الثورة في الفيزياء مع الأستاذ بن جدو عبد الرزاق هيثم

كرهت حياتي كاين واحد النوع من الفراغ ما تقدرش تعالجو لا خرجة، لا صحاب، لا دراهم ، و لا حتى تحقيق أهداف جديدة و أحلام كبيرة تلقى روحك تقرا، تخدم، تخرج، تضحك، تدير مشاريع، تخطط للمستقبل… بصح من الداخل كاين سؤال ساكت يضرب فيك: ومن بعد؟ ومن الناحية النفسية، الإنسان ما يكفيهش يكون عندو حاجات يديرها؛ يحتاج يحس بلي حياتو عندها معنى وغاية ما يسمى بـ ( الغاية الوجودية ) لأنك تقدر تكون مشغول طول النهار… وداخلَك فارغ. وتقدر تحقق حاجة كنت تتمناها بزاف، تفرح بيها أيام، ومن بعد ترجع لنفس الحفرة: "صح… وممبعد ؟" علاش؟ لأنك بنيت حياتك على الأهداف، بصح ما بنيتهاش على غاية. تقرا باش تنجح، تنجح باش تخدم، تخدم باش تربح، تربح باش تعيش مليح… وممبعد؟ إذا ما كانش عندك جواب على السؤال هذا، راح تبقى طول عمرك تجري من حاجة لحاجة، وكل مرة تقول: كي نوصل لهذي نرتاح. توصل… وما ترتاحش. لأن النفس ما تحتاجش غير وش تدير، تحتاج تعرف علاش تدير. وهنا يجي الإسلام ويجاوبك على السؤال اللي تقدر تقضي سنين وأنت تهرب منو: أنت ما خلقتش عبث. ربي سبحانه قال: ﴿أَفَحَسِبْتُمْ أَنَّمَا خَلَقْنَاكُمْ عَبَثًا وَأَنَّكُمْ إِلَيْنَا لَا تُرْجَعُونَ﴾ ماشي جيت للدنيا بالصدفة، وكبرت، ومن بعد تخدم وتجمع وتستهلك وتموت وخلاص. ربي قال: ﴿وَمَا خَلَقْتُ الْجِنَّ وَالْإِنسَ إِلَّا لِيَعْبُدُونِ﴾ وهذي وحدها تقدر تبدل نظرتك للحياة كاملة. لأنك كي تعرف لمن راك عايش، تبدا تفهم علاش راك تدير كل شيء آخر. القراية ما تبقاش مجرد شهادة. الخدمة ما تبقاش مجرد دراهم. الزواج ما يبقاش مجرد هروب من الوحدة. المال ما يبقاش هو الغاية. حتى التعب والابتلاء ما يبقاوش مجرد أشياء صراتلك وخلاص. كل حاجة تولي عندها مكان داخل حياة عندها وجهة. ولهذا ربي ما خلاكش وحدك تخمّم: كيفاش نعيش؟ وشنو الصح؟ وشنو الغلط؟ بعث الرسل، وأنزل الكتب، وبيّن الطريق. يعني ماشي غير خلقك… بل عرّفك علاش خلقك، وشنو يحب منك، او وين راك رايح. فإذا راك حاس هاذ الأيام بفراغ، وتشتت، وما بقيتش عارف واش حاب من حياتك… ما تستعجلش تعمّر الفراغ بأي حاجة. يمكن ما تحتاجش حياة جديدة. يمكن تحتاج تفهم، لأول مرة بصدق: علاش ربي عطاك هاذ الحياة أصلًا. كي تتبدل نيتك من انو دير بش تعيش مليح لانو دير هكا بش ترضي ربي تتبدل عليك الدنيا كاملة كي تولي تقرا تنفع كي تولي تخدم بش تمارس القوامة لي امرت بيها كي تولي تتزوج بش تعف نفسك من الحرام و ترضي الله تضاعف متعتك بالنعم لي عندك لما تعيشها و تأجر عليها لأنو حاولت ترضي بيها ربي و راح يتعمر الفراغ لي فيك لما تولي تعرف هدفك من الوجود اخي اختي الله هو الغاية و كل ما دونه أسباب ... #تعلم_دينك_ما_تورثوش