dusharge1 | همت شهبازی

🔰 فلسفه‌نین اؤز آدامی وار چوخلاریمیز فلسفه دئینده ساده حیاتدان قوپاریب بیزی دوشوندوروجو حیاتا آپاراجاغی اوچون اوندان قورخوروق. بلکه ده بونا گؤره اوره‌ییمیزده دئییریک: «فلسفه‌نین اؤز آدامی وار». فلسفه‌یه قارشی گئنیش یاییلمیش احتیاطلی مناسبت، اصلینده، اونون آیدینلادیجی چتینلییندن چوخ، واراولوشسال (اگزیستانسیال) تأثیری ایله باغلی‌دیر. فلسفه عادتا مجرد آنلاییشلار، مرکّب تئرمینولوژی و نظری سیستئملرله عینی‌لشدیریلسه ده، اوندان قورخونون اساس سببی گونده‌لیک حیاتین راحات و آوتوماتیک آخیشینی پوزما پوتئنسیالی‌دیر. فلسفی دوشونجه انسانی موجود حیات فورماسی ایله اوزلشدیریر و بو اوزلشمه چوخ واخت ناراحاتلیق یارادیر. «ساده حیات» آنلاییشی بورادا درینلیکدن محروم حیات آنلامینا گلمیر؛ داها چوخ سورغولانمادان قبول ائدیلن، عادت و وردیشلر اوزرینده قورولموش یاشام فورماسینی ایفاده ائدیر. فلسفه ایسه بو آوتوماتیک‌لییی سارسیدیر. او، انسانی نییه بئله یاشادیغی، نیبه بئله دوشوندویو و هانسی دَیرلره اساسلاندیغی سواللاری ایله اوز-اوزه قویور. بو سواللار راحاتلیق یوخ، مسؤلیت یارادیر. محض بونا گؤره فلسفه چوخ واخت تهلوکه‌لی بیر فعالیت کیمی قاورانیلیر. «فلسفه‌نین اؤز آدامی وار» ایفاده‌سی بو قورخونون سوسیال دیلله ایفاده اولونموش فورماسی‌دیر. بو جمله فلسفه‌نی ائلیت، سئچیلمیش و گونده‌لیک حیاتدان کنار بیر مشغولیت کیمی تقدیم ائدیر. بئله‌لیکله، فرد فلسفی دوشونجه‌دن کؤنوللو شکیلده اوزاق دورور و بو اوزاق دورمانی نورماللاشدیریر. اصلینده ایسه بو موقع اینتئلئکتوال تواضعکارلیقدان چوخ، دوشونجه مسؤلیتیندن یایینما استراتئگییاسی‌دیر. فلسفه‌نی «باشقالارینین ایشی» کیمی گؤرمک، انسانین اؤز حیاتینی سورغولاماقدان امتناع ائتمه‌سی دئمکدیر. حال‌بوکی فلسفی دوشونجه پئشه و یا آکادئمیک ایستاتوس مسئله‌سی دئییل؛ او، انسانین اؤز واراولوشو ایله قوردوغو مناسبتین فورماسی‌دیر. فلسفه خصوصی انسانلارا عاید دئییل، خصوصی جسارت طلب ائدیر: اؤیره‌شیلمیش معنالاری ریسکه آتماق جسارتی. بو باخیمدان فلسفه‌دن قورخو پاسیو نیهیلیزمله ده علاقه‌لی‌دیر. انسان معنانین موجودلوغونو تام انکار ائتمیر، آنجاق اونون آردینجا گئتمکدن ده چکینیر. فلسفه ایسه محض بو تهلوکه‌سیز نئیتراللیغی داغیدیر. او، انسانی موقع توتماغا، سئچیم ائتمه‌یه و بو سئچیمین نتیجه‌لرینی داشیماغا مجبور ائدیر. بو مجبوریت بیر تضییق دئییل، آزادلیغین اؤزودور؛ آنجاق آزادلیق همیشه راحات اولمور. نتیجه اعتباریله، فلسفه‌نی ساده حیاتدان قوپاران بیر تهلوکه کیمی گؤرمک، اصلینده، دوشونولمه‌میش حیاتین قورونماسی جهدی‌دیر. حال‌بوکی فلسفه حیاتدان قاچیش دئییل، حیاتین اؤزونه داها دقّتلی و مسؤلیتلی شکیلده داخیل اولماقدیر. «فلسفه‌نین اؤز آدامی وار» دئییمی ایسه بو چاغیریشا قارشی قورولموش ان سس‌سیز، آنجاق ان داواملی مدافعه مئکانیزملریندن بیری‌دیر. همت شهبازی #فلسفه 🚶🚶 https://t.me/dusharge1

✍️یازماق بعضی‌لری‌ دیلی یانلیش یازماقدانسا، یازماماغی توصیه ائدیرلر. آنجاق اؤله‌زیمه‌یه طرف گئدن دیلی قوروماق اوچون اونو دایما وردیشده ساخلاماق گره‌کیر. بونون یولو ایسه یازماقدان، خصوصی ایله نثردن کئچیر. نثر، دیله کیملیک وئریر. اونون استفاده‌چیسینه ایسه ملی اؤزونو درک (خودباوری ملی) بخش ائدیر. #همت_شهبازی 🔰 Bəziləri dili yanlış yazmaqdansa, yazmamağı tövsiyə edirlər. Ancaq öləziməyə tərəf gedən dili qorumaq üçün onu daima vərdişdə saxlamaq gərəkir. bunun yolu isə yazmaqdan, xüsusi ilə nəsrdən keçir. nəsr, dilə kimlik verir. onun istifadəçisinə isə milli özünü dərk bəxş edir. H. şahbazi ☂️☂️☂️ https://t.me/dusharge1

«بیزده آنا دیلی گؤنؤنده، بو گؤنو باشقا دیلده قوتلایانلار وار.» بین‌الخالق آنا دیلی گونو، آنا دیلین قورونماسی و گلیشمه‌سینی تشویق ائتمک مقصدی داشییر. بو گؤنو باشقا دیلده تبریک ائتمک معین معنا‌دا سیمبولیک ضدیّت یارادیر: مضمون آنا دیلینی مدافعه ائدیر، فورما ایسه اونو کناردا قویور. بورادا مسئله باشقا دیللرین موجودلوغو دئییل، محض همین گؤنون آنلامسال و سیمبولیک منطیقی‌نین پوزولماسی‌دیر. بئله چلیشکیلی آنلار یاشاییر بیزیمکی‌لر. . همت شهبازی https://t.me/dusharge1

🪑 دیل، ملّتین حیاتی‌دیر دیل یالنیز «سؤز» دئییل؛ ایلگی و مناسبت واسطه‌سی دئییل؛ او، هم ده ملّتین وارلیق اساسینی تشکیل ائد‌ن بیر عنصردور. ملّتین «حیاتی‌دیر». دیلین تاریخی و مدنی ایشله‌یی اونو بیر «وارلیق» کیمی ائدیر. ملّت، ساده‌جه بیر جغرافی و یا سیاسی سیستئم دئییل؛ عینی زاماندا اورتاق مدنی یادداش، اورتاق دوشونجه و اورتاق دیل اوزرینده قورولور. دیل، ملّتین «داخیلی بیرلیینی» تأمین ائد‌ن ان اؤنملی واسطه‌دیر. او، اولمادان ملّت یالنیز سیاسی بیر قورولوش اولا بیلر، آنجاق مدنی و تاریخی وارلیق کیمی داوام ائده بیلمز. بو باخیمدان، آنا دیلینه قارشی لاقئیدلیک، ملّت اوچون «اؤزونو تانیماما»یا گتیریب چیخارار. چونکی دیل، بیر ملّتین دوشونجه سیستئمینی فورمالاشدیریر، تاریخی تجروبه‌لرینی ساخلاییر، مدنی یادداشینی اؤتورور. دیل ایکینجی درجه‌لی ساییلارسا، بو گؤره‌ولر یئرینه یئتیریلمز و ملّت «تاریخ‌سیز» بیر کوتله‌یه چئوریلر. عینی ایله بیزیم کیمی. اگر تاریخ بویو آذربایجان چرچیوه‌سینده قورولان سیاسی سیستئملر، بیر ده بو محیطده یاشاییب یازان صنعت آداملاری آنا دیللرینه «ایکینجی درجه‌لی، اؤنم‌سیز» بیر دیل کیمی یاناشماسایدیلار، اونو کوتله‌ دیلینده اوزون عؤمورلو یاشادیغی کیمی یازی دیلینده ده یاشاتسایدیلار، اوندا بیزیم ملت‌چیلییمیز ده اؤز یئرینده اولاردی. دیله اولان لاقئیدلیک، ملت اولماغا لایق اولمایان بیر توپلوما چئویره‌ر. اونا «ایکینجی درجه‌لی» یاناشما، بیر نوع آسیمیلیاسییا و یا کولونیال تأثیر دئمکدیر. آنا دیلین ایکینجی درجه‌لی ساییلماسی، ملّتین «اؤزونو درک ائتمه» قابیلیتینی ضعیفله‌دیر. اونون تاریخی یادداشینین یوخ اولماسینا، مدنی کیملییی‌نین داغیلماسینا و نتیجه‌ده ملّت‌چیلیک دوشونجه‌سینین ضعیفله‌مه‌سینه گتیریب چیخاریر. ملّت اؤز دیلینی قورویوب گلیشدیرمه‌دن، اؤز مدنیتینی ده قورویوب انکشاف ائتدیره بیلمز. بو باخیمدان، دیلین قورونماسی و انکشافی یالنیز ادبی بیر مسئله دئییل؛ او، ملّی وارلیغین قورونماسی‌دیر. بیر خالقین دیلی ایکینجی درجه‌لی حساب ائدیلنده، همین خالقین دوشونجه دونیاسی «باشقا دیله» باغلانیر، اونون تاریخی و مدنی یادداشی ضعیفله‌ییر، اؤزونو تانیماق قابیلیتی آزالیر. بئله حالدا خالق اؤز کیملیینی ایتیرمه‌یه باشلاییر. چونکی دیل، ملّی کیملیین اساس سوتونلاریندان بیری‌دیر. عینی حالدا، دیلین یازی دیلینده یاشاماسی اونون مدنی دَیرینی آرتیریر، دیلین ادبی و علمی دیلده یاشاماسی اونو ملّی اینتئللئکتوال ثروته چئویریر. اگر بیر خالق یالنیز دانیشیق دیلینی ساخلاییب، یازی دیلینده باشقا دیله کئچیرسه، او زامان همین خالقین مدنی ارثی چوخ ضعیفله‌ییر. همت شهبازی ۱۴۰۴/۱۲/۱ . موغان 🗣️🗣️ https://t.me/dusharge1

غربت دئیینتی‌لری || ناصر مرقاتی شعرلرینی سئوە-سئوە اوخودوغوم آذربایجان شاعری رحمتلیک ناصر مرقاتی‌نین «غربت دئینتی‌لری» آدلی شعر توپلوسو یاشماق سیرا کیتابلاریندا گونش قلم یاییم‌ائوی طرفیندن ایشیق اوزو گورموشدور. کیتابی ساهمانلایان حؤرمتلی مسعود اورنگ، نشره حاضیرلایان ایسه سعید موغانلی‌دیر. اثرین ۲۰ صحیفه‌لیک اؤنسؤزونو یازماق ایسه منه نصیب اولموشدور. همین اؤنسؤزده شاعیرین پوئزییاسی گئنیش شکيلده تحلیل ائدیلمیشدیر. ایكینجی اؤنسؤزو دیرلی اوستاد شاعیریمیز عزیز سلامی قلمە آلمیشدیر. کیتابین جیلد قابیغینی ایسه مهیار علیزاده آیخان ایشله‌میشدیر. امەیی کئچن هر کسە اؤز نوبه‌مده تشکر ائدیرم. شاعیریمیزین روحو شاد اولسون. همت شهبازی

📌 ساواش و انسان حیاتینین دَیری انسان طبیعتینده ماراقلار قاچیلمازدیر و ساواش (محاربه) چوخ واخت بو طبیعی ماراقلارین توققوشماسی‌نین نتیجه‌سی‌دیر. ساواش هئچ واخت تصادفی دئییل. اصلینده ماراقسیز ساواش یوخدور. هر ساواشین آرخاسیندا معین بیر ماراق و مقصد دایانیر. آنجاق بو ماراق چوخ واخت انسان حیاتینی اساس مقصد کیمی گؤرمور، چونکی ساواش، انسان حیاتینی یوخ ائدیر. باشقا سؤزله، ماراق انسان حیاتیندان اوستون توتولور. ماراقلار و مقصدلر انسان حیاتینی گؤزدن سالیر. بو، سیاسی، اقتصادی و یا ایدئولوژی ماراقلاردان قایناقلانا بیلر. انسان حیاتی‌نین دَیری یالنیز ماراقلارین حیاتا کئچیریلمه‌سی تملینده اؤلچولور. . همت شهبازی #یادداش 🐫🐫 https://t.me/dusharge1

🪑 ایکی کیتابیمین چاپینی گؤزله‌ییرم: ۱. شعرین زیروه‌سی (تنقید) ۲. فلسفه تاریخینده فلسفه: نیازی مهدی (کؤچورمه) کاغاذین باهالیغی، اوخوجونون یوخلوغو ناشیرلری ده ذوقدن سالیبدیر. بیز یازارلار دا اوزدن گئتمیریک. #ادبیات‌‌نظریه‌سی کیتابیما چوخداندی استارت وورموشام. کئچمیشلرده آرا سیرا بو موضوعدا یازدیقلاریم اولوبدور. آنجاق بو دفعه سیستئملی شکیلده یازماغا باشلامیشام. سون نفسلریدیر. هله‌لیک ۳۵۰ صحیفه‌لیک اولوبدور. آزالمایاجاق. آمما چوخالما احتمالی وار. بیز یازماغیمیزدا اولاق. ناشیرله اوخوجو اؤزلری بیلر. ۱۴۰۴/۱۱/۲۴ موغان . https://t.me/dusharge1

🪑 صونعی یوللارلا سسیمیزی بوغوروق معاصر توپلوملاردا و حاکیم ایدئولوژی‌لرین حکم سوردویو مکاندا، شخصی و کوللئکتیو ایفاده امکانلاری تئز-تئز صونعی محدودیتلر واسیطه‌سی ایله بوغولور. صونعی یوللارلا سسیمیزی بوغوروق. سسیمیزی «صونعی یوللارلا بوغماق» یالنیز فیزیکی تضییق و یا سئنزورا ایله دئییل، هم ده اجتماعی نورما، حاکیم سؤیلم (دیسکورس) و مدنی تضییق واسیطه‌سی ایله باش وئریر. انسانلار اؤز دویغولارینی، ایدئیالارینی و حتتا یارادیجیلیق پوتئنسیالینی گونده‌لیک تجروبه‌ده سیرادان چیخارمالی اولور، سانکی طبیعی سس و ایفاده منبع‌لری خارجدن اداره اولونور. ادبی و مدنی سؤیلم باخیمیندان، بو فئنومئنده دیل و سوسدورما استعاره‌لری اؤن پلانا چیخیر. انسانلارین سسی یالنیز سیاسی تضییقلر نتیجه‌سینده دئییل، هم ده اجتماعی گؤزلنتیلر و مدنی تضییقلر سببیندن بوغولور. بو، فردین صمیمی‌لیینی سیرادان چیخاریر، اونون طبیعی و یارادیجی ایفاده‌سینی «سیرادان چیخاریلمیش»، تئکنیکی و سویوق بیر فورمایا چئویریر. همت شهبازی #یادداش ☘️ https://t.me/dusharge1

🔹🔹🔹 کیتابین آدی: منیم پاییم (رومان) یازار: پرینوش صنیعی ترجومه‌چی : معصومه شوکورزاده کؤچورن: فرهاد شهبازی کیتاب ۲۰۱۰ دا ایتالیانین بوکاچیو اؤدولونو قازانمیشدیر. #کیتاب 📚📚📚📚📚 https://t.me/dusharge1 .

🔹 قانلي شرقي دوزلاق دويغولاريني دَ‌مير آياقلار تاپداياندا سازاقلار يازاجاقدير مين ‌ايلليك كدريني يارپاقلارين ساچينا. بو توزلو مئشه‌نين آراسيندا چوروموش آغاجلار دنيزدن دانيشيرلار دنيزين ووقاريندان، دالغاسيندان، گئنيش‌لييندن و يئل قانلي بوغازيلا قانلي شرقي اوخويور آغاجلارين جسدينه. گبه اللرين سنين ياغمورسوز گوندوزلرده پؤهره‌ليردي و اوره‌ييمين وورغوسونو دوشونولمز وورغويا چئويريردي دوزلاق دويغولاريملا آغلاياجاغام گئجه اوغروسو ووقاريني آپارسا دا، رؤيالاري‌نين سومويونو ابليسين گؤرونمز اللري قويلاسا دا سازاقلار سؤيله‌يه‌جك نجابتيني؛ سازاقلار يازاجاقدير مين ‌ايلليك كدريني يارپاقلارين ساچينا. . همت شهبازی #شعر 🍁🍁🍁 https://t.me/dusharge1

⭕️«روحای موغانی» افشار دوره‌سیندن اونودولموش بیر شاعر ✍️یازان: #حسین_حسن‌نژاد 🎨رسمی چکن: مصطفی پروین آذربایجانێن باشدان باشاسێ بؤیۆک – آدلێم شخصیتلر و قهرمانلارلا دوْلودور. امّا تأسفله بو شخصیتلرین چوْخو تاریخ سۆره‌جینده بیله بیله یاخود بیلمه‌دن کؤلڲه‌یه گئدیب. شۆکر اوْلسون کی، گئت – گئده بو شخصیتلرله، قهرمانلار دۆزگون تحقیقچی‌لرین زحمتیله آذربایجان ادبیاتینا قایێدیرلار.‌ افشار دوره‌سینده اوْلان شاعر جناب «روحای» سؤیله‌ییر: لاله تک محراب چیڲنینده نمازِ عشق قیل اقتدا ائتمک سنه مشقِ خیال اوْلسون بیزه «حسنعلی بن الحاجی الآغباشی الموقانی» متخلّص به روحا (روحای موغانی) عشق و عرفان دنیاسێ‌نین دیوانه‌سی هابئله اسمأ اعظم الهی‌نین وورغونو، موغان بؤلگه‌سی‌نین ایتمیش قێزیل دامغاسێ، ۱۱ و ۱۲ هجری قمری یۆز ایل‌لیکلرینده یاشایاراق، شعرلری اۆچ بؤلۆمه بؤلۆنور: 1- عرفانی شعرلر 2- استاد و مرشدی جناب سلطان "فرج" حقّینده یازدێغی شعرلر 3- اجتماعی شعرلر جناب «روحا» عرفانی شعرلری‌نین بیرینده 99 اسم، اعظم الهی‌دن آد گتیره‌رک، گؤزلجه‌سینه اوْنلارێ نظمه چکیب، بئله سؤیله‌ییر: قهر اوْلوبدور ساقدوش لطف یار عالِمینی طّی ائدیر دوْخسان سوار دوْققوز آرتێر کامل اوْلسون خیل اسم ذاتِ جان مخفی‌دی جانان آشکار نعمت عظمای دوْخسان دوْققوز آد هر بیرینده مین بیر عالَم استوار... جناب «روحا»، استادی، «سلطان فرج موغانی» مکتبیندن تأثیر آلاراق، ال‌یازماسێندا اوْنا عایید اوْلان شعرلری ده گؤره بیلریک: جّبه‌نین آلتێ نوردور، آی ایله گۆن خجیل باخیر سن هبه آلمێسان مگر حضرت نور رنگی‌سن یئتمیشه یئتمیسن، ولی دُّر یتیم عشق‌‌سن زلف سفید جعدیله کارگه‌ین قشنگی‌سن جناب «روحای موغانی» عشق دریاسێندا غرق اوْلاراق، باش گؤتۆروب سئیره چێخاراق، دوْققوز ایل شیخ صفی بقعه‌سینده اوْلور: عاکفِ دارالامان‌دَیم دوْققوز ایل چؤلده چوْپان اوْلدو سلطانِ ندار... اوْ سارابا گئدیب، ساولان اتـڲینده، اؤزصنده و اسماء الهی‌ده غرق اوْلور. تبریزده «شمس »هاواسێ باشێنا وروراراق، ترنُّم ائدیر: بیا ای شمس مهمانی ز مِی رود مغان داری بیاور شَکر نابی که در رطلش بیامیزی... روحای موغانی، عشق و عرفان دنیاسێ‌نین دلیسی اوْلسا دا، اؤز اطرافی اجتماعی مسئله‌سینه ده چوْخ آیێق اوْلاراق، بیر سێرا ظالیم خان و بـڲ ظۆلمو آلتێندا اوْلان ملّته اؤز شعرلرینده بئله تپکی گؤستریر: مالک‌المُلک اوْدور لایق هر سلطانـی یوْخدو بیر کیمسه آیێتسین یوخوسوندان خانی غُرّه‌دیر آت و عیال و دوه ایلن حَشمه فکر فاسددیر ائدیر خلقدن آلدێر قانی... «جناب روحا»نێن ال‌یازما نسخه‌سی دوْلودور تاریخ‌له اجتماعی مسئله‌لرله، فرهنگ‌له، عشق و عرفان‌لا و... بیز قێساجا سیز عزیزلره بو شخصیتی تانێتدیردیق. امّا بو عرفان دنیاسێ نهنگی‌نی تۆرک و آذربایجان ادبیاتێنا تانیتدیرماق اۆچون سیزین یاردێملاریزا احتیاجێمیز وار. بیز اؤز تاریخمیزی یازماساق، باشقاسێ بیزه تاریخ یازاجاق. «دیوان اشعار ترکی و فارسی روحای موغانی» کئچن آیلار (یایلێق الیازما گروهو) و «سعداله دنیوی مغانلو»نون زحمتلریله اێشیق اۆزو گؤرۆبدور. @SancaqDergisi https://t.me/Sancaq_media/8042

پریزدئنت نه شفاف‌دی!!! . بئله بیر مئساژ تلفونوما گلدی. بونو خبرلرده ده ائشیتدیم: معاون ارتباطات دفتر رئیس‌جمهور: با دستور رئیس‌جمهوراسامی و مشخصات کلیه جان‌باختگان حوادث تلخ اخیر بصورت علنی منتشر می‌شود. این اقدام پاسخ روشنی به جعلیات و آمارسازی‌‌هاست. دئییرلر کی، اؤلن‌لرین سایینی شیشیردنلر وار. آنجاق بو گون (۹ بهمن) تاریخینده دولتین رسمی اعترافینا گؤره، ایندییه‌دک ۲۳ مین انسان (حربی و مولکی انسان) حیاتینی ایتیریب. بو قدر انسانین اؤلومو آز رقم دئییل. بو، ۲۳ مین محو ائدیلمیش حیات، ۲۳ مین داغیدیلمیش عائله، ۲۳ مین یاریمچیق قالمیش گله‌جکدیر. بوتون بونلارا باخمایاراق، پریزدئنت پزشکیان بو فاجعه‌نی اؤزونو دوغرولتماق اوچون استفاده ائدیر، سانکی بؤیوک بیر «اوغور» الده ائدیبمیش کیمی داورانیر. وطنداشلارا گویا فخرله مئساژ گؤندریر کی، اؤلن‌لرین «دوغرو سایی» اجتماعی‌لشدیریله‌جک و بو آددیم «ساختا معلوماتلارا جاواب» کیمی تقدیم اولونور. سانکی اساس مسئله اینسانلارین نییه اؤلدویو دئییل، ایستاتیستیکانین (آمارین) نئجه تقدیم اولوناجاغی‌دیر. حال‌بوکی بو رقمین اؤزو بئله فاجعه‌وی درجه‌ده بؤیوکدور. بونو رقملرله اؤرت-باسدیر ائتمک مومکون دئییل. بو قان، ایستاتیستیکا ایله یویولا بیلرمی؟! مسئله‌یه «سیاهی» کیمی باخماق اؤزو ده فاجعه‌دیر. عموماً بیر چوخلاری اوچون — او جمله‌دن پرئزیدئنت اوچون ده — بو رقم بلکه ساده‌جه ایستاتیستیک گؤستریجی‌دیر. اما اینسان اؤزونو اؤلن‌لرین عائله‌لرینین یئرینه قویسا، آنلایار کی، بیر نفرین اؤلومو بئله آغیر درددیر، لعنت کیمی‌دیر. بیر-بیرینه دوشمن اولموش آذربایجانلا ائرمنیستان آراسیندا گئدن ۴۴ گونلوک ساواشدا بو قدر اینسان اؤلمه‌میشدی. اونلار بیر-بیرینه قارشی سیلاحلی ایدی، حربچی ایدیلر، دؤیوشوردولر، سیلاح توتموشدولار و بارماقلاری تَتیکده (ماشا) هز زامان دایانیردی. بس بوردا نئجه؟ بیر طرفده الی‌یالین، مدافعه‌سیز اینسانا آتش آچانلار بیر آنلیق بئله دوشونمه‌دیلرمی کی، همین گولـله‌نین دَیدییی اورک، صاباح اونلارین اؤز دوغمالاریندان بیری اولا بیلر؟ . https://t.me/dusharge1

یوز ایلده بو قدر انقلاب؟! انقلاب و حرکاتلارین اساس مقصدی توپلومون قورولوشونو دییشدیرمک، ظلم و استبدادی آرادان قالدیرماقدیر. آنجاق، کوللئکتیو مقصدلر فردی احتراصلارلا توققوشدوغو زامان انقلابین نتیجه‌سی غیرمعین اولور. معاصر تاریخده باش وئرن انقلابلار زامانی فردیت‌چی روحون حاکم اولماسی، کوللئکتیو روحون داواملی‌لیغینی سارسیتمیشدیر. حاکمیتین فاجعه‌سی و حکمرانلیق احتراصی، دیگر انسانلاردان اوستون اولما ایچ‌گودوسو، همیشه فردی استبداد و مطلقیت‌چی دوشونجه‌لرین ماهیتینده اولوب و بیر شکیلده باشقالاری اوزرینده اوستونلوک الده ائتمه‌یه چالیشمیشدیر. هر کس باشقاسیندان امتیاز آلماق آرزوسوندا اولموشدور. آیدین‌دیر کی، انسانین انسان اوزرینده حاکمیتی اولمادیغی، حیسیاتلا حرکت ائتدییی و باشقاسینا حاق تانیدیغی -و حتتا بو حاق یوخدورسا، یاراتماغا چالیشدیغی- حاللاردا، قارشیلیقلی آنلاشما، دینج بیرگه‌یاشاییش، هومانیزم و دیگر بیر انسانین وارلیغینی درک ائتمه ایسته‌یی اراده‌لره حاکم اولموشدور، یوخسا زوراکی و مطلق دوشونجه‌لرین حکمرانلیغینا یئر اولمامیشدیر. معاصر ایران تاریخینده‌کی دییشیک‌لیکلرده ده حاکم اولان وضعیتین دییشمه‌سینده بیر نوع کوللئکتیو روح اولموشدور. آنجاق انقلابلارین غلبه‌سیندن سونرا فردی ایستکلر و ذوقلر، انقلابلارین کوللئکتیو روحونو پوزموشدور. عکس حالدا، ایرانین یوز ایللیک تاریخینده بو قدر انقلاب، حرکات و قیاملار باش وئرمزدی. آخی بیر ملّتین نه قدر ائنئرژیسی و گوجو وار کی، هر دؤورده و زاما‌ندا موجود وضعیتی دییشدیرمه‌یه چالیشسین؟ بو دا گؤستریر کی، وضعیتین دییشدیریلمه‌سی کیفایت دئییل؛ بئله بیر دییشیک‌لیک، توپلومون سیستئملی بیر قورولوشا چاتماسی اوچون تک‌باشینا یئترلی اولمامیشدیر. چونکی غلبه‌دن درحال سونرا چوخلوقچو دوشونجه و روح، فردی مطلقیت‌چی دوشونجه طرفیندن آزدیریلمیشدیر. https://t.me/dusharge1

kayb olan vətən https://www.etekyazi.com/kayib-olan-veten/ .

من بیلمیرم بیزیم سیدحیدر بیات، فیلتئرشکنین، اینتئرنئتین یوخلوغوندا، تلگرام صفحه‌سینده نئجه دال‌بادال یازی پایلاشیر؟!! دئییرلر ۱۳۵۷ انقلابی زامانی، موغاندا بیر نفر شعار وئریرمیش کی: شاه ایراننان گئتمه‌سه بیز ناخیرا گئتمه‌ریک . من ده دئییرم: تا بیزیم سید، تلگراما نئجه کئچدیینی دئمه‌یینجه، من ده تلگرامدا یازی پایلاشمایاجاغام!!! . @dusharge1 .

دویغوساللیغا قاپیلمادان دئمک اولارکی، آذربایجان، مشروطه حرکاتیندان باشلایاراق سون یوز ایلین ایچینده اشتراک ائتدییی بوتون مدنی، اجتماعی و انتئلئکتوال حرکتلرده اودوزوبدور. بو حرکت و انقلابلارین آراسیندا سونرادان اؤزونه بلا اولان بیر سیرا خوشاگلمز آخینلارا دا ایستی مناسبت گؤسترمیشدیر. مثلا تاریخی فاکتلار گؤستریرکی، رضاشاهین حاکمیته گلمه‌سینی ان چوخ آذربایجانلی‌لار دستکله‌دی. اونون وعد ائتدییی «جمهوریته» ایناندیلار. آذربایجانلی‌لار طرفیندن آلمانیادا چاپ اولونان «ایرانشهر» درگیسی‌نین ایرانچی آیدینلاریندان توتموش تبریز بازار آداملارینا قدر گئنیش بیر سوسیال طبقه اونو مدافعه ائتمیشدیر. حتتا قاجار شاهی احمدشاهین ۱۳۰۲-جی ایلده آوروپادان ایرانا قاییتماسینا مانع اولماق اوچون تبریز تاجیرلری رضاخانا (او زامان باش ناظر ایدی) مکتوب یازمیشدیلار. https://www.etekyazi.com/ar/kayb-olan-veten/

🐫 چاره‌سیزلیک و ملّتین باتاقلیغی . چاره‌سیز قالان بیر ملت هر گون داها دا باتاقلیغا یووارلانار. چاره‌سی اولمایان بیر ملّت، یعنی اجتماعی، سیاسی و اقتصادی پروبلئملردن چیخیش یولو تاپا بیلمه‌ین بیر توپلوم، زامان کئچدیکجه داها دا درین بحرانلارا سوروکلنیر. بو، یالنیز بیر ملّتین تاریخی و یا جغرافی وضعیتی ایله دئییل، هم ده اونون رهبرلیک، بیلیک و وطنداش فعال‌لیغی ایله باغلی‌دیر. بیر ملّت یالنیز قیسا مدت‌لی تدبیرلرله و یا سماوی دَییشیک‌لیکلرله اؤز پروبلئملرینی حل ائده بیلمز. اگر قورولوشسال اصلاحاتلار حیاتا کئچیریلمزسه، هر گون یئنی چتین‌لیکلر و تضییقلر اورتایا چیخار، اجتماعی و اقتصادی باتاقلیق درینلشر. بو باخیمدان، چاره‌سیزلیک هم فردلرین، هم ده توپلومون روحی دورومونا تأثیر ائدیر: اومید ایتیر، جهدلر و فعالیت‌لر آزالیر، یئنیلیکچی ایدئیالارین حیاتا کئچیریلمه‌سی چتین‌لشیر. ملّتین حرکت قابیلیتی ضعیفله‌ییر، و یالنیز استراتئژی و مقصدیؤنلو تدبیرلر سایه‌سینده بو «باتاقلیق»دان چیخیش یولو تاپماق مومکوندور. بئله‌لیکله، چاره‌سیزلیک ملّتین اؤزونو برپا ائتمه قابیلیتینی محدودلاشدیریر، اونو داها دا ضعیفله‌دن و درینلشدیرن بیر دؤوره سوروکله‌ییر. تاریخی تجروبه گؤستریرکی، یالنیز کوللئکتیو شعور، بیلیک و مقصدیؤنلو فعالیت یعنی ملّت اؤز پروبلئملرینی آنلاییب اورتاق حل یوللاری تاپماقلا ملّتی بو وضعیتدن خلاص ائده بیلر. ✍️همت شهبازی 🪑 https://t.me/dusharge1

«توی دا اولسا تویوغون یاسی‌دیر، یاس دا اولسا …» تویدا، تویوق کَسیلیر. یاسدا، یئنه تویوق کَسیلیر. شرایط دییشیر، اما قوربان دییشمیر. ضرَری چَکَن عینی طرفدیر. حادثه نه اولورسا‌ اولسون، اذیتی چَکَن دییشمیر. بو تویوق، هئچ بیر وضعیتده دیری قالمایاجاق. https://t.me/dusharge1