‎ علم كا گلستان🌿

بسم الله الرحمن الرحيم لا حول ولا قوة إلا بالله اللہ سبحانہ و تعالی سے محبت کا دعویٰ زبان سے کرنا آسان ہے، مگر اس کا ثبوت زندگی میں دینا پڑتا ہے ﴿ قُلْ إِن كُنتُمْ تُحِبُّونَ اللَّهَ فَاتَّبِعُونِي يُحْبِبْكُمُ اللَّهُ وَيَغْفِرْ لَكُمْ ذُنُوبَكُمْ ۗ وَاللَّهُ غَفُورٌ رَّحِيمٌ ﴾ "آپ (نبی ﷺ) کہہ دیجیے: اگر تم واقعی اللہ سے محبت کرتے ہو تو میری پیروی کرو، اللہ تم سے محبت کرے گا اور تمہارے گناہ بخش دے گا، اور اللہ بہت بخشنے والا، نہایت رحم کرنے والا ہے" (آل عمران: 3۱) عموماً لوگ بہت آسانی سے کہتے ہیں کہ وہ ”اللہ سے محبت کرتے ہیں“ اور یہ الفاظ دل میں بڑے سچے محسوس ہوتے ہیں لیکن یہ آیت ہمیں یہ نہیں سکھاتی کہ ہم نے محبت کا دعویٰ کیا یا نہیں، بلکہ یہ بتاتی ہے کہ اس دعوے کے بعد ہماری زندگی ہمارے عمل سے، اس کی گواہی دیتی ہے؟ اگر ہماری اللہ سبحانہ و تعالی سے محبت سچی ہے، تو رسول اللہ ﷺ کی پیروی کرنے سے ہی یہ دعویٰ مکمل ہوگا صرف ان کاموں میں نہیں جو آسان ہوں یا جن کی ہمیں پہلے سے عادت ہو، بلکہ ان مواقع پر بھی جب سنت پر عمل کرنے کے لیے اپنی عادت، اپنے ماحول یا اپنی پسند کو چھوڑنا پڑے۔ یہی وہ مقام ہے جہاں اللہ سبحانہ و تعالی سے محبت کی حقیقت سامنے آتی ہے یہ امتحان رمضان میں جذباتی کیفیت محسوس کرنے یا کعبہ کے سامنے کھڑے ہونے میں نہیں ہوتا، بلکہ روزمرہ زندگی کے اُن خاموش لمحات میں ہوتا ہے، جب رسول اللہ ﷺ کی پیروی کے لیے اپنے نفس کی خواہش کے خلاف قدم اٹھانا پڑتا ہے اکثر لوگ اس آیت کے پہلے حصے پر ہی رک جاتے ہیں۔ "اگر تم اللہ سے محبت کرتے ہو تو میری پیروی کرو۔“ وہ اسے صرف ایک حکم سمجھتے ہیں۔ لیکن آیت کا دوسرا حصہ دل کو جھنجھوڑ دینے والا ہے۔ "اللہ تم سے محبت کرے گا“ یہ نہیں فرمایا کہ اللہ تمہیں صرف قبول کرے گا، یا صرف معاف کر دے گا، بلکہ فرمایا: "اللہ تم سے محبت کرے گا۔" آسمانوں اور زمین کا خالق، پوری کائنات کا ربّ، اس بندے سے محبت کرے گا جو کمزور ہے، بار بار غلطی کرتا ہے، گناہوں سے شرمندہ ہوتا ہے، لیکن اخلاص اور صدق کے ساتھ رسول اللہ ﷺ کی پیروی کرتا ہے۔ یہ ایسی نعمت ہے جس کا مقابلہ نہ دنیا کی دولت کر سکتی ہے، نہ عزت و منصب، اور نہ لوگوں کی تعریف بندے کی اللہ سبحانہ و تعالی سے محبت تو ایک چھوٹے اور کمزور بندے کی اپنے عظیم ربّ سے محبت ہے لیکن اللہ سبحانہ و تعالی کی اپنے بندے سے محبت وہ نعمت ہے جو انسان کی پوری زندگی بدل دیتی ہے یہی محبت بندے کے لیے زمین میں قبولیت پیدا کرتی ہے، اُس کے لیے ایسے دروازے کھولتی ہے جو کوئی اور نہیں کھول سکتا، اور اُس کی زندگی کو ایسی حفاظت اور رحمت میں لے لیتی ہے جو کوئی انسانی تعلق نہیں دے سکتا پھر اللہ سبحانہ و تعالیٰ جانتا ہے کہ اس راستے پر چلنے والا بندہ کبھی نہ کبھی لغزش کا شکار ہوگا۔ اسی لیے آیت کے آخر میں اُس نے اپنے دو مبارک ناموں کا ذکر کیا ہے : الغفور، الرحیم۔ وہ جو بار بار معاف کرنے والا ہے، اور وہ جو اپنے بندے پر اس کی کمزوری کے باوجود رحم فرماتا ہے رسول اللہ ﷺ کی پیروی کا راستہ ہم سے بے عیب ہونے کا مطالبہ نہیں کرتا۔وہ ہم سے صرف یہ چاہتا ہے کہ ہماری سمت درست رہے یعنی کہ ہمارا دل سنت کی طرف بڑھتا رہے، اطاعت کی طرف چلتا رہے، اور اس ہستی کے نقشِ قدم پر چلنے کی کوشش کرتا رہے جسے اللہ سبحانہ و تعالی نے پوری انسانیت کے لیے نمونہ بنایا ہے، چاہے ہمارے قدم آہستہ ہوں، چاہے ہماری کمزوریاں ابھی باقی ہوں، اور چاہے نفس بار بار ہمیں دوسری طرف کھینچتا رہے۔ اللہ سبحانہ و تعالیٰ ہماری اپنی محبت کو اتنا سچا بنا دے کہ وہ رسول اللہ ﷺ کی پیروی میں نظر آئے، اور ہمیں اپنی اس محبت سے نواز دے جو کبھی ختم نہیں ہوتی۔ آمین۔