Ethio-Italy Polytechnic College (Dire Dawa)

በአስተዳደሩ የሚገኙ የቴክኒክና ሞያ ስልጠና ኮሌጆች የሰነቁትን ራዕይ እንዲያሳኩ አስፈላጊው ድጋፍ ሊደረግላቸው እንደሚገባ ተገለፀ። ======================== የድሬዳዋ አስተዳደር ምክር ቤት የበጀት፣ ኢኮኖሚ፣ ንግድና ኢንዱስትሪ ጉዳዮች ቋሚ ኮሚቴ እያደረገ ባለው የመስክ ምልከታው በድሬዳዋ አስተዳደር የኢትዮ-ጣልያን ፖሊ ቴክኒክ ኮሌጅን የ2016 በጀት አመት ማጠቃለያ እቅድ አፈፃፀም ለመገምገም ያለመ የመስክ ምልከታ አድረገ። ቋሚ ኮሚቴው በዋናነት የኮሌጁን የበጀት አመቱ እቅድ አፈፃፀም፣ ከዚህ በፊት ቋሚ ኮሚቴው ባደረገው የመስክ ምልከታው ኮሌጁን በተመለከተ ለሰጠው ግብረ_መልስ የተሰጠ ምላሽ እና በምክር ቤት  የውክልና አሰጣጥ መድረኮች ከህዝብ ለተነሱ  ጥያቄዎች ኮሌጁ ምላሽ የሰጠበትን አግባብ እንዲሁም የፕሮጀክት አፈፃፀምና ማህበራዊ ኃላፊነትን በመወጣት ረገድ ያለውን አፈፃፀም የኮሌጁ ማኔጅመንት አባላት በተገኙበት ገምግሟል። የኮሌጁ እቅድ አፈፃፀም ሪፖርት ለቋሚ ኮሚቴ አባላቱ በዝርዝር የቀረበ ሲሆን አፈፃፀሙን በመገምገም በጥንካሬ የሚታዩ እንዲሁም ያሉ ውስንነቶችን በመለየት በቀጣይ የተሻለ አፈፃፀም ለማስመዝገብ በሚቻልበት አግባብ በጋራ ለመስራት የሚረዳ ሰፋ ያለ ውይይትም አድርገዋል። በዚሁ አግባብ በአፈፃፀም ሂደት ኮሌጁ ራዕዩን ለማሳካት እያደረገ  በሚገኘው ጥረት እያጋጠሙ ያሉትን ተግዳሮቶች የኮሌጁ አመራሮች ለቋሚ ኮሚቴው ያብራሩ ሲሆን ችግሮቹን ለመፍታትም ቋሚ ኮሚቴው አስፈላጊውን ድጋፍ እንዲያደርግላቸውም ጠይቀዋል። በውይይቱ ማጠቃለያም ኮሌጁ በበጀት አመቱ ያስመዘገበው ውጤት አበረታች መሆኑን የቋሚ ኮሚቴው አባላት የገለፁ ሲሆን ከዚህም ባለፈ በተለይም በትምህርትና ስልጠና ዘርፍ ችግር ፈቺና ሰፊ የስራ እድል የሚፈጥሩ ስልጠናዎችን እየሰጠ መሆኑን በማበረታታት በቀጣይም ዘርፉ የተሻለ አፈፃፀም እንዲኖረው በአስተዳደሩ ከሚገኙ የሚመለከታቸው ተቋማት እና ባለድርሻ አካላት ጋር ከእቅድ እስከ ተግባር አፈፃፀም ወጥነት ባለው መልኩ ተቀናጅቶ በጋራ መስራት እንደሚገባና ለተግባራዊነቱም ቋሚ ኮሚቴው ተከታታይነት ያለው ድጋፍና ክትትል  የሚያደርግ መሆኑን የቋሚ  ኮሚቴው ሰብሳቢ የተከበሩ ወ/ሮ አይናለም ተዘራ ተናግረዋል።   የተከበሩ ወ/ሮ አይናለም አክለውም በአስተዳደሩ የሚገኙ የቴክኒክና ሞያ ስልጠና ኮሌጆች የሰነቁትን ራዕይ እንዲያሳኩ እና ለአስተዳደሩ ተገቢውን አገልግሎት እንዲሰጡ ሁሉም ባለድርሻ አካላት አስፈላጊውን ድጋፍ ሁሉ ሊያደርጉላቸው እንደሚገባም አቅጣጫ አስቀምጠዋል። በመጨረሻም የቋሚ ኮሚቴው አባላት በኮሌጁ የሚገኙ የስልጠና ዎርክሾፖች እና ፕሮጀክቶችን ተዘዋውረው ተመልክተዋል። ምንጭ - Dire Dawa Adiminstration Council DDCP ሰኔ 6/2016 ዓ.ም

የኢትዮ-ጣሊያን ፖሊቴክኒክ ኮሌጅ አሰልጣኝ መምህራን በተሳተፉበት የተግባራዊ ጥናትና ምርምር እና የቴክኖሎጂ ውድድር አሸናፊ ሆኑ:: የሥራ ክህሎትና ቴክኖሎጂ ልማት ቢሮ የቴክኒክና ሙያ ትምህርትና ስልጠና ኤጀንሲ በ2016 የበጀት ዓመት በኮሌጆች አሰልጣኝ መምህራን ዘርፍ በተደረገው የተግባራዊ ጥናትና ምርምር እና ቴክኖሎጂ ውድድር ኮሌጃችንን ወክለው የተወዳደሩ አሰልጣኝ መምህራን በሁለቱም ዘርፍ ውድድር አንደኛ እና ሁለተኛ ደረጃ በመውጣት የሰርተፍኬት እና የገንዘብ ሽልማት ከስራና ክህሎት ቴክኖሎጂ ልማት ቢሮ ኃላፊ እና ጥሪ ከተደረገላቸው የቢሮ ኃላፊዎች ሽልማታቸውን ተረክበዋል። ሁሌም በሁሉም ዘርፍ ቀዳሚ የሆነው ኮሌጃችንም በውድድሩ ተሳትፈው አሸናፊ ለሆኑት ተቋማችንን ላስጠሩ አሰልጥኝ መምህራኖች እንኳን ደስ ያላቹ እንኳን ደስ አለን ይላል። 🏆🏆🏆 የኢትዮ-ጣሊያን ፖሊ ቴክኒክ ኮሌጅ ኮሚኒኬሽን ግንቦት 29/2016 ዓ.ም

የኢትዮ-ጣሊያን ፖሊ ቴክኒክ ኮሌጅ በሳቢያን ሁለተኛ ደረጃ ት/ቤት ለሚማሩ ተማሪዎች የግንዛቤ ማስጨበጫ መድረክ አካሄደ::  የኢትዮ-ጣሊያን ፖሊቴክኒክ ኮሌጅ ከሁለተኛ ደረጃ ት/ቤቶች ጋር በጋራ የሚሰራውን ስራ አጠናክሮ በመቀጠል ያልፉትን 2ቀናት በሳቢያን ሁለተኛ ደረጃ ት/ቤት በመገኘት ለተማሪዎች ሰፋ ያለ ግንዛቤን የመፍጠር ስራ ሰርቷል:: የግንዛቤ ማስጨበጫው የተሰጠው በት/ቤቱ ለሚገኙ የ10ኛ ክፍል ተማሪዎች ሲሆን መድረኩ በኦሮምኛ ቋንቋ ትምህታቸውን የሚከታተሉትንም ያማከለና በሁለት መድረክ የተሰጠ የግንዛቤ ማስጨበጫ መድረክም ነበር:: የግንዛቤ ማስጨበጫ ስልጠናውን ለተማሪዎቹ የሰጡት የኮሌጃችን ዋና ዲን አቶ ታደለ አሰፋ እንዲሁም የኮሌጁ ምክትል ዲን አቶ ኤሊያስ አህመድ ሲሆኑ በመድረኩ ተማሪዎቹ ስለ ቴክኒክና ሞያ ዘርፍ ያላቸውን የተሳሳተ አመለካከት የሚቀርፍና የቴክኒክና ሞያ ነባራዊ ሁኔታን ቁልጭ አርጎ በሚያሳይ መልኩ በመተንተን ዘርፉ ለተማሪዎቹ የሚያስገኘውን ምቹ አጋጣሚ ሰፋ ባለ ማብራሪያ የሰጧቸው ሲሆን ተማሪዎች የነገ መዳረሻችውን ከዚሁ ትኩረት ሰተው በጥንቃቄ መምረጥ እንደሚገባቸውም ምክር ለግሰዋል:: በተጨማሪም በአዲሱ የትምህርት ፖሊሲ መሰረት እነዚህ ተማርዎች 11 እና 12 ላይ የቴክኒክና ሞያ ትምህትና ስልጠናዎችንም አያይዘው የሚሰለጥኑ በመሆኑ በዘርፉ የሚሰጡትን የስልጠና አይነቶች በግልፅ እንዲረዷቸው በማድረግ ከፍላጎታቸው ጋር የሚጣጣመውን የስልጠና አይነት ለይተው ምርጫቸው እንዲያደርጉ የሚረዳቸውን ግንዛቤ መስጠት ትችሏል:: የኢትዮ-ጣሊያን ፖሊ ቴክኒክ ኮሌጅ ኮሚኒኬሽን ግንቦት 29/2016 ዓ.ም

የኢትዮ-ጣሊያን ፖሊቴክኒክ ኮሌጅ አመራሮችና ሰራተኞች ፅዱ የስራ አካባቢን እንፍጠር በሚል በኮሌጁና አካባቢው ተማሪዎችን ያሳተፈ የፅዳት ዘመቻ በዛሬው እለት አካሂድዋል::

የኢትዮ-ጣሊያን ፖሊ ቴክኒክ ኮሌጅ በቤተል አንደኛና ሁለተኛ ደረጃ ት/ቤት ለተማሪዎች ግንዛቤ ማስጨበጫ መድረክ አካሄደ::  የኢትዮ-ጣሊያን ፖሊቴክኒክ ኮሌጅ ትኩረት አድርጎ እየሰራባቸው ከሚገኙ ዋና ዋና ተግባራት መካከል አንዱ የሁለተኛ ደረጃ ት/ቤት ተማሪዎች ትምህርታቸውን አጠናቀው ወደ ከፍተኛ የትምህርት ተቋማት ከመግባታቸው አስቀድሞ ከት/ቤቶች ጋር በመተባበር ለተማሪዎቹ የግንዛቤ ማስጨበጫ መድረኮችን በማዘጋጀት ስለ ቴክኒክና ሙያ ዘርፍ ተገቢውን ግንዛቤ እንዲያገኙ የማድረግ ስራ ሲሆን በዛሬው እለትም በቤተል አንደኛና ሁለተኛ ደረጃ ት/ቤት በመገኘት ለተማሪዎች ግንዛቤ ማስጨበጫ መድረክ ማካሄድ ተችሏል::  በመድረኩ ተገኝተው የግንዛቤ ማስጭበጫውን ያካሄዱት የኮሌጃችን ዲኖች ሲሆኑ በመድረኩም ለተማሪዎቹ በቴክኒክና ሞያ ዘርፍ ያሉ ምቹ አጋጣሚዎችን በዝርዝር በማስቀመጥ የሁለተኛ ደረጃ ትምህርታቸውን አጠናቀው ሲጨርሱ በዘርፉ ሊያገኙ የሚችሉትን ወርቃማ እድል ከወዲሁ ተረድተውት ትክክለኛውን ውሳኔ እንዲወስኑ የሚረዳቸውን መረጃና ግንዛቤ ለተማሪዎች ማስጨበጥ ተችሏል:: ይህን መሰል መድረኮች ቀጣይነት የሚኖራቸው ሲሆን የሁለተኛ ደረጃ ተማሪዎቹን ግንዛቤ ከማስጨበት ባሻገር ወደ ኮሌጃችን በመጋበዝ የተለያዩ ስልጠናዎችን እንዲሰለጥኑና ለቀጣይ ምዕራፋቸው መሰረት እዲጥሉ የማድረግ ስራ ተጠናክሮ እንደሚቀጥልም የኮሌጁ ዲን አቶ ታደለ አሰፋ ገልፀዋል:: የኢትዮ-ጣሊያን ፖሊ ቴክኒክ ኮሌጅ ኮሚኒኬሽን ግንቦት 19/2016 ዓ.ም

የአስተዳደሩን ፀጋ መሰረት ያደረገ ክህሎት መር ሥራ ዕድል ፈጠራ ላይ ልዩ ትኩረት ተሰጥቶ ሊሰራ ይገባል፥ ወ/ሮ ፈጡም ሙስጠፋ የድሬዳዋ አስተዳደር የሥራ ክህሎትና ቴክኖሎጂ ልማት ቢሮ ም/ኃላፊ እና የቴክኒክና ሙያ ትምህርትና ስልጠና ኤጀንሲ ኃላፊ ግንቦት 6/2016 ዓ/ም የክህሎት መር ስራ ዕድል ፈጠራ ጋር ተያይዞ ገበያ ተኮር አጫጫር ስልጠናዎች አፈጻጸም  ዙሪያ ከባለድርሻ አካላት ጋር የሚመክር መድረክ ተካሄደ። በድሬዳዋ አስተዳደር የሥራ ክህሎትና ቴክኖሎጂ ልማት ቢሮ የቴክኒክና ሙያ ትምህርትና ስልጠና ኤጀንሲ የሰልጣኝ ልማትና ተቋማት አቅም ግንባታ ዳይሬክቶሬት በተዘጋጀው መድረክ ላይ የአስተዳደሩ የከተማ ወረዳዎችና የገጠር ክላስተር አመራሮች፤ የአንድ ማዕከላት አስተባባሪዎችና ባለሙያዎች እንዲሁም የቢሮው አመራሮችና ባለሙያዎች ተገኝተዋል። የሰልጣኝ ልማትና ተቋማት አቅም ግንባታ ዳይሬክቶሬት ዳይሬክተር የሆኑት አቶ ጀማል አደም እንደተናገሩት ከስራ ዕድል ፈጠራ አንፃር በሁሉም ወረዳዎች ፀጋን መሰረት ያደረገና ክህሎት መር በሆነ መንገድ ማህበራትን በማደራጀት በተለይ ኮሌጆች በሚሰጧቸው ስልጠናዎች ተጠቃሚ ለመሆን በቅንጅት ሁሉም አካላት በመናበብ የሚሰሩበት ሁኔታ መፈጠር አለበት ብለዋል። በመጨረሻም ወ/ሮ ፈጡም ሙስጠፋ በአስተዳደሩ እስከ አሁን ስልጠና እየተሰጠ ካለባቸው የተወሰኑ ዘርፎች በተጨማሪ በሌሎች ዘርፎችም የሥራ ዕድል በመፍጠር በየአካባቢው ወደ ስራ ያልገቡ ወጣቶችን በመለየት ወደ ስራ እንዲገቡ በልዩ ትኩረት ሊሰራ እንደሚገባው በመግለጽ ቀጣይ ሥራ አቅጣጫ በማስቀመጥ ማጠቀለያ ሰጥተዋል፡፡ የሥራ ክህሎትና ቴክኖሎጂ ልማት ቢሮ ህዝብ ግንኙነት

ከፌደራል ስራና ክህሎት ሚኒስቴር በመጡ ባለሙያዎች በ E-LMIS ሲስተም አተገባበር ዙሪያ የግንዛቤ ማስጨበጫ ስልጠና ተሰጠ:: በግንዛቤ ማስጨበጫ ስልጠናው ላይ የኮሌጁ የውጤት ተኮር ትምህርትና ስልጠና ዋና ስራ ሂደት ሀላፊና ምክትል ዲን አቶ ኤሊያስ አህመድ እንዲሁም የዲፖርትመንት ተጠሪዎችና በሂደቱ ስር የሚገኙ ባለሙያዎች በተገኙበት ስለ ሲስተሙ አሠራር፣ ፋይዳ እና ዉጤት ከዉጭ ሃገር ሥራ ስምሪትና የውስጥ ሥራ እድሎችን በማመቻቸት ላይ እንዲሁም የተለያዩ  ብልሹ አሠራሮችን ለማስቀረት የስርዓቱ ሚና የጎላ መሆኑንና ለዜጎች በE-LMIS ሲስተም ምን  ጥቅሞች እና እንዴት በቀረበላቸው ሲስተም መጠቀም እንደሚችሉ ጥልቅ የሆነ ግንዛቤ ተሰጥቷል። እንዲሁም የE-LMIS ሲስተም ተጠቃሚ ለመሆን እንዴት በራስ መመዝገብ እንደሚቻል እና በቀረቡት ብዙ አማራጮች ተጠቃሚ መሆን ኢንደሚችሉም በቂ የሆኔ ግንዛቤ ማስጨበጫ ተሰጥቷል። የኢትዮ-ጣሊያን ፖሊቴክኒክ ኮሌጅ ህዝብ ግንኙነት ሚያዝያ 30/2016 ዓ.ም ድሬዳዋ

የኢትዮ-ጣሊያን ፖሊቴክኒክ ኮሌጅ ለመላው የክርስትና እምነት ተከታዮች በሙሉ እንኳን ለእየሱስ ክርስቶስ የትንሳዔ በአል በሰላም አደረሳችሁ በማለት መልካም ምኞቱን ይገልፃል:: #መልካም_የፋሲካ_በዓል

የኢትዮ-ጣሊያን ፖሊቴክኒክ ኮሌጅ በጎ አድራጎት ክበብ መጪው የትንሳዔ በዓልን ምክንያት በማድረግ ለአቅመ ደካሞች ድጋፍ አደረገ:: የበጎ አድራጎት ክበቡ ያዘጋጀውን የአስቤዛ እና የገንዘብ ድጋፍ የኮሌጁ ዲኖች ተገኝተው ለአቅመ ደካሞች ያስረከቡ ሲሆን አያይዘውም ለመጪው የትንሳዔ በዓል መልካም ምኞታቸውን ገልፀዋል:: በዚህ ክበቡ ባደረገው የአስቤዛ እና የገንዘብ ድጋፍ ተጠቃሚ የሆኑት አካላት በኮሌጁ ማህበረሰብ ጥቆማ ድጋፍ ያስፈልጋቸዋል ተብለው ለተለዩ 20 እቅመ ደካሞች የአስቤዛና የገንዘብ ድጋፍ ማድረግ ተችሏል:: የኢትዮ-ጣሊያን ፖሊቴክኒክ ኮሌጅ ህዝብ ግንኙነት ሚያዝያ 22/2016 ዓ.ም ድሬዳዋ