VOL 2.0

🇺🇦 უკრაინის თავდაცვის სამინისტროს მთავარი სადაზვერვო სამმართველოს (ГУР) უფროსის მოადგილე, გენერალ-მაიორი ვადიმ სკიბიცკი „РБК-Украина“-სთან ინტერვიუში რუსული დარტყმების მოტივებსა და მიზნებზე, მოსკოვის ფსონზე ახალ „შაჰედებზე“ და Starlink-ის რუსული ანალოგის შექმნაზე. ძირითადი დებულებები: • ძირითადი ტიპის რაკეტების მიხედვით რუსეთის ფედერაცია ამჟამად წარმოების გეგმას აჭარბებს თვეში 110–120%-ის დონეზე. „ცირკონებსა“ და მოდერნიზებულ „ონიქსებზე“ წლიური გეგმა შვიდ თვეში შესრულდა. წარმოების ზრდა მათ შორის იმის ხარჯზე მოხდა, რომ აპრილიდან რუსეთის ფედერაციამ „კინჟალებისა“ და Х-32-ის გამოშვება შეაჩერა. მათთვის განკუთვნილი თანხები და კომპონენტები სხვა ტიპის რაკეტების წარმოებაზე გადანაწილდა. • აგვისტოში მოსკოვი სხვადასხვა ტიპის 11 ათასი დამრტყმელი უპილოტო საფრენი აპარატის დამზადებას გეგმავს. ამჟამად წარმოების გადაწყობა ხდება ტურბორეაქტიულ „გერან-4“-სა და „გერან-5“-ზე აქცენტით. • რუსეთის ფედერაცია დარტყმების კონცენტრირებას ახდენს უკრაინის სამხედრო-სამრეწველო კომპლექსსა და ენერგოობიექტებზე, რომლებზეც ლოგისტიკა და საპორტო ინფრასტრუქტურაა დამოკიდებული. გარდა ამისა, რუსები ცდილობენ დააზიანონ სამოქალაქო ინფრასტრუქტურა, რათა დათესონ პანიკა და მოახდინონ სიტუაციის დესტაბილიზაცია უკრაინაში. • რუსული რაკეტები არაზუსტია. სკიბიცკის თქმით, ეფექტური რაკეტისთვის სამიზნიდან გადახრა არ უნდა აღემატებოდეს 5–7 მეტრს, მაშინ როცა რუსული „კინჟალების“ შემთხვევაში ეს მაჩვენებელი 30 მეტრი და მეტია. • სარაკეტო შეიარაღებისა და უპილოტო საფრენი აპარატების წარმოებისთვის ყველაზე კრიტიკულ ელემენტებს, მაგალითად სანავიგაციო სისტემებს, რუსები ამერიკული კომპანიებისგან, ასევე ჩინეთიდან, იაპონიიდან, ტაივანიდან, სამხრეთ კორეიდან და ევროპიდან იღებენ. ამასთან, ამ კომპონენტებიდან ბევრს ექსკლუზიურად სამოქალაქო დანიშნულება აქვს, რის შემდეგაც მოსკოვი მათ საკუთარი რაკეტებისა და დრონებისთვის ადაპტირებს. • ირანი განაგრძობს რუსეთის დახმარებას ტექნოლოგიებითა და კომპონენტებით, თუმცა უკვე ნაწილობრივ და არა იმ მასშტაბით, როგორც 2022–2023 წლებში, რადგან მოსკოვს ახლა უკვე შეუძლია დამოუკიდებლად აწარმოოს დამრტყმელი უპილოტო აპარატები. • მოსკოვი ქმნის Starlink-ის სისტემის საკუთარ ანალოგ „რასვეტს“ და ის გაცილებით სწრაფად გაუშვა, ვიდრე თავდაპირველი გეგმებით იყო გათვალისწინებული. 2026 წლის მარტში რუსეთმა დედამიწის ირგვლივ ორბიტაზე უკვე გაიყვანა 16 თანამგზავრი. შემდგომში დაგეგმილია ახალი გაშვებები, რათა 2027 წელს შეიქმნას 292 თანამგზავრისგან შემდგარი დაჯგუფება და 2035 წლისთვის მისი რაოდენობა 924 თანამგზავრამდე გაიზარდოს. ჯერჯერობით სისტემას მხოლოდ ფრაგმენტულად შეუძლია მუშაობა იმ მომენტებში, როდესაც თანამგზავრები უკრაინის ტერიტორიის თავზე გადაივლიან. • მოსკოვი ფსონს დებს უკრაინაში მომავალ არჩევნებზე იმ მიზნით, რომ ხელისუფლებაში მოვიდეს ხელმძღვანელობა, რომელიც რუსეთის ფედერაციის მიმართ სულ მცირე ნეიტრალური მაინც იქნება. რუსები უკრაინაში მრავალრიცხოვან საინფორმაციო კამპანიებს ატარებენ და ქვეყნის საინფორმაციო სივრცეში მათთვის სასურველ თემებს ატრიალებენ. • რუსეთი სერიოზულ საფრთხეს ხედავს და ძალიან გულდასმით აწარმოებს დაზვერვას უკრაინის სამხედრო-სამრეწველო კომპლექსის ორი მიმართულებით. პირველი - უკრაინული ბალისტიკა: მოსკოვი ცდილობს არ დაუშვას ამ შეიარაღების სერიულ წარმოებაში ჩაშვება. მეორე - ყველაფერი, რაც დაკავშირებულია უპილოტო საფრენ აპარატებთან და FPV-დრონებთან.