Dr.Suzan El-Shaf3y...د.سوزان الشافعي

★ ماما هتعملك إيه ؟ ★ ----------------- - يبدأ موسم الامتحانات و نبتدي الشَّكوى لماما 😭 - ماما..أنا مش مذاكرة الMath..ماما أنا مش فاهمة حاجة🫣 - ماما :- "طيب يا حبيبي معلش استهدى باللَّه كده و حاول تذاكر ..طيب ناخد درس يساعدك أو..أو🤍" - هى ماما هتعملك إيه ؟ ما تمسك الكتاب و تذاكر 🤨 - أو تيجي قبل الامتحان على طول و تقوليلها: - "ماما ..أنا "الجراحة" دي مش هعدِّي منها أنا باقولك أهو..ربنا يُستر" 😒 - ليه كده 😒 ليه تفضحي نفسك ؟!! و هيَّ ماما هتعملك إيه ؟ - - أصلي باجهِّزها ..بتجهِّزيها لإيه ؟؟ - باجهِّزها علشان لمَّا أسقط 😏 - ليه هو إنتِ فاكرة إن ماما هتقولك:-" معلش طولي بالك و حاولي تذاكري و ربنا يكرم "..و بعدين هتدخل هيَّ تنام ..تفتكري هتعرف تنام 🙃‼️ - دي ربنا يعلم بيها😌 إنتِ مش عارفة إنتِ بتعملي فيها إيه 😔.. #دكتورة_سوزان_علمتني

ملكيش دعوة -------------- *إيه هو فضول الكلام؟ -فضول يعني زيادة (يعني مثلاً بنقول فاضل شوية أكل من امبارح).. ففضول الكلام يعني الكلام الزِّيادة.. *طيب أعرف إزاي فضول الكلام؟ -أي سؤال إجابته "وأنتِ مالك" ما تسألهوش.. مثال: •"مُنى اتخطبت" "ألف مبروك، لمين؟"⬅️ وأنتِ مالك.. •"فلانة اتخطبت لابن خالها" "ما شاء اللَّه، عنده شقة؟"⬅️ وأنتِ مالك. مافيش عندنا حاجة في الدِّين اسمها: من باب العلم بالشّيء ❌❌ •"مش هُدى عملت عملية!!" "عملية إيه؟" ⬅️أنتِ مالك يعني لو طلعت عملية زايدة هتزوريها ولو عملية مرارة مش هتزوريها مثلاً.. •عملتِ التَّحاليل؟ آه. طلعت إيه؟ ⬅️ إنتِ مالك.. واخدين بالكم إن ٨٩٪؜ من كلامنا فضول كلام!!!!!! •"الحمد للَّه اشتغلت شغل حلو أوي" "ألف مبروك.. بتقبضي كام؟"⬅️وأنتِ مالك.. ما هي صاحبتي الأنتيم.. ده مايدِّيكيش الحق إنِّك تسأليها.. ولو إنتِ مكانها وسألتك يبقى ماتجاوبيش.. #فضول_الكلام. #دكتورة_سوزان_علمتني

فيه كلام زيادة بيتقال أو بيتسأل ملهوش لازمة وبيخللي اللي قدامك يتضايق أو يضطر يكدب عشان يعرف يرد على الكلام ده

التربية مش إني اودي المدرسة والتمارين وأكل وشرب بس .. لازم تتكلموا مع أولادكم فرصة تتكلموا مع ولادكم علي السفرة (اثناء الاكل). الكلام علي الأكل من السنة علشان تدي فرصة للأكل إنه يتهضم. ولادك هيعرفوا آداب الطعام إزاي من غير ما تعلميهم علي السفرة؟ يتعلم ياكل من قدامه (مش ينقي) يتعلم لو أكل مش عاجبه ميقولش خصوصا في العزومات يتعلم لو عايز حاجة يطلب منك إنتي (مش من صاحب البيت) يتعلم ميبتديش أكل غير لما الكبير أو صاحب البيت يبدأ الأكل يتعلم إن منقومش من على السفرة غير لما الضيف يقوم (حتى لو خلصنا اكل) ولو عندك عزومة خليهم يساعدوكي … أنت عليك المية، وأنت تلم الاطباق اليمين وأنت تلم الأطباق الشمال وأنت عليك العصير منها يساعدوكي ومنها يحسوا بالمسؤلية #دكتورة_سوزان_علمتني

★ شَم النّسيم ★ ----------- - ما حكم الاحتفال "بشمِّ النّسيم" ؟ - لمَّا يكون السُّؤال هو:- - " ما الحكم؟ " تبقى النَّاس المُتعلمة لازم ترد بإجابة من الآتي :- - ١- يجوز . ٢- لا يجوز . ٣- مسألة خلافية. - و كلمة "احتفال" معناها ⬅️ إظهار الفرحة و السُّرور لحدوث نعمة . - احتفال "شمِّ النّسيم " مثل الاحتفال ب ﴿ عيد الأم..عيد الثَّورة..المولد النَّبوي..الخ ﴾ و هو عادة من عادات المصريين و له علاقة بالنِّيل وحصاد الزرع ..يعني مش عيد للمسيحيين.. - طيب هل ينفع احتفال المسلمين بأى مناسبة ؟ دي فيها اختلاف. (مسألة خلافية ).. - الرَّأي (١) - يرى ⬅️ ﴿ لا يجوز الاحتفال إلَّا بالعيدين ( الفِطر و الأضحى )﴾.. - الرَّأي(٢) - ⬅️ ﴿ يجوز الاحتفال بأي مناسبة و لكن بشرطين هما :- - ١- أن تكون " طريقة الاحتفال " تُوافق الشَّريعة.. - ٢- " سبب الاحتفال " يُوافق الشَّريعة .. ﴾ - - يعني مثلًا لو عملنا عيد نسميه عيد البرتقال ناكل برتقال و نلبس لون برتقالي 🍊...هل في حاجة في ده لا توافق الشَّريعة ؟ لا.. - سبب الاحتفال هنا "البرتقال " و البرتقال مش حرام و طريقة الاحتفال كمان مافيهاش حاجة حرام .. # يُوافق الشَّريعة مش معناه إن الرَّسُول أو السَّلف فعله أو لأ.. - و احنا اتعلِّمنا قبل كده أن في المسائل الخلافية " الكل صح ". - يعني لو حد أخذ بالرَّأي الأول بأنَّه"لا يجوز " ⬅️ صح..و لو أخذ بالرَّأي الثَّاني أنَّه "يجوز" ⬅️صح.. - الغلط هو إنَّك تغلط واحد منهم.. - طيب إنتِ تعملي إيه ؟ تعملي "الأحوط".. - الأحوط هنا إنِّك تُوافقي المجتمع اللي إنتِ فيه ⬅️ " درءًا للخلاف ".. #دكتورة_سوزان_علمتني

إيه هو حكم الاحتفال بشم النسيم في الإسلام؟ هل زيه زي الاحتفالات التانية؟ ولا حرام الاحتفال به؟