Sost Kilo

ቆላድባ ፤ አንዲት ፍየል ላይ የአላህ ስም ተፅፎ ... [ ልዑል ዘወልደ ] ጅግጅጋ ይመስለኛል ፥ አንዲት ፍየል ወጠጤ የአላህ ስም ተፅፎባት ተወለደች ። በፅሁፉ ጥርጣሬ ስለገባኝ ፥ የፍየሏ ሆድ ላይ የታተመውን አረቢኛ በፎቶ ወስጄ በአስተርጓሚ አሳየሁት ። ሲረጋገጥ ፥ በሐፍረት ሟሸሽኩ ። አይ ፈጣሪ ፥ መገለጫው ብዙ ! ሱብሀን አላህ አልኹ።  አንድ ግዜ እንዲሁ ፥ የጠፈር ሣይንቲስትና ሊቁ መጋቢ ሐዲሥ ሮዳስ በትምህርታቸው ፤ እመቤታችን በራዕይ አስራ ሁለት ላይ ጨረቃን ተጫምታለች ! ሲሉ ሰማሁና እፈር ሲለኝ ወጥቼ ጨረቃን አየኋት ። ያው እፍረት ገንዘቤ ነው ፤ እውነትም ልጇን አቅፋ በጨረቃ ላይ ትታያለች ፥ ክብሩን የሰማዩ ባለቤት ፈጣሪ ይውሰድ ። ልጅ እያለን የመክሰስ ቂጣ ከታደልን ወዲያ የምናደርገው ድርጊት ነበር ። በጥርሳችን ቅርፅ በማውጣት ሆዳችን ከመግባት በተረፈው መጫወት ። የኔ ደሞ ይብሳል ፥ ቂጣ ቆርምሜ የማልሰራው አገርና አህጉር ካርታ አልነበረኝም ። የሚገርመኝ ፤ የጥበብ ስራዬን ለማመሳከር ለሰዎች ሳሳይ መልሳየው የሚሳሳት ሆኖ አላገኘውም ። ከምስክሩ በኋላ ታዲያ በራሴ በመደመም ውድ ሥራዬን መብላት ያሳሳኛል ።  መክሊቴን እያሳደግኹት የመጣሁት ፥ በግድ አጥና እየተባልኩ የግቢ በር በላዬ ላይ ሲቆለፍብኝ ግዜ ነው ። ከአሰልቺው ጥናት የሚያናጥበኝ ቅዱስ ምግባር ፥ በግድግዳና ኮርኒስ ላይ ፓተርን መፈለግ ሆነ ።  ከፊቴ ያለ አሸዋ ግርፍ ግድግዳ ላይ ከዚህ በፊት ያላየኋቸውን ግጥምጥሞሽ ፍለጋ በሰመመን እጠፋለሁ ። ጥንቸል ፣ የሊስትሮ እቃ ፥ ቀጭኔ ፣ እትዬ ወርቄ ፥ የበሪኪና ዋንጫ ፥ ኢትዮጵያ ( አፍሪካ ተገልብጣ ) ፥ ምሳ'ቃ ፥ ጥርስ ብሩሽ ፥ ሣይንስ ቲቸርን .... የማላገኘው ቁስና ግኝት አልነበረም ። ለጉድ እናውዘዋለሁ ። አይምሮዬ እረፍት አልነበረውም ፤ ሲብስብኝ መንገድ ላይ ሁሉ በደመና ቅርፅ ደርዝ መስራት ጀመርኩ ። በዚህ ነገር አብረውኝ ያሉ ጓደኞቼና ወላጆቼ ለጉድ ተማረሩ ። ትንሽ የምትረዳኝና አብራ የምትዳረቀኝ በህሪያ ብቻ ናት ። በህሪያ አሳዳጊዬ እና የቤት ሰራተኛችን ናት ። እየበሰልኩ ስመጣ ግን ፣ ይሄን ነገሬን ማስተዋል ጀመርኩ ። ሰዎች በውስጣችን ላልተጠየቅነው ጥያቄ መልስ ተሸክመን እንደምንዞር ። በምሳሌ ላስረዳ መሰለኝ ... የቤት ኪራይ ክፍያ ቸግሮት አማቱ ቤት የገባ አዲስ ጎጆ ወጪ ነበር ።  አንድ ፊት ብቻ በየሄደበት ሁሉ እየተደጋገመ ቢታየው ግዜ ፥ አዋቂ ሳይካትሪስት ጋር ይሄዳል ።  - እሺ ፥ ምንድነው ? - ይኸውልህ ፥ ሁሉም ቦታ ላይ የሚታየኝ አንድ ፊት አለ ! - እንዴት ? - በቃ ... ምንጣፍ ላይ ፣ ዳቦ ላይ ፣ ሶስት አይን ያለው ሶኬት ላይ ... ያን ፊት የላማየው ቦታ የለም ! - ይሄ እኮ የተለመደ በሽታ ማለቴ ብዥታ ነው ነው ። ፐሬዶልያ ይባላል ። በአንተ እድሜ ላይ ካሉ ሶስት ሰዎች ሁለቱ ይገጥማቸዋል ። - ዶክተርዬ - ወይ - እነዛ ሁለቱ ሰዎች አማቻቸውን ነው የሚያዩት ? - ምን ?! - አይ ምንም ሃሃሃ አብዛኛውን ግዜ የምናየውን አይደለም የምናስተውለው ፤ ከሱ ይልቅ ሁነትን በውስጣችን ከያዝነው እውነት ጋር እያመሳከርን ፥ እንቀበላለን ። ይህን የምናደርገው ሰልፍ እቲማችንን ለመጠበቅ ሲሆን እያደር ግን ወደ ምርቃና (*በኦሮምኛ confirmation bias ማለት ነው) ይመራል ። ከያ ወዲህ አይምሯችን ተቃራኒ ሀሳቦችን ለማስተናገድ ክፍት አይሆንም ። የተለየ ሀሳብ ያላቸውን ሰዎች መጋፈጥ እንፈራለን ። በሶሻል ሚዲያ የምንከተለው የውስጥ ሀሳባችንን ቫሊዴት የሚያደርጉልንን ሰዎች ብቻ ይሆናል ። አካታችነትና ምክንያታዊት ይጎለናል ። በዚህ መጠቃቱ የሚብሰው በግትርነት የተለያዪ ሀሳቦችን ማሰባጠር ተስኖን ውሳኔዎችን ስናሳልፍ ነው ። አንድ ግዜ ፥ ፓተርን በመፈለግ ባህሪዬ እንደሌላው ከማታገለኝ አሳዳጊዬ ከበህሪያ ጋር እየተከራከርን ነው ። እሷም ከኔ ተጋብቶባት ከኔው ብሳ ቁጭ አለች ። በስኒ ላይየቀረ ዳካ ሁሉ እያነበበች ፤ ትተነትን ገባች ። ይሄኔ ፥ እኔ በተቃራኒው መቆም ጀመርኩ ። የተሻለኝ ራሱ በዛው ቀጥዬበት ይመስለኛል ። በዘይት የተጨማለቀ ሂጃቧን እያሳየቺኝ ፥ እስኪ እንካ አንበው አለቺኝ ። አይኗ በለቅሶ ቀልቷል ። ሂጃቧ ላይ ለደቂቃዎች አተኩሬ ከ"ላ" በስተቀር ምንም ፓተርን አልሰራልህ አለኝ ። -  እሺ ምንድነው በህሪያ ?  - አላህ ! ነው የሚለው   - ምን ? - ሁለት ቀን ባልሰግድ አትሰግጂም ብሎ እያናገረኝ ነው ። ያረቢ አል-ረሕማን ፥ ባክህ ተዉሂዴ ያማረላት አርገኝ ። - እንዴ...! ቆይ አላህ የምር መታየት ከፈለገ ለምን 120 ላይ አይመጣም ? - እህ ! እኔ መች 120 የማየውን ነው ? በዛ የሚመጣው ፤ ቆሻሻዋን በሂጃቤ ቆሻሻ ይንገረኝ እንጂ ... በህሪያ አሳዘነቺኝ ። በልጅ ልቤ ማፅናናት ግራ ገብቶኛል ። ትንሽ ቆይቼ የምትወደው ፕሮግራም ትዝ አለኝ ። - እሺ የምር መገለጥ ከፈለገ ፥ ለምን በህብረ-ትርዒት ላይ አይመጣም ? - ቢስሚላሂር አንተ ! ዘፈን እኮ ሀራም ነ ... - ምን ?! - ...እ...እ...እ... ፥ ሃሃሃ

It's been a long long time ! [ ል ዑ ል ፡ ዘ ወ ል ደ ] ፅድ አናት ላይ የኮኮብ ዕድ ሳይ - በዝንፍ ቅርንጫፍ የተጥመለመለ ሲባጎ ብልጭ ድርግም ሲል - የሥጦታ ሙዳዮች ዙሪያው ሲቆለል -  ዜማ ባየሩ ሲናኝ ፥ በዓመቱ ኦሜጋ ሁሉም ወደልጅነቱ ሲሰበሰብ - በቀለም ያሸበረቁ ሞሳዎች ተሰብስበው ሲዘምሩ -  ኩርሽም ከረሜላዎች ከአፋቸው ሟሙቶ  ሲወርድ - ህፃንነት ፍፅምና መሆኑን አምነው አዛውንቶች አሜን ሲሉ ፥ የበረዶ ጥጥ ብናኞችን አሳበው መላዕክት ሰብ'ን ሲስሙ - የከተማው ካቴድራሎች ስለግርግሙ ንጉሥ ብስራት ሲደውሉ - የተነጠፉ መንገዶች ሁሉ ወደቤት ሲወስዱ - በብልቃጥ የነበረ መንፈስ ተኖ ቤትን ሲሞላ  ፥ የዛፉ ላይ ድቡል ኳሶች እየተብረቀረቁ ሲወዛወዙ - ቀያይ  ሻማዎች ግለው የቤቱን ድባብ ሲለኩሱ -  በቁር ቆፈን ውስጥ የነበሩ ጉንጮች ሲፈግጉ - ልጆቻቸው የታከቡላቸው እናቶች አይን እንደታጠበ ብርጭቆ ሲብለጨልጭ - ሳቆች ተርፈው ወለል ላይ ሲወዳድቁ ፥ በክፍት ልቦች ውስጥ የገባ ንዝረት መልሶ ሲፈስ - ፍልቅልቅ ብላቴኖች ጌታውን እንዳየ ውሻ ከግድግዳ ግድግዳ ሲዘሉ ። ምኞታቸውን ጦምረው የሚመጣውን ሽማግሌ በተስፋ ሲጠብቁ ፥ ቃጭል ያነገቱ አጋዘኖችን በየብስ ሠረገላ  እየተጋለቡ ፥ በራማ ጋሪ እየከነፉ ሲመጡ - ጆንያ ተሸካሚው ሽማግሌ  ሪዙን እየፈተለ ሲደውል - ቦቲውን እያማታ በየአጥቢያው ሆ'ሆይ ሲል  … ከአንቺ መሆን እመኛለሁ ። አድማስ ተሻግሮ የተኛ ልቤ ፥ ቀኑ ሲደርስ ጠብቆ ይቆሰቆሳል ። Carla Thomas ፥ እየዘፈነች ነው ፥ It's been a long long time , Cant' explain why you crossed my mind I guess it's just to wish you ... a merry Christmas ❄️

አዳም ረታ - የፊርማ ሥነ ስርዓት - ሐሙስ ከሰዓት - ጃዕፈር መፅሐፍ መደብር °°°

𝚠𝚒𝚝𝚑 #𝚈𝚞𝚟𝚊𝚕𝚛𝚘𝚋 | 06.

ቆንጅዬ አዲስ ዓመት 💛