ئابووری / الاقتصاد

بانقی ناوەندیی عێراق لەبارەی بەهای دۆلار بڕیارێکی لە بەرژەوەندیی خەڵک دەرکرد و هەنگاوێکی سەرەکی دەبێت بۆ بەرزکردنەوەی بەهای دینار لە بازاڕدا و کەمکردنەوەی بەهای دۆلار. وێنە گەورەکە: حکومەتی عێراق بانگەشەی ئەوە دەکات بەهای 100 دۆلاریی دەهێنێتەوە بۆ 155 هەزار دینار لە بازاڕدا و بۆ ئەو مەبەستە بانکی ناوەندی دەستی بە ڕێکخستنی عمولەی مامەڵەی دیجیتاڵی کردووە و کاتێک کەسێک شتێک بە کارت دەکڕێت و پارەکەی بە کارتی بانق دەدات، چ لە ناوخۆ، چ لە دەرەوە، ئێستا ڕێژەی عمولە جیاوازە و هەر بانکێک بە خواستی خۆی دایناوە، هەر بۆیە بانکی ناوەندی ڕێکی دەخاتەوە. زانیاری زیاتر: کێشەکە ئەوەیە بانکی ناوەندی 100 دۆلار بە 152 هەزار دینار دەشکێنێتەوە، بەڵام هەر بانکێک و بڕێکی جیاواز عمولەی دەخاتە سەر، بەتایبەتی کاتێک بە کارتی بانک بازاڕیی دەکرێت، یان لە دەرەوە بە کاش پارە ڕادەکێشرێت بە دۆلار یان هەر دراوێکی تری بیانی، هەندێک بانک 2.85٪ عمولەی دەخاتە سەر، هەندێک 3٪ و هەندێکیش 6٪ و زیاتریش. بۆنموونە: کەسێک شتێک دەکڕێت بە 100 هەزار دینار، کاتێک پارە بە کارت دەدرێت 106 هەزار دەڕوات، بۆ ڕاکێشانی پارەش هەمان حاڵەت ڕوودەدات، هەروەها کاتێک لە وڵاتێکی دەرەوە 100 دۆلار بە کاش لە ئەی تی ئێم ڕادەکێشرێت، کارت هەیە 155 هەزار دەبات، هەیە دەگاتە 164 بۆ 166 هەزار دینار. ئەوەی پێویستە بزانرێت: بانکی ناوەندیی عێراق، دەیەوێت ئەو بێسەروبەرییە نەمێنێت و ئەمڕۆ بڕیارێکی نوێی داوە و بۆ هەموو بانکەکانی ناردووە، بەڵام ڕێژەکەی دیاری نەکردووە کە دەبێت هەر بانقێک چەند عمولە لە بەکارهێنەرەکانی وەربگرێت، بەڵکو دیاریکردنی ڕێژەکە دەکەوێتە هەنگاوی داهاتوو. لێدوای پسپۆڕ: دکتۆر مستەفا مەلا حەسن، پسپۆڕی ئابووی ئاڤا دەڵێت: جێبەجێکردنی ئەم پرۆسەیە هەنگاوێکە بۆ دابەزاندنی نرخی دۆلار لە بازاڕەکاندا.