Kyaw Gyi

တပ်မတော်ပညာရေးကျောင်းများ ပညာရည်မြှင့်တင်ရေး အလုပ်ရုံဆွေးနွေးပွဲကျင်းပ နေပြည်တော်၊ စက်တင်ဘာ ၅ ကာကွယ်ရေးဦးစီးချုပ်ရုံး(ကြည်း)၊ ပြည်သူ့ဆက်ဆံရေးနှင့် စိတ်ဓာတ်စစ်ဆင်ရေးညွှန်ကြားရေးမှူးရုံး ကွပ်ကဲမှုအောက်ရှိ ပညာရေးကျောင်းများ၏ ပညာရည်မြှင့်တင်ရေး အလုပ်ရုံဆွေးနွေးပွဲကို ယနေ့နံနက်ပိုင်းတွင် ဇေယျာသီရိမြို့နယ်ရှိ အမှတ်(၁)အခြေခံပညာအထက်တန်းကျောင်း(နေပြည်တော်)၌ ကျင်းပသည်။ အခမ်းအနားသို့ ပြည်သူ့ဆက်ဆံရေးနှင့် စိတ်ဓာတ်စစ်ဆင်ရေးညွှန်ကြားရေးမှူးရုံး ညွှန်ကြားရေးမှူး ဗိုလ်ချုပ်ရဲရင့်အောင်နှင့် တာဝန်ရှိသူများ၊ ပညာရေးဝန်ကြီးဌာနမှ တာဝန်ရှိသူများ၊ တပ်မတော်ပညာရေးကျောင်းများမှ ကျောင်းအုပ်ကြီးများ၊ အခြေခံပညာကျောင်းများမှ အုပ်ချုပ်မှုတာဝန်ခံအရာရှိများ၊ ဆရာ၊ ဆရာမများနှင့် ဖိတ်ကြားထားသူများ တက်ရောက်ကြသည်။ ဦးစွာ ဗိုလ်ချုပ်ရဲရင့်အောင်က တပ်မတော်ပညာရေးကျောင်းများ ပညာရည်တိုးတက်မြင့်မားရေးနှင့် သက်ဆိုင်သည့် အချက်အလက်များကို အမှာစကားပြောကြားပြီး မြန်မာနိုင်ငံစာစစ်ဦးစီးဌာန ဒုတိယညွှန်ကြားရေးမှူးချုပ် ဦးအောင်ထိုက်က နှုတ်ခွန်းဆက်အမှာစကား ပြောကြားသည်။ ဆွေးနွေးပွဲတွင် ကျောင်းသား၊ ကျောင်းသူများ ပညာသင်ယူခွင့် မဆုံးရှုံးစေရေးအတွက် ကျောင်းပြောင်းလက်မှတ်(TC)နှင့် ထောက်ခံစာဆိုင်ရာ အခက်အခဲများ ဖြေရှင်းပေးရေး၊ သဘာဝဘေးအန္တရာယ်ကြောင့် ပျက်စီးခဲ့သည့် ကျောင်းအဆောက်အဦများ၊ ရေ၊ မီး၊ မိလ္လာနှင့် သင်ထောက်ကူပစ္စည်းများ ပြန်လည်ဖြည့်ဆည်းရေး၊ ကျောင်းဝန်ထမ်းများ စည်းကမ်းလိုက်နာရေးတို့ကို ဆွေးနွေးခဲ့ကြသည်။ ထို့အပြင် Grade-3 မှ Grade-12 အထိ သင်ခန်းစာများကို အချိန်နှင့်တစ်ပြေးညီ ပြင်ဆင်ဖြန့်ဝေနိုင်ရေး၊ တက္ကသိုလ်ဝင်စာမေးပွဲ ဖြေဆိုမည့် ကျောင်းသား၊ ကျောင်းသူများအတွက် ဖြေဆိုနည်းနှင့် အမှတ်ပေးစည်းမျဉ်းများကို ပိုမိုနားလည်နိုင်စေရေး ဆရာ၊ ဆရာမများအား သင်တန်းများ ဖွင့်လှစ်ပို့ချရေးတို့ကို သက်ဆိုင်ရာကဏ္ဍအလိုက် ဆွေးနွေးခဲ့ကြသည်။ အခမ်းအနားတွင် ဗိုလ်ချုပ်ရဲရင့်အောင်က နိဂုံးချုပ်အမှာစကား ပြောကြားပြီး ပညာရေးဝန်ကြီးဌာနမှ ဆရာ၊ ဆရာမကြီးများအား အမှတ်တရလက်ဆောင်ပစ္စည်းများ ပေးအပ်ကာ တက်ရောက်လာသူများနှင့် စုပေါင်းမှတ်တမ်းတင်ဓာတ်ပုံ ရိုက်ကူးခဲ့ကြကြောင်း သိရသည်။ #SN