BSc Comprehensive nursing (AMU)

ከልክ በላይ መስጠት (Over-giving) በአጭሩ ሲገለጽ፣ ከልክ በላይ የመስጠት መነሻው ፍቅርን ለመግዛት መሞከር ነው፡፡ እንዳብራራው ይፈቀድልኝ፡፡ ከልክ በላይ መስጠት ማለት አንድ ሰው ጤናማና አስፈላጊ ከሆነው በላይ ያለማቋረጥ መስጠት ነው። ይህም ሁልጊዜ ከእውነተኛ ፍቅር የሚመነጭ ላይሆን ይችላል፤ አንዳንዴ ሰውዬው በውስጡ ሳያውቀው፦ “በቂ ከሰጠሁ ምናልባት ይወዱኛል።” “በቂ መስዋእትነት ከከፈልኩኝ  ምናልባት አይተውኝም።” “ሁሉን ካደረግኩላቸው ምናልባት የተሸለ ዋጋ ይሰጡኛል።” “ባይመቸኝ እንኳን ሁልጊዜ ከተገኘሁላቸው ይቀበሉኛል።” ብሎ ከልክ በላይ የሚሰጥ ሊሆን ይችላል። ከልክ በላይ መስጠት የሚታይባቸው መንገዶች 1. ጊዜ የራሳችን ሃላፊነት እያለብን እና አንዳንዴም ማረፍ እንዳለብን እወቅን ሁልጊዜ ለሌላ ሰው መገኘት። 2. ገንዘብ ከአቅማችን ገንዘብ ማውጣት፣ መክፈል ወይም ሰዎችን በገንዘብ መርዳት። 3. ትኩረት ሰዎችን ሁልጊዜ መጠየቅ፣ መከታተል፣ ችግራቸውን መፍታት፣ ማዳመጥ እና ሰዎቹን የሕይወታችን ማዕከል ማድረግ። 4. አገልግሎት ሰዎች ዋጋችንን እንዲያውቁልን በሚል እሳቤ ሁሉንም ነገር ለእነሱ ማድረግና ማለቂያ የሌለው አገልጋይ መሆን። 5. ስሜት የሌላው ሰው ችግር ሁሉ ከአቅማችን በላይ ቢሆን እንኳን መሸከም፣ በሂደቱም የራሳችንን ፍላጎትና ደህንነት እስክንጥል መድረስ። እዚህ ላይ ማስታወስ ያለብን፣ ችግሩ መስጠት አይደለም። መስጠት መልካም ነው። ችግሩ ግን ጤናማ ባልሆነ ተስፋ እና የማይሆን ነገር በመጠባበቅ በመስጠት ለስሜት ቀውስ መዳረግ ሲከሰት ነው። ስለዚህ መስጠት የአንድን ሰው ፍቅር ወይም ተቀባይነት ለማረጋገጥ ስንል ሁል ጊዜ ከልክ በላይ ስንሰጥ ራስን ወደ መተው (self-abandonment) ደረጃ ልንደርስ እንችላለን። ከልክ በላይ መስጠት ብዙ ጊዜ ይህንን ሂደት ይከተላል፦ የተቀባይነትና የመወደድ ጥማት → ያንን ለማግኘት ከልክ በላይ መስጠት → በተስፋ መጠበቅ → የጠበቁትን ባለማግኘት መበሳጨት → መራራ እና ቂመኛ መሆን → የስሜት ዝለት → ራስን ከሰዎች ማግለል፡፡ 1. ወደ ጤናማ መስጠት መሸጋገር አንድን ሰው ስለምንወደው ወይም ስለምናከብረው እንስጥ፤ ነገር ግን ዋጋችንን ለማረጋገጥና ከሰውው ምላሽ ለማግኘት አንስጥ፡፡ 2. በፍቅርና ባለመተማመን መካከል መለየት ፍቅር ይሰጣል፤ አለመተማመን ግን ከልክ በላይ ይሰጣል። ፍቅር በነፃ ይሰጣል፤ አለመተማመን ግን ለመቀበል ሲል ይሰጣል። የምትሰጡትን ለማን እንደምትሰጡ፣ ለምን እንደምትሰጡና ምን ጠብቃችሁ እንደምትሰጡ በሚገባ ለዩ፡፡ ሰዎች እንዲቀበሏችሁ ብላችሁ አትስጡ፡፡ Dr eyob mamo