𝑬𝒙𝒑𝒓𝒆𝒔𝒔𝒊𝒏𝒈 𝒇𝒆𝒆𝒍𝒊𝒏𝒈𝒔

ခြောက်ခြားဖွယ်ည ရေကျသံ တစ်တောက်တောက်နဲ့ ခြောက်ခြားဖွယ်ညတည... ခြေသံတွေအလား လေသံတွေအလား ကြားနေရတဲ့ ခြောက်ခြားဖွယ်ညတည... အမြင်တွေထဲ အမှောင်တိကျသွားခဲ့တဲ့ ခြောက်ခြားဖွယ်ညတည... တိတ်ဆိတ်မှုသာ လွှမ်းခြုံထားတဲ့ ခြောက်ခြားဖွယ်ညတည... အရိပ်တွေအလား လူတစ်ယောက်အလားနဲ့ ခြောက်ခြားဖွယ်ညတည... နာရေးအိမ်မှာ သရဲခြောက်တဲ့ ညအလား... လူသေရှိတဲ့ အိမ်ထဲ နေနေရတဲ့ ညအလား... အိပ်ရှေ့က မည်းမည်းကြီးက သရဲအလား... လူအလား... ခြောက်ခြားဖွယ်ညတည... တရားရွတ်သံများနဲ့အတူ ခြောက်ခြားဖွယ်ညတည... ခြံထဲ လူရိပ်တွေ့လို့ ထွက်ကြည့်မိကာမှ သေးထွက်မတတ် ပြေးခဲ့ရတဲ့ ခြောက်ခြားဖွယ်ညတည... ဘုရားစာမှားရွတ်မိတဲ့ ခြောက်ခြားဖွယ်ညတည... ခြောက်ခြားဖွယ်ညတည ခြောက်ခြားဖွယ်ညတည ခြောက်ခြားဖွယ်ညတည သရဲကြောက်တာ အပြစ်ဖြစ်ခဲ့ရတဲ့ ခြောက်ခြားဖွယ်ညတည။ - လိပ်ပြာ

တွေးကြည့်ဖူးလား တစ်နေ့မှာ အချစ်ဦးနဲ့ လွဲပြီးနောက် ထာဝရ လောကကြီးကို နှုတ်ဆက်ရတဲ့အခါ ကိုယ့်ရဲ့ နာရေးမှာ လာချတဲ့ လွမ်းသူ့ပန်းခွေဟာ တစ်ချိန်က ကိုယ်မပိုင်လိုက်ရတဲ့ အချစ်ဦးနဲ့ သူမရဲ့ လက်ရှိခင်ပွန်းတို့ နာမည်လေးနဲ့ ဖြစ်နေမယ်ဆိုတာလေ။ - လိပ်ပြာ

ပညာဟူသည်၊ နတ္တမည်ပင် တည်တံ့ဉာဏ်ဦး၊ ထည်ဝါထူးလည်း အရူးစကား၊ ယုံကြည်ထားမူ အလားတူဟန် ဉာဏ်မဲ့တည်း။ -အံ့လွန်းပျို

ပွဲတော်တွေဟာလည်း ပျော်စရာမကောင်းတော့ပါဘူး။ ဒို့ခေါင်းပေါ်မှာ ကောင်းကင်ကြီးဟာ လွတ်လွတ်လပ်လပ်မှမဟုတ်တာ ။ -မောင်ချောနွယ်

ငယ်ရွယ်မှုတွေဟာ ငွေနဲ့ပြန်ရှာလို့မရတဲ့ အရာတွေ....။ - လိပ်ပြာ

အလွမ်း တမ်းတမ်းတတ လွမ်းနာကျ ဘဝအစဉ် လွမ်းမိပင်။ -အံ့လွန်းပျို

အသက်ရှင်နေရခြင်းမှာ ဝန်ကင်းချင်တယ်။အများအကျိုး အတွက်ဆိုရင်တောင် တစ်ခါတစ်လေ ကိုယ့်ကိုယ်ကိုယ် ပြန်ငဲ့ရမယ်။ ငါဟာ ချောက်ကမ်းပါးစွန်းမှာ...။ -အံ့လွန်းပျို

ကဗျာစာစဉ်အမည် - အချစ်ကိုအဓိပ္ပာယ်ဖွင့်ဆိုခြင်း

ကဗျာစာစဉ် - ၆ လူငယ်မှန်ရင် အချစ်နဲ့ဘယ်ကင်းကွာဖူးပါ့မလဲ။ ကိုယ်ကြုံတွေ့ခဲ့ရတဲ့ အချစ်ဆိုတဲ့အရာကို ဘယ်လိုများအဓိပ္ပာယ်ဖွင့်နိုင်မလဲ။ ဒီတစ်ခါမှာတော့ အရင်စာစဉ်တွေနဲ့မတူဘဲ အချစ်စာစဉ်လေးမလို့ ကလောင်ကြီး/ငယ်မရွေး ပါဝင်ရေးသားကြဖို့ ဖိတ်ခေါ်လက်ကမ်းလိုက်ရပါတယ်ခင်ဗျာ...🌀။ ကဗျာစာမူပိတ်သိမ်းချိန် - ၂၈ရက်နေ့ ည ၉နာရီ ကဗျာစာစဉ်အတွက် ကဗျာစာမူများကို @Alp_ll2010 ဒီအကောင့်ဆီ ပေးပို့နိုင်ပါပြီခင်ဗျ။ -ကဗျာဗဟိုပြု စာပေကလပ်စည်း #poetry_series #A_poetryhub #literary_club

လေနှင်ရာလွင့်တဲ့ လေလွင့်ရွက်ဝါလေး တစ်ရွက်ကို ငါ့အတွက် ရောက်လာတဲ့ ကံကောင်းခြင်းလေးလိုမျိုး တန်ဖိုးထားပေးခဲ့ပါတယ်...။ -အံ့လွန်းပျို

လူတိုင်းဟာ မခွဲခွာချင်ပဲလည်း ခွဲခွာရတာတွေရှိတယ်။ အနာဂါတ်အကြောင်းပြောရင်း အတိတ်တွေကို ပြန်တွေးရင်း ခွဲခွာသွားရသူတွေလည်း ရှိတယ်။ ချစ်တဲ့ လူနဲ့လည်း ခွဲရသလို မုန်းတဲ့ လူနဲ့လည်း ခွဲကြရပါတယ်။ မေရဲ့ အုတ်ဂူလေးမှာ ထီးမိုးပေးချင်တဲ့ အတိတ်က မောင်ကတော့ ထာဝရခွဲခွာသွားပြီ။ မိုးလည်း တကယ်မနိုးတော့သလို ပန်းကလေးတွေထက်လည်း ဆွေဆွေပိုလှတယ်လို့ သီဆိုသူဟာ မရှိတော့ဘူး။ ‌သေသွားသူတိုင်းဟာ နာမည်မကျန်ခဲ့ကြပါဘူး ဒါပေမဲ့ မေ့ရဲ့ မောင်ကတော့ ထာဝရမနိုးတော့မဲ့ မိုးထဲ နာမည်ကျန်နေရစ်ခဲ့တယ်။ အတိတ်တွေဟာ လှပခဲ့သလား မလှပခဲ့သလား မသေချာပေမဲ့ တစ်သက်လုံးတော့ သတိရနေမှာသေချာပါတယ်။ - လိပ်ပြာ - အမှတ်ရခြင်းကဗျာ ၂၄ရက်၊ ၈လ၊ ၂၀၂၆ [ ၉နာရီ ၄၂မိနစ် မနက် ]

အချစ်ခံရဖို့ ချစ်တာမဟုတ်ပေမဲ့ အပြစ်ခံရဖို့လို့လဲ မရည်ရွယ်ပါဘူး။ ရခဲ့တာကတော့ ဥပေက္ခာတွေချည်း...။ -အံ့လွန်းပျို

မရှိမဖြစ် ဆိုတာမျိုး တကယ်ရှိခဲ့တယ် အသက်။ မင်းမရှိလို့ မဖြစ်တာမဟုတ်ဘဲ မင်းရှိမှဖြစ်မယ့် အခိုက်အတန့်မျိုး ငါ့ဘဝမှာလဲ ရှိခဲ့တယ်။ -အံ့လွန်းပျို

တံခါးမရှိ၊ ဓားမရှိ ကော်ဇောခင်းလို့ စောင့်နေသူမို့ ရွှေရှိဖို့၊ ငွေရှိဖို့မလို သူရှိရင်ပဲ ပြည့်စုံပါပြီ။ -အံ့လွန်းပျို

National Crush Day မင်းကိုချစ်တာ တစ်ရက်မဟုတ်ဘူး အသက်ရဲ့ တစ်သက်ကွ တစ်သက် ဒါကြောင့် ဘယ်လိုမှ ရုန်းလို့ မရတော့သလို ရုန်းဖို့လည်း မဖြစ်နိုင်တော့ဘူး အသက်ရေ။ - လိပ်ပြာ

အမျိုးအတွက် စွန့်ဝံ့သူ ချစ်တဲ့သူငယ်လေ . . . သူငယ်ချင်းကောင်း သွေးသောက်တို့လေ . . . ။ တိုက်ပါရလို့ တိုက်ရလျှင်လဲ ဗမာအရှင်၊ တို့သခင်မျိုး မျိုးရိုးဂုဏ်ထက်၊ ဓားရေးသွက်သည့် ဗမာဘက်မှသာတဲ့။ ကိုင်ပါရလို့ ကိုင်ရလျှင်လဲ ကျောက်ကြီးကျောက်ငယ်၊ ခုနစ်သွယ်တို့ စီခြယ်အပ်သည့်၊ ရွှေထပ်ထားတဲ့ ယိမ်းနွဲ့ပါးဓားမှသာတဲ့။ စွန့်ပါရလို့ စွန့်ရလျှင်လဲ ဘိုးဘွားတို့ချွေး၊ အသက်သွေးနှင့် တို့မျိုးဇာနည်၊ ထီးနန်းတည်ထောင် ဗမာပြည်ကြီးမှသာတဲ့။ ရန်သူတို့လည်းချောင်းသွေး၊ ခြေဆေးချင်တယ်လေး။ -ဒေါင်းနက်

အဝါရောင်အိပ်မက်တွေ ဟိုးအဝေးတစ်နေရာဆီက ချစ်ရသူဟာ ကိုယ့်ရဲ့ အိပ်မက်ထဲ တိုး‌ဝင်ရောနှောလာခဲ့လေရဲ့။ အဝါရောင်လမ်းတွေ ထက်က မြို့ငယ်လေးဆီ ကိုယ့်အိပ်မက်တွေဟာ ဝိုးတဝါး တိုးသွားလို့ မင်းကိုမြင်မိပါတယ် အသက်။ ပထမဆုံး အိပ်မက်ဟာ ပုဂံရဲ့ နေထွက်ချိန်ကစတယ်... မင်းရဲ့ လက်ဖဝါးနုနုတွေဟာ ကိုယ့်ရဲ့ ညိုညက်ညက်လက်ဖဝါး တစ်စုံနဲ့ ထပ်တူကျနေလေရဲ့။ ဒုတိယအိပ်မက်ဟာ ကိုယ့်ရဲ့ လေထဲက တိုက်အိမ်မှာ တည်ပါတယ်... တူညီမှုတွေဟာ မင်းရဲ့ ဖြူနုနုလက်ဖဝါးတွေကို ကိုယ်ကဆုပ်ကိုင်ထားတယ်ဆိုတဲ့ အရာ‌ပါပဲ။ သန်းခေါင်ယံအချိန်တွေမှ အိပ်တတ်တဲ့ ကိုယ့်ရဲ့ အိပ်မက်ထဲ ‌မနက်လင်းခါစရောင်ခြည်နဲ့ အတူ မင်းဟာခိုဝင်တိုးဝှေ့လာတယ်... ဖြူနုနုလက်တစ်စုံကတော့ အိပ်မက်တိုင်းရဲ့ မပါမဖြစ်ပေါ့။ စိတ်ကူးနဲ့ပဲ ပုံဖော်ကြည့်ခဲ့ဖူးတဲ့ မျက်နှာသွင်ပြင်လေးဟာ အိပ်မက်ထဲမှာ တစ်စတစ်စဝင်ရောက် တိုးဝှေ့လာတဲ့ အခါ ကိုယ့်ပျော်ရွှင်ခြင်းဟာ မင်းဖြစ်ကြောင်း သိခဲ့ရပါတယ်။ လေထဲရေးဆွဲဖူးတဲ့ အိပ်မက်လေးတွေကိုလည်း ကိုယ့်စိတ်အစွဲဟာ သန်းခေါင်းယံနဲ့ နေထွက်စ အချိန်တွေမှာ ငြိတွယ်တတ်တယ်ထင်ပါရဲ့။ မင်းဟာမပြောင်းလဲဘူး မင်းရဲ့တည်ရှိခြင်းဟာ ဘာဆို ဘာမှ မပြောင်းလဲခဲ့ပါဘူး။ ကိုယ်ကတော့ မင်းဆိုတဲ့ တည်ရှိခြင်းထဲကို အတင်းဝင်ရောက်ခဲ့သူမလို့ တယိမ်းတယိုင်နဲ့ပေါ့။ မဆုံဖြစ်တော့တဲ့ လမ်းတွေလို့ မှတ်ယူမိတဲ့ ညတွေရှိခဲ့ဖူးတယ်... မျက်ရည်တွေနဲ့ အတူ အိပ်စက်ခဲ့ရတဲ့ ညတွေရှိခဲ့ဖူးတယ်... ဒါပေမဲ့ အရာအားလုံးကို အဝါရောင်အိပ်မက်တွေက သန့်စင်ခြယ်သပေးပါတယ်။ ပုဂံပြည်ရဲ့ နေဝင်ချိန်နဲ့ အသက်ရဲ့ ဖြူနုနုလက်ဖဝါးဟာ ကိုယ့်ရဲ့ အတွေးတွေကိုတောင် ပြောင်းလဲနိုင်တယ်။ မင်းက အဲ့လောက်ထိကို ကိုယ့်ဘဝအတွက်‌အရေးပါခဲ့ပါတယ်။ ယိုင်နဲ့နဲ့ကိုယ်က အဝါရောင်အိပ်မက်တွေထဲ မင်းနဲ့ အတူဆိုတာနဲ့တင် နိုးထရခြင်းတွေဟာ အဓိပ္ပါယ်ရှိသလို အိပ်စက်ချိန်တွေကလည်း အဓိပ္ပါယ်ပြည့်ခဲ့ပါတယ်။ ချစ်ရခြင်းမှာ ပိုင်ဆိုင်ဖို့ ရယူဖို့ထက် မင်းရဲ့ အပြုံးပန်းကလေးတွေပဲ လိုအပ်ပါတယ်။ မင်းက ကိုယ့်အိပ်မက်ထဲ ညတိုင်းလိုလိုတိုးဝှေ့လာတယ်.. ကိုယ့်အိပ်မက်တွေထဲ အဝါရောင်လမ်းကလေးကိုလည်း မြင်ပါတယ်။ အပြုံးတွေ... ပါးချိုင့်ခွက်လေး... ဖြူနုနုလက်ဖဝါးလေး။ အိပ်မက်ထဲက ကြင်နာသူဟာ တကယ်တမ်းမှာ နာကျင်စေသူဆိုတာကိုတော့ ဘယ်သူမှ မရိပ်မိကြဘူးထင်ရဲ့။ ပျော်ရပါတယ်... ငိုလည်း ငိုရတယ်... ဒါပေမဲ့... ကျေနပ်တယ်... ကျေနပ်မိတယ်။ ချစ်တယ်.. ကြိုက်တယ်... သဘောကျတယ်..လိုချင်တယ် ဆိုတာထက် ပိုတယ် အသက်ရဲ့။ ကိုယ်က မင်းကို မြတ်နိုးတာ ကမ္ဘာပေါ်က မိန်းမတွေထဲကမှကိုယ်က မေမေပြီးရင် မင်းကို အမြတ်နိုးဆုံးပဲ။ အဝါရောင်အိပ်မက်တွေနဲ့ အိပ်စက်ရတဲ့ ညတွေမှာ မင်းကို ဒီအကြောင်းတွေ တဝကြီးထိုင်ပြောခဲ့ပါတယ်.. ကိုယ်ပြောခဲ့ရပါတယ် အသက်။ လူတွေက ဘဝမှာ မချစ်သင့်တဲ့ လူကို ချစ်မိသွားတတ်ပါတယ်။ ဒါပေမဲ့ အဲ့ဒါက အမှားမဟုတ်ကြောင်းတော့ ချစ်မိသူတိုင်း မသိကြဘူး။ - လိပ်ပြာ ၁၇ရက်၊ ၈လ၊ ၂၀၂၆ [ ည ၉နာရီ ၁၀မိနစ် ]

ခုနောက်ပိုင်း ကဗျာတွေရေးတာ နည်းသွားပြီး social media မှာ အရမ်းတွေ့လာရတယ်နော် ပုံတွေ အရမ်းတင်လာပြီး ကော်ဖီလည်း ဖြတ်ထားတယ်နော်လို့ ပြောလာတဲ့ အခါ ကိုယ့်ကိုယ်ကိုယ် ပိုချစ်တတ်လာတာပါလို့ ညာပြောမယ်။ - လိပ်ပြာ