Eldor Ilxomovich

“Turkiston” sanʼat saroyining yozgi maydonida Toshkent davlat transport universitetining 2025–2026-o‘quv yili bitiruvchilari uchun “Bitiruv kechasi - 2026” bo‘lib o‘tdi. Ochiq osmon ostida, o‘zgacha shukuh bilan tashkil etilgan ushbu tantana yosh mutaxassislar hayotidagi eng hayajonli va masʼuliyatli pallalardan biriga aylanib, mamlakatimiz transport-logistika tizimi uchun raqobatbardosh kadrlarning yangi avlodi yetishib chiqqanini yorqin namoyon etdi. Marosimda O‘zbekiston Respublikasi Transport vazirining birinchi o‘rinbosari Mamanbiy Omarov, Transport prokurorining o‘rinbosari Doniyor Rahmatullayev, universitet rahbariyati, professor-o‘qituvchilar, sohaning yetakchi mutaxassislari, faxriy mehmonlar hamda keng jamoatchilik vakillari ishtirok etdi. Tadbirda soʻzga chiqqanlar aziz yoshlarni ushbu unutilmas sana bilan samimiy tabriklab, Yangi O‘zbekistonning transport tizimini rivojlantirish yoʻlida ularni ulkan masʼuliyat va sharafli vazifalar kutayotganini taʼkidladilar. Shuningdek, yosh mutaxassislarning kelgusi kasbiy faoliyatida zafarlar, fidoyilik va yuksak natijalar tilab, mustaqil hayot sari dadil odimlashlariga ishonch bildirdilar. Tantana davomida universitetning eng faol va peshqadam talabalari, xususan, “Mard o‘g‘lon” davlat mukofoti sovrindorlari hamda sohaga oid “Iqtidorli yosh transportchilar – 2026” pilot loyihasi g‘oliblari alohida eʼtirof etildi. Shuningdek, o‘qish yillari davomida ilmiy, jamoatchilik, sport va madaniy-ma’rifiy yo‘nalishlarda barchaga o‘rnak bo‘lgan imtiyozli diplom egalariga maxsus diplom hamda esdalik sovg‘alari tantanali ravishda topshirildi. “Bitiruv kechasi – 2026” tantanali tadbiri diplom va mukofotlar topshirish marosimidan so‘ng yorqin gala-konsert dasturi bilan davom etdi. Tadbirda el ardog‘idagi san’atkorlar — Tohir Sodiqov, Yorqinxo‘ja Umarov, Rayhona hamda G‘aybulla Tursunovlarning musiqiy chiqishlari bitiruvchilar, ustozlar va mehmonlarga chinakam bayramona kayfiyat ulashdi. Qiziqarli sahna chiqishlari, DJ Macarella taqdim etgan zamonaviy raqsbop musiqalar, jonli ijrolar va ko‘tarinki muhit bitiruvchilarning talabalik yillarini unutilmas xotiralar bilan yakunlashiga xizmat qildi. Ushbu tantanali oqshom talabalik yillarining eng go‘zal xotirasi bo‘lish bilan birga, transport sohasida yangi marralarni zabt etishga shay turgan iqtidorli kadrlarning katta hayotga olingan yo‘llanmasidir. Oldinda sizlarni mamlakat ravnaqi yo‘lidagi sharafli va mas’uliyatli vazifalar kutmoqda. Zafarlar yor bo‘lsin sizlarga, Vatanimizning umidli yoshlari!