مختارات موميه الفنية

صباح الخير.. لسه مخلصين عرض الأفلام ومناقشتها. من الساعة 4 العصر لغيت دلوقت! احنا حرفيا طلعنا المسرح اتنفخنا، وفي لفظة تانية تيجي محل اتعملت فينا، أقسم بالله مسكوا الكرباج وزنقونا في ركن، وهاتك يا جلد! معجبهومش غير فيلم مريم، وملك. فيلم مريم فعلا ممتاز، المفاجأة كان فيلم ملك، وعندهم أراء منطقية فعلا، لكن ولا فيلم غيره خرج من إطار النفخ!

مسالفل.. مبسوط إني خدت قرار تسليم الفيلم القصير رغم كل المشاكل اللي فيه، سواء أخطاء وقعنا فيها أو مشاكل تقنية أجبرتنا نتخلى عن جزء كبير من الشوتات واللي كانت مهمة لفهم الحكاية. دي أول مرة أقدم حاجة أنا غير راضي عنها، الفن علمني إن الكمال في التجربة مش في الوصول. ما دمت اتبسطت بالتجربة، وبذلت فيها مجهود فليه لأ؟ ليه ميتشافش وأفرح بيه، رغم عيوب النتيجة؟ وكمان عشان آخد فيدباك محتاجه في وقت التعلم والدراسة. أن تنتج شيئًا معيوبًا خير لك من ألا تنتج مطلقًا، وأفضل من أن تنسحب من الطريق.. ده الكلام اللي أقنعت بي نفسي في وقت أصبت بشيء من الاحباط، وقد ذهب الاحباط وبقيت التجربة. 💚 كمان عشان أشوف بدايتي، ويشهد الناس عليها. وعشان كدا هشارك الفيلم معاكم في كومنتات المنشور ده، آخر اليوم بعد العرض إن شاء الله. وهنتظر منكم رأيكم. يومكم طيب 💚

الليلة رغم إجهادها كانت أحد ألطف وأروق ليالي حياتي، قليل أوي لما أحس هذا الإحساس.. أول امبارح خدنا محاضرة إخراج مع الأستاذ حماد، وكانت مراجعة لتمارين إخراج عملناها في شهر 7، وكانت عبارة إننا نعمل مشهد مكثف لا يزيد عن دقيقتين، له بداية ووسط ونهاية، وكل تمرين في 3 أشخاص يخرجوا تمرين واحد بس. غرض التمرين هو العمل الجماعي أولا، وإننا نحقق من هذا العمل الجماعي عمل يستحق المشاهدة. تمرينين حققوا المطلوب، والباقي كان في مشاكل كبيرة، سواء في التواصل والعمل الجماعي، يعني في فريقين كل واحد عمل تمرين، وفريق كل واحد كان عنده مشكلة قوية في التواصل والتآلف، وفريقنا اللي كان عنده مشكلة وهي الاستسهال وعدم أخذ التمرين بجدية (هو مش أوي يعني بس اتحكم علينا بكده). والأستاذ حماد خدنا غسيل ومكوة ورزعنا في ركن المحاضرة وهاتك يا ضرب! طبعا كانت تعليقاته لمصلحتنا، وكان بيحاول يقدم كل اللي يقدر يقدمه عشان نخرج من التجربة دي أكثر نضجًا. ملحقناش نشتغل أنا وحاتم على معالجة الفيلم القصير تبعي، فروحنا، ونمت تقريبا 3 ساعات، عشان تاني يوم اللي هو لسه خالص ده ناخد محاضرة إخراج تانية، وكانت عن «البلوكينج» وهي حركة الممثلين داخل الكادر، وايه القرارات اللي ممكن تتاخد وليه، ونوصل إيه من الحركة دي. كانت محاضرة مهمة، لكنها كانت مكثفة وتقيلة شوية. نيجي بئا لليلة، المفترض هنعرض كل الأفلام تاني يوم، اللي هو النهاردة يعني، ولسه مسلمتش. روحت أنا وحاتم على قهوة، وجه الأستاذ حماد والأستاذ رشاد (مدير المدرسة)، وأماندا وعبد الله وفيصل ومازن وبدر وياسر. قعدنا نشتغل شوية وبنحاول نظبط الصوت الضايع، ونبصمج مونتاج المشاهد اللي اتحذفت، وبعد شوية مشي الأستاذ رشاد وبدر وياسر، ولحق بهم بعدها بشوية مازن. والباقي فضلنا سهرانين لقبل كتابة المنشور ده. الحقيقة كانت سهرة جميلة أوي، نقاشات ومشاكسات بحضور الأستاذ حماد. وفهمنا بعض بشكل أكبر. الأستاذ حماد كان بيحاول يخرج أحسن حاجة فينا، وهو بيعرف يوجه بشكل جيد أو بيحط ايده على اللي بنعرف نعمله واحنا مش واخدين بالنا، وده معناه أنه بيعرف يقرانا، وبيبذل مجهود في ده. بلاحظ إنه بيسأل أسئلة بسرعة في وسط الكلام علشان يوجه الكلام في حتت معينه بتوضحه أكتر، أسئلة ذكية جدا وسريعة. ومهتم أوي بالخلفيات بطريقة مثيرة للاهتمام، أغلب أسئلته أنه بيخرج منا كلام عن خلفياتنا، وهو كمان كان بيشاركنا بشكل ما عن خلفيته، وده خلاني أصلا أقدَّر إننا من خلفيات مختلفة ومتوافقين وزرع فيا الفضول أكتر تجاه أفراد الدفعة. مصر فيها فئات كتير قوي مختلفين تماما عن بعض، بس كلنا مصريين جدا من جوة. كانت الحاجات بتتفتح بشكل تلقائي، وفكرة إن الفن متجذر في كل شؤون الحياة الخاصة والعامة. بتأمل يعني في فكرة إننا من خلفيات مختلفة بس مشتركين في أفكار معينة بس بطرق مختلفة وإن عندنا المساحة المفتوحة دي للحوار والتقبل. ده شيء جميل. حسيت إن دي مصر كما يجب أن تكون. بس للأسف زي ما قال حماد، ده في المدرسة، لكن المجتمع قاسي. حسيت إننا دفعة ثرية أوي للكتابة عنها، وكمان يتعمل عنها فيلم. على رأي أماندا لما كنت بقولها كدا بتقولي: جينا نتعلم دراما بقينا إحنا الدراما 😂 موجود صراع واضح في حياة كل حد فينا من الناحية الفردية عشان يكمل في المدرسة، وكمان صراع البحث عن أرضية مشتركة من الناحية الجماعية. بشعر إننا طول الوقت بشكل ما في صراع مستمر نكون موجودين أصلا في البيئة دي، وصراع مستمر بنحاول كلنا نلاقي أرضية مشتركة، بشكل ما. وكل فترة حد فينا يخبط في التاني، وتاني يوم يكونوا ع القهوة سوا وبنضحك لبعض بصدق. دي حاجة عجباني أوي في مدرسة الجزويت. وبردو جو العلاقات العاطفية فيه لير كتير عن الشخصيات، أيوة حصل كام علاقة كدا من تحت لتحت، فيهم لسه مكملة وفيهم حصل أكشنات. والله دفعة جامدة كمادة للكتابة. المهم، أنا مروح دلوقت في القطر، وبكرة هصحى ع 12 عشان ألحق أوصل المدرسة وأسلم الفيلم القصير وأحضر عرض الأفلام. تصبحوا على خير وعافية 💚

مسالفل.. للأسف تجربة الفيلم القصير تبعي حصل شوية غلطات مونتاجية بنحاول نداويها بس مشكلة إننا هنقص مشاهد مهمة. على كل هي تجربة ممتعة وحلوة بأخطائها ونتعلم منها في اللي جي. هنشره ع بكرة إن شاء الله نكون بصمجنا اللي نقدر نبصمجه..

كادرات مؤنسة..

Dir: Hong Sang-soo

سفر للقاهرة ذهاب ورجوع، برعاية Rocky

لا إله إلا الله! خلصت والله لو بعرف أزغرط هزغرط! أنا حددت مشروع من مشاريع أفلامي، بعنوان: الحج إلى شؤون الطلبة. عشان اللف والدوران اللي لفيته ودورته انهاردة يكفي حج وعمرة 6 سنين بأشواط الصفا والمروة!

يا لهواااااااي الحقوناااااي حد يجدني من شؤون الطلبة حااالاااااان

من الكواليس.. 🎥🎬

مشروع صهاينة وفشل والله

أجارك الله من شؤون الطلبة النسوان! أكاد أجزم إن لديهم صلة بالموساد الإسرائيلي.

وصلت القاهرة حالا أجيب شهادة تخرج سارة اللي بقالها سنة، آخر مرة نزلت القاهرة كان في معرض الكتاب شهر 1 اللي فات، وأتمنى من قلبي منزلهاش تاني لا في العادي ولا في المعارض. مدينة زفت أعوذ بالله!

Jason Bourne (2016) الفيلم الـ 177 من رحلة الألف فيلم.. عودة للشخصية الرئيسيَّة للسلسلة، وتبدأ القصة بعد سنوات من اختفاء بورن عن العالم. يعيش بعيدًا عن الأجهزة الاستخباراتية، إلى أن تظهر أمامه معلومات جديدة مرتبطة بوالده وبالبرنامج الذي كان جزءًا منه. في الجهة المقابلة، تحاول «لي»، عميلة شابة في الـCIA، الوصول إلى بورن والسيطرة على الموقف، بينما يتم إطلاق قاتل محترف للقضاء عليه. الفيلم إذن يُعيد بورن إلى لعبته القديمة من المطاردة والهروب وكشف الماضي، ومواجهة المؤسسة التي صنعته، لكن هذه المرة مع سؤال شخصي أكثر تحديدًا يتعلق بوالده ومصدر تحوله إلى جيسون بورن. الفيلم ممتع ومسلي كعادة السلسلة، لكن هناك مربط آخر في هذا الفيلم وهو يخص السردية، كيف يمكن أن تصنع أمريكا الأحداث وتستغل اسم الإسلام والعرب، خاصة مع أجواء داعش والأحداث التي كانت تطغى على هذه الحقبة.. والفيلم ينتقد هذه اللعبة. #تحدي_موميه_أفلام ١٧٧

The Bourne Legacy (2012) الفيلم الـ 176 من رحلة الألف فيلم.. الجزء الرابع من سلسلة بورن، لكنه لا يتابع جيسون بورن مباشرة؛ بل يوسِّع العالم الذي تدور فيه السلسلة حول برامج التجسس والعمليات السرية التابعة للحكومة الأمريكية. تبدأ الأحداث بعد انكشاف برنامج تريدوستون وما يرتبط به من فضائح. يؤدي ذلك إلى قرار حكومي بالتخلص من برنامج موازٍ يُدعى أوتكَم، وإبادة جميع عملائه حتى لا تترك البرامج السرية أي آثار يمكن أن تدين الحكومة. من بين هؤلاء العميل آرون كروس، الذي يكتشف أنه أصبح هدفًا لعملية تصفية شاملة. يحاول كروس النجاة، لكنه يعاني من مشكلة في قدراته الجسدية والعقلية مرتبطة بأدوية خاصة كان يحصل عليها ضمن البرنامج. يتحول الفيلم إلى مطاردة وهروب بين كروس الذي يريد أن يبقى حيًّا ويستعيد استقلاله، والأجهزة الأمنية محوه نهائيًّا. وفي الوقت نفسه، يكشف الفيلم تدريجيًّا حجم المنظومة التي صنعت هؤلاء العملاء وحوَّلتهم إلى أدوات بشرية قابلة للاستبدال. #تحدي_موميه_أفلام ١٧٦

الحيوان اللي بيزعق في المايك

صباح الخير.. بالنسبة ليا لما بكتشف مخرج جديد، وهو غير مشهور، أو معروف في نطاق معينة، والمخرج ده يكون بالفعل مختلف وعنده حاجة بيقدمها، وأفلامه فيها شُغل.. دي حياة جديدة اتفتحتلي، وفصل جديد بينضاف لحياتي من خلال أفلامه. في 2024 اكتشفت إيريك رومير، وكل فيلم من أفلامه بمثابة حياة. السنة دي اكتشفت هونغ سانغ سونغ، ومبسوط أوي بيه، وبنتشي مع كل مشهد بشوفه من أفلامه. الجدير بالذكر أنه بيطلق عليه إيريك رومير الكوري! وده بينبئني بالاستايل المفضل ليا في الأفلام، أو التون والصوت اللي ممكن أمتثله بعد كدا في صناعة الأفلام، لإنك تكون متأثر ومُقبل بكُلَّك على مخرجين بعينهم بيجمعهم صوت وأسلوب واحد، ده يُنبأك بشيء في نفسك. خدنا لإيريك 18 فيلم السنة اللي فاتت من حوالي 25 فيلم ليه، الباقي مكانش متوفر. حاليا معايا 23 فيلم لهونغ سونغ من إجمالي 35 فيلم أخرجهم حتى الآن. خدنا منهم 3 أفلام الشهر اللي فات، وأعتقد هو اللي هيكون صاحب الأعمال الكاملة هذا العام. الأفلام اللي خدناها لهونغ: - Claire’s Camera - Grass - The Novelist's Film وفيلم Grass كان مرجعية أساسية لفيلمي القصير اللي فات ده.

خلصت خماسية بورن في يومين، توديع الإجازة، ومن هنا لشهر 12 هشحت وقت عشان فيلم يتشاف! وفي بتاع 5 أفلام شوفتهم الشهر اللي فات لسه منشرتهومش، يا رب يعجبوكم.. 🩵