Hijra Bank

ሂጅራ ባንክ በ2025/26 በጀት ዓመት በዋና ዋና የሥራ አፈፃፀም መለኪያዎች የላቀ ውጤት አስመዘገበ! ሙሉ በሙሉ ከወለድ ነፃ የባንክ አገልግሎት በመስጠት ላይ የሚገኘው ሂጅራ ባንክ በተጠናቀቀው በጀት ዓመት በገቢ እና ትርፍ፣ተቀማጭ ገንዘብ በመሰብሰብ፣ በካፒታል መጠን፣ በአጠቃላይ ሃብት፣ በውጭ ምንዛሬ አቅርቦት፣ በዲጂታል ፋይናንሲንግ፣ በደንበኛ ቁጥር፣ በቅርንጫፍ ብዛት ከመቼውም ጊዜ በላይ የላቀ ውጤት በማስመዝገብ በዘርፉ የነበረውን የመሪነት ሚና ማሰቀጠል መቻሉን ባንኩ በዛሬው ዕለት በኢንተር ሌግዠሪ ሆቴል በሰጠው ጋዜጣዊ መግለጫ አስታውቋል፡፡ የሂጅራ ባንክ የ2025/2026 በጀት ዓመት ታላላቅ ስኬቶች:- 1.     አጠቃላይ ገቢ፦ ባንኩ ከተመሠረተ ጀምሮ ባለፉት አራት ዓመታት ካስመዘገበው አጠቃላይ ድምር ገቢ (2.965 ቢሊዮን ብር) በመብለጥ የዘንድሮው ዓመታዊ ገቢው ብር 3.55 ቢሊዮን የደረሰ ሲሆን  ይህም ቀደም ሲል ከነበረው በጀት ዓመት  አንፃር የ97% ዕድገት አሳይቷል፡፡ 2.     ጠቅላላ ትርፍ፦  ካለፉት አራት ዓመታት አጠቃላይ የትርፍ ድምር  (820.7 ሚሊዮን ብር) ከአንድ ቢሊዮን ብር በላይ ብልጫ በማሳየት 1.9 ቢሊዮን በማድረስ ባንኩ ካገኘው ትርፍ አንጻር በ132% የላቀ እድገት አስመዝግቧል፡፡ 3.     የባንኩ አጠቃላይ የሀብት መጠን፦ ባለፈው በጀት ዓመት ከነበረው 14.61 ቢሊዮን ብር በአንድ ዓመት ጊዜ ውስጥ በ115% በማሳደግ ብር 31.45 ቢሊዮን  ደርሷል። 4.     ተቀማጭ ገንዘብ፦ ባለፈው በጀት ዓመት በተመሳሳይ ወቅት ከነበረበት 11.94 ቢሊዮን ብር በመነሳት በአንድ ዓመት ጊዜ ውስጥ በ101%  በማሳደግ  ብር 24 ቢሊዮን  ማድረስ ተችሏል። 5.     ጠቅላላ ካፒታል፦ ባለፈው በጀት ዓመት ከነበረበት ብር 2.42 ቢሊዮን  በ 202% (ከ2 እጥፍ በላይ) በማሳደግ ብር 7.45 ቢሊዮን አድርሷል። 6.     የውጭ ምንዛሬ ግኝት፦ ባንኩ ባለፉት አራት ዓመታት በድምሩ ካንቀሳቀሰው የውጭ ምንዛሬ መጠን የ187.6% ዕድገት በማሳየት በበጀት ዓመቱ 158 ሚሊዮን የአሜሪካ ዶላር ማግኘት ችሏል፡፡ 7.     ለደንበኞች የቀረበ  ጠቅላላ የፋይናንስ መጠን፦ ባለፈው በጀት ዓመት ከነበረው የብር 7.2 ቢሊዮን የፋይናንስ አቅርቦት በ133% በማሳደግ በበጀት ዓመቱ ብር 16.78 ቢሊዮን በላይ ፋይናንስ ያደረገ ሲሆን ይህም በሙሻረካ ብር 1.6 ቢሊዮን (9.54%)፣ በሙዳረባህ ብር 1.33 ቢሊየን (7.93%) እንዲሁም በቀርደል ሐሰን (ነፃ ብድር) ብር 341.72 ሚሊየን (2.03%) ፋይናንስ አገልግሎት አቅርቧል፡ 8.     የቅርንጫፍ ብዛት፦ ባንኩ በበጀት ዓመቱ ውስጥ 41 አዳዲስ ቅርንጫፎችን በመክፈት አጠቃላይ የቅርንጫፎቹን ብዛት 170 አድርሷል። 9.     ዲጂታል ፋይናንሲንግ፡- 3,871 ለሚደርሱ በአነስተኛና መካከለኛ ሥራ ላይ ለተሰማሩ እንዲሁም ሴቶችና ወጣቶች ያለ ማስያዣ ብር 1.5 ቢሊየን የኢሙራበሃ ፋይናንሲንግ  ማቅረብ ችሏል፡፡ 10.  ዲጂታል ባንኪንግ፡- ባንኩ በበጀት ዓመቱ የዲጂታል ባንኪንግ አጠቃላይ ደንበኞች ቁጥር 2.24 ሚሊዮን ማድረስ የቻለ ሲሆን አጠቃላይ በዲጅታል ባንኪንግ የገንዘብ ዝውውር መጠኑ ብር 41.72 ቢሊየን (የ86% ዕድገት) እንዲሁም የግብይት መጠኑ 261,982 (የ519% ዕድገት) ማድረስ ችሏል፡ 11.  ዘካና ወቅፍ፡- ባንኩ በሀገራችን የፋይናንስ ተቋማት ታሪክ ፈር ቀዳጅ በመሆን በበጀት ዓመቱ ከአጠቃላይ ትርፉ ላይ ተቋማዊ ዘካ ብር 8 ሚሊየን እንዲሁም ለወቅፍ ብር 2 ሚሊየን በማውጣት ሸሪዓዊ ግዴታውን መወጣት ችሏል፡፡ 12.  ያለትርፍ የቀረበ የፋይናንስ አገልግሎት፡ ባንካችን ሸሪዓን መሰረት በማደረግ የሚሰራ ባንክ እንደመሆኑ መጠን የመቃሲድ አል ሸሪዓ መርህን የቢዝነሱ ተልዕኮ አካል በማድረግ ዘላቂነትና ኃላፊነትን መሰረት ያደረገ ኢንቨስትመንት ላይ ያለ ምንም ትርፍ በቀርድ አል-ሐሰን (Benevolent Loan ) ከፋይናንሲንግ ፖርትፎሊዮው ብር 341.72 ሚሊየን (2.03%) የሚደርስ የፋይናንሲንግ አገልግሎት ሰጥቷል፡፡ 13.  ሐረመይን አገልግሎት ፡ ሂጅራ ባንክ ሐጅ የማድረግ ታላቅ ምኞት ኖሯቸው የገንዘብ እጥረት ለገጠማቸው ምዕመናን ልዩ የሐረመይን አገልግሎት  በማዘጋጀት ፣ ለጉዞው የሚያስፈልገውን 50% ወጪ ያለ ምንም ትርፍ (በቀርድ አል-ሐሰን) በብድር መልክ ማቅረብ ችሏል። በዚህም ልዩ ዕድል እስከተጠናቀቀው በጀት ዓመት ድረስ 35 ምዕመናን የዕድሜ ዘመን ህልማቸውን እውን በማድረግ የሐጅ ሥነ-ሥርዓታቸውን በስኬት እንዲፈጽሙ አስችሏል። በመጨረሻም በጋዜጣዊ መግለጫው ባንኩ እነዚህ ስኬቶች አውን ይሆኑ ዘንድ ድጋፍ ላደረጉ የአክሲዮን ባለቤቶች፤ የኢትዮጵያ ብሔራዊ ባንክ፣ የፌደራል እስልምና ጉዳዮች ጠ/ም/ቤትና በየእርከኑ ያለው የመጅሊስ መዋቅር፣ የባንካችን የተለያዩ ባለ ድርሻ አካላት፣  መርጠው እና አምነው አብረውት ለቆዩ ክቡራን ደንበኞቹ እንዲሁም በከፍተኛ ቁርጠኝነት ሲሰሩ ለነበሩ የዴሬክተሮች ቦርድ አባላት፣ የባንኩ አመራሮች እና ውድ ሠራተኞቹ ምስጋናውን አቅርቧል፡፡   ሂጅራ ባንክ ጉዞ ወደ ብሩህ ተስፋ!!!