ក្រុមប្រឹក្សានីតិកម្ម នៃក្រសួងសេដ្ឋកិច្ចនិងហិរញ្ញវត្ថុ Legal Council of Ministry of Economy and Finance

កម្មវិធីទស្សនកិច្ចសិក្សាស្ដីពី “ឧត្ដមានុវត្តន៍អន្តរជាតិ នៃក្របខ័ណ្ឌគោលនយោបាយ និងច្បាប់ស្ដីពីសេដ្ឋកិច្ចឌីជីថល” នៅទីក្រុង Tallinn ប្រទេសអេស្តូនី ---------- ដោយមានការអនុញ្ញាតដ៏ខ្ពង់ខ្ពស់ពីឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ចនិងហិរញ្ញវត្ថុ និងជាប្រធានក្រុមប្រឹក្សានីតិកម្ម, នាថ្ងៃចន្ទ ៧រោច ដល់ ថ្ងៃសុក្រ ១១រោច ខែបឋមាសាឍ ឆ្នាំមមី អដ្ឋស័ក ព.ស. ២៥៦៧០ ត្រូវនឹងថ្ងៃទី ៦ ដល់ ១០ ខែកក្កដា គ.ស. ២០២៦, ក្រោមការដឹកនាំផ្ទាល់របស់ឯកឧត្តមបណ្ឌិត ហ៊ែល ចំរើន រដ្ឋលេខាធិការ និងជាអនុប្រធានប្រចាំការក្រុមប្រឹក្សានីតិកម្មនៃក្រសួងសេដ្ឋកិច្ចនិងហិរញ្ញវត្ថុ ព្រមទាំងមានការចូលរួមពីថ្នាក់ដឹកនាំ និងសមាជិក សមាជិកា នៃលេខាធិការដ្ឋានក្រុមប្រឹក្សានីតិកម្ម និងតំណាងអគ្គនាយកដ្ឋានសេដ្ឋកិច្ចឌីជីថល បានចូលរួមកម្មវិធីទស្សនកិច្ចសិក្សាស្ដីពី “ឧត្ដមានុវត្តន៍អន្តរជាតិ នៃក្របខ័ណ្ឌគោលនយោបាយ និងច្បាប់ស្ដីពីសេដ្ឋកិច្ចឌីជីថល” នៅប្រទេសអេស្តូនី ក្នុងគោលបំណងស្វែងយល់ និងដើម្បីជាគតិពិចារណា ក្នុងការកសាងក្របខ័ណ្ឌច្បាប់ និងគោលនយោបាយពាក់ព័ន្ធសេដ្ឋកិច្ចឌីជីថលនៅកម្ពុជា។ ដោយមានការសម្របសម្រួលពីសាលាច្បាប់ TalTech នៃសាកលវិទ្យាល័យបច្ចេកវិទ្យា Tallinn នៃប្រទេសអេស្តូនី គណៈប្រតិភូបាន ជួបពិភាក្សាការងារជាមួយក្រសួង-ស្ថាប័ន ចំនួន៦ រួមមាន៖ ១. Information System Authority (RIA) ២. Ministry of Justice and Digital Affairs ៣. Ministry of Economic Affairs and Communications ៤. TalTech School of Business and Governance ៥. Estonian Data Protection Inspectorate និង ៦. E-Briefing Centre។ កម្មវិធីទស្សនកិច្ចសិក្សានេះ ត្រូវបានបញ្ចប់ប្រកបដោយជោគជ័យ និងទទួលបានលទ្ធផលជាផ្លែផ្កាគួរជាទីសោមនស្ស។