አሻራ Technology™

አውሮፓ የኤአይ ሱፐርኮምፒዩተር መሠረተ ልማትን ለማስፋፋት 390 ሚሊዮን ዩሮ በጀተች ሮይተርስ እንደዘገበው አውሮፓ የሰው ሰራሽ አስተውሎት የኮምፒዩቲንግ መሠረተ ልማቷን በከፍተኛ ሁኔታ ለማስፋፋት ከፈረንሳይ የቴክኖሎጂ ኩባንያ ቡል (Bull) ጋር የ390 ሚሊዮን ዩሮ የግዥ ስምምነት ተፈራርማለች። ውሳኔው አህጉሪቱ በታዳጊው የዲጂታል ቴክኖሎጂ ዘርፍ የውጭ ጥገኝነትን ቀንሳ የራሷን የቴክኖሎጂ ሉዓላዊነት እንድታረጋግጥ ትልቅ አስተዋጽኦ አለው። በዚህ ስምምነት አማካኝነት አውሮፓ ለአርቲፊሻል ኢንተለጀንስ ሞዴሎች ስልጠና እና ለሳይንሳዊ ምርምር ወሳኝ የሆኑ የኮምፒዩቲንግ ሲስተሞችን እና ሰርቨሮችን ትገነባለች። በፈረንሳይ እና በመላ አውሮፓ የኢንዱስትሪ ማዕቀፍ ውስጥ የሚከናወነው ይህ የሃርድዌር እና የሶፍትዌር ማሻሻያ አህጉሪቱ ከዓለም አቀፍ የቴክኖሎጂ ተወዳዳሪዎች ጋር ያላትን ክፍተት እንድትሞላ እና የፈጠራ ስራዎችን እንድታሳድግ ያስችላታል።

የኢራን ተመራማሪዎች በብርሃን አማካኝነት የካንሰር ሕዋሳትን የሚያጠፋና 80% ውጤታማ የሆነ ስማርት "ጄል" ሰሩ ይህ "ስማርት ሃይድሮጄል" (ፈሳሽ ቅባት) የጡት ካንሰር ዕጢዎችን በጥንቃቄ ኢላማ በማድረግ ለማከም የኬሞቴራፒ እና በብርሃን ላይ የተመሠረተ ሕክምናን ያጣመረ ነው። ጄሉ ከተፈጥሯዊና ከሰውነት ጋር ተስማሚ ከሆነ "ካይቶሳን" ከተባለ ንጥረ ነገር የተሠራ ነው፡፡ ስፑትኒክ እንደዘገበው መድኃኒቱን በተቆጣጠረ ሁኔታ የሚለቅ ሲሆን፣ የሌዘር ብርሃን ሲያርፍበት ይነቃቃል፡፡ በተለየ ሁኔታ የካንሰር ሕዋሳትን የሚጎዱ የኦክሲጅን ውህዶችን ያመነጫል፡፡ የተደረጉት ሙከራዎች እንደሚያሳዩት፣ ጄሉ ጤናማ ሕዋሳትን ሳይነካ ከ80% በላይ የሚሆኑትን የጡት ካንሰር ሕዋሳት ማጥፋት ችሏል፡፡ ይህ አቀራረብ ከተለመዱት የጡት ካንሰር ሕክምናዎች በተሻለ፣ አነስተኛ ጉዳት የሚያስከትል እና ቀጥተኛ ዒላማውን ብቻ የሚያጠቃ አማራጭ ሊሆን ይችላል።

የቻይናው "የአየር ላይ ታክሲ" በሆንግ ኮንግ ስኬታማ የሙከራ በረራ አደረገ የቻይናው የቴክኖሎጂ ግዙፍ ኩባንያ ኢሃንግ "EH216-S" የተሰኘውን ሰው አልባ የኤሌክትሪክ "የበረራ ታክሲ" በሆንግ ኮንግ ሳይበርፖርት ያከናወነው የሙከራ በረራ በስኬት መጠናቀቁን ይፋ አድርጓል። እንደ ሄሊኮፕተር ቀጥታ ተነስቶ ማረፍ የሚችለው ይህ ተሽከርካሪ፣ ሁለት መንገደኞችን ይዞ እስከ 120 ሜትር ከፍታ ላይ በመብረር በአንድ ቻርጅ ለ30 ደቂቃዎች መቆየት ይችላል። ይህ ቴክኖሎጂ ቀደም ሲል በጓንግዙ እና በሄፌይ ተግባራዊ የተደረገ ሲሆን፣ የሆንግ ኮንግ አስተዳደር የከተማዋን የትራንስፖርት አማራጭ ለማዘመን ከነደፈው "የዝቅተኛ ከፍታ ኢኮኖሚ" ስትራቴጂ ጋር የሚጣጣም ነው። ፕሮጀክቱ ከኳን ቹንግ ስማርት ሞቢሊቲ እና ከሳይበርፖርት ጋር በመተባበር እየተከናወነ ይገኛል። በቀጣይ ዓመታት እነዚህ አየር ላይ የሚንቀሳቀሱ ተሽከርካሪዎች ለዕለታዊ የትራንስፖርት እና የቱሪስት መስህብ አገልግሎት ይሰማራሉ ተብሎ የሚጠበቅ ሲሆን፣ የከተሞችን የትራፊክ እንግልት ለመቀነስ ትልቅ እመርታ እንደሚያመጡ ታምኖባቸዋል።

ለሮቦቶች እንደ ሰው የመዳሰስ ስሜት የሚሰጥ አዲስ አርቲፊሻል ቆዳ ተሠራ ሳይንቲስቶች ለሮቦቶች ጫናን፣ መወጠርን እና የሙቀት መጠንን በትክክል የመለየት ችሎታ የሚሰጥ አዲስ አርቲፊሻል ቆዳ ፈጥረዋል። ይህ ቆዳ መረጃን በሁለት መንገድ የሚያስተላልፍ ሲሆን፣ የመጀመሪያው ፈጣን ሥርዓት ሮቦቱ የነካውን ነገር ወዲያውኑ እንዲያውቅ ሲረዳው፣ ሁለተኛው ደግሞ መረጃውን ወደ ኤአይ (AI) በመላክ እንግዳ ነገሮችን በጥልቀት እንዲተነትን ያደርጋል። በሙከራውም ፈጣኑ ሥርዓት 17 ቁሶችን፣ ሁለተኛው ደግሞ 5 የተለያዩ ነገሮችን በትክክል ለይተዋል። በ ‘ኔቸር ሴንሰርስ’ (Nature Sensors) መጽሔት ላይ የታተመው ይህ ጥናት፣ ቴክኖሎጂው ወደፊት ሮቦቶች ዕቃዎችን በጥንቃቄ እንዲይዙ፣ ከሰዎች ጋር በቅርበት እንዲሠሩ እና ካሜራ ብቻ በቂ ባልሆነባቸው ቦታዎች ላይ በዳሰሳ በብቃት እንዲያገለግሉ ትልቅ አስተዋጽዖ እንደሚያበረክት ያመለክታል።

ሜታ በማህበራዊ ሚዲያ በወጣቶች ላይ ከደረሰዉ ጉዳት ጋር ተያይዞ ከአሜሪካ ክፍለ ሀገራት ጋር የ17 ቢሊዮን ዶላር ስምምነት ላይ ደረሰ ሜታ ፕላትፎርምስ ፌስቡክን እና ኢንስታግራምን ሆን ብሎ ወጣቶች ለምርቶቹ ሱስ እንዲያዙ በሚያደርግ መልኩ በመቅረፅ እና ህዝቡን በማታለል በ47 የአሜሪካ ክፍለ ሀገራት የቀረበበትን ክስ ለመጨረስ የ17 ቢሊዮን ዶላር ክፍያ ለመፈፀም መስማማቱን የክፍለ ሀገራቱ አቃቢያነ ህግ አስታውቀዋል። ኩባንያው ከስምምነቱ አካል አድርጎ የህፃናትን ደህንነት የሚጠብቁ እርምጃዎችን በስራ ላይ ለማዋል ተስማምቷል። ሜታ በወጣቶች ማህበራዊ ሚዲያ ሱስ ዙሪያ የተመሰረተበትን ታሪካዊ ክስ ለማቆም እና በ47 ክፍለ ሀገራት የቀረቡበትን አቤቱታዎች ለመጨረስ 17 ቢሊዮን ዶላር ለመክፈል በፌስቡክ እና ኢንስታግራም ገጾቹ ላይ የህፃናት ደህንነት ማረጋገጫዎችን ለማካተት መስማማቱ ተገልጿል። ካሊፎርኒያ፣ ኮሎራዶ፣ ኬንታኪ እና ኒው ጀርሲ እ.ኤ.አ. በ2023 በቴክኖሎጂ ኩባንያው ላይ ክስ ካቀረቡት 29 ክፍለ ሀገራት መካከል የሚጠቀሱ ሲሆን፣ አዲሱ ስምምነት የኩባንያው ዋና ስራ አስፈፃሚ ማርክ ዙከርበርግ በካሊፎርኒያ ፌደራል ፍርድ ቤት በዳኞች ፊት ቀርበው ምስክርነት ይሰጣሉ ተብሎ ይጠበቅ የነበረውን የፍርድ ሂደት አሳጥሮታል። የቨርጂንያ ጠቅላይ አቃቢ ህግ ጄይ ጆንስ ባወጡት መግለጫ፣ ስምምነቱ በቨርጂንያ ብቻ 353 ሚሊዮን ዶላር የሚያወጣ ሲሆን፣ በክፍለ ሀገሪቱ የደንበኞች መብት ጥበቃ ታሪክ ውስጥ ከሁሉም የበለጠው እንደሆነ ገልፀዋል። ለዓመታት ሜታ በወጣቶች የአእምሮ ጤና ላይ ከፍተኛ ጉዳት ያደረሱ ሱስ አጋላጭ እና ጎጂ የሆኑ የንድፍ ባህሪያትን አስመልክቶ ህዝቡን ሆን ብሎ ሲያታልል ቆይቷል ብለዋል ጆንስ። ይህ ስምምነት እነዚህን አደገኛ አሰራሮች የሚያስቆም እና ህፃናትን ከኦንላይን ጉዳት የሚጠብቅ ትርጉም ያለው እፎይታን የሚያስገኝ ነው ሲሉ አክለዋል። ሜታ ለተጠየቀው አስተያየት ወዲያውኑ ምላሽ አልሰጠም። ይህ የ17 ቢሊዮን ዶላር ስምምነት፣ ኩባንያው እ.ኤ.አ በ2025 ካስመዘገበው የ201 ቢሊዮን ዶላር ገቢ ጋር ሲነጻጸር አነስተኛ ድርሻ ያለው ነው። ክሱ ሜታ፣ ህፃናትን ለገጾቹ ሱስ የሚያስይዙ ባህሪያትን ሆን ብሎ በመቅረፅ እና እነዚህን ከህዝብ በመሸሸግ ለወጣቶች የአእምሮ ጤና ቀውስ አስተዋጽኦ አድርጓል በማለት ይከሳል። በተጨማሪም ሜታ ያለወላጆች ፈቃድ ከ13 ዓመት በታች የሆኑ ህፃናትን መረጃ ዘወትር በመሰብሰብ የፌደራል ህጎችን ጥሷል የሚል ክስም ቀርቦበታል። ሰላማዊ ነጋሲ #ዳጉ_ጆርናል