yerlan_ustaz

Білімсіздікпен адаспайық. Сақ болайық. Жақында мынадай бір жазбаны оқып қалдым: “Шындық: Ер адам өз нәпсісіне өзі жауапты. Әйелдің киімі — өз таңдауы.” Бұл сөз кейбіреулерге кереметтей әсер етіп, соған елітіп бара жатыр екен. Біз білуіміз керек: расында, әр адам өз күнәсі үшін өзі жауап береді. Ер адам өз нәпсісіне өзі жауап бергені сияқты, әйел адам да өз нәпсісі үшін өзі жауап береді. Ал енді «әйел адамның киімі — өз таңдауы» дегенге келсек, бұл — өз таңдауы емес! Бұл — Жаратушы Раббымыздың бұйрығы. Раббымыздың бұйрығына келгенде бізде таңдау жоқ. Аллаһ Тағала айтады: ﴿وَمَا كَانَ لِمُؤْمِنٍ وَلَا مُؤْمِنَةٍ إِذَا قَضَى اللّٰهُ وَرَسُولُهُ أَمْرًا أَنْ يَكُونَ لَهُمُ الْخِيَرَةُ مِنْ أَمْرِهِمْ﴾ «Егер Аллаһ және Аллаһтың Елшісі бір іске үкім берсе, онда мүмін ер мен мүмін әйел үшін ол істе таңдау жасау жоқ» (әл-Ахзаб, 36-аят) Біз бір нәрсені білуіміз керек: шариғат бір іске бұйырса, мұсылмандар: «سَمِعْنَا وَأَطَعْنَا» «Естідік және бойұсындық» дейді. Оның неге олай, неге бұлай дегеніне жол жоқ. Біз қандай да бір шариғатта парыз етілген нәрсеге амал етсек, Аллаһ бұйырды деп амал етеміз. Оның ешқандай себебін зерттеместен. Өйткені ол — құлшылық. Ал енді ғалымдар сол шариғат бұйырған үкімнің хикметін айтып жатса, ол – оның нақты себебі емес. Яғни ол себеп жойылса, сол үкім де жойылады деген сөз емес. Дәл сол сияқты, хижаптың парыз болуының хикметтерінің бірі — бөтен ердің нәпсісін қоздыру, шәһуатын оятудан сақтандыру болса, бұл хикмет орындалмай қалды деп, хижапты тастауға болмайды. Мысалы, егер еркектердің шәһуаты қозбаса, оның алдында әуретті көрсетіп жүруге болады деген сөз емес! Раббымыз бұйырды — болды. Орындауымыз қажет. Сол себепті, жасы келген, шәһуат деңгейінен өткен үлкен қарт кісі болса да, әуретін жабу — міндет. Құрметті мұсылман бауырлар! Бұл мәселеде шариғатты емес, қоғамды тыңдасақ — адасамыз. Біз мұсылманбыз. Біздің тірегіміз — Құран мен сүннет. Жеке пікірге емес, Раббымыздың бұйрығына бойұсыну — құлшылық. Білімсіз адаспайық. Сақ болайық.