Allayar bala

👋Sálem, balalar! 🎉Búgingi Hayıt bayramıńız jáne kiyatırǵan 1-iyun Xalıqaralıq Balalar kúni bayramı da qutlı bolsın! 🎁Sizlerge bayramǵa ájayıp sawǵa tayarladım. Qanday deysiz be? 📖“Kamazdıń Tikoǵa aytqanları”. Bul meniń zamanagóy erteklerim. Onı 13 jıl ilgeride sizlerdey mektepte oqıp júrgen gezlerim jazǵanman. 📚Ertekler kitabım Sizlerge unaydı degen úmittemen. Kitap jaqında dúkanlarǵa shıǵadı. 📬Oǵan shekem alaman deseńiz @AllayarDarmen ge jazsańız boladı. ✉️Bahası 15 000 sum. Kanalımızģa aģza bolıń: 🐥@Allayar_bala

🦊«Tulkishek”tiń jańa sanın kórdińiz be? 🥋🥊“Qanday sport?”

📝Scenariy avtorı Allayar Dármenov

Kanalımızģa aģza bolıń: 🐥@Allayar_bala

🦊“Túlkishek” jáne sizler menen birge! 🧩“Chellendj”

📝Scenariy avtorı Allayar Dármenov

Kanalımızģa aģza bolıń: 🐥@Allayar_bala

«Túlkishek» telejurnalınıń jańa sanı: «Nege onday?» Scenariy avtorı Allayar Darmenov 💫💫@Allayar_bala

SAYAXAT (ótirik óleń) Ayǵa sozdım qolımdı, Sazan balıq ilindi. Sazandı berdim sıyırǵa, Raxmet dedi toyıp: «ba-a». Súyir shıbınǵa kel dedim, Qara shıbınǵa minbedim, Qamshını urdım, ushırdı, Shımbayǵa kelip túsirdi. Sharbazardan shar aldım, Eki qapshıq qar aldım, Oshaqqa saldım qapshıqtı, Íssı shórek nan shıqtı. Nandı saldım dorbaǵa, Shıbandı qostım arbaǵa. Moynaqqa jettik aqırı. Teńizdiń shıqqan taqırı. Jamǵırǵa ettim qońıraw: «Tez kelmeseń bolmay tur-aw». Samalǵa bulttı sawdırdım, Eki ay jawın jawdırdım. Teńiziń toldı shúmpildep, Oynadıq sóytip áwpildek. Shıbınıma jem berdim, Ózime ózim dem berdim. Allayar Darmenov, 2025 @Allayar_bala

#Ekshembi #Túlkishek 🧤Sálem, balalar! Ekshembi dem alıs kúnińizdi kewilli ótkeriw ushın Sizlerge "Túlkishek" telejurnalınan úzindiler berip kiyatırman.

🤗Sizlerde de úyge qonaq kelgende usınday bola ma?

🐣🐣 @Allayar_bala

AQ KÓYLEGIM Aq kóylegim, aq kóylek, Kiysem júdá shaq kóylek, Abaylayman, qásterlep, Tiygizbey bir daq, kóylek.   Mektep bilim dárgayım, Talpınaman hárdayım, Alabajaq kiyinip, Tártipsiz bala bolmayın.   Ildirip bir-bir sádebin, Taza kiyiniw ádetim, Kórinedi kiymimnen, Tárbiya hám ádebim. Allayar Darmenov, 2025 @Allayar_bala

UX-PISh   Qanday sulıw awılda, Juldız sanap uyıqlaw. Peshshe shaǵar ızıldap, Iytler úrer: — «waw-waw».   «Warq-warq» der qurbaqa, Shegirtkeler: — «shır-shır», Awılǵa tek «5» baha, Pıshıq keler: — «mır-mır»…   Еh, biraq olar úkeme, Qızıq emes dá: «túsh-shsh!...», Qara, tıńla, úndeme: «Ux-pish, ux-pish, ux-pish-shsh...». Allayar Darmenov 2025 🐣🐣@Allayar_bala

MIYAWBAS Miyaw qáne, miyawım, Kerek birge oynawım. Quyrıǵınan tartqılap, Murtın tarap sıypawım. Mıyawımdı tabıńlar, Shıraqtı tez jaǵıńlar, Tabılmasa tezirek, Miliysaǵa shıǵıńlar. Uyqı qaldı bir jaqta, «Push-push», pıshıq qay jaqta? Taptıq, tappasaq bolmas, Sonday biziń miyawbas. Allayar Darmenov 2025. 🐣🐣 @Allayar_bala

#Túlkishek #Ekshembi ☃️Áziz balalar! Sizlerdiń ata-analarıńız, ájaģa-ájapalarıńız jaqsı kórip tamashalaģan "Túlkishek" telejurnalın Sizler de kórip zawıq alıń. 🎈Dem alıs kúnińiz kewilli ótsin! 🐣🐣 @Allayar_bala

QORAZBAY HÁM ORAZBAY   Jaqsı bala Orazbay, Jini tek te qorazbay. Uslap onı alajaq, Párin bir-bir julajaq.   Kórip bunı anası, Toqtattı tez balasın. — Ne qılıq bolsa tawasań, Tawıqtı nege quwasań?   — Sonda nege tań atpay, Qıshqıradı uyıqlatpay. Tınıshlıq joq jazda da, Uyıqlayıq bir az ǵana.   Allayar Darmenov 2025 🐣🐣@Allayar_bala

ALMA Batır alma tisledi, Tisley sala tasladı. Úy tapsırma, sabaǵın, Tayarlap ol basladı.   Sol waqıtta úkesi, Kelip edi baqshadan. Bir tislengen almanı, Kórdi jerde jatırǵan.   Asxanadan anasın, Dawıslap ol shaqırdı. Kórsetip almasın, «Aypón» dep baqırdı. Allayar Darmenov, 2025. 🐣🐣@Allayar_bala

ZOOPARK Buzawım móńireydi, Ílaǵım máńireydi, Ǵoqoqlaydı tawıǵım, Úydiń qası shawqım. Qoylarım «ba-a» deydi, Tayınshaq kisneydi, Anaw eshek ańqırar, Úydiń zooparki bar. Írıldaydı kúshigim, Mırıldaydı pıshıǵım, Úkem ayttı aǵama: «Aǵa, balıq baǵaman». – Kól kerek ǵoy balıqqa, Oylandıń ba, anıq pa? – Awa, awa, oylandım, Qıynalmań oǵan dım. Akvarium alamız, Balıqlardı salamız, Solay etip bizler, Balıqshı da bolamız. Sóytip úkem qatırdı, Akvarium aldırdı, Qora ishi tolıp tur, Pil aldırıw qalıp tur. 2025. Allayar Darmenov 🐣🐣🐣 @Allayar_bala

MURATINO Biziń Murat bilgish dá, Ádeti bar bir jaman: Ótirikti kóp júdá Aytıwınan qorqaman.   Jalǵandı da ırastay Isendirip taslaydı. Oynap ayttım házil dep, Keyin kúlip baslaydı.   Qoyıp berdim Muratqa, «Buratino» kinosın. Kórip bolıp bir waqta, Basladı bılay sózin:   «Ótirikti kóp aytsam, Murnım ósip kete me? Onda bunday ádetti, Búgin-aq tárk etemen!   Jaqsı jolǵa basladı, «Altın gilt – Buratino». Ótirikti tasladı, Biziń úkem Muratino.   Allayar Darmenov 🐣🐣 @Allayar_bala

SORAW-JUWAP (apası menen aqlıǵı) – Tırs-tırs túsedi? – Bunıń atı jawın. – Sarı, jazda pisedi? – Onıń atı qawın.   – Sabı aǵash, temir tis? – Bunıń atı oraq. – Qatırılǵan súzbemiz? – Bolar tatlı toraq.   – Nan pisedi ishinde? – Tandır ǵo! Taptım ba? – Shıǵar jaz keshinde? – Ol ma, súyir shıbın dá!   – Jawınnan soń kóriner? –Taptım, taptım, ayqulaq. –Biri «baa», biri «máá» der? – Biri qozı, biri ılaq.   – Otın shawar birimlep? – Baltası ǵo atamnıń. – Pul berer shúkirim dep? – Qaltası ǵo apamnıń. Allayar Darmenov 🐣 @Allayar_bala

👋Sálem, balalar! Qalaysızlar? 🤝Meniń atım Allayar. Men sizler ushın usı kanaldı ashtım. Bul kanalda Sizlerge arnalģan ózimniń ertek, qosıq, gúrriń, tımsal hám basqa da dóretpelerimdi berip baraman. 🌟Sonday-aq, sizler ushın qızıqlı shıǵarmalardı, multfilm, videoroliklerdi de dıqqatıńızǵa usınıp baraman. 💫Kanalıma aǵza bolıń hám basqa da doslarıńızdı shaqırıń. 👇👇👇 🐣@Allayar_bala