أحمد عبد المنصف 🔻

أفكار بتأمل فيها في صباح يوم مدرسي منعش، وأنا بفكر: إزاي أربي ليلى بنتي في مصر؟!... أو بعبارة أعم: إزاي أربّي أنثى في مصر؟! وإزاي أصنع لها مساحة الحُرية التي أباحها لها الله جل في علاه، وحرّمها وجرّمها عُرف هذا المجتمع؟ لعل الوقت والنفسية تُسعفني وأكتب لنفسي هنا خواطر أطول عما أحلُم أن أفعله مع ليلى إذا قدَّر الله لي ولها أن نكمل ونستمر هنا... ونية المرء أبلغ من عمله.. والله المُعين ")

النهاردة الصبح، ومع بداية العام الدراسي، ظهر لي فيديو جميل لمديرة مدرسة إعدادية بنات، المديرة واقفة في الطابور بتقول تعليمات الزِيّ المدرسي للبنات بمنتهى الحزم، وبتشدد على منع المكياج داخل الحرم المدرسي، لا تقوليلي كُحل ولا معرفش إيه، مفيش مكياج لا في مدرسة ولا كلية، ولا أشوف واحدة مطلّعة قُصّة من الطرحة زي ما أنا شايفة دلوقتي، يا تتحجبي صح يا ماتتحجبيش، وتلمّي شعرك من ورا بتوكة، واللبس يكون واسع مش ضيق، ولا جينزات ولا مقطّع ولا غيره، كل الكلام ده ممنوع. . طبعا أنا أقدِّر كلام المديرة جدا في سياقنا، ربنا يبارك فيها، لكن الفيديو بالنسبة لي كان حزين جدا.. ومؤسِف جدا.. لكنه عند كثير من المصريين هيبقى جميل جدا ومُفرح و(لسه فيها حاجة حلوة أهو)، لو أنك نظرت إليه بمعزل عن السياق الاجتماعي العام! لكن تسمحولي نعمل زوم آوت شويه خارج المشهد ده؟ . هي البنت، في مصر، المفروض تتعلم الحاجات دي فين؟ والمفروض تمارسها بحرية واستمتاع فين؟ يعني فين وإمتى البنت المصرية في صغرها يتقالها: - اقلعي الحجاب.. اقلعي النقاب.. مفيش رجالة هنا.. البسي عادي، وخدي راحتك المحيط كله بنات، وحافظي على عورتك فقط التي يجب سترها قدام البنات. - خدي راحتك، فكي التوكة، افردي شعرك، وسيبي الهوا يحرّكه، واستمتعي بشعرك، وسشوريه، واصبغيه، واعملي كل الي نفسك فيه.. - حطي كُحل، وفول ميكيب يا ستي، وتعالي أقولك تحطيه إزاي، وأعلمك كل فنون المكياج والتزين والاكسسوارات وتطقيم الملابس. - ومالك متخشبة ليه كده.. جربتِ تتعلمي رقص؟.. تعالي أعلّمك! (أنا عارف إن الجملة دي فسق وفجور عند بعض الناس للأسف، وذهنهم أوتوماتيك ربط الجملة بإنها تطلع تُرقص للرجالة في الشارع أو ع تيك توك!) وأنا بشوف الفيديو افتكرت كلام زوجتي ربنا يبارك فيها، إكمنها وُلدت وعاشت في السعودية إلى أن أنهت الثانوية، وكانت بتحكيلي عن مدرستها، (مدرسة بنات) مختلفة تماماااا عن (مدرسة النبات) الي أنا أعرفها في مصر! كانت بتقولي إن النقاب كان العُرف السائد للبس البنات هناك في البلاد، كلنا كنا منتقبات.. بس مكناش منتقبات بردو! قلت لها إزاي؟ قالت لي: ما هو إحنا إمتى بنضطر نلبس النقاب أصلا؟! في المدرسة مثلا؟! إطلاقا! مجرد ما بندخل المدرسة، بنسلّم جميييع الموبايلات، الي تتقفش بموبايل في الفصل دي مصيبة وكارثة ممكن تتتفصل من المدرسة بسببها. المدرّسين والعمال والمديرة والأمن وكل مخلوق في محيط المدرسة = أنثى فقط، مفيش رجالة مطلـــــقًا! فمجرد ما بندخل المدرسة والفصول بنخلع النقاب والحجاب كمان! وكل واحدة من البنات بتكون عاملة (فول ميكَب)... والمُعلِّمة كذلك! والمُعلّمات كمان في أوقات الاستراحة أو الحصص الاحتياطية أو في حصة التدبير والاقتصاد المنزلي كانوا بيعلّمونا إزاي نحط مكياج ونتزين واللبس والطبخ وغيره.. ده غير مسائل النظافة والطهارة الشرعية للنساء الي بنتعلمها في المقررات. يعني المُعلّمة أصلا كنا بنتعلم منها الأنوثة قبل أي حاجة! في الشعر والميكب والبس والكلام والصوت والقعدة والمشية وكل شيء! وكذلك كنا بنتعلم من صحابنا الي أشطر مننا في بعض التفاصيل. وكنا بناخد حريتنا على الآخر في لبسنا وإظهار زينتنا وغيره. وعنده الخروج من المدرسة نضع العباية ونُنزل النقاب فقط! وشكرًا! طيب في الأفراح والمناسبات العامة؟! إطلاقًا بردو؛ لأنها غير مختلطة! فـ جميع الأفراح بتكون مساحة أخرى من ممارسة الأنوثة بحرية. وكذلك المطاعم في منطقتنا، لازم بيبقى فيه قسم خاص بالنساء، أقدر أشيل النقاب والحجاب حتى، وآكل براحتي. طبعا هي لما نِزْلِت مصر اتصدَمِتْ ") مش بس لأن المدرسة مابتعلّمش الكلام ده بحرص ومنهج واهتمام كما عرفت ومش بس لأن أغلب مدارس البنات مختلطة (بمعنى وجود رجال في المدرسة عمالًا أو مُعلّمين، حتى لو مفيش طلاب ذكور) ومن ثَمَّ ممنوع ممارسة مثل هذه النشاطات في وجود الرجال! ومش بس لأن أغلب الأفراح هنا مختلطة.. فيا عيني البنات ممكن تنفّس عن نفسها في ليلة الحِنَّة الي ممكن البعض يعملها ع الضيق قبل الفرح. ولا من المطاعم والمساحات العامة والحمّامات العامة وأغلب المساجد الي هي غير مُصممة لوجود النساء ومراعاة خصوصيتهنّ ابتداء! لكن الصدمة المؤلمة أكتر إن حتى داخل البيوت، البنت مش بتتعلم ده! بل في الغالب لو فكّرت تمارس أنوثتها وتجرب المكياج والشياكة والأناقة وغيره داخل بيتها أو تتخفف من الملابس قليلا... أمها بتقولها: بتعملي ده لمين؟!! أو (عيب، اختشي) أو (لما تتجوزي ابقى اعملي الي إنتِ عايزاه). بالمناسبة، الجملة السابقة بتُقال على حاجات كتييير جدا مباحة البنت في بلادنا بتطلبها من أهلها، وهم بيرفضوا وبيرصّوا الجُملة دي زي ما هي كده: (لما تتجوزي اعملي الي إنتِ عايزاه مع جوزك، هنكون خلصنا من مسئوليتك وهمّك).

. حوش حوش القلوب الي مليانة توكل يا جدعان!!! حوش حوش الأفلام والمسلسلات ومناهج التعليم والبيزنس والتسويق وإدارة الأعمال الي مليانة دروس عن الزهد والتوكل على الله وتخلية القلب مما سوى الله!! حوش حوش المولات والإعلانات واسنتجرام وتيك توك الي كلها بتقولك ازهد في الدنيا وارض بما قسمه الله وقلل احتياجاتك واستغنِ يُغنك الله!! إحنا هنهرج يا جدعان ونضحك على بعض؟!! . إحنا شاطرين بس في (بس ناخد بالأسباب بردو).. لكن التوكل ع الله والإيمان برب الأسباب ومدبر الأمر؟ = لا أكيد المعاني دي معروفة بالبداهة ومغروسة في قلوبنا بالفطرة ومش محتاجين كلام عنها لأننا زُهَّاد بالفطرة! . اعقلوها فعلا.. ومن العقل إن الواحد يفكر في آلاف الاحتمالات قبل أن يُطلق مثل هذه الإطلاقات غير الشرعية وغير العلمية وغير المنضبطة. . اعقلوها فعلا.. ومن العقل أن نُدرك معنى التوكل على الله أولا.. وأن نسعى في تعلمه نظريا والامتلاء به عمليًا/تزكويًا.. وحينها لن يضاد العقلُ التوكلَ.. ولن يتحول التوكل إلى تواكل أبدا. . اعقلوها فعلا .. ومن العقل الدعوة العامة إلى تيسير الزواج (بالمعروف).. وهذه الدعوة إسلامية بامتياز.. ولا تُوجِب التفريط في الحقوق أو المزايدة على مطالب الناس المباحة والمشروعة فيما يرضيهم من أسباب المعاش إلا أن يتنازلوا هم عنها عن طيب خاطر من باب الفضل لا المزايدة. الناس مش ناقصة يا جماعة، سيبوهم في حالهم أرجوكم.. وقولوا خيرا.. أو اكتفوا بالدعاء.. وربنا يزوج كل محتاج وييسر الحال على الجميع يا رب.

(لو مش بتقبض 10 آلاف جنيه ماتتجوزش) جملة مش هتسمعها من فقيه. ليه؟ لأن سؤال (أقبض كام عشان أعرف أتجوز؟) داخل فيه ألف عامل وعامل ممكن يغير موازين المعادلة كلها.. ● هتعيش في شقة تمليك ولا إيجار؟ ● الإيجار دي في القاهرة ولا أقاليم؟ ● لو في القاهرة: في الشيخ زايد والتجمع والزمالك..، ولا في شبرا وعين شمس والمطرية ولا إمبابة ولا دار السلام..؟ ● والأقاليم: في المدينة نفسها ولا في قُرى نائية على أطراف المحافظة؟ ● هتعيش مع أهلك أو أهلها أو في سكن قريب منهم ولا بُعاد ومستقلين بشكل كُلي؟ ● إيه مستوى الدعم والترابط والتكافل الاجتماعي والمادي في عُرف أسرتك وعيلتك؟ ● هتخلفوا ولا مش ناويين أو عندكم ما يكفيكم من الأولاد وعايزين من الجوازة دي الونس فقط؟ (آه ده أوبشن بردو لو مش واخد بالك) ● بتشتغلوا من البيت ولا من الشارع؟ ● لو شغلك برا، بعيد عن البيت ولا قريب؟ ومواصلاته قد إيه؟ ● شغلك بيتطلب اشتراكات شهرية (نت وتطبيقات ومواقع.. إلخ) ولا مفيش؟ ● إيه استهلاكك من الكهربا؟ مساحة شقتك كام؟ مستوى الإضاءة؟ كام أوضة؟ عندك تكييفات؟ عدادك عادي ولا كارت؟ ● إيه مستوى استهلاكك من الغاز والمياه؟ سخانك غاز مثلا وبتحب تاخد دُش بالساعات وتتأمل في حياتك... ولا بتقضي غرضك وتطلع؟ وقس على هذا. ● إيه مدى أولوية الإنترنت عندك؟ وإيه مستوى استهلاكك ليه؟ ● إيه مستوى اللبس بتاعك؟ وبراندات ولا عادي؟ وبتستهلك قد إيه في السنة أو في خلال خمس سنين؟ ● مراتك بتعرف تطبخ؟ ولا هتأكلك كل يوم من إيد الدليفري؟ ولو الثانية: فـ إيه أسعار المطاعم عندك ونوعية الأكل الي بتطلبوه؟ ● وأكلتكم عاملة إزاي؟ الأكلة الكبيرة بتقعد يومين ولا يوم ولا نص يوم؟ ولازم 3 وجبات في اليوم ولا وجبتين بتمشّي الدنيا مع حبة نقنقة في النص؟ والنقنقة دي بتمشي بقُرَص عادي ولا لازم مولت كيك أو قشطوطة من مطعم جنبكم؟ ● عندكم عربية ولا مواصلات عامة ولا أوبر وإخوته؟ وعلى كل احتمال منهم: إيه معدل مشاويركم الأسبوعية خارج البيت وكُلفتها؟ ● مين الي مسئولين منك في الإنفاق؟ زوجتك فقط وأولادك، ولا أمك وإخواتك معاهم مثلا وإنت رب الأسرة؟ ● عندك تأمين صحي ولا لأ؟ ● فيه أمراض عندك أو عند زوجتك أو أولادك لا قدر الله؟ وهل مزمنة؟ وإيه كُلفة الدواء؟ ● ولادك شاطرين ولا محتاجين دروس؟ وفي إيه بالظبط؟ وزوجتك عندها من العلم الي تمكّنها من المذاكرة ليهم أم لا؟ ● إيه المستوى الاجتماعي والمادي لزوجتك الي اتربت عليه قبل الزواج؟ مثلا: كانوا عايشين في فيلا أو شقة كبيرة مثلا؟ كان عندهم خادمة ديما بتساعدهم؟ ولا هي الي بتنفض البيت كل يوم بنفسها هي أو إخواتها؟ ● بتعرف تعمل أعطال البيت البسيطة ولا لو مسمار اتفك هتجيب نجار يربطه أو كهربائي يركّب اللمبة؟ ولو الثانية: فـ إيه أسعار الصنايعية في منطقتك؟ ● إيه مستوى رضاك وزوجتك وقناعتكم ورضاكم بالواقع وظروفه؟ وإيه مدى مرونتكم وتأقلمكم مع هذه الظروف إن اشتدت؟ ● عندكم تموين؟ وإيه مستوى الخزين بتاع البيت؟ سكر وزيت ورز ومكرونة عادي ولا لازم نوع معين حتى لو غالي؟ الفاكهة عادي ولا لازم أورجانيك أو في طبق متكيس؟ والبروتين نظامه إيه؟ والبيض والفراخ تمام عندكم ولا ماشيين على نظام المهلكات والعياذ بالله؟ والسمك شغال؟ وإيه نوعية اللحمة الي بتحبوا تاكلوها؟ وتقدروا تستغنوا عنها قد إيه؟ ● بتنزلوا تجيبوا الخزين من السوق ولا لازم حد بتاع دليفري أو خادم يتسوقلكم؟ ● بتنضفوا البيت بنفسكم ولا بتجيبوا حد أسبوعيا يساعدكم؟ ولا من ده على ده؟ . خمسمية سؤال وسؤال، هينبلي عليه كلام كتير.. ولا يُفصل فيها إلا في مقام الفتوى الخاصة لا الخطاب العام. ومن قلة الفقه أن نخاطب عموم الناس في كل مكان وبمختلف ظروفهم اوحتياجاتهم بما يوافق ظروفنا نحن وحاجاتنا نحن وبيئتنا نحن بزعم الواقعية! هذه واقعية زائفة متوهمة. والأهم من كل الأسئلة الي فاتت: ● إيه مستوى توكلكم على ربنا؟ لو الفلوس قلّت شويه قلبكم واستقراركم النفسي إيه وضعه؟ ● بيتكم هادي ومتناغم وسايبها على ربنا.. ولا بيضرب يقلب على خناقات الفلوس؟ ● بتتصدقوا كتير ولا ماسكين في القرش؟ . دي مش أسئلة دراويش.. سيبكم من العبط المنتشر.. يقولك (اعقلها وتوكل).. وهو طول حياته وفي مدارسه وكليته بيسمع بس عن (اعقلها بالمعنى المادي).. وعمره ما سمع كلمتين عن (توكَل) دي، ووالله ما فاهم يعني إيه توكل أصلا! بس أهو كلام بنرصه ولا عمرنا استشعرناه ولا فاهمينه نظريا حتى. . وفيه ناس دلوقتي لو إنت مابقتش عبد للفلوس وللمادة وبتحسبها بالورقة والقلم في كل لحظة، ولو فلوسك اختفت من حسابك في البنك أو نقصت يبقى احتمال تجيلك سكتة قلبية وانسداد شرايين.. لو إنت مش كده في نظره تبقى درويييش! ومش بتعقللللللللللها وتتووووكل.

الآن الأحد.. وأنت تقرأ هذه الكلمات في جميع محافظات مصر.. يجتمع الناس في مساجد ومعاهد ومكاتب تحفيظ معينة تابعة للأزهر الشريف.. يجتمعون ليقرأوا كتاب الله.. كلٌ يقرأ مما يحفظ.. ربعا.. أو جزءا.. أو القرآن كاملا!.. كلٌ بحسب وسعه. المساجد تتزين وتتعطر بكلام ربنا جل وعلا وحلقات الذِكر.. كدوي النحل! في مبادرة راائعة يُطلقها لأزهر الشريف للنسخة الثالثة؛ بعنوان: اليوم العالمي للسرد القرآني - اقرأ وارتقِ ما أبهى وأجمل مشهد كهذا والله! أكتب هذه الكلمات الآن وأنا أجلس في رحاب الجامع الأزهر، والناس مجتمعون، والنساء، والأطفال، والمشايخ أمامهم يقرأون معا بصوت مسموع في مشهد يشرح الصدور ويُطَمئِن القلوب. وُيقال أن يوم السرد ٣٠ أغسطس العام الماضي ٢٠٢٥ شارك في المباردة أكثر من ١٠٠ ألف مشارك.. وأرجو أن يزيدوا هذا العام. شكرا للأزهر الشريف.. ولفضيلة الشيخ الدكتور أحمد الطيب شيخ الأزهر.

● قلل علاقات، وعمقها، واستثمر فيها، وانتقيها بعناية، ولا ترض بما يُفرض عليك من علاقات في بيئات الدراسة أو العمل أو السكن فتُحولها إلى "صداقات" دون وعي. ● صلّ، واقضِ ما عليك من صلوات، ولا تقطعها أبدا. ●العب رياضة قتالية واتعلم سباحة. ● كل أكل صحي أو شبه صحي، وماتتخنش. ● حافظ على صحتك، وحاول ماتعياش طول ما إنت في مصر، بقدر الوسع. ● احفظ القرآن وداوم على قراءته والاستماع إليه، وكذا مع الحديث الشريف، والشعر العربيّ. ● أتقن اللغة العربية وعلومها. ● اقرأ وتعلم، ولا تتوقف عن التعلم أبدا. ● أتقن الإنجليزية، وإن زدت عليها كان خيرًا. ● ماتقارنش نفسك بحد، ولا تطلب رضا الناس، وركز في ورقتك. ● داوم على ذكر الله في كل وقت، وخاااصة الصلاة على سيدنا النبي صلى الله عليه وسلم فهي ترياق كل داء. ● اتجوز في أسرع وقت لو عندك القدرة المادية وقدرا من الوعي والخُلق. ● ابعد عن القروض الربوية، وابعد عن الديون بشكل عام، (العصر ده بيتكالب عشان يسلسلك بالديون بكل شكل)، ولو عليك فاجعل قضاءها أولويتك الأولى. ● اتعلم حرفة (نجارة-سباكة-كهربا-حدادة-صيانة أجهزة-خياطة..) تتكسب منها إن لزم الأمر. ● في الكلية: هات أكبر مجموع ما استطعت، واشترك في أنشطة طلابية وتطوعية وادخل بيئات ثقافية واجتماعية مختلفة. ● ابعد عن الشللية، أي شللية في الدين أو الدنيا.. ولا تحبس نفسك في حزب أو جماعة توالي عليها وتعادي، وخليك منصف ومعتدل ورأيك حُرّ ومستقل وحقّاني حتى لو هيزعّل الناس منك. ● ماتحرقش وقت كتير في سؤال (أبدأ منين).. ابدأ بالمتاح قدامك، والطريق بيوضح وينوّر مع كثرة الخطى. ● اتعلم مهارة تقنية (برمجة-ذكاء اصطناعي-تسويق إلكتروني- تحليل بيانات.. ). ● أتقن الأساسيات في علوم دينك على مذهب معتمد من مذاهب المسلمين المستقرة، وعلى أهل علمٍ متحققين بما يُدرّسون، ولا يغلب عليهم عقلية الشللية والصراعات، بل يكسوهم الأدب والذوق والرحمة ورجاحة العقل وغزارة الاطلاع (في علوم الدين والدنيا)، ولا تحصر نفسك في شيخ واحد، وصوت واحد، وتعلم لتفهم أولا، سواء اقتنعت واعتنقت هذا الرأي أم لا، لكن اسمع لتفهم لا لتردّ. ● ولا تحصر نفسك في علوم الدين، بل اجمع إليها ما استطعت من علوم الدنيا (الإنسانية والاجتماعية والطبيعية)، فهذا يعمّق فهمك لعلوم الدين أولا، ثم لعلوم الواقع الذي تُنزّل عليه الدين ثانيًا. ● لو عندك القدرة المادية والبدنية: خلّف كتير واعمل عزوة وأهل وسند، وتوكل على الله. ● تصدق كتير جدا جدا، في كل وقت، وبسبب وبدون سبب، وأحسن في تقديم صدقاتك بما تُحب أن يُهدى لك، وأنفق ولا تخش من ذي العرش إقلالا خاصة في الظروف المادية الصعبة التي يُمسك فيها الناس ويخافون. ● اعمل فلوس كتير، وخليك غني، واستعمل مالك فيما يُرضي الله، ويعيّشك عزيز ومستمتع بحياتك، واستثمر في جودة حياتك وراحتك، وسافر ولف البلاد، واتعرف على ثقافات مختلفة، واسع في قضاء حوائج أهلك والناس. ● خاطب أهلك في وقت التعارض بلغة العاطفة لا العقل، لا تحاول إقناعهم، حاول تطمينهم والعزف على وتر مشاعرهم لا محاججتهم. ● استشر في أمورك واستخر الله، فإذا عزمت فتوكل على الله، وتحمل قراراتك، ولا تقل ليتني، ولا تحرق وقت كبير أوي في التردد والخوف من الخطوة.. الحياة الحقيقية التي ستستمتع بها = تستلزم قدرا من الشجاعة، والمواجهة، والمخاطرة. ● اتعرف على العلوم والمجالات المختلفة، واعرف كل علم بيبحث في إيه وبيجاوب على إيه، فمعرفة مظان العلم نصف العلم. ● صاحب أهل العقل والأدب والعلم، الذين تتأدب بأدبهم وتستزيد من عقولهم وبصيرتهم، فإن لم تجدهم مجتمعين في أحدهم وهو الغالب في هذا الزمان = فاطلب من هذا عقله، ومن ذاك أدبه، ومن ذلك علمه، وخذ من كل قولٍ أحسنه. ● ابعد عن النساء الأجانب، أي العلاقات المُحرّمة أو المساحات المشبوهة، وضع بينك وبينها ألف حاجز وحاجز، وأحسن الظنّ بالناس، ولا تعرِّض نفسك للفتن. ● اهتم بأن تكون لا أن تبدو.. خليك صادق وحقيقي، خاصة في عالم الشو والزيف هذا، وحافظ على مبادئك ودينك وأخلاقك حتى لو مش هتلاقيها موضة ولا هتجيب الريتش والفلوس الأكتر ") ● ادع كتير، واستعن بالله ولا تعجز ")

البداية: الاثنين القادم بإذن الله، 17 أغسطس، الساعة 8:30 م، زوم. ملحوظة خالية من أي إكليشيهات تسويقية كاذبة: ناس كتير جدًا سألونا عن الدفعة الجديدة والحمد لله، وفيه ناس مسجّلة في هذه الدفعة بالفعل قبل هذا الإعلان = فلو بتفكر تآنسنا في الرحلة: الحق ") ولو معدّي من هنا ومهتم بالدراسات اللغوية والشرعية والإنسانية = ارمي التماسي بتعليق، ده هيساعد في ظهور البوست لمن يهتم به ") للتسجيل أو الاستفسار.. اضغط هنا: https://wa.me/201023535502 نلقاكم على خير.. ") #نحوَ_نحوٍ_مختلف #برنامج_عين_عربية

قصيدة من روائع المبدع أحمد بخيت. لكن إنشاد صديقي الحبيب إبراهيم الجاكي أضفى عليها جمالا ورونقا وسحرا آخر لا يمكن وصفه! هذه القصيدة.. وهذا الإنشاد قد يُصالحك على الشِّعر كله ") هذه القصيدة مع هذا الإنشاد.. يُعدّلان مزاجي مهما تعكّر.. ويُصلِحان أفسدته الأيام") استمتعتوا ")

وأنا فاكر بردو لما إدارة كليتنا -دار العلوم- منعت الصلاة في ممرات الكلية وطلبت من الطلبة إنهم يروحوا يصلّوا في المسجد المركزي في الجامعة، والي كان يبعد عن الكلية مسافة 5 دقائق مشي، طلعت همهمات كده تحت عنوان (غرباااء)، وشوف التغريب والإلحاد! وشوف بيحاربوا الدين وبيكرهوه إزاي وبيضايقهم منظر الصلاة إزاي! (آه والله بيتكلموا عن إدارة كلية لغوية شرعية قائم عليها مسلمون وأساتذة شريعة عادي). طيب ده ليه؟ أولًا - اضطراب في الثقة مع إدارة المؤسسة والقائمين على النُظم الإدارية واللوائح التنظيمية بوجه عام.. ودي قصة كبيرة شويه. ثانيًا - وده الي يهمني هنا: ضعف الوعي الإداري والتنظيمي للتجمعات: يعني كل واحد من الطلبة فكر في نفسه: إيه الي هيحصل يعني لو وقفت دقيقة في الممر أصلي عشان ألحق المحاضرة بدل ما أمشي 10 دقائق لمسجد الجامعة ومجهود ووقت زيادة؟ لكن محدش فكر: ماذا لو حد من زمايلك جه وقف جنبك يصلي هو كمان؟ وجه بعدهم 20 طالب وقفوا وقفلوا ممر الكلية؟! وبعد بكرة، جماعة الصلاة تبقى 50 طالب، والإمام الي فات كان بيقرأ بقصار السور، والإمام الي بعده قرر يقرأ بالمفصّل عادي.. وإمام تالت قرر يعلي صوته (ثم يرفع عليك سلاح: ها؟ هتعترض على سماع القرآن يا زنديق؟!) والجماعة الي بعدها 200 طالب، وبعدها يخلصوا صلاة ويقعدوا يختموا الصلاة، وبعدها ممكن يعملوا درس ع الضيق أي حد يطلع يتكلم فيه... كل ده في ممر الكلية.. إلخ. طبعا كل ده كان بيحصل قبل كده، والمزايدات دي مازالت بتحصل عادي، وبتحصل في المساجد عادي.. لكن محدش فكر في ده. وهنا دور الإدارة إنها توعي الناس بفلسفة اللوائح، ليه حطينا النظام ده؟! ماتكتفيش بالكلمة الماسخة بتاعة (ده سيستم المكان وشكرًا)، ودور أصحاب العقول والخبرة هنا ع السوشال إنهم يوعّوا الناس بده. -- (2) لو ضاق بك الوقت، أو لم تسعك القدرة لبلوغ مكان الصلاة = صلّ في أي مكان وجوبًا حتى لا تخرج الصلاة عن وقتها، سواء كنت راجل أو ست، وحاول تتجنب الطرقات أو ما يؤذي الناس بقدر المستطاع. ودور المجتمع واللوائح التنظيمية إنها تدعم ده، وتتسامح معاه، مش تبقى ضده، ولا تزايد على الحريص على الصلاة أو تتهمه بالورع الكاذب، ده سفه وقلة أدب، خاصة لو بنتكلم عن مجتمع مسلم يعني. -- (3) أذية الناس باسم الدين حرام شرعًا، والمزايدات عليهم في هذا حقيرة سخيفة، ومن صور ذلك: - إنك تبقى عامل في مصلحة حكومية وتأخر مصالح الناس عشان حضرتك قررت تصلي 100 صلاة فايتة من الي عليك في وقت الشغل! وجو: إيه هتمنعني من الصلاة؟! لن يشفع لك، وينبغي أن تُحاسب قانونيًا. - إنك تركب مايكروفون صوته عااالي جدا ومزعج ولازق في بيوت الناس، عشان تسمّعهم حلاوة الأذان والقرآن = ده شيء مزعج ومرفوض وسخيف، ومش علاجه إننا نهاجم الأذان أو نمنعه، لكن التوسط حلو، والعقل والرحمة حلو والله. شبه الرخم الي يجي جنب واحد نايم ويقرر يقرأ قرآن أو يذكر الله بصوت عالٍ، ولو صحي واتضايق يقوله: إنت شيطان؟ بتضايق من صوت القرآن؟! ده حلو ترزعه كفّ يتعدل على طول. -- (4) لما تصمم مول، صمم مكان لائق بالمسجد، مش خُنق في أحقر مكان وأضيقه! عظّموا شعائر الله، واجعلوا رضا الله فوق "رضا الزبون" وكل رضا! ومظاهر الدين (الصلاة - الحجاب.. إلخ) مش إخيه، ومش بيئة، وانتقاصها يعيب في عقلك ودينك وسوائك النفسيّ قبل كل شيء. ولو شايف إن مظاهر الدين هتنفر منك شريحة مستهدفة من الجمهور = فلا بارك الله لك لا في مالك ولا جمهورك ولا صحتك ولا غيره! يابني إحنا هنموت والله.. ومش هناخد مليم معاانا، كل الهيلمان ده هيروح للورثة، وإحنا هنروح للي خلقنا.. افتكر ده كويس وإنت بتصمم السيستم واللوائح وبتعمل براند لنفسك ") وافتكر قوله تعالى: {ذلك ومن يُعظِّم شعائر الله فإنها من تقوى القلوب}. -- (5) وأخيرًا هقولها تاني لنفسي والناس: لا تستهن بالسوشال ميديا في بلادنا للأسف! وأنا بقول للأسف لأن مش ده الطبيعي، مش الطبيعي إني لما أتظلم أفكر إزاي أعمل تريند عشان آخد حقي.. بس ما علينا.. في عصر التريند الي إحنا عايشين فيه بقى، حاول تذاكر شويه قانون، وتفكر إزاي تحمي حقوقك، ولو حسيت إنك ظُلمت، وصدر الحكم من محكمة السوشال ميديا الي بتجر الواقع والإجراءات وراها للأسف = ماتسكتش عن حقك، واطلع قول للناس روايتك وأدلتك، يمكن ده يعدل كفة السوشال ميديا قليلًا. وشكرًا.

تابعت التريند الأخير بتاع فتاة المول التي مُنعت من الصلاة في أحد مطاعم مول ما، وإدارة المطعم نزلت اعتذار ليها وفصلت المدير الي منعها. سمعت وقرأت روايتين للحادث، رواية من المدير نفسه الذي رُفد، مصور فيديو يحكي تفاصيل الواقعة وناشره ع صفحته، ورواية من البنت التي مُنعت ومنشور لشخص آخر يبدو إنه تدخل في تفاصيل الموضوع ويدعم روايتها، وقرأت بيانات إدارة المطعم. رواية بتقول: - مدير يتعدّى لفظيًا على امرأتين بصحبة أطفالهما، وكاد أن يتعدّى جسديًا، ومنعَهما من الصلاة في المطعم رغم إنهم استأذنوا من أحد مدراء المطعم وأذِنَ لهم، وطُردوا من المطعم، ودخلوا في صدمة نفسية وغيره، والبنتين نشروا روايتهم وانتشرت بشدة، واتقلب الرأي العام على المطعم، وعلى إثر ذلك إدارة المطعم نزلت بيان اعتذار (دون توضيح سبب الاعتذار)، وأكدوا على فصل المدير صاحب الواقعة (دون توضيح سبب الفصل) رغم إنهم بيقولوا إنه نفذ تعليمات المكان والمول. . ورواية بتقول: - بنتين، طلبوا من الإدارة يصلّوا في المطعم، فالإدارة وجهتهم لمكان المسجد الي يبعد 50 متر عن المطعم، ورفضوا الصلاة في مساحة المطعم طبقًا للوائح المكان وإدارة المول، فإحدى البنتين لم تكترث للرفض ولكلام المدير، وقالت: الله أكبر، وبدأت صلاة، فالمدير قال للتانية التي لم تصلي: هل يصح الي هي عملته؟ فقالت للمدير: إحنا جايين للمطعم مش للمول! ثم تعالى صوتها، وصوت امرأة ثالثة معها، فتعالى صوت المدير، وطلب لهم الأمن وقالهم إنتم غير مرغوبين في المكان. . ليه تريند زي ده يهمني؟ لأنه اتفتح معاه 3 ملفات ملتهبة: 1- (ملف النسوية والذكورية - لأن الضحية أنثى والجاني رجل): - ملف نسوي - ضعف الرجولة والتهجم على النساء وخطاب الكراهية ضدهن، - ملف ذكوري - استغلال السوشال ميديا لتكبيل الرجل وقطع عيشه وتصديق الضحية المرأة دون التريث للاستماع إليه. . 2- ملف (الدين ومجتمع إيجبت والأعمال) - عدم المهنية وازدراء الصلاة والشعائر الدينية عند شريحة من مجتمع إيجبت أو مجتمع رواد الأعمال، وفُتح كلامٌ عن تقديم رضا الزبون على تعظيم الشعائر كما ظهر في لغة بيان المطعم.. إلخ. . 3- ملف السوشال ميديا والمجتمع والإدارة: - ملف سُلطة السوشال ميديا الي بقت ليها السُلطان والقوة الأكبر على تحريك المياه الراكدة، والاغتيال المعنوي، وتسريع الإجراءات القانونية بشكل غير منهجي لتقديم كبش فدا وتهدئة الرأي العام. . إيه انطباعي العام عن التريند؟ 1- بيان سيئ جدًا من المطعم: - اعتذار دون توضيح سببه! تعتذرون عن ماذا؟ هل الاعتذار عن تنفيذ المدير لتعليمات المطعم والمول؟ = فلا وجه للاعتذار أصلا. أم عن سوء معاملته للزبون وإهانته واعتدائه اللفظي؟ = إن كان كذلك فيلزمه تحقيق مطوَّل أصلا، ونشوف الكاميرات ونشوف روايات الخصمين وروايات الشهود وغيره، فـ فض النزاع في مثل هذا مابيحصلش في يوم وليلة! فمش فاهم يعني إيه [ تم إيقافه عن العمل فورًا وإحالته للتحقيق تمهيدًا لاتخاذ الإجراءات القانونية والإدارية اللازمة لإنهاء خدمته] = إيه الجملة دي؟! ماهو يائما فيه تحقيق ولسه هنشوف نتيجته، يائما إنتو حققتوا خلاص ووصلتوا لنتيجة إنه مُدان وطبقتوا عليه عقوبة الفصل، لكن إيه تحوله للتحقيق وتقول النتيجة والعقوبة في نفس الجملة؟!! ويعني إيه [وذلك لمخالفته تعليمات وسياسات الشركة] وبعدها بسطرين تقولوا [تؤكد إدارة ... أن المجموعة لا تمنع أداء الصلاة بأي شكل من الأشكال، وإنما تلتزم بالتعليمات التنظيمية الخاصة بإدارة ..، والتي تنص على أداء الصلاة داخل المساجد والأماكن المخصصة لذلك بالمول، وليس داخل المحلات التجارية]. فالناس ماعرفتش بردو، هل الزبون هنا تجاوز وخالف تعليقات المول؟! = طيب فيه إدانته في البيان؟! وهل المدير التزم بتعليمات المول؟ = طيب فين توضيح ده في البيان إنصافًا للرجل؟ طيب هل العقوبة لأجل العدوان؟ أو تقصدوا بمخالفته لتعليمات وسياسات الشركة هنا عدوانه وأسلوبه السيئ؟ = طيب فين توضيح ده في البيان أو في نتيجة التحقيق؟! ولا الاعتذار عشان نلم فرشة الترنيد؟! البيان لم يُجِب عن أيٍ من هذا، وكله كلام مبهم ومضطرب ومالوش أي معنى. 2- تسرع في تصديق أحد الطرفين دون أدلة سوى الكلام: الطرفين بيقولوا روايتين فيها قدر من الاستفزاز، وفيها ثغرات ومساحة مبهمة، وكلاهما بيقولوا "الكاميرات بتثبت كلامنا" ومحدش أفصح عن الكاميرات، ولا حد من "الجمهور" شاف الكاميرات ولا دياوله، وإنما هو كلام قصاد كلام. فده يفصله جهات التحقيق مش جمهور السوشال ميديا. 3- في المواقف الي زي دي، بشوف إن أسلم حلّ: التوقف في الواقعة + وإن شئتَ الكلام فيكون عامًا عن قضايا ومفاهيم فُتحت على هامش الواقعة، فنقول مثلًا: (1) لو أنا في مكان بيوفّر لي مساحة للصلاة محترمة ومناسبة = ده تنظيم إداري محترم، وينبغي الالتزام به ما وسعني الزمان والقدرة البدنية، والمزايدات بتاعة: دول بيحاربوا الدين والصلاة = شغل رخيص وساذج.

عايز أقولكم اكتشافين وقفت عليهما مؤخرًا: أولهما - بودكاست (سهم). من حيث لا أحتسب، ظهر لي بودكاست رائع، يقوم عليه المُحاوِر الجميل الذي لم أتشرف بمعرفته من قبل لكن سعدت بالتعرف إليه Omar Amin وأنا راجل أعزّ جدا المُحاوِر الحصيف الي يقدر يدير حوارا مثمرا وممتعا في نفس الوقت، ويفتح للضيف ميدان الكلام فيما يُحب ويُحسن، ثم يترك له المساحة الكافية دون أن يزاحمه. ثم فوجئت أنّ أعزّ الأصدقاء كانوا ضيوفًا في بودكاست سهم.. أ. عمر النعماني، ود. يحيى صلاح، وأ. أيمن الشناوي، وأ. طه الأزهري، وغيرهم من الأفاضل الذين أعرفهم كـ أ. محمود سلام أبو مالك. فسعيد إن بقى عندي قائمة من الحلقات الي حريص إني أسمعها جميعًا في أقرب وقت بإذن الله. أما الاكتشاف الثاني فهو - الحبيب د. يحيى صلاح المغربي! يحيى صديق عزيز، عرفته في صحبة شيخ العمود التي ظفرت من الدنيا بها. مقابلاتنا في الواقع كانت معدودة، على جمالها وعذوبتها وخفتها على قلبي.. لكني عرفتُ يحيى هنا على الفيس كاتبًا ناقدًا مفكرًا باحثًا.. وتابعتُ جميع مقالاته لسنوات، ومازلتُ أحرص على قراءة كل حرفٍ يخطّه. طبيب بشري.. وطالب علم.. وهبه الله من رجاحة العقل، وخفة الظل، وفصاحة اللسان، وعزّة النفس، ونهم المعرفة، وسعة الاطلاع.. ما جعلني أقع في أسر قلمه وعقله، وأحاول أن أتعلم منه دائمًا ما وسعني.. وأتوقع له أن يكون من نُخبة المفكّرين والباحثين الذين سيتركون أثرًا وبصمة بارزة في صفحات الفكر العربي والإسلامي والإنسانيّ الحديث. لكن.. لأن مقابلاتنا معدودة.. ومحادثاتنا الإلكترونية شبه معدومة.. لم يتسنّ لي أن أجلس عددًا من الساعات أستمع إليه بتركيز يتحدث في موضوع بعينه.. إلى أن استمعت إلى هذه الحلقة! ولو جعلتُ للحقلة عنوانًا آخر يخصني لقلت: «اكتشفتُ صديقي من جديد»! فعلًا، الحلقة اكتشاف بالنسبة لي لصديقي العزيز، وتركت أثرًا في نفسي مازلتُ أعالجه") ربنا يبارك فيه وينفع به دومًا! أدعوكم إلى الاستماع إليها كاملة، ولاقيت حلقة جديدة كمان نزلت للدكتر هسمعها بإذن الله، واسمعوا كذلك بقية حلقات هذا البودكاست الماتع، وشجّعوا المحتوى الجميل ") رابط الحلقة وقناة البودكاست: https://youtu.be/x05RRM1tEe4?si=y4uZKcRd22ADAJ3B

إيه نظام البكالوريا المصرية الجديد الي عامل دوشة ده؟ ناس كتير جدا لسه ماتعرفش عنه حاجة، وناس كتير سألوني عن تفاصيله، فهذا ما وصلت إليه بإيجاز: ● ده نظام شبيه بنُظُم مُطبقة في بلاد كتير، وبدأ يُطبق عندنا من أولى ثانوي السنة الماضية. ● الطالب -بناءً على ملء استمارة رغبات- سيُخير من بداية أولى ثانوي، بين: بكالوريا، ولا ثانوية عامة قديم، إيه الجديد في البكالوريا؟ ● في أولى ثانوي (سنة نقل مش شهادة)، هيدرس 6 مواد ثابتة داخلة في المجموع: اللغة العربية + الإنجليزية + التاريخ المصري + الرياضيات + الفلسفة والمنطق + العلوم المتكاملة (فيزياء وكيمياء وأحياء). ومعاهم 3 مواد خارج المجموع: الدين + البرمجة وعلوم الحاسب + اللغة الأجنبية الثانية (فرنسية/ألمانية/أسبانية..). ● أما الشهادة الثانوية ومجموعها فـ هتتوزع على سنتين (تانية وتالتة مع بعض) ● بدءًا من تانية ثانوي، الطالب هيختار مسار/شُعبة/تخصص من 4: 1- مسار الهندسة وعلوم الحاسب. 2- مسار الطب وعلوم الحياة. 3- مسار الأعمال وبيزنس. 4- مسار الآداب والفنون. ● في تانية ثانوي، هيدرس (4 مواد فقط): 3 مواد ثابتة (أيا كان تخصصك) + مادة تخصصية واحدة اختيارية. ● المواد الثابتة في تانية: اللغة العربية + الإنجليزية + التاريخ المصري. ● المادة الاختيارية الرابعة: هيختار مادة واحدة فقط من مادتين، بحسب تخصصك: - مسار الهندسة = الطالب هيختار: البرمجة أو الكيمياء (أحدهما مش الاتنين). - مسار الطب = هيختار: الرياضيات أو الفيزياء. - مسار الأعمال = هيختار: المحاسبة أو إدارة الأعمال. - مسار الآداب = هيختار: علم نفس أو لغة أجنبية ثانية. بحيث كل مادة من الأربعة بـ 100 درجة = إذن مجموع تانية من 400 درجة. ● في تالتة ثانوي: الطالب هيدرس مادتين فقط داخل المجموع! آه مادتين تخصص فقط طول السنة! بجانب (الدين)، كل الشعب هتدرسه، وهو خارج المجموع، والجديد فيه إن النجاح فيه بقى من 70%. ● مادتي التخصص: - مسار الهندسة: الرياضيات والفيزياء (معا). - مسار الطب: الكيمياء والأحياء. - مسار الأعمال: الرياضيات والاقتصاد. - مسار الآداب: الجغرافيا والإحصاء. وكل مادة من الاتنين بـ 100 درجة = إذن مجموع تالتة ثانوي هيكون من 200 درجة. ● وبكده شهادة الثانوية بعاميها هيبقى مجموعها من 600 درجة. ● وأُعيد نظام التحسين من جديد، يعني الامتحانات هتُعقد أكتر من مرة، والطالب يقدر يدخل امتحان المادّة أكتر من مرة، ويختاروا الدرجة الأعلى. أول فرصة امتحان مجانية، والفرص الأخرى برسوم خاصة. - هل نظام التنسيق هيختلف؟ نسبيًا آه، ● فيه كليات هيتاح إنك تدخلها من جميع الشُعب، بحسب المجموع، مثل: اقتصاد وعلوم سياسية - الحقوق - دار العلوم - الإعلام - الآثار - السياحة والفنادق - الخدمة الاجتماعية - علوم الرياضة (تربية رياضية سابقًا) - التربية النوعية - البنات (اقتصاد منزلي) - التربية (تخصص طفولة) - فنون جميلة (فنون).. إلخ. ● أما كلية (الآداب) و(التربية) ففيهما تفصيل، بحسب المسار: - مسارات الطب والهندسة والأعمال هتُفتح لهم جميع أقسام (الآداب) باستثناء الجغرافيا وعلم النفس، - وكذا هتُفتح لهم جميع أقسام (التربية) باستثناء الجغرافيا وعلم النفس والأقسام الأدبية ذات الصلة. - لكن لو مسار آداب وفنون، هتُفتح لك جميع أقسام (آداب). وفيه كليات تقدر تدخلها من عدة مسارات: ● كليات التجارة وإدارة الأعمال وتكنولوجيا الإدارة ونظم المعلومات = ماتقدرش تدخلها من مسار الآداب، لكن تقدر من المسارات الـ 3 الباقيين. ● كليات الفنون التطبيقية، وعلوم الأرض، وعلوم البترول والتعدين، والثروة السمكية، والبنات (أقسام علوم)، والتنمية التكنولوجيا (زراعية) = تدخلها من مسارين فقط (الطب والهندسة). ● كلية الزراعة = تدخلها من مسارين فقط: - مسار الهندسة، - ومسار الطب، باستثناء تخصص الهندسة الزراعية. ● كلية العلوم = من مسارين فقط: - مسار الهندسة: تُفتح لك تخصصات رياضة. - مسار الطب: وتُفتح لك تخصصات علوم. وفيه كليات ماينفعش تدخلها إلا من مسار واحد: ● كليات لا تُفتح إلا من مسار الطب: الطب البشري + الأسنان + البيطري + العلاج الطبيعي + الصيدلة + التمريض+ معهد دراسات وبحوث تكنولوجيا السكر + تكنولوجيا العلوم الصحية التطبيقية. ● كليات لا تُفتح إلا من مسار الهندسة: الهندسة + التخطيط العمراني + الحاسبات والمعلومات والذكاء الاصطناعي + الفنون الجميلة قسم عمارة + علوم الملاحة وتكنولوجيا الفضاء + تكنولوجيا التعليم الصناعي + التربية (تخصص رياضيات). ● كليات لا تُفتح إلا من مسار الآداب: - الألسن (بشرط دراسة لغة تانية في تانية ثانوي) - وأقسام الجغرافيا وعلوم النفس بكلية آداب. ● ولا توجد كليات تُفتح حصرًا لمسار الأعمال فقط. بس يا سيدي، دي كل المعلومات الي قدرت أوصلها حتى الآن. جود نايت ")

مع كل زيادة أسعار جديدة أنا مابقتش طالب حاجة من حد، ولا منتظر من حد إنه يتكلم ويقول حاجة، ولا أحب أزايد على أي حد. لكن كل الي بقيت أطلبه: إن الناس تبطل تزايد وتسخَّف ع المواطن الغلبان! تبطل تغنيله في الرايحة والجاية: اشتغل على نفسك.. طور من نفسك.. نوع مصادر دخلك.. نمي مهاراتك.. المشكلة أكيد عندك.. محتاج تشتغل على وعيك الذاتي أكتر وتحل إساءات الطفولة لجدك التاسع عشر. مش بقولك ماتساعدوش أو اقعد اندب جنبه.. لأ والله أبدًا.. بل ساعدوا الناس ياخوانا، ساعدوهم بكل ما تملكون، وكلٌ بما في وسعه، بس ساعده بدون سخافة وجليطة وتناحة وسفاهة ومزايدات رخيصة معزولة عن واقعه الاقتصادي والاجتماعي الي هو معكوك فيه.. وبدون ما تقوله: اتحرك أنت مش شجرة!.. وسافر وابحث عن فُرص عمل أفضل!!.. أو ليه معاك لغتين بس مش خمسة؟.. وليه مش خبير في الأمن السيبراني مش فاهم؟! وشكلك مش بتعرف تدير أولوياتك ووقتك كويس!! وتحسسه إنه واقف في مكانه ومش بيعمل حاجة وفاشل! . لأن والله ناس كتير جدا حوالي بتعمل كل حاجة تقدر عليها ومش بتبطل جري.. لكن السياق المحيط مصر يحسسها إنها واقفة في مكانها مش بتتحرك!.. إذا مكانتش بترجع ورا! . ساعدوا الناس دينيا ودنيويا.. بس فهموهم إنكم مس سحرة هتحلوا لهم كل المشاكل! ساعدوهم بإنكم تحددوا لهم نطاق مسئولياتهم عن الي هم فيه: يعني فيه حاجات في حيز تأثيرنا ممكن نشتغل عليها، وفي حاجات لأ! فيه حاجات إنت مسئول عنها بدرجة ما.. وفيه حاجات بتأثر عليك بس مش مسئوليتك، ومش بتاعتك، ومش ذنبك وإنما ذنب ناس تانية، وحلها أكبر مني ومنك. ساعدوهم بس براحة عليهم.. بشويش.. لو عندك حبة علم أو مهارة أو وعي خدوا بإيديهم.. والتمسوا لهم العُذر.. وخدوهم بالحضن! لأن الي بيشوفوه ده كتير والله. الله يلطف بالناس.. الله يلطف بهم ويفتح لهم أبواب الرزق جميعًا.

اللهم من وَلِيَ من أمر أمتي شيئًا فشَقَّ عليهم فاشقُقْ عليه، ومن ولي من أمر أمتي شيئًا فرَفَقَ بهم فارفُقْ به. _ سيدنا رسول الله صلى الله عليه وسلم.

تذكير للي حابب نتقابل من الأصدقاء: سألقي اليوم -الخميس- كلمة عن الحياة الجامعية في فعالية (حيرة الكليات) لنشاط doss الساعة ١٠ ص العنوان: 6 أكتوبر - أبراج سوناتا الربيع - المحور المركزي - بعد سيتي سكيب مول، وبجوار سلفر مول. لينك العنوان: https://bit.ly/324x28T

خبرين لسه نازلين ورا بعض من ساعتين..! وأرجوك، حاول ماتألفش هذه الأخبار المفجعة وتعتبرها مكررة ومُملة.. حاول. إحنا لسه بعيد أوي.. الواحد ساعات بيحس إننا في المواقع دي بنغنّي ونردّ على بعض وبنكلّم الي شبهنا، لكن معرفش إزاي ممكن صوتنا يوصل لأهالي الطلبة دي؟! الطالب الي وصل لدرجة إنه شايف قيمته الذاتية وقيمة وجوده في الحياة وفرصه ومستقبله كله متوقف ومتمحور حول مجموع الثانوية.. بحاول أتخيل ده اتربى في أي بيئة وبين أي عقليات ونفوس؟! . يا جدعان، أرجوكم، حاولوا من بدري تربّوا حيالكم وتوصلوا لهم إنكم بتحبوهم وبتقدّروهم، وبتفخروا بيهم لذاتهم.. لذاتهم.. لوجودهم الإنساني المجرّد في الحياة.. يعني: أنا مبسوط عشان أعرف حد زيك!.. بص الوصف؟ وصف متعلق بيه مش بيك. أنا بحبك ونقطة، مش بحبك عشان جبت درجة حلوة أو طلعت الأول أو سمعت كلام ماما. ثم فخور بيك لأنك بتحاول وبتسعى وبتعافر.. سواء وصلت ولا لأ، جبت نتيجة ولا لأ، دي أمور أخرى ننظر لها بعدين بعين المراجعة والتعلم -- لكن المهم إنك بتحاول وصامد. أرجوكم.. امدحوا سعيهم.. خطواتهم.. محاولاتهم.. مش بس "نتائجهم المُرضية". علموهم إن الخطأ والتعثر ده شيء جميل جدًا ومبهج.. لأنه فرصة للتساؤل.. فُرصة للتعلم.. فرصة لاكتشاف جديدٍ في النفس وزيادة الوعي والبصيرة.. فرصة للحياة!!.. مش للموت!!! علموهم إنهم مخلوقين لوظيفة، عشان يعبدوا ربّنا سبحانه ويُبقوا ذِكرَه وحُكمَه في الأرض، وإن ربنا اصطفاهم بذاتهم، وكرّمهم، وسخّر لهم البر والبحر والكون كله ليعينهم على تحقيق رسالتهم، وأرسل لهم أكرم الخلق، رُسُل الله عليهم الصلاة والسلام لإرشادهم واستنقاذهم من حيرتهم. علموهم إنهم غاليين على ربنا أوي! إن الإنسان مخلوق عظيم عند الله، لا يُختصَر في مجموع ولا شهادة ولا شغل... يعني لما تطلبوا من ولادكم يعرّفوا بنفسهم للضيوف، ماتخليوش يكتفي بس بإن اسمي كذا، وفي سنة كذا.. علمه إزاي يتكلم عن نفسه.. اهتماماته، هواياته، تفضيلاته، أحلامه! آه علمه يحلم ويبص لبعيد مش تحت رجليه وبس. وعلمه يعبر عن آرائه الحياتية بشجاعة حتى لو غلط. وربّيه إنك أمانه وحمايته... إنه لو وقع في مشكلة تبقى إنت أول حد يجري عليه ويحكي له ويتحامى فيه، مش أول حد يجري منه لأنه هيكسّر فيه بنقده ومعايرته وتعليقاته السخيفة. ده الطريق الصعب، الي محتاج بذل مجهود حقيقي، لكن أومن إنه الطريق الصح، الي هيخلق إنسان سوي وقادر يعيش حياة أحسن وأنضج وأسعد. والله يرحمهم جميعًا ويلطف بذويهم. #الثانوية_وما_بعدها