44th Ranger Regiment

"DEFTECH Azerbaijan" "DT-001" PUA platforması üçün yeni mühərrik sınağını uğurla başa çatdırıb. Azərbaycanın müdafiə sənayesi şirkəti DEFTECH uzunmüddətli kəşfiyyat və zərbə missiyaları üçün nəzərdə tutulmuş "DT-001" PUA platformasında yeni güc qurğusunun (powerplant) sınağını uğurla həyata keçirib. Yenilənmiş 360 sm³ həcmli daxili yanma mühərriki və starter-generator sistemi uçuş müddətinin artırılması, əməliyyat radiusunun genişləndirilməsi və faydalı yükdaşıma qabiliyyətinin yüksəldilməsi məqsədi daşıyır. Bu sınaq "DT-001" platformasının inkişafında mühüm mərhələ olmaqla, sistemin uzunmüddətli əməliyyatlar zamanı döyüş imkanlarını daha da artırır.

Tandem qanadlı silahlı PUA olan "DT-001" missiya konfiqurasiyasından asılı olaraq 75–120 kq maksimum qalxma kütləsinə malikdir. Platformanın qanad açıqlığı 3,5 metr, uzunluğu isə 4 metrdir. PUA 3 000–5 000 metr hündürlükdə 120–130 km/saat sürətlə 5–10 saat havada qala bilir. "DT-001" geniş spektrli faydalı yüklərin inteqrasiyasını dəstəkləyir. Bunlara elektro-optik və termal kameralar (EO/IR), multispektral kameralar, hava əsaslı "LiDAR" sistemi, lazer məsafəölçəni və hədəf işarələyicisi ilə təchiz olunmuş soyudulmuş "FLIR" sistemi, "SIGINT/ELINT" elektron kəşfiyyat modulları, radioelektron mübarizə (jamming) podları və rabitə retranslyasiya modulları daxildir. Platforma rabitə və idarəetmə baxımından da müasir imkanlara malikdir. "DT-001" 10 Mbit/s ötürmə sürətinə qədər peyk rabitəsini (SATCOM), tezlik atlamalı şifrələnmiş "UHF" məlumat ötürülməsini, lokal "Mesh" şəbəkəsinə inteqrasiyanı, "GNSS" siqnallarının olmadığı şəraitdə fəaliyyət imkanını və yüksək "anti-jamming" qorunmasını təmin edir. Silahlanma baxımından "DT-001" gövdəaltı iki asqıda 2 ədəd "F1500" tipli kamikadze sursatı daşıya bilir. 40 km mənzilə malik olan "F1500" yer hədəflərinə, hava hədəflərinə və radiolokasiya vasitələrinə (anti-radiation) qarşı istifadə oluna bilir. Yeni mühərrik sınağının uğurla başa çatdırılması göstərir ki, "DT-001" platformasının uçuş müddətini, əməliyyat çevikliyini və döyüş imkanlarını artırmaq istiqamətində inkişaf işlərini davam etdirir. Bu yeniləmə platformanın kəşfiyyat, müşahidə, radioelektron mübarizə və yüksək dəqiqlikli zərbə missiyalarında daha effektiv istifadə edilməsinə imkan verəcək.

Hörmətlə:🌐@GSSR44