‌🌾‌بەفرین شەڕەفڪەندے🍃🌸

ئالان بە ڕاکێش ڕاکێش بابی لە قوڕ و چڵپاوەکە هێنابوو ئەو جێگایەی خاوێنکرابۆوە، ناتوانم بنووسم لە چ حاڵ دابووم! تەنیا لەبیرمە هەستێکی نامۆ و جەرگبڕ هەناومی ڕێکدەکوشی! دەستەکانم هێزیان هەبوو یان نا؟ نازانم! بەڵام توند لەسەر سینگیم دانا و چەند جارم  فشار دا، هەناسەم دەهات یان نا؟ نازانم! بەڵام زوو زوو تەنەفووسی مەسنووعیم دەدایە، چاوم دەیدیت یان نا؟ نازانم! بەڵام ئەو چاوی هەڵێنا و لەمنی بڕی، سەریم لەسەر ڕانم دانا، ملی بەلاوە نابوو، بەسەر ڕانم دا ڕشاوە، ئەو دەڕشاوە بەڵام ئەمن گەرووم ژانی دەکرد! ئەو چاوی تێبڕیبووم بەڵام ئەمن بۆ نەمردم؟ نازانم! وردە وردە دەموچاوی شین هەڵگەڕا و چاوە مەستەکانی لێڵ بوون، ئەمنی داماو چاوم لە لاقی کرد زیادە لە هەموو ڕۆژێک چەکمەی لە پێ نەکردبوو، کەفکێشەکەی لیتاوەکەی پێ هەڵدەلووشی لە پەنا دینامەکە فڕێ درابوو، چاوی قورس بوون، کوتم هەستە کوڕە جەنگەی خەوێ نێ نازانی زۆرمان کار هەیە! نازانم خوشکە مێردەکم بە کوێدا گەیشتێ، نازانم دایک و بابم چۆنیان زانی، چون بڕقی وانیش لەگەڵ بڕقی ئێرە وێگڕا دەڕۆیشت، ئەگەر بڕقیش ڕۆیشت خەتیش دەڕوا و تەلەیڤوون ئانتێن نادا... دیتم ئالان بە پڕتاو سواری سەمەندەکە بوو… دواتر بۆیی گێڕامەوە کە لەو جادە ناخۆشە هەر بەدەندە پێنج دەڕۆیشت، هەتا زوو بگاتە برهانی و ڕێگای باغی پێشان ئامبووڵانسکە بدات… ئەمنیش ئێستاشی لەگەڵ بێ قەت لۆمەم نەکرد و نەمکوت ڕۆڵە خۆ ئەتۆ ئێستا شەش ساڵت ماوە هەتا گەواهینامە وەرگری بۆ ماشێنت لێخووڕیوە؟ نەشمکوت بۆ وا توند دەڕۆیشتی، ئەویش قەت نەیکوت بۆ ئەوێ ڕۆژێ بڕق زووتر لە ڕۆژان هاتەوە و کاتێک زەنگمان بۆ فۆوریەتهای پزشکی لێدا بۆ وا درەنگ بەهانامان گەیشتن؟ چاوی لەسەر دێڕەکان دەترازێ کاتێک خێزانی دەڵێ: تکایە چیدی مەخوێنەوە، دەچم دووشێک دەگرم، دواتر لیباسەکانت ئوتوو دەکەم، شوویەکەی بە سەرسووڕمانەوە چاوی لێ دەکا و دەڵێ: مەگە ئوتووت نەکردبوون؟! خێزانی دمی پان دەکاتەوە و دەڵێ: بەدی بەڵام بە کەتری ئوتووم کردبوون! شوویەکەی چاوی زەق دەکا و دەڵێ: بۆ بە کەتری؟! ــ جا چت عەرز کەم؟ بڕق نەبوو، ئەمنیش لەبیرم چووبوو ئوتوویان بکەم ئەتۆش بەپەلە بووی منیش بە کەترێڕەش بۆم ئوتوو کردی و... قاقایەک لێدەدا... شوویەکەی بەسەرسووڕمانەوە دەڵێ: چی؟ بە کەترێڕەشە!؟ خێزانی بەدەم پێکەنینەوە دەڵێ: ئادی دۆینێ کە ئەتۆ لە نێو باخ بووی و بڕقیش ڕۆیبوو، ئێرەش نە شەمچەی لێ بوو، نە فەندەک کە گازەکەی پێ هەڵکەم، منیش نەمکردە نامەردی، کەترێکەم لەسەر ئاور هەڵگرت و لە پەڕۆێکم پێچا و کراسە ڕەشەکەتم پێ ئوتوو کرد! شوویەکەی پێدەکەنێ و دەڵێ خەمێ مەخۆ، شەرتە حاسڵاتی ئەوساڵم کە فرۆشت بێ منەتی دەوڵەت؛ لێرە پەنێلی خۆرشیدی دانێم بەشی ئەو دێیە بکات. خێزانی کلاسۆڕەکەی لەبن دەستی دەردەکێشێ و دەڵێ: تووخودا چیدی مەخوێنەوە. شوویەکەی ئاخێکی تاڵ هەڵدەکێشێ و دەڵێ: پێش ڕۆیشتن ئەو کورتە فیلمانەی نەرمین بۆی ناردووی بۆمنی بنێرە. خێزانی هاوکات کە فیلمەکان دەنێرێ بۆ چەند ئانێک وەبیر کارەساتەکە دەکەوێتەوە و دەڵێ: کاتێک گەیشتمە بیمارستان زۆربەی خزموکەس، کاس و وڕ بوون، ئیواش بوو دەیچریکاند و سەری خۆی دەڕنی...!چاوم بە ئالانی کەوت، خۆم گەیاندێ، فرمێسک سێڕیز و چوارڕیز لە چاوەکانی دەهاتنە خوار! لە ئامێزم گرت، توند بەخۆمەوەم گووشی، بەدەم هەنیسکانەوە کوتی: هەهـ سبەینێ هەهـ تەوللودمە هەهـ بابم قەولی هەهـ پیستی ماشێنی هەهـ پێ دابووم هەهـ قەرار بوو بچینە وێ هەهـ دادە گیان! هەهـ سبەینێ لەگەڵ تەوەللوودم هەهـ سەرەخۆشی بابمە! ئاخێکی دی هەڵدەکێشێ و دەڵێ: فیلمەکانم بۆ ناردی زوو چاویان لێ بکە و هەتا کارەبا نەپچڕاوە گووشێکەت لە شاڕژ نێ. شوویەکەی دەڵێ: قوورسایی ئەو کارەساتە هەمیشە لەسەر دڵمان دەمێنێتەوە، گووشێکەی لە گیرفانی دەردێنێ، یەکەم فیلم دەکاتەوە " باوان لەسەر کۆشی پوورە شەرمینی دانیشتووە و هەر دووکیان سەریان بە دەرکەی ئامبووڵانسەکەیەوە ناوە، پەیمان لەسەر تەختە باریکەڵەکەی نێو ئامبووڵانسەکە ڕاکشاوە، نەرمین کراسی پەیمانی هەڵداوەتەوە و دمی بە زگییەوە ناوە، باوان دەڵێ: بابەگیان! هەستە چاو لەو جادەیەی بکە، چاو بابەگیان! ئەو هەمۆ ماشێنەت لەگەڵە، چاو هەموو لەبەر تۆ هاتوون، هەستە، ئەوانە میوانی تۆن، هەستە بەخێرهاتنیان بکە!” فیلمەکەی دیکە تەنیا پێنج چرکەیە، دەیکاتەوە؛ "جەماوەرێک سەرقاڵی ناشتنی مەیتێکن..." ✍بەفرین شەڕەفکەندی