Шексіздік 🌀

Саяхаттан қолым тимей жатса да жазып тастағым кеп тұр. Эмоциямен. Оппозиционер Айдос Садықовтың өлімі туралы жазбалардың астындағы пікірілерді оқып, мына халық ешқандай құрбандыққа тұрмайтынына көзім жетті.

Әдемі жолдан кейін әдемі шаршау. Фонда кешкі джаз. Фотоларды көріп, демалып жатырмын. Ішімде керемет жайлылық. Мен өліп кетіп жатсам қымбат жандарымның әрқайсысына әдемі саяхат сыйлап үлгеріппін. Бақыт.

Қызым ата-әжелерінде Оралда. Кеше ағайынды сіңлілеріммен қыдырған. Әжесі сол жүрісіне ренжіңкірегенін жазады. Әжесі яғни менің анам жалпы қыдыру дегенді ұнатпайды. Мамамның түсінігі бойынша адам не ақша тауып үйге қаржылай көмектесуі керек, не үй шаруасын істеп еңбекпен қолғабыс етуі керек. Жалпы көп қазақтың ойы осы. Бос отыруға, бос жүруге, үйде 1-2 ай болса да бос жатып қалуға болмайды. Дұрыс дейің десең көп қазақ әйтеуір біреуге пайдалы болуды меңзейді. Пайдалы, өзгеге қажет болған жақсы. Алайда ересектер жас кезіңде өзіңді тану, өз бағытыңды іздеу, қабілеттеріңді шыңдау немесе көңіл көтеріп, қуат толтыру да өз уақытыңды яғни белгілі бос уақыт өлшемін талап ететінін түсінсе екен. Ал бос уақыт иелеріне оның барлығынан нәтиже шығару керек. Өз басым әйтеуір мамамнан талай ұрыс естіген айналаны, өмірді бақылауға кеткен бос уақытым жазушылыққа, үйде тұрмайтын “қыдырмпаз” жиһанкездігім танымалдылық пен табысқа әкелді. Шүкір!

“Жақсылыққа жақсылықпен жауап бер. Ал жамандыққа әділдікпен жауап қайтар” Конфуций. Әділ сотқа қатысты ең әділ тұжырым.

Буддизмді зерттеп жүрген оқушы кезімде Қытайды Тибет үшін жек көрдім. Ұлтшыл студент кезімде Қытайды Шыңжаң үшін жек көрдім. Саяхаттауды бастап, түрлі елмен танысқанымда жек көрініш басылып, назарым саясатында емес табиғатына, бейбіт халқына ауысты. Енді бәрінен қолым босап Қытай тарихына үңіле бастаған кезеңімде бұрынғы синофобиям үшін ұялып жүрмін. Білімсіз кез келген эмоция көрсоқыр.

Жамбылдың жасын берсін деген ойды енді қисынсыз тілектердің қатарына қосамын. Қадірі кеткен жылдарды ешкімге тілемес едім. “Жамбыл” фильміне барыңыздар, достар. Мен сарай ақыны деп менсінбей келген қария еді. Сөйтсем өз еркінен тыс жұмсақ күш саясатының құралына айналған екен. Фильм арқылы тұлғасын танып, сыйлай түстім. Қазаққа жасаған жақсылығыңыз болсын өзіңіз барып көріп, басқаларға айта жүріңіздер.

Арманымдағы парақшаны ашып алдым. Қалай дегенмен оқырмандардың жартысы вайбтық фотоларға үйренбеген. Біреуі түсінбей сынап, біреуі пайдалы ешнәрсе жазылмаған деп лайк қоймай кетеді деп қорыққанша мендегі барлық күй сақталатын жеке парақша ашып алуды жөн көрдім. Кайф сезім. Мүмкін әркімде болу керек.

Өзбекстанғы риза емес ырзамын бар ғой. Енді имамдарға әлеуметтік желіге шығуға тыйым салыпты. Өздерінің қадірін кетірмей, дінге кір келтірмей. Әдемі шешім. Әйтпесе қолжетімді болған сайын арзан. Анау Азия елдерінде әлеуметтік желіде сөйлеп уағыз, пәтуа айтпақ түгіл көшеде кездейсоқ тақуаны көрсең үлкен жақсылықтың белгісі деп санайды.