الأستاذ لعجال شاهر - علوم فيزيائية

#رسائلكم ✉️ السلام عليكم تلاميذ اولى و ثانية ثانوي معاكم تلميذة باك 2027 شعبة رياضيات جيت نعطيكم زبذة كيفاه قدرت نحافظ على مستواي في الثانوية و لله الحمد اولا شفت نصائح جماعة بروميار بلي قراية ليسي مش كيما السيام و انو التعب لي تعبتيه في بيام لازم تزيد عليه و حطيتها في راسي كيما نهار طلعنا من ابتدائي لسيام مرحلة انتقالية و عادي تهبطو فصل اول ملغري انا مهبطتش في فصل لول بالعكس تاني و ثالث لي هبطت تهاونت شوي في مادة التكنولوجيا مثلا المهم و المفيد كيفاه نقراو كل مادة تفصيليا رياضيات مادتي المفضلة و خصوصا كي قراتني استاذة ماشاء الله تبارك الرحمان يعني زدت حبيت المادة اكثر و خاصة اني قريتها بانتظام و مدرتش خطا التلاميذ لي هو مراكمة الدروس كل درس كنت نحاول نطبق من كتاب نوردين رائع و تان كتاب المدرسي احيانا و اكيد مع اساتذة القسم حفظها الله و كانت نتائجي مليحة و لله الحمد فيزياء ممكن كانت عقبة شوي لانني محليتش تمارين بشكل الكافي اولا و ثانيا ملقيتش مصدر جيد لفهم الدروس لانو مكنتش نفهم في القسم نوجه تحية لاستاذة القسم لي كانت تبذل كل لعندها لكنني بصراحة لم اكن افهم عليها بالشكل المطلوب المهم و هكاك و مجترش ليكور و قريت من يوتيوب من عند الاستاذ عبد اللطيف و الاستاذ سيف الله و اكيد نحل من قناة الاستاذ لعجال و سني و سعيدي و كنت نستفيد كثيرا و بالسبة للعلوم كنت دايرة زوم مع الاستاذ الفايدي ربي يحفظو و تعلمت المنهجية من اول ننصحكم بتعلم المنهجية اولا ثم فهم الدروس و حفظ المهم لانو تحتاجو في النص العلمي و ايضا حل تمارين كتابيا هكا تتعلم لانو قراءة تمارين شفويا متفيدش المهم و جبت حتى 20 في العلوم و لله الحمد بصراحة صح صادفت الموضوع مي محليتوش قريتو برك و مع ذلك قدرت نجاوب و لله الحمد لانني والفت باقي المواد ننصحكم بالحفظ اجتماعيات و الفهم و الله انا فصل لول حفظت و ممبعد تراجعت شوي كيما قتلكم لكن كنت ندي نقاط من الفهم و مع ذلك منعنديش اساس في الاجتماعيات درك راني باك نحس روحي ضايعة جامي شفت واحد نصح نصيحة هذي مي و الله اقراوها سيريو مشي المكتسبات في المواد الاساسية فقط صح في المواد الاساسية مهم جدا لانو عدم التمكن من وحدات اولى ثانوي يساوي معاناة في ثانية و في الباك بصح مام كي تكون فاهم منهجية الاجابة في اجتماعيات و كلش تعاونك لا يكون هدفكم النقاط و معدلات فقط لانو الصح في لباك و مشي نقصد صح في الباك العبارة السوقية نتاع متقراش حتى يوصل لباك لااا من كلامي تفهمو لعكس لازم تعطي كلش حقو و لكن اقصد مثلا نتا جبت17 و حاب 19 تروح تقمع الاستاذ يزيدك وووو معندهاش فايدة طلع مستواك وحدك الامر مختلف عن متوسطة هنا و اذا طاح فيك استاذ عيان حط هدفك واحد نتعلم بشكل صحيح و نعرف مهنجية الاجابة بغض النظر عن النقطة نروحو للغات ننصحكم طلعو مستواكم عموما لانو اصلا في ليسي برنامج اللغات مش مضغوط كيما السيام بسيط نوعا ما يعني تقدر تدي عادي مي طلع مستواك تعلم اللغات خاصة انجليزية بطلاقة احسن تفيدك بالنسبة للاسلامية لازم تحفظ و تفهم و تحل مواضيع لانها ترجع فهامة مش حفاظة كيما السيام و اعلام الي و تكنو شوفو بصراحة اذا محابيش تطلعو تقني مكالاه ضيعو وقتكم معاهم الا اذا حابين 20 باش تدو معدلات كبيرة و الا اذا تقنعو ب 15 و 16 اعتمدو الفهم جيدا و حفظ القليل فقط -نصيحة مش لازم تاحذ بيها ترجع ليك لانو انا كي نصحتكم باش تدو اساس و النقاط تجي معاها فهمتوني يعني 15 في تكنو في بروميار اعتقد مراحش تفسد عليك والو في ثانية و ثالثة - المفيد مواد هاذو حفظ +فهم اذا حفظت بلا فهم و لا فهمت بلا حفظ مشكيتش تقدر تجيب 20 هذي هي و ننصحكم نصيحة بعيذا عن الدراسة التزموا بذينكم و احفظو القران كاين للبنات قروبات في ثلغرام روعة و الله هذا واش تلقاو في الاخرة و اخطيكم من الصحبة و التتباع بلا فهامة و مواقع التواصل و الله اخطيكم من قروبات الاقسام غير لجياحة و تجاوز الخطوط بين الجنسين و اهتموا بوالديكم و فرحوهم و ربي يوفقكم كاامل المرة الجاية نمدلكم نصائح لجماعة الدوزيام شعبة رياضيات ان شاء الله استاذ كتبت بزاف مي من القلب و الله دعواتكم لزميلتكم ولكل من يسعى لتقديم النصيحة و العون لكم إن شاء الله في ميزان حسناتها وفقنا الله وإياكم إلى كل ما يحب و يرضى