شكة دبوس - pinprick

وردني سؤالٌ غريبٌ من سيدة لا تشعر بالمتعة أو الإثارة في لحظتها ولكن هذه المتعة مؤجلة لما بعد انتهاء الموقف -سواء في العلاقة الجنسية مع زوجها أو المواقف العاطفية كالقُبلة، وعبارات الرومانسية، أو حتى في تجاربها اليومية التي تحبها كالمطر والطعام اللذيذ- فهي تُظهر استجابتها العاطفية والجسدية لاحقًا عند تذكّر الحدث، وتتساءل إن كان لهذا تفسير نفسيٌ أو عصبي، وتطلب حلًّا. ده نمط عصبي اسمه Delayed emotional processing في ناس بتعيش مشاعرها بعد الحدث أكتر من وقت الحدث نفسه. العقل البشري عجيب التكوين بيشتغل بطريقتين، عقل اللحظة، وده بيهتم بالانتباه والبقاء والمراقبة، وعقل التذكر والتخيل ده بقى بيعيد الحدث للاستمتاع بكافة تفاصيله اللي الأولاني اتشتت فيها، بيعمل كده علشان يبني معنى للموقف وذاكرة باقية، كإنه بيمنح الدماغ جرعة إضافية من التوقع وإعادة تفعيل دوائر المكافأ. حاجة كده كإن القُبلة اللي الزوج قبَّلها مجرد بذرة ستُسقى لاحقًا لتنمو ويشتد عودها، وبالمناسبة في عدد لا بأس به من النساء الإثارة عندهم بتكون ذهنية مش حسيَّة، وده ليه سبب منطقي بالمناسبة إن الإثارة عند النساء تبدأ من الدماغ ثم تنتقل للجسد، عكسنا احنا الدنيا عندنا في البطيخ😀 الجسم شغال والدماغ شغال والشغلانة واخده هوا والله. وده اللي خلا مقولة العم جون جراي خالدة "يعطي الرجل الحبَّ ليكسب الجنس، وتعطي المرأة الجنس لتكسب الحبَّ" فـ الست هنا هتديك الجنس كوسيلة للحصول على ذِكرى رؤية الحب في عينيك لها. عند حالة أختنا الكريمة عقلها بيكون غارق في المراقبة الذاتية ومصاب بفرط تسجيل وتحليل اللحظة، وده بيعمل نوع من أنواع الـ Mild Dissociation اللي هو انفصال خفيف عن الواقع "طالما لا يصاحبه فقدان ذاكرة أو إحساس دائم بالانفصال"، كإن العقل بياخد الداتا وبيعمل مسح علشان يسجلها بشكل كافٍ للاستمتاع اللاحق، الاستمتاع المتأني وغير الملزم بتبادل المسؤولية تجاه الطرف التاني أو حتى تجاه الموقف نفسه، العقل واخد قرار مُسبق: سنستمتع لاحقًا بهذه اللحظة ونضخمها لنعيش كافة التفاصيل بروية. طبعا لو ده حال بتقدر تسيطري عليها وتعرفي تفصليها ولا يصيبك بالفراغ العاطفي، أو يُفقدك المتعة الكاملة، أو أحيانا بتحسي إنك خارج جسمك وبتتفرجي عليكي من فوق😀 فكده شكرًا تاخدي بعضك وعلى الطبيب النفسي وفورًا، وأستحضر هنا مقولة دكتورنا العظيم الرخاوي: مفيش مشكلة لو كلمت الدولاب، انت كده طبيعي وسليم، لكن أول ما يرد عليك تجيلي.😀 طبعا في تمارين تقدري تعمليها علشان تزودي استمتاعك الآني باللحظات والأحداث، زي إنك تسألي نفسك "أنا شايفة إيه؟ حاسة إيه، سامعة إيه" ده بيرجعك لـ الـ Mindfulness grounding اللحظة الحالية، ويساعد في ده تمارين النفس الطويل، مع توقيف مراقبة حالك، يعني خدي قرار إنك مش هتراقبي وتسجلي اللحظة كفيلم يمكن مشاهدته بالحركة البطيئة بعدين.. وطبعا قللي الاعتماد على المراجعة الذهنية كوسيلة وحيدة للمتعة، وزودي جرعة الحضور اللحظي لحد ما توقفي المشاهدة اللاحقة بالتدريج " وده علشان منقعش بس في سلوك قهري" والتدريج ده هيخلي العقل يجوع مشاعريا وهرمونيا ويعرف إنه إذا حُرِم من الواقع سيُحرم أيضا من لذة مراجعته.. العقل أذكى مما تتخيلي، واللاواعي يمكنه أن يدرِّب نفسه على ما يبقيه مستمتعا. وكتبه أسيم