افق گریلا

👇 پەژاک: هەڕەشە بۆ سەر شەنگال، هەڕەشەیە بۆ سەر باشووری کوردستان و ناسنامەی کورد ◀️ ئەنجوومەنی پارتی ژیانی ئازادی کوردستان (پەژاک) بەبۆنەی ١٢هەمین ساڵیادی فەرمانی شەنگالەوە ڕاگەیاندراوێکی نووسراوی بڵاوکردەوە، ڕاگەیاندراوەکە بەم شێوەیەیە:⬇️

" ۳ـی ئاب، ساڵیادی جینۆسایدی شەنگالە کە ساڵی ٢٠١٤ ئەنجامدرا. ئەنجومەنی پارتەکەمان "پەژاک" بە باوەڕ بە ڕەوایی دۆزی ئازادیی گەلەکەمان لە شەنگال، لە دوازدەیەمین ساڵیادی هێرشی گرووپی چەتەکانی داعش بۆ سەر شەنگال، ئەو تاوانە دڕندانەیە بە توندی شەرمەزار دەکات. گەلی کوردی ئێزدی هێمای ناسنامەی مێژوویی و نموونەی بەرخۆدانی هەزاران ساڵەی ئێمەن و جینۆسایدی ئەوان، جینۆسایدێکە کە هەوڵ درا بەسەر هەموو گەلی کورددا بسەپێنرێت. لە ڕۆژی ڕەشی ٣ـی ئابی ٢٠١٤دا، هێزەکانی داعش هێرشیان کردە سەر ناوچەی شەنگال، هەزاران کوردی ئێزدیی بێپاراستنیان کۆمەڵکوژ کرد، ژنان و کچانیان ڕفاند و کران بە کۆیلە و دەیان هەزار کەسیان ناچار کرد هەڵبێن بۆ چیاکان. ئەم هێرشە، کە کۆمەڵگەی ئێزدی بە حەفتا و سێیەمین "فەرمان"ـی مێژوویی خۆی دەزانێت، جینۆسایدێکی ئاشکرا بوو دژی گەلی کوردی ئێزدی. زۆر هێز و لە سەروویانەوە دەوڵەتی تورک، پشتیوانیان لە گرووپی چەتەکانی داعش کرد و هەندێک هێزیش لە باشووری کوردستان ئێزدییەکانیان بە جێ هێشت و بوونە هۆی ڕەخساندنی ئەم کۆمەڵکوژییە. هەرچەندە لە کاتی هێرشەکەدا دەوڵەت و هێزە جیهانییەکان بێدەنگییان هەڵبژارد، بەڵام لە دوای هەستانەوەی دۆستانی کورد لە گۆڕەپانی نێونەتەوەیی، لە لایەن دەزگا نێونەتەوەییەکانەوە وەکو جینۆساید، تاوان دژی مرۆڤایەتی و تاوانی جەنگ ناسێنرا. هێرشی داعش بە ئامانجی سڕینەوەی جەستەیی تەواوی ئێزدییەکانی خاوەن ناسنامەی کوردی بوو و تورکیا بە جێکردنەوەی ئەندامە سەرەکییەکانی داعش لە خاکی وڵاتی خۆیدا، ئەوانی بۆ ئەنجامدانی ئەم جینۆسایدانە ئامادە کردبوو. مێژوو بێگومان سەبارەت بەم تاوانانە دادوەری دەکات و بێدەنگی دشکێنێت. وەک هەڵوێستێکی مرۆڤایەتی دەبێت کە داعش وەک ڕێکخراوێکی تیرۆریستی و توندڕەو کە دەستی داوەتە یەکێک لە ڕەشترین پەڕەکانی مێژووی هاوچەرخ، شەرمەزار بکرێت. کردەوەی ئەم گرووپە چەتەیە بۆ کوشتن، بەکۆیلەکردن، وێرانکاریی فەرهەنگی و هەوڵدان بۆ لەناوبردنی کۆمەڵگەیەکی ئایینی و نەتەوەکەی بە شێوەیەکی هاوکات، تاوانێکی ئاشکرایە لە مێژووی مرۆڤایەتیدا. دەبێت بۆ تۆمارکردن لە مێژوودا بیر بهێنرێتەوە کە ئەگەرچی هێرشەکانی داعش لە لایەن هێزەکانی تێکۆشەری گەریلا و تێکۆشەرانی ئێزدییەوە بە خێرایی تێک شکێنران، بەڵام لە ساڵانی پاش ئەوەدا، دەستپێکی شەپۆلە بەرفراوانەکانی هێرشی ئاسمانی و ڕاستەوخۆی تورکیا بۆ سەر شەنگال بە گڵۆپی سەوزی هێزە جیهانییەکان ئەنجام درا. دەوڵەتی عێراقیش کە شەنگال بەشێکە لێی، هێشتا خاوەنی زیهنیەتێک نییە کە ئامادەبێت بۆ قبووڵکردنی سیستەمێک کە ڕێگر بێت لە دووبارەبوونەوەی کۆمەڵکوژییەکان. کوشتنی شۆڕشگێران، پارێزەرانی گەل و خەڵکی بێپاراستن لە دوای ئەم هێرشانەوە، هێشتاش وەکو پرۆژەیەکی سەربازی لە پشتی پەردەوە لە سەر مێزی دەوڵەتە نەیارەکانی گەلی کورد ئامادەیە. هەر بۆیە هێشتاش مەترسیی کۆمەڵکوژیی تری دژی کورد بەتایبەت ئێزدییەکان بوونی هەیە و پێویستە گەلەکەمان بە هۆشیاری و ئاگاییەوە لە بەرامبەر ئەم مەترسییانە ئامادە بێت. هەر ئەم پرۆژە جینۆسایدکارانەی دوژمنانی کورد نەک تەنها ئازارەکانی خەڵکی ئێزدیی توندتر کردووە، بەڵکو ڕێگریی لە گەڕانەوەی ئارام و ئاوەدانکردنەوەی بەردەوامی شەنگال کردووە. سەبارەت بە دەوڵەتی عێراق و دەوڵەتانی وەکو تورکیا و ئێران، دەبێت بگوترێت کە لە کاتی جەنگی جیهانیی سێیەمدا کە لە ناوچەکەدا بەڕێوە دەچێت و نووکی ڕمەکەی بەرەو ئێرانە، هەر چەشنە دەستپێشخەرییەکی شەڕانگێزیی تری دژی کورد بە مانای ڕەخساندنی زەمینە بۆ بەردەوامبوونی شەپۆلەکانی تری جینۆسایدە. بە سەرنجدان لەم دۆخە نالەبارەی ناوچەکە، شەنگال بە کۆڵنەدانەوە وەستاوە و تێکۆشەرە بوێرەکانی دەتوانن دیسانەوە مێژوو دروست بنووسنەوە.

 🖤@gerila2014 💬@zana_shorsh