GRAYS _ رماديون

من التصورات اللي بحبها في العلاج بالتقبل و الالتزام إن اختيارك لقيمك أو مبادئك مش معناه أن الطريق هيكون خالي من الألم أو العقبات.. بل بالعكس العلاج ده بيقولك أن الطريق هيكون منحني و غير مستقيم و كذلك مليان عوائق كتير في كل مرحلة. هنا بقى وعيك بأن العوائق جزء من طريقك ده هيخليك تحس بشعور و لو بسيط بأنك مش متفاجئ لأنك كده كده عامل حسابك أن أكيد في مشكلة ممكن تحصل لأن دي طبيعة الحياة. العوائق ممكن تبقى مشاعر حادة أو أفكار سلبية أو ناس بتؤذيك أو حظ سيء أو تصرفات غبية منك و هكذا. الهدف هنا بقى مش إزالة كل العوائق من الطريق لأن في عوائق مهما عملت مش هتقدر تزيلها زي مثلا الايذاء المستمر من الأهل لو انت عايش معاهم و هكذا.. و لكن الفكرة هنا أنك تستمر في التحرك تجاه قيمك مهما يحصل مع تعلم كيفية التعامل مع العوائق. و حاول ترسم مع نفسك زي الرسمة اللي في الصورة اللي في التعليقات دي و تكتب فوق الهدف أو القيمة أو المبدأ اللي بتحاول توصل له.. و كل ما تتعرض لأي عائق اكتبه مكان كلمة عائق عشان مخك يفهم أن ده جزء من التجربة فميحصلش إنهيار تحت الضغط.

اللي تعرض لتجربة الوسواس القهري الفكري.. بيكون عنده حساسية تجاه كل الأفكار الطارئة على ذهنه و بيكون خايف أن أي فكرة ممكن تتحول إلى وسواس قهري ( خوف دائم من فقدان السيطرة على أفكاره )

الاضطرابات المصاحبة لكل نوع من اضطرابات الشخصية 👇 1 اضطراب الشخصية الارتيابية Paranoid قد يعانون أيضاً من مشكلات مثل : اضطراب سوء استخدام المواد المخدرة و الكحوليات.. الاكتئاب.. اضطراب الهلع.. الفوبيا.. اضطراب القلق العام. 2 اضطراب الشخصية الانطوائية Schizoid قد يعانون أيضاً من مشكلات مثل : اضطراب ثنائي القطب.. الاكتئاب.. اضطراب الهلع.. الرهاب الاجتماعي.. اضطراب القلق العام.. الفصام. 3 اضطراب الشخصية شبه الفصامية Schizotypal قد يعانون أيضاً من مشكلات مثل : القلق.. الاكتئاب.. نوبات ذهانية قصيرة غالباً ما تنتج عن الضغوط. 4 اضطراب الشخصية النرجسية Narcissistic قد يعانون أيضاً من مشكلات مثل : اضطراب ثنائي القطب.. الاكتئاب.. القلق.. اضطراب سوء استخدام المواد المخدرة.. إدمان القمار.. اضطرابات الأكل.. احتمالية الانتحار كبيرة جداً. 5 اضطراب الشخصية الحدية Borderline قد يعانون أيضاً من مشكلات مثل : خطورة الانتحار.. الاكتئاب.. اضطراب ما بعد الصدمة.. اضطراب الأكل.. الفوبيا.. اضطراب الهلع.. اضطراب سوء استخدام المواد المخدرة.. متلازمة الألم العضلي الليفي ( الفيبرومايلجا ).. مرض السكر.. ارتفاع ضغط الدم.. التهاب المفاصل.. آلام الظهر. 6 اضطراب الشخصية المضادة للمجتمع Antisocial قد يعانون أيضاً من مشكلات مثل : زيادة خطر الانتحار.. الفوبيا.. اضطراب ما بعد الصدمة.. اضطراب الهلع.. اضطراب القلق العام.. الاكتئاب.. اضطراب ثنائي القطب.. اضطراب سوء استخدام المواد المخدرة.. إدمان القمار. 7 اضطراب الشخصية الهيسترية Histrionic قد يعانون أيضاً من مشكلات مثل : السلوكيات الانتحارية المتكررة.. الاكتئاب.. اضطرابات أخرى في الشخصية. 8 اضطراب الشخصية الاعتمادية Dependant قد يعانون أيضاً من مشكلات مثل: الاكتئاب.. اضطراب ثنائي القطب.. اضطراب الهلع.. القلق العام.. الشره العصبي.. الرهاب الاجتماعي.. مشكلات تعاطي الكحوليات و المخدرات.. خطورة الانتحار. 9 اضطراب الشخصية الوسواسية القهرية OCPD قد يعانون أيضاً من مشكلات مثل : القلق العام.. الفوبيا.. الوسواس القهري. 10 اضطراب الشخصية التجنبية Avoidant قد يعانون أيضاً من مشكلات مثل : الاكتئاب.. القلق العام.. اضطراب شخصية أخرى. المصدر : كتاب العلاج المعرفي السلوكي لاضطرابات الشخصية لجيفري سي وود لو بتستفيد من المحتوى اعمل ♥️ #GRAYS #Nader_Sultan للحجز في الجلسات الاونلاين أو العيادة راسلنا عبر رسائل الصفحة أو من خلال واتساب : 01063457667

عمرك سمعت عن التعزيز المتقطع في العلاقات ⁉️ طيب قبل ما أقول اي حاجة ضروري أعرفك الأول ايه هو اصلا التعزيز المتقطع... بص يا باشا التعزيز بشكل عام هو التكنيك الأساسي في تعديل السلوك.. و هو بشكل عام فيه نوعين وهما التعزيز المتقطع و التعزيز المستمر.. التعزيز المستمر معناه أن كل مرة الشخص يعمل شيء كويس يتم مكافأته عليه يعني مثلا كل مرة الطفل بيذاكر ساعة فالأم بتكافئه كل مرة .. و ده طبعا بيساهم في تكرار السلوك ده ( المذاكرة ) أما بقى التعزيز المتقطع.. فهو برده معتمد على المكافأة بس مش كل مرة.. يعني لو هنطبقه على مثال الطفل ده فالأم ممكن مرة تعطيه مكافأة ومرة تانية لا .. أظن بديهي أن تقول ان التعزيز المستمر ده لطيف وجميل و لذيذ و التعزيز المتقطع ده شرير و كده.. و لكن اسمح لي أصدمك بأن التعزيز المتقطع تأثيره أقوى من التعزيز المستمر. و بل و كمان التعزيز المتقطع بيخلي الشخص يستمر في السلوك حتى بعد ما التعزيز ما يبقاش موجود.. يعني لو مثلا الأم قررت انها تبطل تعزيز ( مكافأة ) خالص للطفل فالطفل هيكمل في السلوك برده.. و لو قلتلك مثال أبسط فمثلا تخيل ألعاب المراهقات اللي على النت.. ألعاب المراهنات قائمة على التعزيز المتقطع لأن أنت في مرة بتفوز بمبالغ كتير و في مرة تانية مش بتفوز بحاجة خالص.. فاللي بيخيلك تستمر في السلوك هو التساؤلات اللي في دماغك زي ( يمكن المرة الجاية أفوز.. طيب اجرب كمان مرة ) طيب ده ايه علاقته بالعلاقات يعني ؟ تخيل لو شخص في علاقة ما .. الطرف الثاني في العلاقة بيعطي له اهتمام شديد جدا في بعض الأوقات.. وفي أوقات تانية بيبقي في تجاهل شديد.. يعني العلاقة فيها مكافأت بس مكافأت متقطعة .. و مخك في الموضوع ده بيكون معمي و مش بيعرف يفرق بين العلاقة السامة و العلاقة الصحية.. لأن زي ما قلت فوق التعزيز المتقطع بيخلي السلوك يستمر حتى بعد لو التعزيز مش موجود. و يمكن ده أحد التفسيرات لسبب استمرار شخص في علاقة سامة و مؤذية.. و هو بيكون عارف انها مؤذية و رغم ذلك مش قادر يمنع نفسه.. ليه ؟ عشان الشخص بيكون في دماغه افتراض قوي جدا و هو ( عدم حصولي على النتيجة دلوقتي لا يعني انها لن تأتي لاحقا ) يعني بمعنى أصح هو مستني الفرج 😁 المشكلة بقى إن الشخص مش بيكون عارف المكافأة هتيجي امتى.. فده بيخليه يعمل سلوكيات كتير بتحسسه بالراحة المؤقتة ولكنها على المدى الطويل بتخليه يدمن العلاقة.. يعني مثلا هتلاقيه بيفتح التليفون كل شوية يشوف هل الشخص الاخر بعت رسالة و لا لا .. أو رد على الرسالة و لا لا .. أو مثلا بيفكر بشكل مستمر في العلاقة. و ده معناه إن الشخص مش بيكون متعلق بالشخص الآخر بل متعلق باحتمالية حصوله على المكافأة.. زي ألعاب المراهنات بالضبط. هل ده معناه إن الشخص الآخر لما يعمل التعزيز المتقطع بيكون بالضرورة شخص متلاعب ؟ الإجابة هي لأ.. يعني مش معنى أن زوج بيعامل زوجته أحيانا بحنان و أحيان تانية ببرود يبقى هو كده متلاعب.. ممكن يكون متردد أو ممكن يكون شخص غير ناضج عاطفيا أو غير مستقر في مشاعره أو ممكن يكون مضغوط مثلا.. يعني اللي اقصده إن بدون قصد منك انت ممكن تستخدم التعزيز المتقطع و تخلي شخص يتعلق بيك بشكل مرضى . لكن طبعا في ناس متلاعبة جدا و بتركز على الهشاشة النفسية اللي فيك.. بيركز على الحتة الفاضية اللي جواك اللي أنت محروم منها وهو يملاها بتعزيز متقطع فيخليك تتعلق بيه.. و هو في النهاية ممكن يكون بيتسلى اصلا. و بس... لو بتستفيد من المحتوى اعمل ♥️ للحجز في الجلسات الاونلاين أو العيادة راسلنا عبر رسائل الصفحة أو من خلال واتساب : 01063457667 #GRAYS #Mohamed_Monir

مهارة فك الاندماج فك الاندماج معناه إنك تتعلم تشوف الفكرة على إنها مجرد فكرة.. مش حقيقة لازم تصدقها أو تتصرف بناء عليها.. يعني بدل ما تقول ( أنا فاشل ) أتعامل معاها كأنها فكرة دخيلة أو فكرة لا تخصك فهتبقى الصياغة ( أنا عندي فكرة بتقول إني فاشل ) الفرق البسيط في الكلام ده مش عبث كده و خلاص.. لكنه مهم جدا لأنك بتعمل مسافة نفسية بينك وبين الفكرة. لو حاسس أنك مش فاهم فتخيل معايا كده لو شخص عنده فكرة ( لو دخلت المكان ده هتوتر جدا ) لو أنت اندمجت بقى مع الفكرة دي فممكن تتحول عندك لحقيقة أما بقى لو فكيت الاندماج فالفكرة هتتحول ( عقلي بيقولي إن المكان ده خطر و إني هتوتر ) و ده مش معناه أن المشاعر أو الأفكار السلبية هتنتهي لكن معناه إني مش لازم أمشي وراء الفكرة أو الشعور. و يمكن ده أصلا جوهر العلاج بالتقبل و الالتزام بشكل عام أنك مش لازم تلغي الفكرة أو تقنع نفسك أنها غلط.. المهم أنك تغير علاقتك بالفكرة بحيث ما تبقاش هي اللي بتتحكم في سلوكه. #GRAYS

العلاج بالتعرض للمرآة قد يؤدي إلى تفاقم أعراض تشوه صورة الجسم #دراسة_جديدة لو بتستفيد من المحتوى اعمل ❤️ #GRAYS #Nader_sultan

أنا على المستوى الشخصي أحياناً بستخدم العلاج بالقراءة جنباً إلى جنب مع العلاج العادي.. بس ده لو لقيت أن المريض بيحب القراءة أصلاً و ده مبقاش موجو كتير الأيام دي.. أذكر في مرة من المرات استخدمت رواية أفراح القبة لنجيب محفوظ في إني أوضح لشخص أن كل إنسان بيفكر بطريقة مختلفة.. و بالفعل المفهوم ده وضح له. و طبعاً لو حابب تتعمق في العلاج بالقراءة أكثر أنصحك بقراءة كتاب ( العلاج بالقراءة ) لبيجال شاه.. كتاب حلو جداً . و بس... لو بتستفيد من المحتوى اعمل ♥️ للحجز في الجلسات الاونلاين أو العيادة راسلنا عبر رسائل الصفحة أو من خلال واتساب: 01063457667 #GRAYS #Mohamed_Monir

إيه هو العلاج النفسي بالقراءة ⁉️ أنا من وجهة نظري شايف أن العلاج النفسي له أشكال متعددة و مرنة تقدر تناسب أي شخص.. يعني في ناس العلاج الفردي هيساعدها جداً و ناس تانية محتاجة تشوف أشخاص بيعانوا من نفس معاناتهم فالعلاج الجماعي هيكون مناسب لهم.. و ناس تانية عندها القدرة على البحث و التمحيص بسهولة فالعلاج بالقراءة هيساعدهم جداً... إيه ده يعني الكتب مش مجرد قراءة و خلاص و أنها ممكن تبقى علاج 🧐 في الحقيقة أيوه هي مش مجرد قراءة كده و خلاص.. و على فكرة دي مش فكرة جديدة دي قديمة جداً.. يعني مثلاً في الحضارات القديمة زي الحضارة المصرية مثلاً كان بينظر للقراءة كأنها أداة للتخلص من المشكلات النفسية.. لدرجة أن في بعض الأبحاث بتقول أن مكتبة رمسيس الثاني كان مكتوب على مدخلها عبارة ( بيت شفاء النفس ) و هنروح بعيد ليه.. إحنا عندنا القرآن الكريم إحنا بنقرأه لما بنحس أن أننا مش فاهمين حياتنا.. حتى القرآن أشار في أول أية نزلت فيه إلى أهمية القراءة.. فإحنا نفهم من كده أن القراءة مش مجرد وسيلة ترفيهية قد ما هي وسيلة لإيجاد المعنى و محاولة لحل المشكلات النفسية . أول شخص استخدم مصطلح العلاج بالقراءة هو الكاتب صامويل كروزرز سنة 1916 في أحد كتبه.. المهم يعني أن المصطلح ما انتشرش أوي زي مانت متخيل إلا بعد الحرب العالمية الثانية اللي مات فيها أكثر 70 مليون شخص.. و كانت كل دول العالم بلا استثناء و خاصة الدول الأوروبية عندها صدمة جماعية ناتجة عن ويلات الحرب فالناس كانت محتاجة حد يساعدها في تفسير اللي بيحصل. و من هنا بدأت ثورة كتب التنمية البشرية.. و طبعاً أول شخص كتب في المجال بالشكل الحديث هو ديل كارنيجي.. ديل أعطى للناس اللي محتاجة تسمعه.. كتبه كلها كانت بتركز على قدرة الإنسان على العطاء حتى في أسوأ أحواله.. حتى و لو كتب التنمية البشرية في ناس بتشوفها نصب و لكن العلاج بالقراءة بيعترف بها لأن أهم ركيزة في العلاج ده هو أن الكتاب اللي بيخليك تفكر و بيساعدك في ترتيب أفكارك و كذلك حل مشكلاتك فهو كتاب مهم جداً. يعني العلاج بالقراءة بيركز على رد فعل المُتلقي على اللي بيقرأه مش على أهمية الكتاب أو قيمته الفنية.. يعني الأهم أن الكتاب يلمس حاجة فيك و يكون بيخاطبك . عندي إحساس كده إنك عايز تفهم أكثر... سنة 1949 كان في باحثة مهمة جداً في علم النفس اسمها كارولين شرودز.. كارولين كان رسالة الدكتوراة بتاعتها عن العلاج بالقراءة.. و رسالتها دي تقريباً كانت أول أساس نظري مفهوم للعلاج بالقراءة.. و هي كان لها جملة شهيرة جداً بتوضح وجهة نظرها ( الأدب لا ينقل معلومات فقط، بل يثير عمليات نفسية عميقة تشبه ما يحدث داخل العلاج النفسي، حيث إن القراءة عملية ديناميكية من التفاعل بين شخصية القارئ والأدب، بحيث يثير الأدب مشاعر القارئ و يحررها ) كارولين قالت أن العلاج بالقراءة زي أي علاج أخر له مراحل و أسس.. و وضحت أن له أربع مراحل عشان ينجح فعلاً في أنه يؤدي وظيفته.. و هي ركزت أكثر على قراءة الروايات.. و المراحل دي كالتالي : 1 القارئ يتماهى مع الشخصية يعني يلاقي نفسه شبه بطل القصة أو يمر بنفس مشاكله.. يعني مثلا لو شخص مكتئب يقرأ عن شخصية فقدت شغفها بالحياة فيحس مع نفسه بأن الشخصية دي بتحكي عنه . 2 يخرج مشاعره وهو بيقرأ يبدأ يحس بالحزن أو الغضب أو الخوف اللي كان مكبوت.. وقد يبكي أو يتأثر.. يعني ببساطة تنفيس الانفعالي . 3 يفهم نفسه يبدأ يربط بين اللي حصل للشخصية واللي بيحصل له هو.. يعني و هو بيقرأ يقول لنفسه مثلا ( أنا برضه بفكر بنفس الطريقة دي.. ويمكن ده سبب معاناتي ) .. كارولين بتطلق على المرحلة دي اسم (الاستبصار) 4 يطبق اللي اتعلمه بعد ما فهم نفسه.. يبدأ يغير سلوكه أو طريقة تفكيره في حياته.. و دي أهم مرحلة لأن الهدف مش مجرد القراءة لكن الاستفادة منها في الواقع. يعني مثلاً لو مريض عنده قلق اجتماعي قرأ رواية عن شخص كان بتخاف يتكلم قدام الناس. في الأول قال ده شبهي ( التماهي ) بعدين تأثر جداً و هو بيقرأ ( التنفيس ) بعدها فهم إن خوفه ده سببه إنه دايما بيتوقع الرفض ( الاستبصار ) بدأ يجرب يتكلم مع الناس خطوة بخطوة ( التطبيق ) أنا بقى ليا وجهة نظر أن نجاح العلاج بالقراءة مش لازم يكون موجود فيه المراحل دي كلها.. يكفي فقط أنه يثير أي مشاعر أو ذكريات و أفكار معينة.. و لما يثير جواك الأشياء دي حاول تسجلها في ورقة و مع الوقت هتلاقي تدريجياً أنك ابتديت تفهم نفسك. طيب هو العلاج ده لازم يكون تحت إشراف معالج نفسي ؟ في وجهة نظر بتقول أنه ممكن الشخص يعالج نفسه بنفسه من خلال القراءة بس ده محتاج شخص معين يكون عنده مقدرة على تحمل المشاعر الحادة و يقدر يتعامل معاها.. و في وجهة نظر أخرى بتقول أن العلاج بالقراءة ممكن يبقى علاج نفسي لوحده تحت إشراف معالج.. و في ناس بتشوف أنه ممكن يبقى مكمل للعلاج النفسي العادي.

👇👇

جاسمين : أنا بقيت بشوف أن التفكير الزائد هو مشكلة في كشاف الانتباه.. ببساطة تخيل نفسك إنك فني إضاءة في المسرح.. أنت اللي بتتحكم في الكشاف و بالتالي بتحدد الجمهور هيشوف إيه.. ممكن توسع شعاع الإضاءة فيغطي المسرح كله وكل الممثلين.. وممكن تضيق الشعاع لدرجة إنه ينور على شخص واحد بس.. دلوقتي بقى تخيل إن المسرح هو عقلك.. و الكشاف هو انتباهك. لما بنقع في التفكير الزائد.. بيكون كأن الكشاف بتاعنا ركز على تفصيلة صغيرة جدا.. وساب باقي حياتنا كلها في الضلمة.. فنبدأ نشوف المشكلة فقط... ونلاحظ أي دليل يؤيد الفكرة اللي في دماغنا.. بينما أي دليل عكسها بيختفي من وعينا.. انتباهنا بيتحول لكل حاجة غلط في حياتنا.. ولما نثبت نظرنا على جزء صغير من حياتنا يبدأ يبان لنا وكأنه الحقيقة الكاملة. عقلنا أثناء التفكير الزائد بيغير الطريقة اللي بنشوف بيها الواقع.. إحنا بنفتكر إن الجزء الصغير اللي شايفينه هو الحقيقة الكاملة عن حياتنا في اللحظة دي.. المشاعر السلبية بتضيق مجال انتباهنا.. وبتخلق عندنا انحياز سلبي.. وده بيخلينا أقل قدرة على تقبل أفكار جديدة و الاستفادة من الآخرين و حل المشكلات. أما المشاعر الإيجابية.. فهي بتوسع انتباهنا.. و بالتالي بنبقى أكثر كفاءة و أكثر مرونة و أكثر إبداعا و أكثر انفتاحا على المعلومات و أكثر قدرة على توليد حلول وأفكار متنوعة. و لذلك القاعدة الأهم هي بلاش تحاول تفكر في مشاكلك و أنت حالتك النفسية سيئة.. لأن ده أشبه بأن واحد بيحاول يطلع من حفرة عن طريق إنه يحفر أكتر. لو بتستفيد من المحتوى اعمل♥️ للحجز في الجلسات الأونلاين أو العيادة 👇 راسلنا عبر رسائل الصفحة أو من خلال واتساب : 01063457667 #GRAYS #Mohamed_Monir

سؤال و جواب حول علاج التفكير الزائد النهاردة إن شاء الله هنكمل في سلسلة أسئلة و أجوبة مع علماء النفس المشهورين عالمياً.. اللي هتجاوب على الأسئلة النهاردة هي ( جاسمين هيبرد ) و دي أخصائية نفسية خبرتها تتخطى تقريباً 20 سنة.. جاسمين متخصصة في العلاج المعرفي السلوكي و العلاج بالمخططات و العلاج المتمركز حول المشاعر. طبعاً كالعادة الأسئلة دي منشورة على موقع Psychwire و أنا بس بترجمها بتصرف.. يلا نبدأ كفاية رغي 😁 س : ليه التفكير الزائد بيبان لبعض الناس إنه مفيد ؟ جاسمين : كتير من الناس بييجوا العلاج النفسي وهما مستنزفين من كتر التفكير.. بيفضلوا يعيدوا نفس الحوارات في دماغهم.. ويرجعوا للأخطاء اللي حصلت ويحللوا مشاعرهم ويتخيلوا مشاكل ممكن تحصل في المستقبل.. ويدوروا على إجابات لأسئلة ملهاش إجابات أًصلاً. غالبا التفكير الزائد بيستمر لأنه بيقنع الشخص إنه لو فكر في المشكلة شوية كمان هيقدر يفهمها أو يمنع حاجة وحشة أنها تحصل أو يحس إن الأمور تحت سيطرته. لكن المشكلة إن التفكير الزائد نادرا لما يدي اللي بيوعد بيه.. يعني ببساطة بدل ما يجيب إجابات هو غالبا بيكبر الشك والقلق.. الحاجة اللي بدأت كمحاولة لحل مشكلة بتنتهي إنها تسيب الشخص حاسس إنه محبوس و عاجر.. و ده بالضبط اللي بيخلي التفكير الزائد صعب أنك تكتشفه.. هو بيتخفى في صورة حل للمشكلات.. لكن هو في الحقيقة بيحافظ على المعاناة ويخليها مستمرة. س : أظن إحنا محتاجين نفهم التفكير الزائد بشكل أعمق . جاسمين : التفكير الزائد هو لما عقلنا يفضل متعلق بأفكار ومشاعر معينة.. وغالبا بتكون سلبية.. ومش بنعرف نبطل تفكير فيها. من الطبيعي إن الإنسان يفكر في الأشياء اللي بتحصله أو يراجع الماضي أو يفكر في بدائل مختلفة لموقف معين.. لكن لما يفضل غرقان باستمرار في مشاعره وأفكاره هنا بتبدأ المشاكل. غالباً بنقع في دوامة التفكير الزائد لما بنكون في حالة مزاجية سيئة.. لأن الحالة المزاجية دي بتخلينا نفتش في أي مشكلة ممكنة سواء كانت من الماضي أو الحاضر أو المستقبل و بدل ما ده يساعدنا نمشي لقدام بيوقفنا مكاننا ويكبر حجم المشاكل.. غالبا بيبقى في بعض المؤشرات اللي بتقول أنك حالياً في دوامة التفكير الزائد زي مثلاً : _ أنك مشغول بشيء معينة وكل شوية ترجع تفكر فيه تاني. _ مزاجك سيئ أو حاسس بضيق. _ بتنط من موضوع لموضوع من غير ما تاخد أي استراحة. _ بتبدأ من موقف محدد حصل.. وبعدها تعمم وتوصل لاستنتاجات عن نفسك أو عن حياتك كلها. _ بتحس إنك بعد التفكير بقيت أسوأ بدل ما تبقى أحسن. _ بقيت تقلق أو تلوم نفسك بسبب إنك أصلًا بتفكر زيادة. س : في العلاج النفسي إزاي بتفرقي بين التأمل المفيد والاجترار غير المفيد ؟ وهل فيه علامات معينة بتبصي عليها في طريقة تفكير العميل أو في الطريقة اللي بيتكلم بيها عن خبراته ؟ جاسمين : التأمل المفيد هو طريقة بتلاحظ بها إن في حاجة في حياتك مش ماشية صح.. و تحللها بالتفصيل علشان تحل المشكلة.. النوع ده من التفكير التحليلي بيكون ممتاز لما يبقى في شيء ملموس أو بمعنى أصح مشكلة محددة.. يعني إنك تدي المشكلة وقت و مجهود معقول يخليك توصل لحل.. وبالتالي تتحرك لقدام. أما بالنسبة للاجترار غير المفيد.. فهنا إحنا بدل ما نركز على اللي حصل فعلا بنبدأ نسأل أسئلة ملهاش إجابة.. و الأسئلة دي مع الوقت بتخلينا نقول لنفسنا جمل زي ( أنا دائما غلط _ أنا أصلاً فاشل في كل حاجة ) التأمل بيحركك لقدام أما التفكير الزائد فبيسيبك واقف في مكانك. التأمل بيزود قدرتك على المواجهة و بيخليك تحس إنك أحسن.. أما التفكير الزائد فبيستنزف طاقتك و يبوظ حالتك المزاجية. س : إيه أكتر الطرق اللي لقيتيها فعالة في مساعدة المرضى أنهم يخرجوا من الدوائر دي ؟ جاسمين : أول حاجة و هي ملاحظة الأفكار.. يعني تبدأ تلاحظ الأفكار المتكررة اللي بتدور في دماغك.. وتشوفها على حقيقتها أنها مجرد تفكير زائد.. لاحظها كأنها شريط الأخبار في التليفزيون. ثاني حاجة و هي اختيار رد الفعل.. بدل ما تدخل أوتوماتيك في دوامة التفكير خد قرار مقصود إنك مش هتستسلم للتفكير الزائد.. افتكر أن دائماً عندك عندك حرية الإرادة لأن التفكير الزائد بيوهمك أنه يقدر يتحكم فيك.. قرر تتصرف بطريقة مختلفة عكس اللي بتعمله لما بتجيلك الأفكار . ثالث حاجة و هي أنك تتقبل الواقع كما هو.. أول ما تتخلى عن توقعاتك غير الواقعية.. هتبدأ تستمتع بالحياة زي ما هي.. بدل ما تفضل تقارنها بالصورة اللي في دماغك. رابع حاجة و هي مواحهة مخاوفك.. الفعل هو الترياق الحقيقي للتفكير الزائد.. لأنك مش هتقدر تتغلب على مخاوفك إلا لما تواجهها بنفسك.. و ساعتها تقدر تثبت لنفسك بشكل عملي إن الأفكار اللي كانت بتخوفك مش صحيحة أو على الأقل مش بالدقة اللي كنت متخيلها. س : إزاي بتقرري إمتى تركزي على تغيير محتوى الأفكار.. وإمتى تركزي على تغيير علاقة الشخص بأفكاره ؟

👇👇

بعد 3 سنين و نص خبرة في المجال النفسي أدركت أن الاخصائي النفسي مش لازم يتعلم كل العلاجات النفسية و لا لازم يعرف كل المقاييس النفسية.. بل إن كل ما كانت أدواته محدودة بس هو متقنها بما يرضي الله هيلاقي نتائج رائعة. لكن أساليب ترويج الكورسات التخصصية بتتبع أسلوب معين كده و هو أنها تديك شعور طول الوقت ( إن انت ناقصك حاجة ) و دي رسالة شريرة يُراد بها خير.. لكنها في النهاية شريرة و مؤذية.. و كتير من الناس كرهت المجال ده بسبب هذا الشعور المؤذي.. مش هتصدق لو قلتلك أن كتير من طلاب علم النفس بيكلموني و بيبقوا حاسين بالخوف لما بيشوفوا إعلان لكورس جديد.. مع أن المفروض الاعلان يدي انطباع بالتشويق. من وجهة نظري طالب علم النفس دلوقتي مش محتاج كورسات.. لأن مفيش أكثر منها.. هو محتاج حد يهديه و يقوله أن أنت مش فايتك حاجة.. أو بمعنى أصح يدير له دماغه و يفهمه الفرق بين المهم و الأهم. لكن للأسف إحنا مجال ينتقم من نفسه.. مجال يرى الطالب كأنه حفنة من الأموال تسير على قدمين.. إحنا مبنعرفش نتعاطف مع بعض مع أن احنا جايين من نفس المنبع.. يعني اللي بيعرض الكورس هو نفسه كان في يوم من الأيام مكان الطالب و عارف قد ايه الموضوع صعب. و في النهاية الطالب ده لما بيشتغل بتكون عنده نزعة استحقاقية ( انتقامية أحياناً) في أنه لازم يغلي سعر الجلسة عشان ياخد حقه من الدنيا.. و الدائرة تكمل.. و في النهاية هتخرج جيل استهلاكي كامل من المعالجين لا يستطيع التعاطف مع المريض بل يراه كسعر جلسة لا بد من سداده.. هيخرج معالجين مش بيقدروا يقللوا سعر الجلسة للناس غير المقتدرة لأن المرجعية الإنسانية بتاعتهم بتقول أن الحياة مفيهاش رحمة و ده لأنه شاف أن حتى المعالجين الكبار اللي المفروض أنهم بيروجوا لنفسهم أنهم آباء لهؤلاء الطلاب ( طلعوا هما كمان انتهازيين ) و لا يرون أي رحمة إلا بالمال.. هتدفع هحترمك.. مش هتدفع و لا أعرفك. و ممكن أكون غلط عادي.

الجو بتاع اليومين دول بيعمل أعراض تبدو من بعيد انها اكتئاب و لكنها مش اكتئاب خالص زي مثلاً: ـ فقدان الطاقة و الإرهاق و الخمول بسبب الحرارة . ـ فقدان الشهية للأكل عند بعض الناس أو انفتاح الشهية المفرط للمياه بسبب الحرارة برده. ـ النوم بصعوبة قد تصل للأرق بسبب أن الجو مقبض و غير مناسب للنوم. ـ صعوبة التركيز أو عدم القدرة على التركيز أصلا. ـ انخفاض الرغبة في القيام بالأنشطة المعتاد خاصة لو مفيش مروحة أو تكييف. و أنا بقول كده لأن بلاقي ناس كتير بتشخص نفسها بالاكتئاب و هو الموضوع في النهاية بيكون بسبب مشكلة الحرارة المفرطة للجو حالياً. و يا سلام بقى على الصداع اللي بيجي لما بتمشي في الشمس.. حاجة أخر روقان 😂

الإجابة لأ طبعا.. لأن في حالات بتمنع نجاح العلاج ده أولها مثلا إن يبقى المريض مش مقتنع بالعلاج أو معندوش دافعية و لو بسيطة للعلاج.. و ثاني حاجة هي أن يكون المريض عنده أفكار أو رغبات انتحارية ملحة.. و كمان العلاج ده مش بينفع مع شخص بيتعاطى المخدرات و مش بينفع مع الأشخاص اللي عندهم نوبة هوس مع الوسواس. طيب هو البرنامج ممكن نستخدمه مع اضطرابات أخرى غير الوسواس القهري ؟ هو في البداية كان معمول للوسواس القهري فقط.. و لكن مع الوقت البرنامج ده اتعمل عليه أبحاث أكثر و لذلك أثبت جدارته في علاج اضطراب الهلع و القلق الاجتماعي و اضطراب تشوه صورة الحسم.. لكن الصراحة ما زال حجم الادلة الخاصة بعلاجه للاضطرابات دي أقل بكتير من الادلة الخاصة بالوسواس القهري.. و لكن هو علاج واعد جدا. و اتمنى في الفترة القادمة البرنامج ده يبقى مشهور عندنا في المنطقة العربية لأنه هيحل أزمات كتير جدا خاصة في مصر.. و هيساعد ناس كتير تتلقى العلاج في المستشفيات الحكومية عادي. وبس... كفاية كده أنا تعبت 😁 لو بتستفيد من المحتوى اعمل ❤️ للحجز في الجلسات الاونلاين أو العيادة 👇 راسلنا عبر رسائل الصفحة أو من خلال واتساب : 01063457667 #GRAYS #Mohamed_Monir

علاج الوسواس القهري في ٤ أيام فقط 🔥 برنامج بيرجن من بداية الألفيات تقريبا دولة النيرويج كانت بتعاني من أزمة كبيرة في علاج الوسواس القهري.. ده لأن عدد المعالجين اللي بيعرفوا يعالجوا الوسواس القهري كانوا قليلين جدا و الأزمة هنا أن عدد كبير من المرضى كان بيعاني و مش عارف يتعالج + طبعا قوائم الانتظار الكتير في العيادات و المستشفيات ( بيفكرك بحاجة الكلام ده 😁 ) المهم يعني في الوقت ده كان في واحدة اسمها ( جيرد كفال ) و هي كانت عميدة كلية علم النفس في جامعة بيرجن النيرويجية.. كان معروف عنها أنها شغالة من زمان على برامج للعلاج المكثف لاضطرابات القلق. و في سنة ٢٠٠٩ قررت جيرد تاخد إجازة سنتين للتفرغ العلمي في محاولة منها لحل مشكلة قوائم الانتظار.. و كان أكثر شيء هي مركزة عليه هو أن احنا ازاي كمعالجين نقدر نعالج المرضى في أسرع وقت ممكن و هل لازم المريض يتابع جلسات ٣ أو ٤ شهور عشان يتعالج و لا ممكن العلاج يكون مكثف و يؤدي نفس الفعالية في ٤ أيام فقط ؟ و عشان التساؤل ده فيه مجازفات كتير قررت أنها لازم تنشئ عيادة مخصصة لعلاج الوسواس القهري فقط عشان تتأكد هل العلاج المكثف ده هيعطي نفس المفعول و لا لأ.. و بدأت بإنشاء العيادة في مستشفى هاوكيلاند.. و كان معاها باحثين كتير برده في العيادة مهتمين بالعلاج المكثف. قبل ما يطبقوا العلاج بيفهموا المريض أنه لازم يفرغ أربع أيام كاملة للعلاج فقط.. في الـ٤ أيام دول المعالج بيكون مرافق للمريض معظم الوقت و بيساعده يواجه الوسواس القهري في المواقف الحقيقية و يساعده برده أنه لا يستجيب للفكرة و يرفض يعمل الطقوس.. تخيل معايا شخص مفيش حاجة بيعملها في حياته في ال٤ أيام دول إلا مواجهة الوسواس القهري.. تفتكر هل النتيجة هتكون كويسة ؟ و يا للمفاجأة النتائج كانت ممتازة جدا.. المرضى اتحسنوا بدرجة كبيرة و عدد قليل جدا انسحب من العلاج.. و مع الوقت بدأت المستشفيات في النرويج تعتمد البرنامج ده رسميا. لو خدت بالك هما ما اخترعوش حاجة جديدة هما حلوا أزمة و لكن بطريقة رائعة.. العلاج اللي استخدموه طبعا هو العلاج بالتعرض و منع الاستجابة ERP و لكن بطريقة مكثفة جدا. طبعاً أظن أنت عندك تساؤلات كتير دلوقتي و تعالى كده نفصصهم بص يا سيدي خطة العلاج ده بتكون كالتالي : اليوم الأول المعالج مش بيبدأ بالتعرض على طول بل بيفهمه أصلا يعني ايه وسواس القهري و إزاي بيشتغل في مخه.. و بيشرح له فكرة التعرض و منع الاستجابة.. و كمان بيطلب منه يحدد أكثر المواقف اللي بيخاف منها المريض و اللي بتؤدي للطقوس.. و بعدين المعالج بياخد اتفاق من المريض على خطة العلاج.. يعني تقدر تقول ان أول يوم هو كورس مكثف في كل ما يتعلق بالوسواس القهري و علاجه . اليوم الثاني بيبدأ بقى العلاج الحقيقي.. المعالج بيكون مع المريض في كل المواقف اللي هو بيخاف منها.. و بيبدأ يتعرض لكل المواقف دي بالتدريج.. يعني يتعرض للمواقف الاقل شدة إلى المواقف الأعلى شدة.. الهدف في اليوم ده هو أن المريض يتعرض للمخاوف بدون ما يستجيب لها بالسلوك القهري المعتاد.. و خد بالك ما ينفعش المعالج يطمن المريض و إلا العلاج هيفشل و ده طبعا من الأشياء اللي بيتم شرحها في اليوم الأول. اليوم الثالث بنكمل تعرض بنفس الطريقة.. و لكن هنا المعالج بيلفت نظر المريض لمفهوم مهم جدا في برنامج بيرجن و هو ( القرار الصغيرة ) Micro Choice.. و ده معناه ببساطة لفت نظر المريض أن دائما الوسواس كل دقيقة بيحطه في اختيار صعب و هو ( هل أسمع كلام الوسواس و لا أتصرف بشكل طبيعي ؟ ) و هنا المعالج بيسأل المريض طول الوقت ايه الأفكار اللي بتدور في دماغه و بيقوله ( هل في قرار صغير دلوقتي في دماغك ؟ ) و طبعا المريض هيقول ( ايوه ).. فالمعالج بيقول له أن دي فرصة عشان تثبت لنفسك هل الوسواس يستحق اني ألتفت ليه و لا لأ؟ و المعالج هنا بيشجع المريض أنه يختار السلوك الطبيعي بدون الطقوس.. و طبعا بيشجع مش معناها أنه بيطمن . و في نهاية اليوم الثالث اهل المريض و أصدقاءه بيحضروا محاضرة بيتعلموا فيها ازاي يدعموا المريض من غير ما يشاركوا في الطقوس أو يقدموا له أي طمأنة. اليوم الرابع بيكون نص اليوم تعرض عادي.. و لكن النص التاني بيكون عن أهم التساؤلات اللي عند المريض بخصوص مرحلة ما بعد العلاج.. يعني المعالج بيفهم المريض هيعمل ايه لو الوسواس رجع تاني.. و ازاي هيستمر في التعرض بنفسه.. و ازاي يمنع الانتكاسة و لو حصلت انتكاسة هيعمل ايه.. و طبعا لازم تتأكد ان المريض هو فاهم فعلا الكلام ده فعلاً مش بيهز دماغه و خلاص 🧐 و طبعا بيكون في متابعة بسيطة بعد العلاج . شايفك ياللي بتسأل.. طيب هو العلاج ده هينفع مع كل مرضى الوسواس القهري ؟

👇👇