Najmiddin Turon

#konsert_oldidan Najmiddin Turon @suhrob_ziyo1

Yoshlar ovozi gazetasidan!

Assalomu alaykum! She'riy konsertga kirish pullimi, qayerdan ro'yxatdan o'tish kerak, degan savollar bo'lyapti. Shu savollarga javoban aytmoqchimizki, kechaga kelish, kirish mutlaqo erkin! She'rlarimizdek, shoirlarimizdek eeeerkin kecha bo'ladi! Yaqinlaringiz bilan kelib, mazza qilib she'r eshitib ketishingiz uchun harakatdamiz! Ushbu taklifnoma har biringizga atalgan, sizni kutamiz! ⏰Vaqt: 19-noyabr, 19:00 da 📍 Manzil: Renessans kino uyi @soz_loyihasi

Чопиб кетди тоғларга томон, Ҳар тукида ёвқур бир чирой. Чўққиларнинг шамолгайида, Увиллашга гувоҳ бўлди ой. Итларнинг бўғзига тиқилди ҳадик, Чўпон кетди уйига кириб. Бир тўп тўнғиз ширин жонини Ололмади хавфдан айириб. Сўнгра чопди дашт узра озод, Қонга ботиб лунжлари, тиши. Тонг отарда қайтди ортига Қафасдаги бўрининг туши. https://t.me/Najmiddin_Turon

ЙЎҚ Жароҳатлари қичқирар унинг: “Йўқ!” Кишанлари қичқирар унинг: “Йўқ!” Унинг жароҳатларига Кўксини босган Мусича Қичқирар: “Йўқ!” Йўқ!— Ғазони қулбозорда Чўри қилиб сотаётганларга. Йўқ!— Ғазони ёлғон сўзга Айрибош қилаётганларга. Шаллақи газеталар, Вайсамоқни бас қилинг, Токи, эшитилсин ўша: “Йўқ!” Юрт ўлиб бормоқда Зулмат ичида— Юпитерлар кўзни қамаштирмас, Шамлар милтирамас, Ҳатто йўқдир ойнинг бир тарам нури— Юрт ўлиб бормоқда зулмат ичида. На мaтбуотда бир хабар, На дафн маросими, На марсия, На йиғи, На мотам марши. Сиз эй, ўзини “барбудо” атаб, Мода пойгасида ҳаллослаган Тошюраклар, Ҳеч бўлмаса бир лаҳзага Овозингиз ўчсин, Токи, эшитилсин ўша: “Йўқ!” Қичқираётган Минг марталар ўлса ҳам Ҳамон тикка турган Эски уйнинг Девори! Сиз эса— Шамол учираётган Ватанимнинг чангига Очофатдай ёпишасиз. Қани, шишаларга тўлдиринг уни— Миллионлаб олибсотар Мол кутар ахир! Муин Бисису Фаластин Шоири https://t.me/NajmiddinTURON

Тақво йўлларинда мажнунтол эгик, Тераклар кеккайган азалий кофир. Аслан қўноқлиги яширин дунда Ёмғирлар муҳожир, мен-да муҳожир. Токларнинг шохида тўнглаган ёши, Беҳиштда данагин қолдирган анжир. Бизни тарошлаган норасо дунё, Ёмғирлар хабарчи, мен-да хабарчи. Оҳулар кўзидан андуҳий бода Ҳўплаган шамоллар эсида жудо. Эс бу қолганларга ўхшамак бўлса, Ёмғирлар девона, мен-да девона. Қўрғошин тусдаги ёшни симирган, Туманлар заминнинг чўнтакрўмоли. Унинг бир камига даво қидирган, Ёмғирлар сазойи, мен-да сазойи. Ҳаққуш уясига тухумин қўйиб, Каккулар минг йилки жўжа очирган. Бул мудҳиш сирларнинг гувоҳи бўлиб, Ёмғирлар осилган, мен-да осилган. Кун-бакун тусланиб бораётган бул— Замон оловбардор, замин ўтхона. Кимки ёндош бўлса, эта бошлар кул, Ёмғирлар бегона, мен-да бегона... https://t.me/Najmiddin_Ermatov

JO'RA Najmiddin Turon sheʼri Erkin Bozorov ijrosi Nosirjon Otajonov tasviri https://t.me/NajmiddinTURON

ШОИР Бир жом у, азоб ҳам, бахт ҳам қуйилгай. Ҳар киммасу, ҳеч ким бўлиб туюлгай. Шоир — бир кишилик миллат, ҳар сафар Миллат шоиридан бошлаб сўйилгай. Кеча “Мутолаа” лойиҳаси доирасида “Сокин жанг” бўлди. Лойиҳа бош муҳаррири, ёзувчи Жавлон Жовлиев ташаббуси билан ташкил этиб келинаётган “шеърий консерт”нинг бешинчи сони қаҳрамони—катта шоир, қудам Суҳроб Зиё даврани жондириб жарди! Суҳроб ўйчан йигит. Жангги ҳам ўйда кечади. Бироқ шу ўйларнинг шеърга айланган бир қисми ҳам вўлой-билай жойга ўт қўйиб юборади. Унинг кечада айтилган шеърларини кўп ўқиганмиз, ўзидан ҳам ҳар жойда эшитганмиз. Бироқ кечаги таъсир бутунлай бошқача эди. Суҳроб ҳар бир шеърининг кетма-кетлигини тасбеҳ каби шундай терганки, биттаси олинса сочилиб кетади, тингловчилар-да шеърдан-шеърга кўтарилгани сари тўкилиб бораверади. Режиссёр, ёш актёрлар ҳам анча пишибди. Композиция, ижролар қойилмақом. Меҳмонлар то тугагунча кўз узмай ўтиришди. Сиёсати турфа, ёлғон айтиш урфда, ҳар қадами ўйловли, туйғулари байловли, қорин ғами ишвали, енгил ҳаёт жилвали бўлган бу замонда шундай шеър, шундай шоир, шундай лойиҳаларнинг борлиги кишига қанот беради. Ҳали бўшлиққа қараб шеърлар айтилмаяпти, уни эшитувчи одамлар бор! https://t.me/NajmiddinTURON

Уфққа қараб қушлар учди, Ўнги келмай тушлар учди, Тўкилганим увол дея Парланиб-о, ёшлар учди. Бир мен қолдим учолмаган. Висол мендан кечиб кетди, Хулё сари кўчиб кетди, Кўзларима тиккан ўша Чимилдиғин ечиб кетди,. Бир мен қолдим кечолмаган. Ғусса келди қўлида тўр, Кишан, тушов - яроғи мўл, Чирқиллади oлашақшақ, Қочиб кетди ҳаттоки йўл. Бир мен қолдим қочолмаган. На илдиз бор, ва на қанот, Фақат дард бор йўқдир сабот, Аҳволима бўзлаб, бўзлаб, Менда яшаб ўтди ҳаёт. Бир мен қолдим яшолмаган. Бир мен қолдим яшолмаган... ©Нажмиддин Эрматов 2019, феврал

“MUTOLAA”DA SHE’RIYAT davom etadi! Oʻzbekiston Yoshlar ishlari agentligi “Mutolaa” loyihasi hamda O‘zbekiston Milliy kutubxonasi hamkorligida “SOKIN JANG” nomli teatrlashtirilgan nazm kechasini taqdim etadi. • Dastur qahramoni: iste'dodli shoir Suhrob ZIYO • Mehmon: shoir va aktyor Erkin BOZOROV 📝 Soʻz va adabiyot muxlislarini 12-noyabr kuni soat 17:00 da O‘zbekiston Milliy kutubxonasida kutib qolamiz. 👇Ro’yxatdan o’tish uchun ushbu soʻrovnomani to’ldiring: https://forms.gle/UtZ9vG7RxZ7hV2Ay8 Mutolaa ilovasini yuklab oling

"Shoir kim?"ning galdagi qahramoni kim? Zamona zo‘rniki,  dedilar menga, Tomosha ko‘rniki,  dedilar menga, Muhabbat-chi,  sheʼr-chi,  so‘radim qaqshab, Manglayi sho‘rniki,  dedilar menga. Bugun "Til va adabiyot taʼlimi"  jamoasining fotonigohida xayol, kuz va kabutarlar ichra kezingan Shukur Qurbon bo‘ldi! 🌐 Sayt  ✈️  Telegram ✅Murojaat  ♾Muhokama

Hamid Sodiq portreti. Rassom: Mas'ud Kholov! Manzil: Jadid Elbek tuvilgan joy — Bo‘stonliqning Xumson daryosi bo‘yida edik o‘shanda.

“Til va adabiyot taʼlimi” журналида эшон бува бир удумни жорий қилган. Ҳар соннинг яхши бир мақоласи учун муаллифга мукофот пули бор (қалам ҳақидан алоҳида, албатта). Хуллас, тўртинчи соннинг яхшиси деб Шодмонқул Саломнинг Эшоқбил Шукур ижодига бағишланган “Бир қирда, бир сирда...” мақоласи топилди. Мукофот пулини ўзим бераси бўлдим. Тўғриямда, шоир шоирга пул бермаса, бошқа буровлардан умид йўқ. Нақтимиз ҳам жа кичкина эмас, ушоқ пулга айлантириб, пачкаси билан урса бир шоирни гангитади. Эрталаб шоирга сим қоқдим: —Ассалом алайкум, акоси! —Во алайкум ассалом, шоир! —Мукофот пулини қачон ола кетасиз энди? (кечаси ютиқ чиққанини телеграмдан билдириб қўйгандим) —Ишга томон ўрлаяпман, бир кириб ўтайми? —Ҳозир келсангиз, осонгина қутулиб кетасиз, бунинг йўтал-пўтал, деган жайлари бўларди. Минг йиллик удум сизга келганда харом қотмасин. —Қачон борай унда? —Кунни кечлатиб келсангиз, изини бирон нимага улардикда. —Бўлди, кечга бошқа режа қилмай тур унда. Димоғим чоғланди. Ҳаливери Шодмонқул Саломни кимдир эритибди, деган гапни бировдан эшитмаганман. Шоир Бек Али давраларда айтиб юради: Устозим Шодмон ака бўлади. Тошкентга илк келган вақтларим пулим етмай қола бошлади. Акага айтим “чўта, пулим етмай қоляпти”. Шодмон ака зўр маслаҳат берди “Сен ҳалиям ўзингнинг ҳисобингдан еб-ичиб юргандирсанда”. Шу гапларни эслаб, завқим яна-да ортди. Агар кечга режамиз амалга ошиб қолса, давраларда бировга гап бермай юраман. Мен билан ҳазиллашма, кимсан Шодмонқул акани кечликка туширган одам бўламан, дейман. Соат ўн бирларда Шодмон ака сим қоқиб қолди. —Шоир, ишим тугаб қолганди, ҳозир борсам, ҳисобчиларинг тушликка чиқиб кетмайма? (Ичимда бир ғудрандим, бу шоир кечликдан бўйин товлаб, ҳозир келмоқчи. Муддаоси аниқ, тушликда осон қутулиб кетади. Хай, дедим. Шунисиям ҳарна) —Хай, келаверинг. —Бўлди, бир соатда ўтаман унда. Келди. Пулни олди. Юракка яқин чўнтакка жойлади. Узун-қисқа бўлиб Навоий-30 дан нишабладик. Абдулла Орифу Рауф Парфиларнинг қадамини минг кўрган кўчадан Миллий таомларга ўтдик. Кирсак бизни бир одам кутиб ўтирган экан. Шодмон ака таништирди. “Ma'naviy hayot”нинг суратчиси экан (исми ёдимдан чиқди). Ичимга шубха ўрлади. Овқатни еб, чойни ичиб, то тургунимизча шу шубҳа мияни ғажиб чиқди. Охирида кутилмаганда кутилган воқеа барибир содир бўлди. Халатлининг қуёшида қорайиб, обдон зуваласи пишган шоир яна қаттиқ келди. Ҳисобни суратчи акага тўлатиб юборди. Минг йиллик удум яна Шодмон акага кетганда харом қотди. Ишга сувга тушган мушукдай шумшайиб қайтдим. Эҳ, давраларда каттаю кичикка айтаман деб қанча латифа тўқиб қўйгандим, бари увол кетди. https://t.me/NajmiddinTURON

Мен сезаман Ёққанда ёмғир, Тарновлардан қуйилганда сув, Мени мендек эсга олади, Мени мендек унутган сулув. Чиқиб келар дилгир ҳаётдан, Сув юзига қалқигандек хас. Томчиларга тутиб қўлини Энтикади бекадар, бесас. Ва булутлар бир-бир тарқайди, Шамолларда тўзғийди хотир. Сўнг ёмғирдек намчил ҳаётга Сингиб кетар бамайлихотир. https://t.me/Najmiddin_Ermatov

КИМ НИМАНИ ЯХШИ КЎРАР Эҳтимол, бизнинг халқ илму маърифатни, тарбия ва таълимни, ҳунар ва саноатни яхши кўрар, деб ўйлайдурғондурсиз? Йўқ, бу фикрингиз ёнглиш. Эшонларимиз тоат ва ибодат, панду насиҳат, зикру тасбеҳ ўрниға тўйлардан тўн киюб, кўб ошаб, кўп ухлашни яхши кўрурлар. Уламоларимиз дарсу таълим ўрниға, бир-бирлари ила ўрун талашиб, мукаррир ва мударрис бўлишни, ўзлари бўлолмай қолсалар, эшикма-эшик юруб сайловни бузишни яхши кўрурлар. Имомларимиз, халойиқға ваъз ва насиҳат ўрниға, тўй ва жанозаларда юруб, жома кийишни яхши кўрурлар. Бойларимиз орқа-ўнглариға қарамасдан, фойда ва зарарларини ойирмасдан бир-бирлариға рақобат қиламан деб, "бонка" ва "кридит"ларини кўпайтуруб, дўффилари тор келганда рус ва яҳудийларнинг молларини букуб-синишини яхши кўрурлар. Мўйсафидларимиз намоз ва ниёз ўрниға, масжид эшигига йиғилуб ўтуруб, ҳар кимни ғийбат ва шикоят қилишни яхши кўрурлар. Муаллимларимиз бир-бирларидан қизғонишуб, болаларни арзон ўқитаман деб, бир ўзларига юз, юздан ортуқ бола йиғуб, ўзлари тўй ва маъракаларда болаларнинг умрини бекор ўткаришни яхши кўрарлар. Савдогарларимиз: "Тўйликни тўйи ўтар, тўйсизни куни ўтар" деган сўзга амал қилмай, қайси маҳаллада тўй бўлса, дастурхончилик қилишни яхши кўрурлар. Дўкондорларимиз ишларини тартиб-ла солмай, замонаға мувофиқ иш юритмай, Маллахон замонидан қолғон эски дўкон, эски тос, эски тартибларини яхши кўрурлар. Оналаримиз билим ва тарбия ўрниға эрлари ила урушуб-талашуб қизлариға мол қилмакни яхши кўрурлар. Оталаримиз болалариға ўқутмак ва таълим бермак ўрниға "Ўғлум, эмди каттакон йигит бўлдинг, шунча ўқуганинг етар, пул топ!" — деб "ташишка" — ҳаммоллик қилдиришни яхши кўрурлар. Заргарларимиз йигирма тийинлик кумуш, ўн тийинлик тилло орасиға мум ва сақичлар жойлаб, исмини қиз ҳайрон, зебигардон қўюб, беш-ўн сўмга сотишни яхши кўрурлар. Табибларимиз долчин, занжабил, ҳуббул малик, филфил каби бир неча атторни қутисида йўқ нарсалардан мураккаб дору ва маъжунлар ясаб, бечора нодон халқни пулини олишни яхши кўрурлар. Машшоқ ва ҳофизларимиз тўй ва базмларга бир мардакни(нг) исмини бачча қўюб, ўзлари ила баробар олиб юруб, "миллий адабиёт" ўрниға "Хоним ялола, бегим ялола" деб баччага ташланаётган пулларни бўлуб олишни яхши кўрурлар. Саводхонларимиз жарида ва журналлар, тарих ва рўмонлар ўрниға Дақёнус замонидан қолғон, хурофотлар ила тўлғон "Андоғ урдиларки, гард-гард бўлуб кетди", деб лофлар ёзилғон китобларни оғизларини қуфуртуруб ўқумоқни яхши кўрурлар. Ёшларимиз илм ва маърифатли бўлишни, ҳунар, санъат ўргонишни ўрниға, ўзларига зеб беруб тор шим ила калта камзул, қотирма ёқаларга бино қўйишни яхши кўрурлар. Ишчиларимиз илм ва ҳунардан маҳрумлиги сабабли бошқа миллатлар илму маърифатлари соясида кунига 4-5 сўм ишлаб турган бу замонда кунига уч тангаға мардикорликни, ойиға ўн беш сўмға қоровулликни, йигирма сўмға фанар ёқишни, ўн сўмға кўнка йўлини тозалашни ва шуларга ўхшаш энг паст ва оғир хизматларни яхши кўрурлар. Болаларимиз оталаримизнинг илм қадрин билмаган, илм учун пулни кўзлари қиймаганлик сабабли ўқумоқ ва ўрганмоқ ўрнига "Оҳ, пул, жоним пул", деб "ташишка" — ҳаммолликни яхши кўрурлар. Муҳаррирларимиз кўб-кўб оқча олиб, оз-оз ёзишни яхши кўрурлар. Муштарийларимиз фойдали мақолалар ўрниға хабарларни яхши кўрурлар. Шоирларимиз миллий шеър ва адабиёт ёзишни ўрниға мувашшаҳми ёки "қошингдан, кўзингдан", — деб, жавонларни мақтаб фасод ахлоқға сабаб бўладурғон шеърлар ёзишни яхши кўрурлар. Аммо мен бўлсам, ҳозирги замонда индамасдан туришни яхши кўрурман. 1913 йил Абдулла Авлоний https://t.me/NajmiddinTURON

Ҳай, ёр-а! Куюк кўнгил оҳидан Буғланган Орол қайда, Тунлар зулматни ўрган Ул ҳамроҳ ҳилол қайда, Айғирнинг бўйни мисол Бўронни кесар десанг, Қаддингга ўхшаб турса Айтмоққа савол қайда? Ҳай, ёр-а! Қора тортсанг ёруғлик Кўздан йироқ борадир, Ҳаётидан норизо Эл бесўроқ борадир, Дарди қават-қавату Қўл юпқароқ борадир, Жасорат сўниб борган Умрда малол қайда? Ҳай, ёр-а! Эл алқаб юрган беклар Элнинг қасдига тушса, Оқ қайиндай ой қизлар Ҳижрон рақсига тушса, Отамерос йўқсиллик Тағин наслига тушса, Жортибойи кўп юртда Бут қайда, камол қайда? Ҳай, ёр-а! Қавмим дебон қароғинг Ёшлиғ бўлса, кулсалар, Йўлдошим деб юрганинг Йўлин калта бурсалар, Ҳақ номидан сўз очиб, Халқ нонидан урсалар, Шиори зеб замонда Яшарга мажол қайда? Ҳай, ёр-а! Юз йилларки қийпиниб Эгилган бош биздадир, Суягини унутиб Тентиган лош биздадир, Битмас сабр ҳам бизда Тағин кўзёш биздадир, Зарур вақти мушт бўлар Қўл қайда, қурол қайда? Ҳай, ёр-а! Сўзлай десанг сўзингни Қафас қўрқитиб турса, Ўлай десанг ютилган Нафас қўрқитиб турса, Яра дилни яратган Бесас қўрқитиб турса, Самода борми, билмам, Бунда истиқлол қайда?.. Ҳай, ёр-а! https://t.me/NajmiddinTURON

#adabiy_klub Mana, qariyb 3 soatki, Xurshid Doʻstmuhammadning "Qahr" qissasi yuzasidan muhokama davom etmoqda. Keskin savollarga muallifdan keskir javoblar olinmoqda. Fikrlar xilma-xil boʻlsa, fikr almashish maroqli boʻladi. 🔥 Kitobxonlar adabiy uchrashuvlarni juda sog'inibdi. Buni davraning uyg'unlashgani, uyushganidan ham ilg'ash qiyin emas. 🌐 Sayt  ✈️  Telegram ✅Murojaat  ♾️Muhokama 📱Instagram