الرُؤَىٰ." 🔻

فكرة التسليم التام لقضاء الله وقدره وأنك متأكد أن مفيش ضياع فكرة ممزوجة بشعور الطمأنينة، تكون الدنيا مقلوبة وتقول الحمد لله وتلاقي أتفتحت معاك من كذى حته وجالك فرص تاني بس علشان رضيت بالابتلاء وحمدت! الفكرة انك مُبتلي فيما تحبه علشان ربنا يقيس مدى صبرك وحبك ليه، ف طالما كدة كدة واقع عليك الإبتلاء خليك ذكى وأكسب محبة الله وفرص ما بعد الرضا والحمد🤍🕊

قال رسول الله -صلى الله عليه وسلم-: ألا أنبئكم بخير أعمالكم، وأزكاها عند مليككم، وأرفعها في درجاتكم، وخير لكم من إنفاق الذهب والورِق، وخير لكم من أن تلقوا عدوكم فتضربوا أعناقهم ويضربوا أعناقكم؟ قالوا: بلى يا رسول الله. قال: ذكر الله تعالى.

كل تعطل معاك اديها واحدة اللهم اني اسألك الثبات في الامر والعزيمة على الرشد ونسألك موجبات رحمتك وعزائم مغفرتك نسألك شكر نعمتك وحسن عبادتك ونسألك قلبا سليما ولسانا صادقا ♡

نسيت أقلكم، لو عايزين تضيفوا على تدريبات العقل على التركيز، العبوا لعبة ذكاء، يا ريت بس تكون بعيد عن وقت البريك علشان تريح عقلك وبعيد عن وقت الشغل 🤩 زي الشطرنج او العاب فك الالغاز كدة يعني أنا اختارت الشطرنج لأسباب خاصة، نقوا انتوا بقى 😂♥️

مصدر المقال أدرك عمرك، عبد الله وسية انصحكم تتابعوه♥️

طويل حبتين🤏🏻 بس معلش 😂💗

ياترى إيه هو العائق اللي بيوقف لنا في النص واحنا بننفذ مهمة معينة؟ التشتت، وهنا أنا مش جاية اقلك أبعد عن الفون وقلل سوشيال ميديا والكلام ده كله اللي شبه حفظناه ومش بنعمل بيه!😂 خليني أقلك ليه لازم تركز الاول وإيه هي المميزات لو أنت شخص دايمًا مركز ف أنت هتكون 1_ نميت التفكير النقدي عندك وبعدت السطحية من تفكيرك 2_ زيادة الإنتاجية والانجازات اللي وضعتها في الخطة 3_ اختصار الكثير من الوقت 4_ عززت الثقة بالنفس لان كل ما كنت اكتر إنتاجية ومنجز ده بيديك دفعة ثقة انك تقدر تعمل أي حاجة 5_ راحة الضمير، ومفيش بقى هقوم الفجر أشد جامد لا راحة ضمير بمعني الكلمة😂 6_ قدرتك على التخيل الحي، في كورس ادرك عمرك لعبد الله وسية ذكر فيه كذى مثال ومن ضمن شركة مايكروسوفت لما قالت في التمنينات ان في يوم من الايام هيكون في حاسوب في كل منزل وده طبعًا كان وقتها شيء شبه مستحيل ولكن التخيل الحي كانت نتيجته اقوى، ومن ضمن الأمثلة مقولة انشتاين " الخيال اكثر قوة من المعرفة، فالمعرفة تجعلك ترى الأشياء كما هي أما التخيل يجعلك ترى الأشياء كما يجب أن تكون. بص يا سيدي عقلك ده خارق عايز له مقال لوحده ولكن خليني أكتفي ان اقلك انت تقدر عمرك فزت في جيم كنت مركز فيه؟ طيب عمرك لميت مادة ليلة امتحان وجبت فيها تقدير؟ _ كلنا عملناها_ ده بقى يا سيدي دماغك لما يركز بعد توفيق الله طبعًا. طيب تعمل إيه علشان توصل للنقطة دي وتبقى كدة دايمًا مش وقت الزنقة بس؟ إليك الخطوات...... لازم يكون عندك هدف والهدف ده يكون بين ٤ حاجات شيء بتعمله ليه مستقبل ليك، شاطر فيه لو مش شاطر تبقى، تدخلك فلوس أو تقدير لو تبع الدراسة، تحبها ولو مش بتحبها حبها علشان تشتغل في اللي بتحبه علشان انت مش هتنقي ده شغل وانت ملزم بيه كل دول يكونوا مرتبطين بنية ان يكون ليك رسالة وأثر تتركه بالعلم اللي اتعلمت بعدين. لو أنت بقى حد مشتت خالِص والتركيز بيكون وقت الزنقة بس_ اصل مش معقول يعني عمرك ما ركزت ده كفاية عينك اللي اتمققت في متابعة المسلسلات بالتفصيل😂_ 1_ الدعاء، صدقني بدون الاستعانة بالله أنت ولا حاجة أنت شاطر علشان فيه رب بس 2_ شرب مية كتير، حط جنبك ازازة مية وانت بتشتغل، مخك عبارة عن 80% مية يعني قلتها بتأثر على تركيزك في ساعات نشاطك 3_ ركز على ساعتك البيولوجية وسيبك من اللي يقلك افصل وقت هو وقت الفجر ومعرفش ايه بعيدًا عن انه افضل وقت فعلا بس مش لازم يكون الساعة البيولوجية بتاعتك، لو عايز تبني عادة صحية درب نفسك على ان الوقت ده يكون الساعة البيولوجية بتاعتك لو معرفتش خلاص شوف ايه هي الساعة دي وأبدأ اشتغل على مهمه ما وتنجزها ده هيديك دفعة ثقة انك ركزت وقدرت تعمل ده في وقت كويس وهيديك ثقة اكتر انك تكمل 4_ ابعد عن المشتتات طول ما انت بتخرج من ابلكيشن تروح التاني انت كدة خليت عقلك في استقبال وإرسال طول الوقت وزودت نسبة التشتت، قلل ابلكيشنز 5_ نسبة التشتت وانت في مكان فيه دوشة بتكون 64% يعني لجوئك انك تذاكر برة البيت أو تشتغل برة البيت ده في حالات معينة زي الضغط أو البيرن اوت وده هنتكلم عليه علشان كدة اشتغل في مكان مغلق 6_ الريحة، الرؤية البصرية زي مثلا شكل مكتبك عامل ازاي الاقلام، ريحة الاوضة كل ده مهم جدًا 7_ التغذية، أهم حاجة الخضار الورقي والسمك ومتسالش ليه علشان يطول شرحة السمك فيه حمض DHA قلته مع مرور الوقت بياثر على الخلاية الذهنية والتركيز 8_ اشتغل بايدك الاتنين، ليه؟ علشان كل ايد عكسها فص مسؤول عن التركيز، ف مثلا دايما شغال بايدك اليمين يبقى الفص الشمال شغال ف حاول تعمل مهام تدرب بيها اديك الشمال علشان تقوي الفص اليمين. طيب عملت كل ده وبردو منفعش ! تحبط بقى واصل انا منفعتش وكل ده؟ لا، العلماء قالت إن الانسان اللي لسة بيدرب على التركيز مش بيقدر يركز اكتر من ساعة ف وحدة وحدة على نفسك كدة علشان كدة قلت لك ابدا بالساعة البيولوجية _ متنساش تريح مخك مش جسمك، يعني وقت البريك ريح دماغك حبة مينفعش يكون البريك ترييح ضهر وانت قاعد تسكرول وناسي أن في دماغ شغالة وقت طويل وحرام تكون في إرسال واستقبال طول الوقت. آخر حاجة التصور، عقلك الباطن مش بيفرق بين الحقيقة والخيال، يعني عمرك بكيت لما شوفت مشهد حزين؟ أكيد حصلت نفس الشيء تصور انك انجزت المهمة دي وانت بالفعل بتنجزها، بس حاسب عقلك يخدعك ويفهمك انك عملتها وانت معملتش حاجة لمجرد انه اخد حبة دوبامين من التخيل!! لو عايزة تفهم يعني إيه وإزاي نتفادى ده استنى مقال بكرة. _ رؤى شهاب الدين

"كُنْ لنفسِكَ كُلَّ شيء" احتضن يدكَ عندما ترتجف باليد الأخرىٰ، وإنْ شئتَ التشجيعَ فَاهمسْ في قلبِكَ: أنا هنا لأجلِك، أو حامَتْ فوقَكَ المتاعب فَكُنْ كما عهدتَ نفسكَ صبورًا على المَشَقَّةِ، قويًّا عند الشدائد، ثمَّ إيّاك وخذلان روحِكَ، فإنْ فعلتَ فَمَنْ سيقفُ جواركَ؟! أنتَ تحتاجَ إليكَ، وربَّما الآن أكثر من أيِّ وقتٍ مضى، فَكُنْ لنفسِكَ عونًا، ونصيرًا، ومُسْتَرَاحًا، ووطنًا، ولا تكُنْ عونًا للحياةِ عليك! - عماد عيد

لو بنوتة تبعتلي وهرد عليها عادي، وبعد أذنكم يعني بلاش تبدأ الشات ب "." علشان مش هبادر وأسأل فيه إيه، اللينك أهو 🤩🤍

https://91878042990380.sarhne.com هستنى صوركم هنا وتشاركوني عملتوا إيه، يااااااا رب الاقي حد نفذ التاسك🤡

كان في حد مسجل في الفورم مش متحمس ومستني يشوف قدراتي 😂🤍 متقلقش مش هغلط خالِص أشتغل أنت بس وهفاجئك في الآخر بسني ودراستي 😂🤍🤍🤍

إيه هدفي من كل ده؟ هتعرفوا في نهاية الرحلة، دمتم بخير💜

شايفين اقصد إيه بالشخبطة؟ لولاها مكنتش عرفت أعمل المحتوى ده بجد😂💜

بالشكل ده💜

1_ أكتب كل اللي أنت عايزة وعايز توصل له 2_أرجع أقرأ تاني اللي كتبته 3_حدد المهم ثم الأهم ثم المهم جدًا 4_علم بألوان أو بأرقام 5_أبدأ أكتبهم تاني بس بالترتيب كدة أنت نجحت، متنساش تشارك💜

تعرفوا؟ الناس اللي سجلت في الفورم قليلين خالِص، مكانش مهم عندى العدد قد ما مهم أشتغل مع حد عايز يبدأ بجد، شكرًا للاهتمام بتاعهم بجد💚

هتسلم التاسك إزاي؟ هتسلم صورة موضحة أنك بالفعل بدأت في لينك الصراحة أو في يوزر التلجرام او ممكن نعمل بوت علشان نتشارك عليه

أول تاسك هتشتغل عليه وهو الكتابة بشكل عشوائي طيب ليه؟ وإشمعنا عشوائي؟ علشان توصل للهدف أو الشيء اللي انت عايزة ومجهول بالنسبة ليك لازم لك خطة، وعلشان تعمل خطة لازم تفرغ كل اللي في دماغك، دماغك كل دقيقة بيخلق فكرة ومع كل فكرة بتبدأ تتشتت ودماغك حساسة جدًا، وقلة التركيز والتشتت هيخليها واقفة عند نقطة معينة واللي هي " أعمل إيه؟ أصل انا تايه" ومع مسكة القلم وتفريغ كل اللي في دماغك بتبدأ ترسم خطة وتشوف الصورة بشكل أوضح. طيب ليه عشوائي؟ علشان حضرتك لسة بادئ في الكتابة ف طبيعي جدًا علشان ترسم خطة للي في دماغك أنك تتشتت وهتبدأ تحس بالإحباط حيال ذلك، ولفي بينا يا دنيا ف اللي طالباه منك جلسة مع نفسك ورقة قلم شخبط اكتب اي حاجة المهم خرج اللي في دماغك كله بعد ما تعمل التمرين ده هبدا أديك تاسكات تاني علشان تكمل الرحلة.

السلام عليكم ورحمة الله وبركاته، قرأت الردود وعرفت مشاكلكم ف بإذن الله الكورس يكون كافي لحل كل مشكلة واجهتكم في البداية خليني أعرفكم يعني ايه المُلتف لا يصل المُلتف هو المشتت، اللي شايف نفسه تايه، المتخاذل، اللي واقف عند نقطة في الماضي وسايب حياته تمشي لوحدها! أنا كنت في يوم من الأيام ذلك الشخص لغاية تجارب معينة كدة بعدها ملقيتش نفسي غير وأنا بحاول وبخلق لنفسي فرصة تناسب الموارد اللي معايا وقدراتي، وصحتي النفسية والجسدية وده اللي هنقله ليكم. طيب هل كل اللي هقوله مجرد كلام؟ لا كل اللي هينزل في المحتوى حاجات أنا درستها من كروسات مدفوعة كتب قرأتها، تجربتي الشخصية وتجارب أخرى يعني متخافش مش هضيعك، المهم تشتغل على نفسك وتنفذ كل اللي هطلبه منك. إيه محتويات الكورس ومدته قد إيه؟ مدة الكورس 40 يوم متتاليين، في أول 10 أيام هنتكلم على كذى مهارة لازم تكون عندك وكل مهارة هتكون بتدريب معين علشان تعرف تكتسبها، والمهارات دي مش هتشتتك ولا حاجة لا هي بس هتخليك توصل للهدف بإذن الله لو اتبعتهم هتوصلك لأنت عايز إيه ، بعد ال10 أيام هنبدأ شهر كامل بتاسكات يومية هتاخدها مني وتنفذها زي مثلا تضيف عادة جديدة، تتعلم شيء جديد _ طبعًا بعد أكتشاف نفسك عايزة إيه_ تتعلم إزاي تذاكر، إزاي تدير وقتك، تخرج من زون الضغط إزاي وألخ وده طبعًا بعد ما تكتسب أهم مهارة وهي التركيز !. طيب هنشارك إزاي؟ مطلوب منك تسلمني التاسك يوميًا في معاد معين هحدده، بصورة او فلوج او حتى تحكي في ماسدج عملت ايه وايه المشكلة اللي واجهتك يعني ملزم بده، علشان تعزز الحماس عندك وتحس أنك بتعمل حاجة بجد. هبعتلكم أول تاسك دلوقتي وبكرة تسلموه علشان ندخل على أول محطة في أول 10 أيام. ♡

يا جماعة علشان لقيت كتير مش فاهم يعمل إيه، أضغطوا هنا وردوا على الأسئلة وبس ده المقصود بأملأ الفورم😭