💡HƏYATIN_TƏMƏLİ💡

Hicri-qəməri aylarının ilki olan Məhərrəm ayı, xüsusilə də İslam Peyğəmbərinin (s) əhli-beytinə sevgi bəsləyənlər üçün dərin mənəvi və mədəni dəyərə malik bir aydır. Bu ay, xüsusilə də ilk on günü, Kərbəla hadisəsi ilə əbədi olaraq İmam Hüseynin (ə) və onun səhabələrinin adı ilə bağlıdır. Kərbəla faciəsindən sonra İslam aləmində, xüsusən şiə toplumlarında Məhərrəmin ilk on günündə əza məclisləri qurulmuş, İmam Hüseynin (ə) qəhrəmanlığı, şəhadəti və haqqa bağlılığı yad edilmiş, rövzələr və mərsiyələr oxunmuşdur. Əhli-beyt imamlarının (ə) tövsiyələrinə əsasən bu günlərdə şadlıqdan uzaq durmaq, İmam Hüseynin (ə) məqsədlərini yad etmək, onun Aşura məktəbini yaşadan işlərə yönəlmək savablı və dəyərli ibadətlərdən sayılır. Böyük Azərbaycan şairi Məhəmməd Füzuli bu matəm ayı ilə bağlı belə demişdir: Mahi-Məhərrəm oldu, şəfəqdən çıxıb hilal, Qılmış əza, tutub qədi-xəm, qərq-i eşk-i al. Mahi-Məhərrəm oldu, məsərrət haramdır, Matəm bu gün şəriətə bir ehtiramdır. Bəli, bu günlərdə matəm saxlamaq həm dini şərəfimizə, həm də İslamın qorunmasına göstərilən ehtirama çevrilmişdir. Çünki İmam Hüseyn (ə) öz canını verərək İslamın diriliyini təmin etmiş, haqqa və ədalətə canıyla həyat bəxş etmişdir. Bu günlərdə biz müsəlmanlar olaraq matəm saxlamaqla yanaşı, bu ənənəni gələcək nəsillərə də ötürməliyik. Bu həm dini, həm milli kimliyimizin qorunması baxımından vacibdir. https://t.me/salmanovtural