Study with hatem

هي هذا النوع من الادوية يدير احتباس سوائل لكن في الحالة تاعك بما انو لمدة 5 ايام فقط يعني مش راح يكون التاثير تاعو كبير وبالتالي ميشكلش خاطر عليك وبما انو يعني عطاهولك طبيب نظن انو عارف واش يدير فلاداعي للقلق فمدة العلاج قصيرة مش راح يكون كاين ضرر او اعراض جانبية

شوفي النقطة في الميدسين منقلكش معندهاش معنى الي يقولك هذي الهدرة يكذب عليك نقطة مهمة لكن متعكسش مستوى تاعك فممكن فقط ملقيتيش طريقة الدراسة الي تساعدك وتقدري تدي بيها ممكن الخلعة انا نعرف عباد معايا كي نكونو نقراو ولا في سطاج ربي يبارك تحسو ماجور دو برومو هاز معلومات يعرف يدير ايكزاما ويشخص نورمال مي في كونطرول نلقاهم مديين 10 ولا 11 هل هذا انو طبيب فاشل بابع لا ممكن يخاف من كنطرول ممكن قلة تركيز عادي جدا بالنسبة للكيرسيس ميتحسبش بروميار ودوزيام من طروازيام يبدا والتخصص مزال الحال باه تحكمي انك تقدريلو ولا لا ضرك انا وش نقدملك نصيحة بما انو مزال الحال اخدمي على طريقة الدراسة تاعك لانو مش راح تخسري والو ضرك

هي من حيث الصعوبة تاع ليكور لا مش صعيبة عادي جدا كيفها كيف باقي السنوات مشكل تاعها انا شارجي بزاااااف عندنا 4 اينيتي مع 5 ليموديل ونقروهم مع بعض وكي نعقبوهم ورا بعض بسناتهم غير سمانة سمانة هذي الحاجة الي مش مليحة فيها فقط اما بالنسبة للصعوبة عادي

وفيك بارك ربي يحفظك الحمدلله انك فهمتو فرحتوني بالنسبة للبيوفيزيك معنديش مصدر مي باه نديرو حاجة مليحة الي يقراها من مصدر خارجي ويعجبو يشاركو معايا باه نحطو مع زملائكم هكا باه تعم الفائدة 🤍✨

الباك تاعي ديت 16.18 وموزون 17.12 طلعت دوزيام ب11.17 وسطاجيت في chirurgie bozzoran et pneumo

هي بلاي ليست وقيل ماشي مرتبين ليكور مي راني رتبتهملكم في الاميساج الطويل هذا لول الي فيه مصادر مرتبين ثم افضل انا شخصيا يعجبني شرحها تشرح بالتفصيل متخليلكش البس هذاك تاع حاجة تسقسي عليها وتعاود باه الي مفهمش يفهم والي فهم يروكوشي معاها فنعم نظن انو يكفيوكم فيديوات تاعها تفهمو بيا الفيزيو تاع نورو

بيوفيزيك مقريتهاش مكانش عندي الوقت فيزيو قريتها من عند مريم راها حاطة فيديوات في اليوتيوب شرحها هايل وليكور الي مدارتهمش قريتهم وحدي وكاين الي اسيستيت فيهم

3éme année

بالنسبة للدورة درتها لغاية في نفسي منقدرش نخبركم سبب علاش مي كي درتها عمري ما شاركت معاهم حاجة ومحطيتهالكمش هنا بخلاف شرح تاع ليكور والي مسجلين عندي شايفين ويعرفو فالفائدة تاعي من هذه الدورة مش دراهم فقط مي انا كي يسجل عندي انسان ويبدا يقرا ويقلي ربي يحفظك وفهمت وشرحك هايل وسهلتها علينا صدقوني غير وكانو حطلي الدنيا بين يديا

ايه دايما يمدولكم سومان بلوكي قبل كنطرولات تاعكم وكاين حتى لي يمدولهم سمانتين على حسب قفازة تاع ليديليقي تاعكم

اول كوش نقرا كور تاعي نفهمو بيا وكل بارتي نقراها نعاود نسيي نشرحها لروحي باه نتاكد اني فهمتها وكي نكمل كور كامل نعاود ثاني نشرحو لروحي باه نتاكد بلي فهمتو وفي الكوش دوزيام بنفس الطريقة نحكم كور تاعي ونحاول نشرحو مرة اخرى لنفسي باه نثبت معلومات اكثر ونحل كيسيام باه نعرف علواه يركزو ليبروف وآخر كوش ندير قراءة برك للكور تاعي ونركز على الحوايج الي يجيبو عليهم كيسيام بزاف وقبل كونطرول في ليل نحل كنطرول عام ليفات باه ندي فكرة

هذا ميساج لقيت منو بزااااااااف شوفو انا كي ديت الباك تاعي كنت حاب تخصص طبي مي مكنتش محدد بين ميدسين ودونتيست ولكن كنت حاب دونتيست اكثر لانو ميقراوش بزاف وكذا مي انا صراحة كنت باغي ميدسين مي كي عادت طريق طويلة كيما يقولو محبيتش نديرها صليت استخارة ودرت ميدسين والحمدلله رغم كل الضغط الي نفوتو عليه مي مندمتش عليها بالنسبة ليا تبقى مهنة نبيلة قبل كل شيئ بالنسبة الي داروها ومش حابينها نحكيلكم حكاية حكاهالي طبيب كنت نسطاجي عندو في الصيف قالي انا كي ديت باك تاعي مكنتش باغي طوووول ميدسين مي دارنا دايما يانسيستيو عليه باه يديرها ويسييو يقنعوه ايا دارها وهو مش باغيها وبقا مش حابها حتى وهو يقرا فيها حتان كطريام كي بدا سيكل كلينيك وبدا يشوف المرضى والامراض تاعهم والي يتحسنو ويبراو حبها وعجباتو وضرك في السبيطار وين كنت نسطاجي مكانش واحد ميهدرش عليه من افضل الاطباء ربي يبارك والمرضى كامل يبغوه ويحترموه يعني ماشاء الله مي جامي شفت مرضى يحبو طبيب كيما هو سعني هذه الاشياء تبان بسيطة مي ممكن تغيرلك وجهة النظر تاعك 180 درجة

يكفيك الحال عادي حنا العام لي فات عطاونا فيها 5 سمانات برك 4 قراية وسومان بلوكي والسمانة لولة راكم عارفين دايما post controle ايا تقريبا كانو عندنا فيها غير 4 سمانات والحمدلله تقريبا اغلب برومو طلعنا وكاينو كاين نقاط ممتازة عادي جدا يعني مزال مفاتش الحال حتى اذا مزال مبديتوش طوووول مفاتكم والو مزال عندكم الوقت تقدرو تبداو تقراو وتلحقو وطلعو باذن الله

العفو هذا واجبي واقل شيئ نقدر نفيدكم بيه ان شاء الله تكونو تستفادو من هذه الصفحة والمعلومات الي نقدمها ولو بنسبة 0.01٪ مشكور او مشكورة صاحبة الرسالة هذه بارك الله فيك ولك بالمثل ان شاء الله اضعاف مضاعفة 🤍✨

منقدرش نعطيك حل جذري يعني لانو راجعة لكل واحد وكريقة دراسة تاعو قادر تكونو تتعمقو في الكور بزاف وتحوسو على تفاصيل ياسر علبيها يشدلكم وقت بزاف فكحل سييو كي تبداو تقراو ديرو but لازم توصلولو باه تحبسو قراية مثلا اليوم لازم نقرا 2 كورات متنوضوش حتى تكملوهم هكا مع الوقت راه تعودو تكملو كورات اكثر في وقت اقل

هي طويلة صح وتعيي مي مهمة دونك سييو كي تقراوها دايما حطو قدامكم مجسم 3D باه تسهللكم القراية وفي نفس وقت تساعدكم تشفاو ثاني كان حاجة كنت نديرها ساعدتني بزاااااااف في دراسة تاع اناطو الي هي الرسم كنت نرسم بزاف باه نفهم وساعدتني هكا باه تحفزو الذاكرة البصرية تاعكم وكي تخدمو نتوما حاجة تشفاو عليها افضل من انكم تشوفوها

بالطبع يكفيك الوقت تدي فوق 15 مزال الحال روكوشي بزاف خاصة اناطو فيها ليديتاي وكيسيام تاني باه تعرفو علواه يركزو ليبروف وباذن الله تديو نقطة مليحة

هو من الافضل انكم تقراو اناتو وايستو قبل فيزيو باه تجيكم ساهلة وخاصة الايستو لكن يعني اذا مقريتوهمش وبديتو بالفيزيو مش راح تواجهو صعوبة يعني نورمال

راح نحكي على تجربتي الشخصية بعيدا عن اراء الناس انا نشوف انو عدد الطلبة معندو حتى علاقة بانكم تهزو من سطاج ولا لالا الي حاب يتعلم عادي تقدرو تكزامينيو ليمالاد عادي كاش متفهموش تسقسيو ليريزيدو ليتيدي وسيميلاسيو ثاني تفهمو كامل وتسييو كامل يعني عدد الطلبة مهوش عائق في السطاج

هو او ساهل وفي نفس وقت ميجيبوش عليه بزاف هو تقريبا عبارة عن كور جينيراليتي كي شغل شوي من كلش الحوايج انواع تاع ليفيبر وكذا الي يجيبو عليهم وتحفظوهم هوما Classification des fibres nerveuses هذي الي يجيبو عليها احفظوهم واحفظو الارقام الي فيها