Ministry of Urban and Infrastructure 🇪🇹🇪🇹

ኢትዮጵያ የታጠቀቻቸው አዳዲስ የጦር ጄቶች የአየር ክልሏን ለመጠበቅ ከምን ጊዜውም በላይ ዝግጁ ያደርጋታል!

የሀገራችንን ሰላምና ደህንነት በዘላቂነት ለማረጋገጥ የምናደርገው ሁለንተናዊ ጥረት ዛሬ ሌላ አዲስ ምዕራፍ ላይ ደርሷል። ኢትዮጵያ በመከላከያ ኃይል እያደረገች ያለው ዝግጁነት ጥቃትን ቀድሞ ማስቀረት የሚያስችላትን አቅም እያላበሳት ነው። ከዚህ ቀደም ከሩሲያ መንግስት ጋር በደረስነው ስምምነት መሰረት፣ ዛሬ የመጀመሪያዎቹን አስራ ሁለት የሱ-35 4ኛ++ ትውልድ የጦር ጄቶች (Su-35 4++ Generation) ተረክበናል። በተጨማሪም ኢትዮጵያ አራት የኤስ-400 (S-400) የአየር መከላከያ ስርዓት ባትሪዎችን ትረከባለች። ወዳጄ የሩሲያው ፕሬዝዳንት ቭላድሚር ፑቲን ከስምምነታችን አንድ ዓመት አስቀድሞ እነዚህን የጦር አውሮፕላኖች እንድንረከብ ስላሳዩት ትጋት ላመሰግናቸው እወዳለሁ። እነዚህን የጦር ጄቶች በመታጠቅ ኢትዮጵያ ከሰሃራ በታች ባሉ የአፍሪካ ሀገራት ቀዳሚ ሆናለች። ይህ ታሪካዊ ስኬት የሀገራችንን ሉዓላዊነት ይበልጥ የሚያጠናክር ሲሆን፣ ወደፊትም የጋራ ደህንነታችንን እና ቀጣናዊ መረጋጋትን ለማረጋገጥ የምናደርገውን ጉዞ በልበ ሙሉነት እንድንቀጥል ትልቅ አቅም ይሆነናል።

የፌደራል ከተሞች ልማታዊ ሴፍትኔት የስራ ፕሮጀክት ሀገራዊ የስትሪንግ ኮሚቴ የበጀት ዓመቱን መደበኛ ስብሰባዉን አካሄደ  አዲስ አበባ፣ ጥቅምት 17 ቀን፣ 2019 ዓ.ም(ከመልሚ) የከተሞች ልማታዊ ሴፍትኔት የስራ ፕሮጀክት ሀገራዊ የስትሪንግ ኮሚቴ የተጠቃሚዎችን የተሻሻለ ክፍያን መወሰን፣ ፕሮጀክቱን አጠቃላይ ዓላማ ግንዛቤ መፍጠር እና የ2019 በጀት ዓመት ዕቅድን አስመልክቶ መደበኛ ስብሰባዉን አካሄዷል፡፡ የከተማና መሠረተ ልማት ሚኒስቴር ሚኒስትር ክቡር ሙሐመድ አብድራህማን(ኢ/ር) መንግስት ከአለም ባንክ ጋር በመቀናጀት በ88 የሀገራችን ከተሞች ላይ ተግባራዊ ያደረገው የከተሞች ልማታዊ ሴፍቲኔትና የሥራ ፕሮጀክት በከተሞቻችን የሚታየውን ድህነት በመቀነስ እና የከተሞችን የጽዳት፣ የውበትና የአነስተኛ መሰረተ ልማት ችግሮችን በማቃለል ረገድ ጉልህ አስተዋጽኦ እያበረከተ የሚገኝ ፕሮጀክት ሲሆን መንግስታችንም በትኩረት ከሚያስፈጽማቸው ፕሮጀክቶች አንዱ ነው ብለዋል፡፡  ከተረጂነት አስተሳሰብ በመላቀቅ በዘላቂነት አምራች ዜጋ ለማፍራትና ከድህነት ለመላቀቅ እንደ ሀገር የጀመርነውን ጉዞ መሰረት በማድረግ የፕሮጀክቱ አተገባበር ከዚሁ አንጻር የተቃኘ እንዲሆን በስፋት እየተሰራ ነው ያሉት ኢንጂነር ሙሐመድ በውጤቱም የበርካታ ዜጎችን የኑሮ ደረጃ ለማሻሻልና በተጨባጭ ከተረጅነት ወደ አምራችነት መሸጋገር እንደምንችል ያመላከተ ውጤት እየተመዘገበ መመጣቱን ተናግረዋል ፡፡ በሚኒስቴር መ/ቤቱ የከተሞች ምግብ ዋስትና እና ልማታዊ ሴፍትኔት ጽ/ቤት ኃላፊ አቶ ብርሃኑ ተሾመ የፕሮጀክቱን አጠቃላይ ያለፈውን አመት የስራ ሂደት እና በቀጣይ ትኩረት የሚሹ ጉዳዮች ላይ ለስትሪንግ ኮሚቴ አባላት በዝርዝር አቅርበው ፕሮጀክቱ እንደሀገር ከፍተኛ አካታችነት የሚሰተዋልበት እንደሆነ ገልጸው በተለይ በሁሉም የሀገሪቱ ከተሞች በተመረጡ 88 ከተሞች በፍሐዊነትና በግልጽነት የተለዩ ጾታን፣ ዕድሜን እና አካል ጉዳተኝነትን ታሳቢ በማድረግ ዜጎች በዘላቂነት ኑሮአቸውን ባማሻሻል ከተረጅነት ወደ አምራችነት እየተሸጋገሩ ይገኛሉ ብለዋል ፡፡ የስትሪንግ ኮሚቴው አባላት በበኩላቸው ፕሮጀክቱ በተጨባጭ አካታችነትን ትኩረት በማድረግ ዜጎች ክብራቸውን በሚመጥን ደረጃ ህይወታቸውን በትክክል እየቀየረ መሆኑን በሪፖርት ከሚቀርበዉ ገለጻ ባሻገር ሁሉም የስትሪንግ ኮሚቴው አባላት ወደ ከተሞች በመሄድ ማረጋገጥና የሚስተዋሉ ተግዳሮቶች በዘላቂነት በጋራ በመፍታት ኃላፊነታችንን ልንወጣ ይገባል ብለዋል፡፡  በተለይ ስለ ፕሮግራሙ ያሉ የተሳሳቱ አመለካከቶችን በማጥራት እና ግልጽ ግንዛቤ በማስጨበጥ የሕዝባችንን ግንዛቤ ልናዳብር ይገባልም ብለዋል የኮሚቴው አባላት ። በፌደራል ደረጃ ሀገራዊ የስትሪንግ ኮሚቴው አባላት የገንዘብ ሚኒስቴር፣ ሴቶችና ማህበራዊ ጉዳይ ሚኒስቴር፣ ሥራና ክህሎት ሚኒስቴር እና የስደተኞችና ከስደት ተመላሽ አገልግሎት ሲሆኑ። በየተቋማቱ አዲስ ለተሾሙ የመንግስት የስራ ሀላፊዎች ስለፕሮጀክቱ አጠቃላይ ገለጻና ማብራሪያ ተደርጎላቸዋል፡፡ በመጨረሻም የስትሪንግ ኮሚቴ አባላቱ በቀረቡት አጀንዳዎች የተጠቃሚዎችን የተሻሻለውን ክፍያ እና የ2019 በጀት ዓመት ዕቅድ ዙሪያ ሰፊ ውይይት ካካሄዱ በኋላ አጀንዳዎቹ በሙሉ ድምጽ ጸድቋል፡፡  

በኢፌዴሪ ከተማና መሠረተ-ልማት ሚኒስቴር፣ የከተሞች ገቢ ሪፎርም ፕሮጀክት ጽ/ቤት የከተሞች ገቢ ሪፎርም ስራዎችን በተመለከተ ለፌዴራልና ለክልል የስራ ኃላፊዎችና ባለሙያዎች የግንዛቤ ማስጨበጫ ስልጠና ሰጠ አዳማ፤ ጥቅምት 16/2019 ዓ.ም፤ (ከመልሚ) በከተሞች ገቢ ሪፎርም ፕሮጀክት ጽ/ቤት፣ በመሬት ልማት እና ካዳስተር እንዲሁም በንብረት ግመታ መሪ ስራ አስፈጻሚዎች በኩል እየተሰሩ የሚገኙ ተግባራትን በማስመልከት የግንዛቤ ማስጨበጫ ስልጠና ለፌዴራልና ለክልል የስራ ኃላፊዎችና ባለሙያዎች በአዳማ ከተማ ተሰጠ፡፡ መድረኩን ያስጀመሩት የፕሮጀክት ጽ/ቤቱ ተ/ዋና ስራ አስኪያጅ ተወካይ አቶ ሰሎሞን ጴጥሮስ ባስተላለፉት መልዕክት መንግስት ለከተማ ኢኒሼቲቮች ልዩ ትኩረት ሰጥቶ እየሠራ መሆኑን ገልጸው የግንዛቤ ማስጨበጫ ስልጠናው ከተሞች የማዘጋጃ ቤታዊ አገልግሎትን በማዘመን የከተሞችን የውስጥ ገቢ በዘላቂነት በማሳደግ የከተማ ነዋሪውን የመሠረተ ልማት ፍላጎት ለማሟላትና የህዝብ አገልግሎትን የተሳለጠ ለማድረግ የሚያስችል አቅምን ለመፍጠር እንዲያስችል ታስቦ የተዘጋጀ መሆኑን ገልጸዋል፡፡ በአቅም ግንባታ የስልጠና መርሃ-ግብሩ ላይ በተለያዩ ርዕሰ-ጉዳዮች ላይ ያተኮሩ ስድስት የስልጠና ሠነዶች የቀረቡ ሲሆን በፕሮጀክት ጽ/ቤቱ በተሰጡ የአቅም ግንባታ ስልጠናዎችና በተሰሩ ስራዎች የተገኙ ውጤቶችን በተመለከተ የቀረበው ሠነድ በአቶ መቅሱድ ኸይሩ (የአቅም ግንባታና ኮሙዩኒኬሽን አሀድ አስተባባሪ)፤ የንብረት ግብር ታክስ አዋጅ ሠነድ በአቶ ሰሎሞን ጴጥሮስ (የፕሮጀክት ጽ/ቤቱ የንብረት ግብር አሃድ አስተባባሪ)፤ የማይንቀሳቀስ የንብረት ግብይትና ግመታ አዋጅን የተመለከተው ሠነድ በአቶ አለማዬሁ ተገኔ (የንብረት ግመታ መሪ ስራ አስፈጻሚ ዴስክ ኃላፊ)፤ በከተማ መሬት ሊዝ ሲስተምና አተገባበር ላይ ያተኮረው የስልጠና ሠነድ በወ/ሮ ዝማም ጎሳዬ፣ (የፕሮጀክት ጽ/ቤቱ የሲስተም ልማትና ቴክኖሎጂ አቅርቦት አሃድ ተወካይ) የከተማ መሬት ይዞታና መሬት ነክ ንብረት ምዝገባ አዋጅ፣ በአቶ ገብሩ ባይብኝ (የመሬትና ካዳስተር መሪ ስራ አስፈጻሚ ዴስክ ኃላፊ)፤ እና በስድስት ዋና ዋና የማዘጋጃ ቤታዊ የገቢ አሰባሰብ ርዕሶች ዙሪያ የተዘጋጀው ሠነድ፣ በወ/ሪት አጸደ ኃይሉ፣ (የማዘጋጃ ቤታዊ ገቢ አሰባሰብ አሃድ አስተባባሪ) አማካኝነት ቀርቧል፡፡ ለስልጠና በተዘጋጁትና ለውይይት መነሻነት በቀረቡት ስድስት ርዕሰ-ጉዳዮች ላይ የጋራ ውይይት የተደረገ ሲሆን በውይይት ሂደቱ ለተነሱ ጥያቄዎች፣ አስተያየቶች እና የግልጽነት ጥያቄዎች በሚመለከታቸው አቅራቢዎችና ከመድረክ ምላሽ የተሰጠ ሲሆን ስልጠናው ከተሞችን በሥርዓት ለመምራት የተዘጋጁ የህግ ማዕቀፎችን ወደ መሬት በማውረድ የሚጠበቀውን ውጤት ለማምጣት በተዘረጉና በተተገበሩ የሪፎርም ስራዎች ላይ የተሞክሮ ልውውጥ በማድረግ ሀሳቦች በስፋት የተንሸራሸሩበት መድረክ እንደሆነ ከተደረገው የጋራ ውይይት መገንዘብ ተችሏል፡፡

የዓለም የከተሞች ቀን በተባበሩት መንግስታት የአፍሪካ ኢኮኖሚ ኮሚሽን (UNECA) መከበር ጀመረ ። አዲስ አበባ ጥቅምት 16 ቀን 2019 ዓ.ም (ከመልሚ) የከተማ እና መሠረተ ልማት ሚኒስቴር፣ የአዲስ አበባ ከተማ አስተዳደር እና UN-Habitat  በጋራ ያዘጋጁት የዓለም የከተሞች ቀን "ከተማን በማደስ በኢትዮጵያ ከተሞች ለሁሉም ምቹና ተስማሚ የመኖሪያ ቤት ማረጋጋጥ" በሚል መሪ ቃል በአዲስ አበባ በተባበሩት መንግስታት የአፍሪካ ኢኮኖሚ ኮሚሽን (UNECA) መካሄድ ጀምሮአል ። በመድረኩ ላይ የተገኙት የከተማና መሠረተ ልማት ሚኒስቴር ሚኒስትር ክቡር ኢንጂነር ሙሐመድ አብድራህማን የከተሜነት ዕድገት ለኢትዮጵያ ከታላላቅ የልማት ዕድሎች አንዱ በመሆኑ ከተሞቻችንን የኢኮኖሚ ዕድገት፣ የሥራ ዕድል ፈጠራ፣ የፈጠራ ሥራዎች፣ የቴክኖሎጂ እድገትና የማኅበራዊ ለውጥ ማዕከላት ለማድረግ እየሠራን ነው ብለዋል ። ነገር ግን በዓመት 5.4 በመቶ የሚደርሰው ፈጣን የከተሜነት ዕድገት በመኖሪያ ቤት፣ በመሠረተ ልማት፣ በመሠረታዊ አገልግሎቶች፣ በመሬት አስተዳደር፣ በማዘጋጃ ቤቶች የራስ ገቢ ማሰባሰብና በከተማ ፋይናንስ አቅም ላይ ከፍተኛ ጫና እየፈጠረ እንደሚገኝ የገለጹት ክቡር ሚኒስትሩ ። እነዚህን ተግዳሮቶች ለመፍታት የተቀናጀ እርምጃ፣ የረጅም ጊዜ ዕቅድና የዜጎቻችንን ፍላጎትና አቅም ያገናዘቡ ስትራቴጂያዊ እቅዶች እንደሚያስፈልግ ገልጸዋል። ኢትዮጵያ ያስጀመረችው ታላቁ የመደመር ስትራቴጂ 2025–2050 የከተማ እድገትን ለማፋጠን፣ የተቋማትና የማዘጋጃ ቤቶችን አቅም ለማጠናከር፣ የሀገር ውስጥ ሀብትን ለማሰባሰብና ለረጅም ጊዜ የቆዩ የከተማ ልማት ተግዳሮቶችን በሥርዓት በተደራጀ፣ በተቀናጀና ዘላቂ በሆነ መንገድ ለመፍታት ትልቅ አቅም ይፈጥራል ብለዋል ክቡር ሚኒሰትር ። ስትራቴጂው የኮሪደር ልማትን በማስፋፋት፣ የመኖሪያ ቤት ዕድሎችን በማሳደግ፣ ተቋቋሚና አካታች የከተማ ልማትን በማበረታታት፣ እንዲሁም የከተሞችን የኢኮኖሚ መሠረት በማጠናከር የኢትዮጵያን የከተማ ለውጥ ሂደት ይበልጥ ያፋጥናል ስሉም ገልጸዋል ። ኢትዮጵያ በ2027 የተባበሩት መንግሥታት የአየር ንብረት ለውጥ ጉባኤ COP32ን ለማስተናገድ እየተዘጋጀች ባለችበት ወቅት፣ ከተሞቻችን በአየር ንብረት ለውጥ ምላሽ ሰጪ እርምጃዎች ውስጥ ወሳኝ ሚና እንዲኖራቸው እየሰራን ነው ብለዋል ሚኒስትሩ ። በቤት ግንባታና በከተማ መሠረተ ልማት ላይ የሚደረጉ ኢንቨስትመንቶች የአየር ንብረት ለውጥን መቋቋም፣ የአካባቢ ዘላቂነትን ማስጠበቅ፣ ሀብትን በቁጠባ መጠቀምና ከአየር ንብረት ጋር ለተያያዙ አደጋዎች ዝግጁ መሆንን ይበልጥ ማበረታታት አለባቸውም ብለዋል ። ሁሉም የልማት አጋሮች እውቀታቸውን፣ የፋይናንስ ድጋፋቸውን፣ ቴክኖሎጂያቸውንና ተቋማዊ አቅማቸውን ለዚህ የጋራ ሀገራዊ ጥረት የበኩላቸውኝ እንዲያበረክቱ ጥሪ አቅርበዋል ክቡር ሚኒስትር ኢንጂነር ሙሀመድ።

ከቀጨኔ ባምቢስ የወንዝ ዳርቻ ልማት፤ ነዋሪዋን የሚመጥን ውብ የአዲስ አበባ ገጽታ!

ዛሬ፣የቀጨኔ–አምባሳደር–ጊዮን-ኢሬቻ–ባምቢስ የወንዝ ዳርቻ ልማትን መርቀን ለአገልግሎት አብቅተናል። ይህ የ351 ሄክታር አጠቃላይ ስፋት እና የ10 ኪ.ሜ ርዝማኔ ያለውን የኮሪደር ልማት ዘመናዊ፣ አረንጓዴ እና ሁሉንም አካታች የሆነች አዲስ አበባን የመገንባት ራዕያችንን እውን የሚያደርግ ትልቅ ፕሮጀክት ነው። የእግረኛ መንገዶችን፣ የብስክሌት መንገዶችን እና የተቀናጁ የትራንስፖርት መሠረተ ልማቶችን ያካተተ በመሆኑ፣ ይህ ልማት ይበልጥ ተደራሽ እና ለኑሮ ተስማሚ የሆነ የከተማ ከባቢን ይፈጥራል። የልጆች መጫወቻ ስፍራዎች፣ ፕላዛዎችና አምፊ ቲያትሮች፣ የስፖርት ማዘውተሪያዎች፣ እንዲሁም የውሃ ትርዒት ማሳያዎች ለመዝናኛና ማህበራዊ ግንኙነት አዳዲስ ዕድሎችን ያበረክታሉ። የመኪና ማቆሚያ ስፍራዎች እና ከ100 በላይ መኪኖችን በአንድ ጊዜ መሙላት የሚያስችሉ ስምንት የኤሌክትሪክ መኪና መሙያ ማዕከላት የዘመናዊ መሠረተ ልማቱን አቅም ይበልጥ ያጠናክራሉ። በወንዝ አስተዳደር፣ በአፈርና ውሃ ጥበቃ፣ እንዲሁም በወንዝ ዳርቻ አረንጓዴ ስፍራዎች አማካኝነት የአካባቢ ጥበቃን ከከተማ ገፅታ ለውጥ ጋር እያቀናጀን እንገኛለን። በተመሳሳይ መልኩ ይህ ልዩ የኮሪደር ልማት አዳዲስ የኢኮኖሚ ዕድሎችን መፍጠር ያስቻለ ነው። የተዘጋጀው የገበያ ማዕከል ቀደም ሲል በወንዝ ዳርቻው አካባቢ ይኖሩ ለነበሩ ነዋሪዎች የዕደ ጥበብ ምርቶችን እንዲያመርቱ፣ ለማሳያና ለመሸጫ እንዲጠቀሙበት የሚያስችል ሲሆን፣ የግብርና ምርት መሸጫ ማዕከሉ ደግሞ የግብርና አምራቾችን ከገበያው ጋር ያገናኛል። የእኛ ርዕይ ለዛሬውና ለሚቀጥሉት ትውልዶች ውብ ብቻ ሳትሆን ምርታማና ሁሉንም አካታች እንዲሁም ህዝቧን የምትመጥን ከተማ መገንባት ነው!

12ኛውን የጣና ፎረም ከታደምን በኋላ፣ ከአፍሪካ መሪዎችና ከፍተኛ ባለሥልጣናት ጋር በመሆን ባሕር ዳር ስታዲየም ጎብኝተናል። ጉብኝቱ በስፖርት መሠረተ ልማት ረገድ ያለውን መሻሻል እንዲሁም ባሕር ዳር ለስፖርት፣ ለቱሪዝም እና ቀጠናዊ ትብብር ማዕከል የሚያደርጋትን ትልቅ አቅም ለመመስከር ዕድል የሚሰጥ ነበር።

ጣና ፎረም፤ የአፍሪካውያን ቁርጠኛ ድምጽ!

"የሰላም መንገዶች በአፍሪካ፦ የኢኮኖሚ ሉዓላዊነት እና የጂኦፖለቲካ ሽግግር" በሚል መሪ ቃል በተካሄደው 12ኛው የጣና ከፍተኛ የደህንነት ፎረም ላይ ተገኝቼ ንግግር በማድረጌ ደስታ ተሰምቶኛል። የጉባኤው መሪ ቃል ልንዘነጋው የማይገባንን እውነታ ያሳያል፤ ከድንበራችን ባሻገር የሚወሰኑ ውሳኔዎች በዜጎቻችን፣ በኢኮኖሚ ዕድሎቻችን እና በደህንነታችን ላይ ተፅዕኖ ያሳድራሉ። እያንዳንዱን ድንገተኛ ቀውስ መቆጣጠር ባንችልም፣ የመቋቋም አቅማችንን ግን ማጠናከር እንችላለን። ይህ ለአፍሪካ የሀገር በቀል መፍትሄዎችን ማዘጋጀት፣ የኢኮኖሚ ሉዓላዊነትን ማጠናከር እና ትብብርን ማሳደግ ማለት ነው። አፍሪካ እየተለወጠ ካለው ዓለም አቀፋዊ ሥርዓት ጋር መላመድ ብቻ ሳይሆን፣ ሥርዓቱን የመቅረጽም ሚና ሊኖራት ይገባል። ለኢትዮጵያ ዘላቂ ሰላም ቀዳሚና እጅግ አስፈላጊ ጉዳይ ነው። ይህም ዜጎችን መጠበቅ፣ ሕገ-መንግሥታዊ ሥርዓቱን ማክበር እና ለውይይት በርን ክፍት ማድረግን ይጠይቃል። ለብሔራዊ ምክክር ባለን ቁርጠኝነት፣ የሰላምን መንገድ የሚመርጡትን ሁሉ ለመቀበል ሁልጊዜም ዝግጁ ነን። የመደመር ፍልስፍና፣ ጥንካሬዎቻችንን እና አቅማችንን በማስተባበር እንዲሁም ከራሳችን ተጨባጭ እውነታዎች የተቀዱ መፍትሄዎችን በማዘጋጀት ላይ ያተኮረ መሆኑን ያስገነዝበናል። ለወደፊት ትውልዶቻችን የምናወርሳትን ዓለም ለመቅረጽ የላቀ ሚና እየተጫወትን፣ ጠንካራ የመቋቋም አቅም ያላት፣ ሰላማዊ እና የበለጸገች አህጉር መገንባት እንችላለን።