Oxygen 🫀

إنّك تبعد عن الأشخاص والحاجات اللي بتأذيك، ده نُضج. إنّك تعرف إمتى تقول الحاجة دي ما تستاهلش مُعافرة، ده نُضج. إنّك ما تبقاش مهتم تعرف اللي بيتقال عليك في غيابك، ده نُضج. إنّك تفهم إن مش كل حاجة تستاهل عتاب، ولا كل موقف يستاهل جدال، ولا كل معركة تستاهل الفرهدة اللي مش جايبة همّها، ده نُضج. النُضج مش إنك تبقى فاهم الدنيا كلها، لكن إنك تعرف إمتى تتكلم، وإمتى تسكت، وإمتى تبعد، وإمتى تسيب الحاجة تمشي من غير ما تستنزف نفسك. النُضج حاجة مُهمة جدًا في مشوار سلامك النفسي، ويا بخت اللي نضج وفهم الدنيا بدري.

الشغل بيستهلك أغلى نعمتين (الصحة والوقت).. وبالتالى لازم مقابل النعمتين دول على الأقل تطلع بحاجه من تلاتة: .Make Money -1 .Make experience -2 .Have fun -3 يا تعمل فلوس ، يا تعمل خبرة ، يا إما تكون سعيد فى شغلك على الأقل.

أحيانًا الإنسان بيتعب من نفسه أكتر ما بيتعب من الدنيا. من دماغه اللي مبتسكتش، ومن توقعاته اللي مبتخلصش، ومن الصورة اللي حاططها لنفسه ومش قادر يوصل لها. يتعب من إنه عايز يبقى أحسن، بس كل ما يتحسن شوية يرفع السقف أكتر. يفضل يبص لورا فيحاسب نفسه، ويبص لقدام فيقلق، ويبص لغيره فيحس إنه متأخر ينجح، فيفتش عن اللي ناقص. يغلط، فيفضل يعاقب نفسه يتأخر، فيقارن نفسه باللي سبقه. ويقف، فيفتكر إنه ضاع. المشكلة إن الإنسان ساعات مش بيعيش حياته.. بيعيش في تقييم مستمر لحياته كل خطوة بيحاسبها، وكل قرار بيراجعه، وكل مرحلة بيقارنها بصورة مثالية هو نفسه اللي اخترعها وبين كل ده، ينسى يعيش. لحد ما يبقى مش عارف يستمتع بحاجة، ولا يرضى بحاجة، ولا حتى يعرف هو عايز إيه. وساعتها تكتشف إن بعض التعب مش محتاج إن الدنيا تتغير.. محتاج إنك تبطل تحط نفسك طول الوقت تحت الاختبار

حلو إنك تكون بتتعامل مع شخص يحسسك إنك مُميّز ويميزك عن غيرك فعلاً، مثلاً ميبقاش عايز يرد على حد ويرد عليك أنت، يخبي الموضوع الفلاني عن الجميع ويحكيلك، ميبقاش له مزاج يخرج او يعمل حاجة ولو أنت عرضت عليه يغيّر رأيه، فكرة إن اللى قدامك يستثنيك عن غيرك بشكل فعلي لوحدها قادرة تبسطك لمُجرد إنك مهم وغالي على شخص ما لدرجة إنه بيتطمن و بيرتاح معاك اكتر من أي حد تاني وده ملوش غير تفسير واحد؛ إنه مبيحبش قدك♥️ ....

ابعد .. عن الناس القاسية وحط تحت كلمة قاسية ١٠٠ خط اللي مالهمش عزيز ولا غالي ابعد .. عن اللى شايف غلطته صغيره أو شايف نفسه مابيغلطش، انت مش ناقص كفايه زمنك عليك ابعد .. عن اللى تسامحه مره واتنين ويكرر غلطه، بيبقى فاكر نفسه أذكى منك وانك مابتحسش ابعد .. عن اللى ف شدتك عمرك ما لاقيته ابعد .. وبس .. ما تبصش وراك تانى .. صدقني اللى هيخسرك مش هيعوضك تانى

في وقت من حياتك هتكتشف إنك مش محتاج تثبت نفسك لحد ولا محتاج تشرح كل خطوة في حياتك اللي بيحبك هيفهمك حتى لو سكت واللي مستني غلطة منك مش هيرضيه أي تبرير عشان كده عيش براحتك ومتدخلش كل معركة ومتردش على كل كلمة وخلي أفعالك هي اللي تتكلم عنك لأن في ناس مهما شرحتلها مش هتفهم وفي ناس هتفهمك من نظرة واحدة وفي النهاية أهم حاجة إنك تكون راضي عن نفسك وعارف إنك بتعمل اللي عليك والباقي سيبه على ربنا والأيام كفيلة إنها تكشفلك مين كان صادق ومين كان مجرد وقت وعدى .

عارفين لما تقول سرك لحد وتكون واثق فيه وتحس إن اللي بينكم عمره ما هيطلع بره وبعدين تلاقي حد تالت بيقولك نفس الكلام اللي أنت حكيته لا وكمان تتعاير بيه بجد دي كانت من أوحش الصدمات اللي ممكن أعدي بيها مش عشان السر نفسه قد ما هو عشان الشخص اللي ائتمنته على حاجة وجعتك هو نفسه اللي خلاها كلام على لسان ناس تانية من ساعتها فهمت إن مش أي حد بنحبه أو بنثق فيه ينفع نحكيله كل حاجة لأن في ناس بتحفظ سرك وناس بتحفظه لحد ما تحتاج تستخدمه ضدك

أنا عارف إن بيعزّ عليك تشوف مشاعرك وتضحيّاتك بيروحو على الفاضي بسبب ناس ما عرفتش تقدّر اللي عملته عشانهُم ولا فهمو قيمة وجودك؛ بس نصيحة بلاش تلوم نفسك وبلاش تندم على حاجة حلوة عملتها، لإن لو حتى الزمن رجع بيك من تاني هتتصرّف بنفس الطريقة وبنفس جدعنتك لإن ببساطة دا إنتَ. (الشيخ الشعراوي) بيقول: "لا تندموا على حب أو معروفٍ أو خيرٍ قدمتموه لأحدهم ولم يكن يستحقـه، كونوا دائمًا مُعتزين بنقاء قلوبكم وإيَّاكم أن تلومُوا طهارتكُم".

نصيحتي متستعجلوش على مستقبلكم ومتحكموش عليه من الفترة اللي أنتوا عايشينها دلوقتي لأن مش كل تأخير معناه فشل ومش كل طريق طويل معناه إنك مش هتوصل يمكن تكون دلوقتي مش فاهم أنت رايح فين ومش شايف نتيجة لكل التعب اللي بتعمله بس صدقني كل خطوة بتاخدها حتى لو صغيرة بتفرق في الشخص اللي هتبقى عليه بعدين ومتقارنش نفسك بحد وصل قبلك لأن كل واحد ليه وقته وظروفه وطريقه الخاص بيه ومتخليش نجاح غيرك يحسسك إنك اتأخرت أنت مش متأخر أنت بس لسه في طريقك وخليك فاكر إن اللي أنت عايشه دلوقتي مش هو كل حياتك الظروف بتتغير والناس بتتغير والفرص بتظهر في أوقات أنت مش متوقعها ويمكن الحاجة اللي نفسك فيها دلوقتي متتحققش بالشكل اللي كنت متخيله بس تلاقي بعدها حاجة أحسن بكتير اهتم بنفسك واتعلم وابني نفسك واحدة واحدة حتى لو محدش شايف تعبك دلوقتي لأن هييجي وقت هتبص ورا وتفهم إن كل حاجة عدت عليك كان ليها سبب وإن التعب اللي كنت فاكره ملوش لازمة كان بيجهزك لحاجة أكبر المستقبل مش محتاج منك تعرف كل حاجة من دلوقتي هو محتاج منك بس إنك تكمل ومتستسلمش ومتخليش فترة صعبة تحكم على حياتك كلها لأن ممكن جدا تكون الأيام اللي أنت شايفها دلوقتي أصعب أيامك هي نفسها البداية لحاجة عمرك ما كنت تتخيل إنها تحصل ربنا يطمن قلوبكم🤍

أنا اقتنعت إن اللي مكتوبلي مش هيفوتني، وإن اللي خرج من حياتي مكنش خسارة زي ما كنت فاكر.. يمكن شخص مشي، أو فرصة راحت، أو باب اتقفل في وشي، وأنا وقتها زعلت.. بس دلوقتي فاهم إن مش كل حاجة بنخسرها كانت خير لينا. فبطلت أندم على اللي فات.. وبقيت مؤمن إن اللي ليا هييجي، واللي راح كان لازم يروح...

العشم أكتر حاجة مُمكن تزعلك؛ لما تتعشّم في حد دا معناه إنّك بتربُط روحك وسعادتك ومودك العام بشخص مُعيّن فلو الشخص دا خذلك قلبك هيتقهر وهَتُقع على جدور رقبتك، يبقى كان ليه من الأول؟ لازم تبطّل عشم وما ترفعش سقف توَقُعاتك في الناس عشان لما تحصل دقّة نقص منهُم ما تاخُدش بالك أصلًا لإنّك في الأساس مش مستنّي منهُم حاجة، إحنا في زمن مَحدّش فيه بيسند حد، إنتَ سند نفسك.. خليك عارف كدا كويس.

اِتعلم لما تلاقي نفسك كمالة عدد بالنسبة لشلة من الناس.. مترضهاش على نفسك

الدنيا مش هتديك كل اللّي نفسك فيه، دايمًا هتحطك في اختبار.. وتقولك: اختار هتكسب حاجة، وفي المقابل هتسيب حاجة هتختار راحة بالك، فتخسر ناس هتختار طموحك، فتتنازل عن وقت وحاجات بتحبها وهتختار قلبك أوقات، حتى لو عقلك كان شايف غير كدا الحياة مش إنك تاخد كل حاجة، الحياة إنك تعرف إيه اللّي يستاهل تختاره.

الشخص اللي ما بيعرفش يتحكم في دموعه دا مش شخص ضعيف ولا بيمثل، في ناس ربنا خلقها عفوية وحساسة لدرجة إنّهم لو سمعوا خبر وحش عن حد ما يعرفهوش بيحطو نفسهم مكان الشخص دا وبيتأثرو عشانه، هُما كدا وطبعهم كدا والموضوع مالوش عِلاقة بالأڤورة ولا التصنُّع؛ النوع دا من الناس بيحمل صِفة الأنبياء والصحابة وبيتقال عنهم: "رقة القلب".

تنازُلاتك الكتير وإنّك دايمًا بترضى بالقليل دا مش هينجّح عِلاقتك زي ما إنتَ فاكر ولا الطرف التاني هيشيلك على كفوف الراحة؛ بالعكس إنتَ كدا هيتداس عليك وحقوقك اللي المفروض فرض عليهُم هتلاقي نفسك بتشحتها وبتترجاها وبرضو مش هتطولها! وبمرور الوقت هيتداس عليك أكتر وحتى لما تتوجّع ما حدّش هيهتم لصوت وجعك من الأساس لإنّك مش متشاف أساسًا. ولو مش مصدّق بُص حواليك هتلاقي نماذج كتير بالغت في عطائها وتضحياتها وفي الأخر قلوبهم اتكسرت وإتداس عليهم حرفيًا.....

بعدت عن اي حاجه مش شبهي اخترت نفسي المرادي ومعنديش استعداد اخسرها عشان اي حد. نفسي ثم نفسي ولو اختياري لنفسي انانيه ف (It’s Oky)💗.

أنت المسئول الوحيد عن مصيرك.. محدش هينقذك لو إنت مستسلم، ومحدش هيحققلك أحلامك لو إنت مش مستعد تسعى وتتحمل وتدفع الثمن. متلومش الظروف، ولا الناس، ولا الحظ.. لأن في النهاية، قراراتك هي اللي بتحدد طريقك. اختار صح، اشتغل على نفسك، اتحمل نتائج اختياراتك، ومتستناش حد يديك الحياة اللي إنت نفسك فيها. إنت صاحب القرار.. وإنت اللي هتحدد هتوصل لفين.

«الساعة هتعرفك الوقت.. أما الوقت فهو اللي هيعرفك الناس»

التقدير فعلًا مفعوله زي السحر.. بيخلي الواحد يعمل أصعب حاجة وهو مرتاح، لمجرد إنه حاسسّ إن تعبه متشاف ومتقدر الإنسان ممّكن يشيل جبال بحب، لكن صعب يشيل حباية قمح وهو حاسس إنه مجبر ومحدش مقدّر مجهوده التقدير بيخلّي الناس تكمل وتدي أكتر، وغيابه بيخليهم يبعدوا حتى لو كانوا بيحبوا اللّي بيعملوه.

أنا مش محتاج أرد على كل ظلم اتعرضتله، ولا أبرر كل حاجة اتقالت عليا.. كفاية إني عارف إن ربنا شايف وعارف الحقيقة كلها. ربنا عارف كل كلمة اتقالت في غيابي، وكل موقف اتحطيت فيه غصب عني، وكل مرة سكت فيها وأنا قادر أتكلم، وكل وجع شيلته جوايا ومحدش حس بيه. عارف مين ظلمني، ومين صدّق كلام مش حقيقي عني، ومين خذلني وهو عارف الحقيقة، ومين اختار يبعد وهو عارف أنا كنت بعمل إيه عشانه. وعشان كده بطّلت أرهق نفسي في إثبات حقي للناس.. وسيبت كل حاجة لربنا، لأنه أعلم بالقلوب، وأعرف بالتفاصيل، وأعدل في الحكم... ﴿وَاصْبِرْ لِحُكْمِ رَبِّكَ فَإِنَّكَ بِأَعْيُنِنَا﴾....