هوى .

‏السن مايحكم عقول الاوادم ‏وميزان عقل الادمي في لسانه .

‏يابو الغره اللي تنفهق عن مفيض النور ‏عسى باقيٍ لي شي قدام لااشيّب ‏عسى باقيٍ لي وصل ماهو شعر وشعور ‏ترى وصلك انفع لي من النافع الصيب ‏ياكم داجت اقدامي على بيتك المهجور ‏وعلى بعد دارك كنت احس انك قريب ‏الاسراف في حبك لعب في حياتي دور ‏والاسراف حتى بالمشاعر مهو طيب

دون عز النفس ماهبنا خساير ‏والعزايم من فضل ربي كبيره .

‏تلاشى النهار و عوّد الليل .. بـ التذكار ‏على وجهه الغامض يغطي مشاريعه ‏يدف الطواري قدم عيني وانا المنهار ‏اجدد له احساسي و اجدد له البيعه ‏طواري غريبه لو ماني غريب .. اطوار ‏تحنّ الخفوق لـ عزلته .. و لـ مواضيعه ‏رهين الوله و ان جيت بْـ ادله مع السمار ‏تنادي المساري كل .. ضيقه و تلويعه ‏و اضيّع و ادل الدرب و واجه الاضرار ‏لكن فقدة الاحباب هي والله الضّيعه ‏عجزت اتحايل و امنع الطـاري المرار ‏وهو لاقي بـ[ حزني ودمعي ] منافيعه ! ‏اذا الليل يسلب بسمتي دون سبق انذار ‏عسا الصبح يحمل بسمتي مع ذعاذيعه ‏حبيبي بعد غنّت على بعدك الاقدار ‏وقف كل طاري مر يرهي مواجيعه ‏انا كيف بـ ارضى البعد وادله عن اللي صار ‏وش طوّل من سنين الهوى غير اسابيعه ؟ ‏ومن يرد ضحك القلب غيرك ياملح الدار ‏بعد ما عطاني . ( دمعتينه و توديعه ) ! ‏شف جروحي الحيّه ماتطلب من الاعذار ‏سوى .. صبحٍ بـ جيّتك غنّت .. مطاليعه

‏النفس عودها على العز تعتاد ‏وارفع مواطنها عن الذل والهون .

‏وش يلحلح ضيقةٍ تجهل مواعيد الزياره ؟ ‏هرجها همّ وثقيلة طينه و مصدر ملل ‏آتقهوى من مرارة هالشعور بْلا استخاره ‏وآتفنجل كنّي اسقي زهرة العمر بـ عسل ‏ ماالها نيّه تروح مْبيّته نية عماره ‏ضيفٍ بْليّا كرامه ما وهبه الله خجل ‏بين صكّات الليالي والضحوك المستعاره ‏قلبٍ اعيته الظروف وانزعت منْه الأمل ‏ساوت الأيام معنى الربح عنده والخساره ‏والمعنّى ما يحسّ ان قلبه المتعب ذبل ‏آتحرّى حارس احلامي يصفّر لي باشارة ‏مادريت ان زمزم الاحلام له عمر وأجل ‏غفلة الأوهام تمحي واقعي تاره وتاره ‏آتخيل والخيال اقسى محطات الفشل ‏آخ من عقلٍ بنا من هاجس افكاره حضاره ‏يهرب لفكرة يتيمة عن تهاتيه الوجل ‏القدر ما يحجب وْقوعه ذكاء ولا شطاره ‏اقشر الحال ان كتبْه الله على عبده حصل ‏راكد الما لو لحقْه مْن البشر رمي الحجاره ‏عوّد لهادي سكونه ما حوى بجوفه زعل ‏ليه ألوم النار في حرقي وانا كنت الشراره ؟ ‏قلبٍ اهيَف وش له بفرقى الحبايب والأهل ! ‏ ‏فالصدر متمركيه ضيقة تجرّعني مراره ‏ضيقة اللي ما لقى في قلب محبوبه محل

بشروا راعي الصبر حلمه قريب ‏لو يطول الوقت لا يفقد رجاه .

‏خلني ساكت انا كلي عتاب ‏خوفي اجرح قلبك لا حكيت ‏لا تسالني عن الزعل والاسباب ‏راجع افعالك ان كان نسيت ‏اي بالله راضي بالجفا و الغياب ‏دامـك على قلب يحبك قسيت ‏عندي سؤال واتمنى له جواب ‏لو تبادلت الادوار بيننا رضيت .!

‏من صدّ عني جعله اخر همومي ، ‏ومن صان قدري جعلني ماخلا منه .

‏أنا عاذرٍ صدري إذا ثار وألا إنهار ‏على كثر ما أدفن فيه ما فضفض ، وطلّع ‏ياشين الذكا لاصار يكشف لك الأسرار ‏سكوتك وجع ، والأوجع العلم لا صلّع ‏مثل عود رمثٍ حاذفينه وزان النار ‏إذا صالته دخّن ، وإذا ناشته ولّع ‏جَهَلْك الأمور أخير من معرفة وش صار ‏ترى المعرفه قسمة مقاريد ومقلّع