لِــــ روح

أغرب شعور ممكن يعيشه الإنسان إنه يبص لنفسه ويحس إنه ما بقاش عارفها الحاجات اللي كانت بتفرّحه بقت تعدّي عادي والكلام اللي كان بيكسره بقى يسكت عليه كإنه اتعوّد حتى ضحكته بقت باهتة، طالعة بالعافية وروحه اللي كانت مليانة حياة بقت هادية زيادة عن اللزوم كأن في نسخة قديمة منه اختفت فجأة ومن وقتها، وهو تايه بيدوّر على نفسه

مش كل تعب بيتحكي… في تعب بيخلّي الواحد يسكت فجأة، يبعد فجأة ويهدا بشكل يخوف الناس اللي كانت متعودة على ضحكته وكلامه. أنا حاولت أفضل زي ما أنا… حاولت ما أتغيرش ما أخليش الوجع ياكل مني حاجة بس للأسف اتغيرت. بقيت أختفي من كل حاجة من الكلام من الناس، حتى من نفسي أوقات. ومحدش حاسس إن الهدوء اللي بقيت فيه مش راحة… ده تعب وصل لمرحلة السكوت. في حاجات جوايا بتوجعني كل يوم، ومع ذلك لما حد يسألني: مالك؟ بقول: “مفيش” مع إن الحقيقة… في كتير أوي، بس محدش هيحس بيه زي ما أنا حاسه

في صداع مش سببه التعب سببه الكلام اللي متقالش والضغط اللي متخزن جوا القلب تحس إن دماغك تقيلة وعيونك واجعاك وكل حاجة حواليك صوتها عالي بس محدش حاسس بيك وأوقات العياط مبيبقاش بسبب موقف بيبقى بسبب تراكم. تراكم وجع وسكوت ومحاولة إنك تبان كويس وأنت من جواك مستنزف وفي آخر اليوم كل اللي بتتمناه إن دماغك تسكت شوية، وقلبك يهدى ولو لمرة من غير وجع