Samir studies dz

اولا : التزم بالوقت ، دير حسابك توصل للمركز قبل 20 دقيقة من بداية الامتحان للمركز ولي بعيد يدير حساب ترونسبور ويخرج بكري خاطر كاين بضعة مراكز تتأخر دقيقة ما يدخلكش ويروح تعب عام كامل في باطل ثانيا : حتى وتكمل بكري ما تخرجش من القسم ، خاطر كاين بضعة أساتذة الا من رحم ربي ، كي يشوفك جاوبت مليح وخرجت بكري يمد ورقتك لطالب يكون يعرفوا يكتب عليها وتعتبر انت هو لي غشيتي ،، يعني كمل الوقت حتى للأخير ثالثا : ذرك بعد وجد صوالحك ، بطاقة التعريف . الاستدعاء . الأقلام مع الاحتياط دير 2 اسود و2 ازرق. آلة حاسبة . اوراق مليمترية . مسطرة. منقلة. ممحاة . .... رابعا : ما تخافش. صحيح امتحان يبان رسمي شوية . انا ثاني أصابني الخوف في الباك الاول تاعي . لكن الخوف يكون في النصف ساعة الأولى فقط قبل ما يمدولكم الموضوع تع العربية . بعدها يبانلك كلش عادي . تسمى ما تخافش خاطر الخوف يؤثر عليك سلبا رابعا : كي تدخل اقرا المعوذتين . اية الكرسي . ادعي ربي يسهلك وابدا خامسا : احسن اختيار الموضوع ، خذ وقتك في اختيار الموضوع . واكبر خطأ بعد نصف الوقت تبدل الموضوع ونتا ديجا مشيت في الموضوع الاول سادسا : يفضل انك ما تغشش . خاطر ربي ما يوفقش في حاجة مبنية على منكر . (وكيما تبغي اخي واختي هاذي حياتك ) سابعا : اجب بالمنهجية ' مثل في العربية ، اكتب ذرك في اليوتيوب منهجية الإجابة حيقون أسامة وشوف المنهجية تع الحكم و التمثيل و التعليل ثامنا : اكتب بالازرق و الاسود تاسعا : بين سؤال و سؤال اترك سطر فارغ ، باه تبين للاستاذ المصحح بلي انتقلت للسؤال الآخر عاشرا واخيرا : حسن خطك ، و الاهم اكتب #رقمـالموضوع المختار ، مثلا اخترت الموضوع الاول ، قبل ما تبدا تجاوب في أول سطر اكتب "الموضوع الاول " ربي يوفق الجميع ، اخوكم واستاذكم سمير يمتنى لكم التوفيق و النجاح . كانت سنة مليئة بالتعب ما تخليش تعبك يروح في باطل انت قدم كامل وش عندك و النتيجة ما تخممش فيها فهي عندك ربي