Ananda Saytanar Foundation

ရင်သားကင်ဆာ အခမဲ့စစ်‌‌ဆေးနိုင်မည့် အစီအစဉ် အနန္တစေတနာဖောင်ဒေးရှင်းကို စောင့်မျှော်ကြည့်ရှူနေသူအားလုံး မင်္ဂလာပါရှင် 🙏🏻🙏🏻🙏🏻 အောက်တိုဘာလဟာ ရင်သားကင်ဆာနှင့်ပတ်သက်ပြီး အသိပညာပေးတဲ့ လ ဖြစ်ပါတယ်။ ဒါ့အပြင် အနန္တစေတနာဖောင်ဒေးရှင်းရဲ့ Facebook Page ဟာလဲ မကြာသေးခင်ကမှ Follower 3 သိန်း ပြည့်သွားခဲ့ပြီဖြစ်ပါတယ်။ ဒါ့ကြောင့် အန္တစေတနာဖောင်ဒေးရှင်း Follower 3 သိန်းပြည့် အထိမ်းအမှတ်အဖြစ် အောက်တိုဘာလအတွက် Giveaway ကို ရင်သားကင်ဆာနဲ့ပတ်သက်ပြီး အထူးအစီအစဉ်အဖြစ် စီစဉ်ထားရှိပါတယ်ရှင်။ ဒီအစီအစဉ်မှ ကံထူးသူ (၃) ဦးကို ရင်သားကင်ဆာစစ်ဆေးနိုင်ဖို့အတွက် ရင်သားဓါတ်မှန် (Mammogram) နှင့် ရင်သားအယ်ထရာဆောင်း (Ultrasound) အခမဲ့ ရိုက်ကူးပေးခွင့် ပေးသွားမှာဖြစ်ပါတယ်။ ရင်သားကင်ဆာဟာ အဖြစ်များဆုံး ကင်ဆာတွေထဲကတစ်ခုသလို နောက်ကျမှသိတတ်တာကြောင့် သတိထားရမယ့် ကင်ဆာရောဂါတစ်မျိုးဖြစ်ပါတယ်။ အသိနောက်မကျရအောင် ပုံမှန်ရင်သားစစ်ဆေးခြင်းနည်းလမ်းတွေဖြင့် နောက်မကျရအောင် ကြိုတင်ကာကွယ်နိုင်ပါတယ်။ ဒါ့ကြောင့် ရင်သားကင်ဆာ အသိနောက်မကျရအောင် ရင်သားပုံမှန်စစ်ဆေးခြင်း အလေ့အထကို ပိုမိုသိရှိစေလိုတဲ့အတွက် အနန္တစေတနာဖောင်ဒေးရှင်းမှ ယခုလို Giveaway အစီအစဉ်လေး စီစဉ်ထားတာဖြစ်ပါတယ်ရှင်။ ဒီအစီအစဉ်မှာ ပါဝင်ဖို့အတွက်ဆိုရင် ✅ Facebook page က ယခုပို့စ်ကို like လုပ်ပြီး public မှာ ရှယ်ပေးရပါမယ်။ ရှယ်ထားကြောင်း screenshot လေးကို ဒီပို့စ်ရဲ့ comment မှာ မန့်ပေးထားရပါမယ်။ Facebook Page Link: https://www.facebook.com/anandasaytanarfoundation ✅ အနန္တစေတနာဖောင်ဒေးရှင်းပေ့ခ်ျကို like & Follow လုပ်ထားရပါမယ်။ ✅ ဒီအစီအစဉ်မှာ အမျိုးသား၊အမျိုးသမီး မည်သူမဆို ပါဝင်နိုင်မှာဖြစ်ပါတယ်။ မိမိက ကံထူးသူအဖြစ်ရွေးချယ်ခံရပေမယ့် ဓါတ်မှန်ရိုက်ကူးခွင့်ကို မိမိ မိတ်ဆွေ၊ ဆွေမျိုးသားချင်းထဲက သင့်တော်သူ တစ်ဦး (၁ ဦး) အား လွှဲပြောင်းပေးနိုင်ပါတယ်နော်။ ဒါ့ကြောင့် ကိုယ်က ရင်သားစစ်ဆေးဖို့မလိုသေးဘူးဆိုရင်တောင် ကိုယ့်ရဲ့ မိခင်၊အဒေါ်၊ညီမ၊အစ်မ တွေအတွက် ပါဝင် ကံစမ်းပေးနိုင်ပြီး ရင်သားကင်ဆာစစ်‌ဆေးခွင့်ကို သီတင်းကျွတ် ဂါဝရအဖြစ် လက်ဆောင်ပေးနိုင်မှာ ဖြစ်ပါတယ်ရှင်။ ရင်သားကင်ဆာစစ်ဆေးဖို့ လာရောက်မယ့်သူဟာ 🔹အသက် (၃၅) နှစ် နှင့်အထက် ဖြစ်ရပါမယ်။ 🔹ရန်ကုန်မြို့၊ ဒဂုံမြို့နယ်ရှိ CBL Medical Centre ကို လာရောက်နိုင်သူဖြစ်ရပါမယ်။ 🔹သတ်မှတ်ထားသော အချိန်ကာလအတွင်း CBL Medical Centre သို့ လာရောက်ပေးနိုင်သူဖြစ်ရပါမယ်။ ကံထူးသူ (၃) ဦးကို (၂၂.၁၀.၂၀၂၄) ရက်နေ့မှာ comment များထဲမှ Random comment picker ဖြင့် ရွေးချယ်ပေးသွားမည်ဖြစ်ပါတယ်ရှင်။ #အနန္တစေတနာဖောင်ဒေးရှင်း #AnandaSaytanarFoundation #By_AMMK_Investment_Holdings_Company #health #healthylife #ကင်ဆာ #Cancer #ကျန်းမာရေး #giveaway #NoBraDay

အထိုင်များရင် ကျန်းမာရေးထိခိုက်သလား 👉ငြိမ်ငြိမ်လေး ထိုင်နေတာက အန္တရာယ်ကင်းတယ်။ ကျန်းမာရေးအတွက် မထိခိုက်ဘူးလို့ ယူဆရင် အခုပဲ အဲ့ဒီအတွေးကို စွန့်လွှတ်လိုက်ပါ။ 👉လေ့လာချက်တွေအရ တစ်ရက်ကို ၈နာရီနဲ့ အထက် အထိုင်များတာက အဝလွန်တာနဲ့ ဆေးလိပ်သောက်တာနည်းတူ ကျန်းမာရေးကို ထိခိုက်နိုင်ပြီး သင်ထင်မထားတဲ့ ရောဂါတွေနဲ့ပါ ဆက်စပ်နေတာကို တွေ့ရပါတယ်။ 👉ငြိမ်ငြိမ်လေး ထိုင်နေတာက ကိုယ့်ကျန်းမာရေးကို တိတ်တိတ်လေး ဖျက်ဆီးနေတဲ့ အသံတိတ်လူသတ်သမားပါပဲ။ အထိုင်များတာကြောင့် ဖြစ်လာနိုင်တဲ့ ကျန်းမာရေးပြဿနာတွေကတော့ 🔸ခြေထောက်နဲ့ တင်ပါးက ကြွက်သားတွေ အားပျော့လာတာ ဒီကြွက်သားတွေက လမ်းလျှောက်ဖို့၊ ခန္ဓာကိုယ်ကို ဟန်ချက်ထိန်းဖို့ အရေးပါတဲ့ ကြွက်သားတွေဖြစ်တဲ့အတွက် အားနည်းနေမယ်ဆိုရင် ကြွက်သားတွေ တောင့်တင်းပြီး နေလို့မကောင်းတာ၊ ချော်လဲလွယ်တာတွေ ဖြစ်တတ်ပါတယ်။ 🔸ခါးနာတာ ခြေထောက်နဲ့ တင်ပါးက ကြွက်သားတွေလိုပဲ အထိုင်များတဲ့အခါ ခါးနဲ့ ပေါင်က ကြွက်သားတွေပါ တောင့်တင်းပြီး နာကျင်လာပါတယ်။ ဒါ့ပြင် ထိုင်တဲ့အခါ ကိုယ်နေဟန်ထားမမှန်တာနဲ့ပါ ပေါင်းစပ်လိုက်တဲ့အခါ ခါးနာတာ၊ ကျောရိုးဆစ်တွေ ပျက်စီးတာတွေပါ ခံစားရလာပါတယ်။ 🔸ဇက်ကြောတက်တာ တစ်နေကုန် ထိုင်ပြီး တကုပ်ကုပ်နဲ့ ငုံ့ပြီး အလုပ်လုပ်မယ်ဆိုရင် လက်ပြင်နာတာနဲ့ ဇက်ကြောတက်တာတွေ ခံစားရမှာ ဖြစ်ပါတယ်။ 🔸ကိုယ်အလေးချိန်တက်တာ အထိုင်များပြီး လှုပ်ရှားမှုနည်းမယ်ဆိုရင် ခန္ဓာကိုယ်က အဆီနဲ့ သကြားဓာတ်ကို ကောင်းကောင်းမသုံးနိုင်လို့ အဆီစုပြီး ဝလာမှာ ဖြစ်ပါတယ်။ အထူးသဖြင့် ဗိုက်နဲ့ ခါးတစ်ဝိုက်မှာ အဆီတက်လာမှာပါ။ ဒါက နောက်ပိုင်းမှာ သွေးတိုးရောဂါ၊ ဆီးချိုရောဂါနဲ့ နှလုံးရောဂါဖြစ်နိုင်ခြေကို များစေမှာပဲ ဖြစ်ပါတယ်။ 🔸စိုးရိမ်ပူပန်စိတ်နဲ့ စိတ်ကျရောဂါ အကြောင်းရင်းကို သေသေချာချာ မသိရသေးပေမယ့် အထိုင်များတဲ့သူတွေက စိုးရိမ်ပူပန်မှုများတာနဲ့ စိတ်ကျ‌ရောဂါ ပိုဖြစ်တာကိုတွေ့ရပါတယ်။ ဖြစ်နိုင်တာကတော့ အထိုင်များတဲ့အခါ လေ့ကျင့်ခန်းမလုပ်ဖြစ်၊ လေ့ကျင့်ခန်း မလုပ်ဖြစ်တော့ စိတ်ပျော်ရွှင်တဲ့ ဟော်မုန်းတွေ ထွက်တာနည်းသလို လူတွေနဲ့ ထိတွေ့မှု နည်းတာကြောင့်လည်း ဖြစ်နိုင်ပါတယ်။ 🔸ကင်ဆာရောဂါ လေ့လာချက်တွေအရ အထိုင်များတာက အဆုတ်ကင်ဆာ၊ သားအိမ်ကင်ဆာနဲ့ အူမကြီးကင်ဆာတို့နဲ့ ဆက်စပ်နေတာကို တွေ့ရပါတယ်။ 🔸နှလုံးရောဂါ အထိုင်များတဲ့သူတွေက နှလုံးသွေးကြောပိတ်တာနဲ့ လေဖြတ်တာ ဖြစ်နိုင်ခြေ များပါတယ်။ 🔸ဆီးချိုရောဂါ အထိုင်များတာက အင်ဆူလင်မတိုးတာကို ဖြစ်စေပြီး ဆီးချိုရောဂါ ဖြစ်နိုင်ခြေကို များစေပါတယ်။ 🔸သွေးကြောထုံးခြင်း အထိုင်များတဲ့အခါ ခြေထောက်မှာ သွေးစုပြီး သွေးကြောထုံးတတ်ပါတယ်။ များသောအားဖြင့် အန္တရာယ်မရှိပေမယ့် တချို့သောအခြေအနေတွေမှာ သွေးခဲပိတ်တတ်ပါတယ်။ 🔸သွေးခဲပိတ်ခြင်း အထိုင်များရင် ခြေထောက်က သွေးကြောမှာ သွေးခဲပိတ်တတ်ပါတယ်။ ဒါက အရေးကြီးပါတယ်။ ပိတ်နေတဲ့ သွေးခဲက ပြုတ်ထွက်ပြီး အဆုတ်သွေးကြောမှာ သွားပိတ်ရင် အသက်အန္တရာယ်ရှိပါတယ်။ 👉အထိုင်များက ဒီလိုမျိုး ကျန်းမာရေးပြဿနာတွေ ပေးနိုင်တာကြောင့် တတ်နိုင်သမျှ ထိုင်တာကို လျှော့ပါ။ ကိုယ်ရဲ့ တစ်နေ့တာမှာ အခွင့်အရေးရတာနဲ့ လှုပ်နေပါ။ ဥပမာ 🔹နီးနီးနားနားနေရာတွေဆို လမ်းလျှောက်ပါ။ လမ်းလျှောက်ရင်လည်း ခပ်သွက်သွက်လျှောက်ပါ။ 🔹လှေကားအတက်အဆင်းလုပ်ပါ။ 🔹ရုံးမှာဆိုရင်လည်း မကြာခဏ အိမ်သာသွားတာ၊ ရေထသောက်တာ လုပ်ပေးပါ။ 🔹လေ့ကျင့်ခန်း မလုပ်ဖြစ်ရင်တောင် ကိုယ်ဝါသနာပါရာ အားကစားတစ်ခုခုလုပ်ပါ။ ဥပမာ ရေကူး၊ ကြက်တောင်ရိုက် 🔹အိမ်မှာနေရင်လည်း ထိုင်ချည်းမနေဘဲ တတ်နိုင်သမျှ လှုပ်ရှားနေပါ။ ဥပမာ TVကြည့်တုန်း ကြော်ငြာလာရင် လမ်းထလျှောက်တာမျိုး 🔹တစ်ရက်ကို နာရီဝက်လောက် သတ်သတ်မှတ်မှတ် လေ့ကျင့်ခန်းလုပ်နိုင်ရင် အကောင်းဆုံးဆိုပေမယ့် မလုပ်နိုင်သေးရင်လည်း စိတ်ဓာတ်မကျပါနဲ့။ 🔹ဘာနဲ့လုပ်လုပ် အထိုင်နည်းပြီး လှုပ်ရှားမှုများအောင် ဖန်တီးပါ။ ကိုယ့်ရဲ့ သက်တမ်းကို ထိုင်နေရင်းနဲ့ မကုန်ဆုံးစေဖို့ ဒီဆောင်းပါးလေးကနေ သတိပေးလိုက်ရပါတယ်။ Dr Htet Htet Zaw Win #အနန္တစေတနာဖောင်ဒေးရှင်း #AnandaSaytanarFoundation #By_AMMK_Investment_Holdings_Company #ကျန်းမာရေး #သွေးတိုး #ဆီးချို #health #ကင်ဆာ #Cancer #healthylife #healthylifestyle #healthylifestylechange

ဘာလို့ ဆီးချိုဖြစ်ကြတာလဲ 👉ဆီးချိုရောဂါက ကမ္ဘာတစ်ဝှမ်းလုံးမှာ နေ့စဉ်နဲ့အမျှ အဖြစ်များတဲ့ ရောဂါဖြစ်ပေမယ့် ဘာကြောင့်ဖြစ်ရလဲဆိုတာကို သိနဲ့သူက နည်းပါတယ်။ ဒါကြောင့် ဒီပို့စ်မှာ ဆီးချိုရောဂါဖြစ်ရတဲ့ အကြောင်းရင်းတွေကို ရှင်းပြပေးချင်ပါတယ်။ 👉အရင်ဆုံး ဆီးချိုရောဂါမှာ အမျိုးအစားတွေ အများကြီးရှိပေမယ့် အဖြစ်များတာကတော့ အမျိုးအစား ၁ နဲ့ အမျိုးအစား ၂ ပဲ ဖြစ်ပါတယ်။ 👉ကိုယ်ဝန်ဆောင်ဆီးချို၊ ဆီးချိုအကြိုအဆင့်၊ ပန်ကရိယမကောင်းလို့ ဖြစ်တဲ့ ဆီးချို၊ MODY၊ LADA စသဖြင့် ထူးထူးခြားခြားအမည်တွေနဲ့ ဆီးချိုရောဂါတွေ ရှိပေမယ့် အမျိုးအစား ၁ နဲ့ ၂ ကပဲ အဖြစ်များပါတယ်။ 👉အမျိုးအစား ၁ ဆီးချိုရောဂါကို အသက်ငယ်စဉ်ကတည်းက ဖြစ်ကြလို့ ကလေးဆီးချိုလို့လည်း သိကြပါတယ်။ သူက‌တော့ မျိုးဗီဇ၊ ပတ်ဝန်းကျင်အခြေအနေတွေ စုပေါင်းပြီးဖြစ်တာပါ။ အမျိုးအစား ၁ ဆီးချိုရောဂါမှာ ခန္ဓာကိုယ်တွင်း အင်ဆူလင်ထုတ်ပေးမယ့်ဆဲလ်တွေကို ခန္ဓာကိုယ်ကပဲ ပြန်ဖျက်ဆီးပစ်တာကြောင့် အင်ဆူလင် မထွက်နိုင်ပါဘူး။ ဒါကြောင့် အမျိုးအစား ၁ ဆီးချိုရောဂါရှိသူတွေက တစ်သက်လုံး အင်ဆူလင် ထိုးရတာ ဖြစ်ပါတယ်။ 👉အမျိုးအစား ၂ ဆီးချိုရောဂါကိုတော့ အသက်အရွယ်ရမှာ ဖြစ်လာတာကြောင့် လူကြီးဆီးချိုရောဂါလို့ ခေါ်ပါတယ်။ သူကတော့ ခန္ဓာကိုယ်ကနေ အင်ဆူလင်ပုံမှန်ထွက်တယ်၊ ဒါပေမယ့် ခန္ဓာကိုယ်က အင်ဆူလင် မတိုးတာကြောင့် သွေးတွင်းသကြားဓာတ်တွေတက်ပြီး ဆီးချိုဖြစ်တာပါ။ နောက်ပိုင်းမှာတော့ အင်ဆူလင်မထွက်တော့တဲ့အဆင့်အထိ ရောက်သွားနိုင်ပါတယ်။ မိသားစုထဲမှာ ဆီးချိုရောဂါဖြစ်တဲ့သူရှိရင် ကိုယ့်မှာ ဖြစ်နိုင်ခြေများသလို စားသောက်နေထိုင်ပုံမမှန်ရင်လည်း ဖြစ်နိုင်ခြေများပါတယ်။ 👉တခြားဆီးချိုရောဂါတွေမှာဆိုရင်တော့ ကိုယ်ဝန်ဆောင်ဆီးချို ဆီးချိုအကြိုအဆင့် မျိုးဗီဇကြောင့်ဖြစ်တဲ့ MODY ခုခံအားကမောက်ကမဖြစ်လို့ဖြစ်တဲ့ LADA သောက်တဲ့ ဆေးဝါးတွေကြောင့်ဖြစ်တဲ့ ဆီးချို (ဥပမာ စတီးရွိုက်တွေ သောက်ပြီး ဖြစ်တဲ့ ဆီးချို) ပန်ကရိယထိခိုက်ပြီး ဖြစ်တဲ့ ဆီးချို (ဥပမာ ခဏခဏ ပန်ကရိယရောင်တာ၊ ပန်ကရိယ ထုတ်လိုက်ရတာ) တခြားရောဂါတွေရဲ့ နောက်ဆက်တွဲကြောင့်ဖြစ်တဲ့ ဆီးချို (ဥပမာ ကိုယ်တွင်းသံဓာတ်များပြီး ပန်ကရိယပျက်စီးတာ) စသဖြင့် အမျိုးမျိုး ရှိပါတယ်။ 👉ဆီးချိုရောဂါတော်တော်များများက မဖြစ်အောင်ကာကွယ်လို့ မရပါဘူး။ ဥပမာ အမျိုးအစား ၁ ဆီးချိုရောဂါ၊ ခုခံအားစနစ်ကြောင့် ဖြစ်တဲ့ ဆီးချိုရောဂါ ဒါတွေဆိုရင် ကာကွယ်လို့ မရပါဘူး။ 👉ဆေးဝါးတွေကြောင့်ဖြစ်တာ၊ ပန်ကရိယမကောင်းလို့ ဖြစ်တာ ဒါတွေကတော့ အထိုက်အလျောက် ကာကွယ်လို့ ရပါတယ်။ 👉ဖြစ်နိုင်ခြေကို လျှော့ချလို့ ရတာကတော့ အမျိုးအစား ၂ ဆီးချိုရောဂါပါ။ မိသားစုထဲမှာ မျိုးရိုးရှိတယ်ဆိုရင်တောင် ကိုယ့်ရဲ့ စားသောက်နေထိုင်ပုံကို ပြောင်းလဲလိုက်မယ်ဆိုရင် ဖြစ်နိုင်ခြေ နည်းသွားမှာပါ။ အမျိုးအစား ၂ ဆီးချိုရောဂါ ဖြစ်နိုင်ခြေကို လျှော့ချဖို့ဆိုရင် 🔸အာဟာရပြည့်ဝအောင် စားသောက်ပါ။ 🔸တစ်ရက်ကို နာရီဝက်နဲ့ တစ်ပတ် ၅ရက်လောက် ကိုယ်လက်လေ့ကျင့်ခန်း လုပ်ပါ။ 🔸အဝမလွန်အောင် ထိန်းပါ။ 🔸စိတ်ဖိစီးမှုနည်းအောင်နေပါ။ 🔸တစ်ရက်ကို ၇-၉နာရီခန့် အိပ်စက်ပါ။ 🔸ဆေးလိပ်ဖြတ်ပါ။ 🔸အရက်လျှော့သောက်ပါ။ 🔸ရောဂါအခံတွေ (ဥပမာ သွေးတိုး၊ နှလုံးရောဂါ) ရှိတယ်ဆိုရင် စနစ်တကျ ကုသပါ။ ဒါဆိုရင် ဖြစ်နိုင်ခြေကို လျှော့ချနိုင်မှာပါ။ 👉ဆီးချိုရောဂါတွေက အမျိုးအစား အများကြီးရှိသလို ဖြစ်ရတဲ့ အကြောင်းရင်းတွေကလည်း မတူပါဘူး။ အဖြစ်အများဆုံးကတော့ အမျိုးအစား ၁ နဲ့ ၂ ပါ။ ၁ က ကာကွယ်လို့ မရပေမယ့် ၂ ကတော့ စားသောက်နေထိုင်ပုံကို ပြောင်းလဲလိုက်ရင် ဖြစ်နိုင်ခြေကို လျှော့ချနိုင်တာကြောင့် ခုကစပြီး ကျန်းမာရေးနဲ့အညီ နေထိုင်စားသောက်ဖို့ တိုက်တွန်းချင်ပါတယ်။ Dr Htet Htet Zaw Win #AnandaSaytanarFoundation #အနန္တစေတနာဖောင်ဒေးရှင်း #By_AMMK_Investment_Holdings_Company

ကြို့ထိုးတာမြန်မြန်သက်သာစေဖို့ 🔸‘အွတ် အွတ်’ အော် ဒီကြို့ကလည်း မိုးလင်းတည်းက ထိုးနေတာ မပြီး မပြီးနိုင်တော့ဘူး။ တစ်ယောက်ယောက်ကများ ငါ့အတင်းပြောနေတာများလား။ ကြို့ထိုးရင် ရေသောက်ဆိုလို့ သောက်နေတာလည်း ဗိုက်တစ်လုံး ဖြစ်နေပြီ ဒါလည်း မသက်သာသေးဘူး။ 🔸ကြို့ထိုးရင် စိတ်လှုပ်ရှားစရာတစ်ခုခု ပြောပေးရတယ်တဲ့။ ဒီမနက် ထီပေါက်တယ်လေး ဘာလေးများ ဖုန်းမဆက်ကြဘူးလား မသိပါဘူး။ 🔸တအွတ်အွတ်နဲ့ ဗိုက်ကြောတွေလည်း နာလှပြီ။ ဘယ်တော့များမှ သက်သာမှာပါလိမ့်။ 🔵ကြို့ထိုးတာက လူတိုင်းကြုံဖူးကြတဲ့ ကိစ္စပါ။ တော်တန်ရုံလောက်ကတော့ သူ့အလိုလို ပျောက်သွားပါတယ်။ အပေါ်က ဦးလေးကြီးလို ရေတွေ ဗိုက်တစ်လုံးပြည့်အောင် သောက်ဖို့ မလိုသလို ဘေးကနေ တစ်ယောက်ယောက် စိတ်လှုပ်ရှားကိစ္စတွေ လာပြောပြဖို့လည်း မလိုပါဘူး။ 🔵အဲ တစ်ခါတလေကျတော့လည်း ကြို့ထိုးတာရဲ့ နောက်ကွယ်မှာ ရောဂါကြီးကြီးမားမား တစ်ခုရှိနေပြန်ရော။ ဒါရင်တော့ သေချာရှာပြီး ကုရမှာပေါ့။ 🔵ကြို့ထိုးတယ်ဆိုတာ ပြောရမယ်ဆိုရင် ရင်ဝမ်းခြား ကြွက်သားလို့ ခေါ်တဲ့ ရင်ခေါင်းနဲ့ ဝမ်းခေါင်းကြားက ကန့်လန့်ဖြတ်ကြွက်သားကြီး အကြောလိုက်လို့ ဖြစ်ရတာပါ။ ဒီကြွက်သားကြီး ညှစ်တဲ့အခါ ‘အွတ်’ဆိုတဲ့ အသံလေး ထွက်လာပြီး ခဏခဏ ညှစ်ရင်တော့ ဗိုက်ကြောတွေပါ နာလာတာပေါ့။ များသောအားဖြင့်တော့ - ဂတ်စ်ပါတဲ့ အအေးတွေ သောက်တာ - အရက်တွေ အလွန်အကျွံသောက်တာ - ဗိုက်ပြည့်အောင် တနင့်တပိုးစားတာ - စိတ်ဖိစီးမှုများတာ၊ စိတ်လှုပ်ရှားလွန်းတာ - ရုတ်တရက် ပတ်ဝန်းကျင် အပူချိန် ပြောင်းလဲတာ - ပီကေတွေဝါး၊ ဆေးလိပ်တွေ သောက်ရာကနေ လေမျိုချမိတာ စတာတွေကြောင့် ကြို့ထိုးတာ များပါတယ်။ 🔵ဒီလို ကြို့ထိုးတာက အ‌ရေးမကြီးသလို ၂ ရက်အတွင်းမှာတင် သူ့အလိုလို ပျောက်သွားတတ်ပါတယ်။ တကယ်ဆို ၂ ရက်တောင် မကြာဘဲ နာရီပိုင်းလောက်နဲ့တင်တောင် သက်သာသွားနိုင်ပါတယ်။ 🔴ဒီလိုမဟုတ်ဘဲ ၂ ရက်ထက် ကြာနေရင်တော့ ရောဂါတစ်မျိုးမျိုးကြောင့် ဖြစ်နေနိုင်တယ်ဆိုတာကို သတိထားပါ။ ၂ ရက်ထက်ကြာအောင် ကြို့ထိုးနေရင်တော့ 🔹ရင်ဝမ်းခြားကြွက်သားကို ထောက်ပံ့နေတဲ့ အာရုံကြောကို သွားသွားထိမိနေတာ (ဥပမာ နားစည်နားမှာ တစ်ခုခုကပ်နေတာ၊ လည်ပင်းမှာ အကျိတ်တစ်ခုခုရှိနေတာ၊ စားချဉ့်ရည်ဆန်တက်တဲ့ ရောဂါရှိနေတာ၊ လည်ချောင်းနာတာ) 🔹ဦးနှောက်နဲ့ အာရုံကြောရောဂါတစ်ခုခု ရှိနေတာ 🔹ဆီးချိုရောဂါ 🔹ကျောက်ကပ်ရောဂါ 🔹ကိုယ်တွင်းဓာတ်ဆားဓာတ်မမျှတတဲ့ရောဂါ 🔹ကိုယ်သောက်နေတဲ့ ဆေးဝါးတွေရဲ့ ဘေးထွက်ဆိုးကျိုးတွေကြောင့် ဖြစ်နိုင်ပါတယ်။ သာမန်အားဖြင့်တော့ ကြို့ထိုးတာက နေရထိုင်ရခက်တာက လွဲရင် အသက်အန္တရာယ်မရှိပါဘူး။ သာမန်ကြို့ထိုးတာကို မြန်မြန်သက်သာဖို့ဆိုရင် လုပ်ပေးနိုင်တာတွေက 🔸စက္ကူအိတ်ထဲကို လေရှူသွင်းရှူထုတ်လုပ်ပါ။ 🔸ရေခဲရေနဲ့ အာလုပ်ကျင်းပါ။ 🔸ခဏ အသက်ရှူအောင့်ထားပါ။ 🔸ရေအေးအေးကို နည်းနည်းစီ သောက်ပေးပါ။ 🔸ဂတ်စ်ပါတဲ့ အအေးတွေကို ခဏရှောင်ထားပါ။ 🔸အစားကို နည်းနည်းစီခွဲစားပါ။ အများစုက ဒီနည်းလမ်းတွေနဲ့ သက်သာသွားပေမယ့် တကယ်လို့ ကြို့ထိုးတာက ပိုပိုဆိုးလာမယ်။ မကြာခဏ ကြို့ထိုးမယ်။ ၂ရက်ကြာတဲ့အထိ မပျောက်ဘူးဆိုရင်တော့ နောက်ကွယ်မှာ ရောဂါတစ်ခုခု ရှိနေနိုင်တာကြောင့် ရှာဖွေကုသဖို့ အကြံပေးချင်ပါတယ်။ Dr Htet Htet Zaw Win #AnandaSaytanarFoundation #By_AMMK_Investment_Holdings_Company #health #ကျန်းမာရေး

အထိုင်အထမှာ မူးသွားတာဘာကြောင့်လဲ 🔹ထိုင်ရာကနေ ဆတ်ခနဲ ထလိုက်ရင်ပဲဖြစ်ဖြစ်၊ လှဲနေရာကနေ ရုတ်တရက် ထလိုက်ရင်ပဲဖြစ်ဖြစ် မျက်လုံးတွေ ပြာပြီး မိုက်ခနဲဖြစ်တာကို ကြုံဖူးကြလား မသိဘူး။ အထူးသဖြင့် လူကြီးတွေမှာပေါ့။ အထိုင်အထမှာ မူးတာက လူကြီးတွေမှာ ပိုပြီးအတွေ့ရများပါတယ်။ 🔹ထိုင်ရာကနေ၊ လှဲရာကနေ ထလိုက်တဲ့အခါ လူကို သတိကောင်းကောင်းနဲ့ မတ်မတ်ရပ်နိုင်ဖို့ ဦးနှောက်ကို သွေးရောက်ဖို့ လိုပါတယ်။ လူငယ်တွေ၊ ကျန်းမာရေး ကောင်းတဲ့သူတွေမှာ နှလုံးနဲ့ အာရုံကြောစနစ်က ကောင်းကောင်းအလုပ်လုပ်တာကြောင့် အထိုင်အထမှာ ဘာမှမသိသာပေမယ့် လူကြီးတွေ၊ နေထိုင်မကောင်းတဲ့သူတွေမှာကျ ဒီစနစ်တွေက တုံ့ပြန်မှုနှေးတာကြောင့် ခြေထောက်က သွေးတွေက ခေါင်းကို အလျင်မီအောင် မရောက်ဘဲ မူးတာ၊ မိုက်ခနဲဖြစ်သွားတာတွေ ခံစားရတာပါ။ အထိုင်အထမှာ မူးနိုင်တဲ့သူတွေကတော့ 🔸အသက်ကြီးသူတွေ (ဆီးချိုရောဂါ၊ ပါကင်ဆန်ရောဂါရှိရင် ပိုဖြစ်နိုင်ခြေ များပါတယ်) 🔸ရေဓာတ်ခမ်းခြောက်သူတွေ (အန်တာ၊ ဝမ်းလျှောတာ ဖြစ်ပြီး ရေလုံလောက်အောင် မသောက်သူတွေ) 🔸နွေရာသီဆို ချွေးထွက်များပြီး ရေဓာတ်ဆုံးရှုံးသူတွေ 🔸နေပူထဲမှာ အချိန်ကြာကြာ အလုပ်လုပ်ရသူတွေ 🔸အအေးမိ၊ ဖျားနာ စသဖြင့် နေထိုင်မကောင်းဖြစ်သူတွေ 🔸စိတ်လှုပ်ရှားပြီး အသက်ရှူမြန်တဲ့သူတွေ 🔸သွေးအားနည်းရောဂါရှိသူတွေ 🔸အကြာကြီးထိုင်၊ အကြာကြီးလှဲပြီး ရုတ်တရက် ထလိုက်သူတွေ 🔸ဆီးဆေး၊ သွေးကျဆေး၊ ပါကင်ဆန်ရောဂါကုဆေးတွေကို အလွန်အကျွံသောက်သူတွေပဲ ဖြစ်ပါတယ်။ ဒီလိုလူတွေက အထိုင်အထမှာ မူးတာအပြင် - ရုတ်တရက် သတိလစ်ချင်သလို ခံစားရတာာ - မျက်လုံးတွေ ပါသွားတာ အားမရှိဘဲ ပျော့ခွေချင်သလို ဖြစ်တာ - နောက်ကျော၊ ဂုတ်၊ ခါးနဲ့ တင်ပါးနေရာတွေ နာတာကိုပါ ခံစားရတတ်ပါတယ်။ အထူးသဖြင့် ဒီလက္ခဏာတွေကို - ထိုင်ရာ၊ လှဲနေရာကနေ ဆတ်ခနဲ ထတဲ့အချိန် - မနက်အိပ်ရာနိုးနိုးချင်းအချိန် - လှုပ်လှုပ်ရှားရှားလုပ်ပြီးတဲ့အချိန် - အစာစားပြီးစအချိန် - ဝမ်းညှစ်ပြီးစအချိန်တွေမှာ ပိုပြီး ကြုံရတတ်ပါတယ်။ 🔹မကြာခဏ အထိုင်အထမှာ မူးတတ်တယ်ဆိုရင်တော့ ဆရာဝန်နဲ့ ပြကြည့်ပါ။ ရောဂါအခံတစ်ခုခု ဒါမှမဟုတ် သောက်လက်စဆေးတစ်ခုခုကြောင့်လည်း ဖြစ်နိုင်ပါတယ်။ ဒါ့ပြင် ခဏခဏ မူးတတ်တယ်ဆိုရင် ခုပြောမယ့် ဆောင်ရန် ရှောင်ရန်တွေကိုလည်း လိုက်နာကြည့်ပါ။ 🔸တစ်ရက်ကို ရေ၂လီတာလောက် သောက်ပါ။ မနက်အိပ်ရာထထချင်းမှာ ရေဖန်ခွက်တစ်ခွက်စာလောက် သောက်ပေးပါ။ 🔸ရုတ်တရက် ဆတ်ခနဲ ထတာကို ရှောင်ပါ။ လှဲရာကနေ ထမယ်ဆိုရင် အရင်ဆုံး ဖြည်းဖြည်းချင်း ထထိုင်ပါ။ ပြီးမှ ဖြည်းဖြည်းချင်း မတ်တပ်ရပ်ပါ။ ဘေးနားက တစ်ခုခုကို ကိုင်ထားပါ။ 🔸အချိန်အကြာကြီး မတ်တပ်ရပ်တာ၊ ထိုင်တာကို ရှောင်ပါ။ 🔸ခြေသလုံးကြွက်သားလေ့ကျင့်ခန်း လုပ်ပေးပါ။ အထူးသဖြင့် ထိုင်ရာကထမယ်ဆိုရင် ခြေ‌ချောင်းတွေကို ကော့လိုက်၊ လျှော့လိုက် လုပ်ပြီးမှ ထပါ။ 🔸ပစ္စည်းကျသွားတဲ့အခါ ကုန်းပြီး မကောက်ပါနဲ့။ ထိုင်ချပြီးမှ ကောက်၊ ဖြည်းဖြည်းပြန်ထပါ။ 🔸အရက်အလွန်အကျွံ မသောက်ပါနဲ့။ 🔸တစ်ကြိမ်တည်းနဲ့ အစားတွေ အများကြီး မစားပါနဲ့။ 🔸နေပူထဲမှာ အကြာကြီး အလုပ်မလုပ်ပါနဲ့။ 🔸ဝမ်းချုပ်မခံပါနဲ့။ အထိုင်အထမှာ မူးတတ်တာက မတော်တဆ လှဲကျတာ၊ ပြုတ်ကျတာတွေ ဖြစ်နိုင်လို့ သတိထားပါ။ ခဏခဏ ဖြစ်တတ်တယ်ဆိုရင် ဆရာဝန်နဲ့ ပြဖြစ်အောင် ပြပါ။ ဆောင်ရန် ရှောင်ရန်တွေကို လိုက်နာပါ။ အထိုင်အထလုပ်တိုင်းမှာ သတိထားမယ်ဆိုရင် နောက်ဆက်တွဲပြဿနာတွေ မဖြစ်အောင် ကာကွယ်နိုင်မှာ ဖြစ်ပါတယ်။ Dr Htet Htet Zaw Win #AnandaSaytanarFoundation #By_AMMK_Investment_Holdings_Company #health #healthylife #ကျန်းမာရေး

G6PD ရှိတယ်ဆိုတာ ဘာကိုပြောတာလဲ 🚨ဆေးခန်းလာပြတဲ့အခါ မေမေတွေက “ကျွန်မ သားလေးက G6PD ရှိတယ်၊ သားလေးက မွေးတုန်းက G6PD ပါလာတယ်”ဆိုပြီး ပြောတာ ကြားဖူးကြမှာပါ။ 👉အဲ့ဒီ G6PD ဆိုတာက glucose-6-phosphate dehydrogenase ဆိုတဲ့ အင်ဇိုင်းဖြစ်ပြီး ဓာတ်တိုးပစ္စည်းတွေနဲ့ တွေ့တဲ့အခါ သွေးနီဥတွေကို မပေါက်ကွဲအောင် ကာကွယ်ပေးတဲ့ အင်ဇိုင်းပါ။ 👉ဒီအင်ဇိုင်းမရှိတဲ့အခါကျတော့ တချို့သော ဆေးတွေ သောက်မိတဲ့အခါ သွေးနီဥတွေ ပေါက်ကွဲပြီး ကလေးက ဆီးမည်းမည်းတွေသွားတာ၊ သွေးအားနည်းတာတွေ ဖြစ်လာပါတယ်။ 👉တကယ်တော့ မေမေတို့ ပြောတာက နည်းနည်းလွဲနေတာ ရှိနေပါသေးတယ်။ G6PD ရှိတယ်လို့ ပြောရမှာ မဟုတ်ဘဲ G6PD ချို့တဲ့နေတယ်လို့ ပြောရမှာ ဖြစ်ပါတယ်။ ဘယ်လိုပဲပြောပြောပါ။ ဒီလိုမျိုး ဆေးခန်းလာပြတိုင်းမှာ ဒါလေး ပြောတတ်တာနဲ့တင် အင်မတန်အထောက်အကူ ဖြစ်ပြီး ဆရာဝန်တွေကလည်း ဒီလောက်ဆို နားလည်ကြပါတယ်။ 🔹G6PD အင်ဇိုင်းချို့တဲ့တာက မျိုးရိုးလိုက်ပြဿနာဖြစ်ပြီး သားသားတွေမှာ ပိုဖြစ်တတ်ပါတယ်။ မိန်းကလေးတွေ G6PD ဖြစ်တာက ရှားပါတယ်။ 🔹G6PD ချို့တဲ့တဲ့ ကလေးတွေက ဘာလက္ခဏာမှ မပြတတ်ပါဘူး။ ဒီတိုင်းကြည့်ရင် ချို့တဲ့မှန်း‌တောင် မသိပါဘူး။ တစ်ခုခုနဲ့ မတည့်တာနဲ့ ထိတွေ့မိမှသာ လက္ခဏာတွေ ပြတတ်ပါတယ်။ ဒါကြောင့် မွေးစကလေးတွေမှာ G6PD ချို့တဲ့နေသလားဆိုတာကို သိနိုင်ဖို့ ဆေးစစ်ကြည့်ရပါတယ်။ 🔹G6PD ချို့တဲ့တဲ့ကလေးက သာမန်အချိန်တွေမှာ အကောင်းဆိုပေမယ့် သူနဲ့ မတည့်တာနဲ့ ထိတွေ့မိမယ်ဆိုရင် သွေးနီဥတွေ ပေါက်ကွဲပြီး - သွေးအားနည်းတာ - ဖြူဖျော့လာတာ - ဆီးမည်းမည်းတွေသွားတာ - နုံးတာ - မောတာ - ရင်တုန်တာတွေ ခံစားရတတ်ပြီး အချိန်မီကုသမှုမခံယူဘူးဆိုရင် အန္တရာယ်ရှိပါတယ်။ ဒါကြောင့်မိဘတွေအနေနဲ့ G6PD ချို့တဲ့တဲ့ကလေးတွေက ဘာတွေ ရှောင်သင့်လဲဆိုတာကို သိထားသင့်ပါတယ်။ ♦️ပိုးသတ်ဆေးအနေနဲ့ဆိုရင် ဆာလဖာပါတဲ့ဆေးတွေ ♦️ငှက်ဖျားမှာ အသုံးပြုတဲ့ တချို့ဆေးတွေ ♦️Dapsone၊ Nitrofurantoin၊ အက်စဖရင်၊ ♦️တောင်ကြီးပဲလှော် ♦️ဆိုးဆေး ♦️ပရုတ်လုံး (ဒါကြောင့် ကလေးအနှီး၊ အဝတ်အစားတွေကို ပရုတ်လုံး မထည့်ထားသင့်ပါဘူး) ♦️ဒန်းဆိုးတာ စတာတွေကို ရှောင်သင့်ပါတယ်။ 👉တချို့ကလေးတွေမှာ အဆုတ်ပိုးဝင်တာ၊ အူရောင်ငန်းဖျားဖြစ်တာ၊ အသည်းရောင်အသားဝါ အေပိုး၊ ဘီပိုးဝင်တာနဲ့ စိတ်ဖိစီးမှုများတဲ့အခါ သွေးနီဥတွေ ပေါက်ကွဲတတ်တာကိုလည်း တွေ့ရပါတယ်။ 👉G6PD ချို့တဲ့တာက လောလောဆယ်မှာတော့ အပြီးပျောက်အောင် ကုသလို့ မရသေးပါဘူး။ သွေးနီဥတွေ ပေါက်ကွဲချိန်မှာ သွေးသွင်းပေးတာ၊ ခံစားရတဲ့ ဝေဒနာပေါ်မူတည်ပြီး ကုသတာတွေပဲ လုပ်လို့ ရပါတယ်။ အကောင်းဆုံးနည်းလမ်းက ကလေးနဲ့ မတည့်တာကို တစ်သက်လုံး ရှောင်ဖို့ပါပဲ။ ဒါဆိုရင် လူကောင်းအတိုင်း နေနိုင်ပါတယ်။ မိဘတွေအနေနဲ့ ဆောင်ရန် ရှောင်ရန်ကတော့ ဆေးရုံ ဆေးခန်းသွားပြတဲ့အခါတိုင်း ကလေးမှာ G6PD ချို့တဲ့ကြောင်း ပြောပြပါ။ ကိုယ့်သဘောနဲ့ ကိုယ် ဆေးတွေ မတိုက်ပါနဲ့။ စပ်ဆေးတွေ မတိုက်ပါနဲ့။ ကလေးကိုယ်တိုင်ကိုလည်း G6PD ချို့တဲ့ကြောင်းကို ရှင်းပြထားပြီး သူနဲ့ မတည့်တာတွေကို သေချာပြောပြထားဖို့ လိုပါတယ်။ ဒါဆိုရင်တော့ သာမန်လူလိုပဲ နေနိုင်မှာ ဖြစ်ပါတယ်။ ဒီလောက်ဆို G6PDချို့တဲ့တဲ့အကြောင်းကို ပြည့်ပြည့်စုံစုံသိလောက်ပြီလို့ မျှော်လင့်ပါတယ်။ ကျန်းမာပျော်ရွှင်သောဘဝများ ပိုင်ဆိုင်နိုင်ကြပါစေရှင်။ Dr Htet Htet Zaw Win #AnandaSaytanarFoundation #By_AMMK_Investment_Holdings_Company #ကျန်းမာရေး #health

👥 အနန္တစေတနာဖောင်ဒေးရှင်းအနေနဲ့ ရေဘေး‌ကြုံတွေ့နေရသောနေရာများမှ ပရဟိတအသင်းများနှင့် ပူပေါင်းပြီး ကနဦးအနေဖြင့် ငွေသိန်း (၃၀၀) ကျပ်တိတိကို လှူဒါန်းပေးခဲ့ပါတယ်။ 🎗ငွေသိန်း (၃၀၀) ကျပ်ဖိုးလှူဒါန်းတဲ့ထဲမှာ ရေဘေးသင့်ပြည်သူများ အလိုအပ်ဆုံးဖြစ်တဲ့ အဝတ်အစား၊ စောင်၊ ‌ခြင်ထောင်၊ စားနပ်ရိက္ခာနှင့် ဆေးဝါးများစွာ ပါဝင်ပါတယ်။ အနန္တစေတနာ‌ဖောင်ဒေးရှင်းမှ ရေဘေးသင့်ပြည်သူများအတွက် အလှူပြုမှုကို လူ၊ နတ်အပေါင်း သာဓုခေါ်ဆို မေတ္တာပွားများနိုင်ဖွယ် ဝေမျှလိုက်ခြင်းဖြစ်ပါတယ်။🙏🏻 နောက်ထပ်လှုဒါန်းကူညီမှုများလည်း ဆက်လက်ဆောင်ရွက်သွားမှာဖြစ်ပါတယ်။ #Ananda_Saytanar_Foundation #By_AMMK_Investment_Holdings_Company

ယနေ့ စက်တင်ဘာ ၁၀ ရက်နေ့ဟာ "ကမ္ဘာလုံးဆိုင်ရာ မိမိကိုယ်ကို အ-ဆုံး-စီ-ရ-င်မှုကာကွယ်ရေးနေ့" ဖြစ်ပါတယ်။ 🔸လူတွေရဲ့ ဘဝအချိန်တစ်ခုလောက်မှာ သူ့ဘဝကို စွန့်ခွာသွားချင်တဲ့စိတ်ဖြစ်‌ပေါ်လာတာဟာ ထင်မှတ်မထားလောက်အောင် အများကြီး ကြောက်စရာကောင်းပါတယ်။ လူ‌တွေရဲ့ နေ့စဥ်ဘဝမှာ ရုန်းကန်မှုတွေ၊ စိတ်ဓာတ်ကျ စိတ်ညစ်စရာတွေ၊ စိတ်ထိခိုက်စရာတွေကြောင့် နာကျင်ခံစားရတာတွေဟာ ကိုယ်စီ အနည်းနဲ့အများ ရှိတတ်ကြပါတယ်။ 🔸ဒါပေမယ့် တချို့သောသူတွေအတွက် ဒီစိတ်ခံစားမှုတွေက ပြင်းထန်ဆိုးဝါးလာတဲ့အခါ ၊ အခက်အခဲတွေကြားမှာ စိတ်ဓာတ်ကျပြီး ဘယ်လိုရှင်သန်ရမလဲ မသိတော့တဲ့အခါ၊ ဘဝဟာ အဓိပ္ပါယ်မဲ့လာမွန်းကြပ်တယ်လို့ ခံစားရတဲ့အခါ၊ ဆုံးရှုံးမှုတွေကြောင့် ထိခိုက်ခံစားရတဲ့အခါ လူတွေဟာ ကိုယ့်ကိုကိုယ် အ-ဆုံး-စီ-ရ-င်တဲ့နည်းလမ်းနဲ့ ထွက်ပေါက်ရှာဖို့ စဉ်းစားတတ်ကြပါတယ်။ 🔸ထိုအချိန် တဒင်္ဂအတွင်း အချိန်အပိုင်းအခြားလေး အတွင်းမှာ သူတို့ရဲ့ စိတ်ထဲရုတ်တရက် ဖြစ်ပေါ် လာတဲ့ ဒီအတွေးတွေအတိုင်း ကိုယ့်ကိုကိုယ် အ-ဆုံး-စီ-ရ-င်ဖို့ မလုပ်မိအောင် အဲ့ဒီအချိန်မှာ အားပေးပြီး အတူတူကျော်ဖြတ်နိုင်အောင် ကူညီပေးနိုင်ဖို့က အင်မတန်မှကို အရေးကြီးပါတယ်။ 🔸၂၀၁၉ က အချက်အလက်တွေအရ လူ ၁၀၀ ရှိရင် တစ်ယောက်က ကိုယ့်ကိုကိုယ် အ-ဆုံး-စီ-ရ-င်လို့ သေဆုံးကြတာပါ။ လက်ရှိကမ္ဘာတစ်ဝန်းလုံးမှာ တစ်နှစ်ကို လူပေါင်း ၈ သိန်းကျော်က ကိုယ့်ကိုကိုယ် အ-ဆုံး-စီ-ရ-င်လို့ သေဆုံးကြတာဖြစ်ပြီး စက္ကန့် ၄၀ တိုင်းမှာ လူတစ်ယောက်ဟာ ကိုယ့်ကိုကိုယ် အ-ဆုံး-စီ-ရ-င်သွားတာဖြစ်ပါတယ်။ 🔸အထူးသဖြင့် ကိုယ့်ကိုကိုယ် အ-ဆုံး-စီ-ရ-င်မှုဟာ အသက် ၁၅ မှ ၂၉ နှစ်ကြား လူငယ်တွေကြား သေဆုံးမှုတွေရဲ့ ဒုတိယမြောက် အကြောင်းအရင်းဖြစ်နေပြီး တကယ်ကို အလေးအနက်ထားပြီး အကူအညီပေးဖို့ လိုအပ်နေပါတယ်။ 🔸မိမိကိုယ်ကိုယ် အ-ဆုံး-မစီ-ရင်-မီ လူအများစုမှာ သူတို့နဲ့ပတ်သက်ပြီး အရင်နဲ့ မတူတဲ့ နေပုံထိုင်ပုံတွေ အပြုအမူ လက္ခဏာတွေ ( ဥပမာ စိတ်ကျရောဂါဝေဒနာ လက္ခဏာတွေ ) ပြတတ်ပေမဲ့လဲ ပတ်ဝန်းကျင်က သူတွေဟာ သတိမထားမိ၊ သတိမမူမခဲ့တဲ့အတွက် မကူညီပေးနိုင်ခဲ့ကြပါဘူး။ အကယ်၍သာ အချိန်စောစောသာ သူတို့ကို သတိထားမိပြီး အချိန်မီကူညီပေးနိုင်ခဲ့ရင် ဘဝတစ်ခုကို ပြန်လည်ကယ်တင်နိုင်မှာ ဖြစ်ပါတယ်။ ဒါ့ကြောင့် ပုံမှန်မဟုတ်တဲ့ လက္ခဏာတွေ သတိထားမိတယ်ဆိုရင် ပေါ့ပေါ့တန်တန်မတွေးပဲ ကူညီဖေးမဖို့၊ စကားပြောနှစ်သိမ့်ပေးဖို့ လိုအပ်ပါတယ်။ 🔸ပျှမ်းမျှအားဖြင့် ကိုယ့်ကိုကိုယ် အ-ဆုံး-စီ-ရ-င်ဖို့ ကြိုးစားသူတွေရဲ့ ကြိုးစားမှုပေါင်း ၂၅ကြိမ်လောက် မှာ ၁ ကြိမ်ကဟာ အသက်ကိုဆုံးရှုံးစေတာ ဖြစ်ပါတယ်တဲ့ ။ ဒါကြောင့် လူတွေမသိအောင် ဘယ်နှစ်ကြိမ်လောက်အထိ ကွယ်ရာမှာ အ-ဆုံး-စီ-ရ-င်ဖို့ အကြိမ်ကြိမ် ကြိုးစားနေခဲ့တယ်ဆိုတာကို ကာယကံရှင် ကိုယ်တိုင်ကလွဲပြီးမသိနိုင်တဲ့အတွက် ကိုယ့်ပတ်ဝန်းကျင်ကသူတွေကို နားလည်ပေးကြဖို့၊ ကြင်ကြင်နာနာ နွေးနွေးထွေးထွေး ဆက်ဆံပေးကြဖို့နဲ့ မိမိကို ဖွင့်ဟပြောဆိုလာတဲ့အချိန်မှာလဲ အလေးအနက်ထားပေးရင်း သူတို့ရဲ့ခံစားချက်ကို နားထောင်ပေးရင်း ကူညီဖေးမပေးဖို့ အရေးကြီးပါတယ်။ ✅ ဒါကြောင့် ဘယ်လိုပြဿနာ အခက်အခဲပဲဖြစ်ဖြစ် စိတ်ပူပင် စိတ်သောကရောက်စရာ ရှိရင်ပဲ ဖြစ်ဖြစ် မိမိ ယုံကြည်ရတဲ့သူတွေကို ပြောပြပေးပါ။ ✅ အကူအညီ တောင်းဖို့ ဝန်မလေးပါနဲ့။ ✅ အကယ်၍ မိမိမှာ စိတ်ထွက်ပေါက်မဲ့ မွန်းကြပ်လာခဲ့ရင် ဒါမှမဟုတ် မိမိကိုယ်တိုင် စိတ်ပိုင်းဆိုင်ရာ အကူအညီ လိုအပ်နေမည်ဟု ခံစားမိလျှင် နီးစပ်ရာ ဆရာဝန်များ စိတ်ရောဂါအထူးကုများနှင့် ဖြစ်စေ စိတ်ကျန်းမာရေး ကျွမ်းကျင်သူများနှင့် ဖြစ်စေ တိုင်ပင်ဆွေးနွေးပြီး လိုအပ်တဲ့ ကုထုံးများ ကုသမှုများကို ရယူနိုင်ပါတယ်။ ✅ ကိုယ်တိုင်လဲ တပါးသူတွေကို ကူညီ စာနာပေး နားထောင်ပေးဖို့ ကြိုးစားပေးပါ။ ဒီလိုခက်ခဲတဲ့ ကာလကြီးကို အတူတူ ကျော်ဖြတ်နိုင်အောင် အချင်းချင်း ကူညီစောင့်ရှောက်ပေးရင်း တန်ဖိုးရှိတဲ့ ဘဝတွေကို ဆက်လက်ရှင်သန်စေနိုင်မှာပါ။ Dr. Shein Thu Han #Ananda_Saytanar_Foundation #By_AMMK_Investment_Holdings_Company #mentalhealthawareness

အစာအိမ်မှန်ပြောင်းကြည့်ခြင်းရဲ့ ကောင်းကျိုးနဲ့ သတိထားရမယ့်အချက်များ 👉“အစာအိမ်မှန်ပြောင်းကြည့်ရမယ်နော်” လို့ ပြောလိုက်ရင် လူနာတိုင်းက ကြောက်ကြတာကြီးပါပဲ။ ဒီမှန်ပြောင်းကြီးကို ပါးစပ်ကနေ ထည့်ရမှာ နာမှာလား။ မတော်တဆ ဗိုက်ထဲမှာ တစ်ခုခုဖြစ်သွားရင် ဘယ်လိုလုပ်မလဲဆိုပြီး ကြောက်ကြပါတယ်။ တကယ်တော့ အစာအိမ်မှန်ပြောင်းကြည့်တာက လူနာတွေရဲ့ ရောဂါကို ရှာဖွေရာမှာ အများကြီး‌ ကောင်းကျိုး‌တွေရှိပါတယ်။ 🔹ဒါကြောင့် ဒီနေ့မှာတော့ အစာအိမ်မှန်ပြောင်းကြည့်တယ်ဆိုတာ ဘယ်လိုမျိုးလဲ၊ ဘာကောင်းကျိုးတွေ ရှိလဲ၊ ဘာတွေ သတိထားရမလဲဆိုတာ ပြောပြပေးပါမယ်။ 🔹အစာအိမ်မှန်ပြောင်း ကြည့်မယ်ဆိုပါစို့။ ဆေးခန်းပြသလိုမျိုး အခုလာ လှဲ၊ မှန်ပြောင်းထည့် ဒီလိုမျိုးတော့ မဟုတ်ပါဘူး။ အစာအိမ်ထဲကို ရှင်းရှင်းလင်းလင်းမြင်ရဖို့အတွက် အစာအိမ်ထဲမှာ အစာတွေ ရှိမနေဖို့ လိုပါတယ်။ ဒီအတွက် မကြည့်ခင်မှာ အနည်းဆုံး ၆ နာရီ အစာဖြတ်ရပါတယ်။ ဒါ့ပြင် ကိုယ့်မှာ သောက်လက်စ ဆေးဝါးတွေ ရှိတယ်ဆိုရင်လည်း ဆရာဝန်ကိုပြောပြပြီး ရပ်ဖို့၊ မရပ်ဖို့ တိုင်ပင်ရပါတယ်။ 🔹မှန်ပြောင်းကြည့်တာက မေ့ဆေး၊ ထုံဆေးတွေ မလိုပါဘူး။ ဒါပေမယ့် မှန်ပြောင်းထည့်တဲ့အခါ အဆင်ပြေအောင် အာခေါင်ကို ထုံဆေး ဖျန်းပေးပါတယ်။ လူနာစိတ်ငြိမ်အောင်လို့ စိတ်ငြိမ်ဆေးလေး ပေးထားတတ်ပါတယ်။ စိတ်ငြိမ်ဆေးက လူကို ရီဝေဝေဖြစ်စေတာ၊ အိပ်ငိုက်တာမျိုးတွေ ဖြစ်စေလို့ မှန်ပြောင်းကြည့်ပြီးရင် ကားမောင်းတာ၊ အမြင့်တက်တာတွေ မလုပ်ရပါဘူး။ ဒါကြောင့် မှန်ပြောင်းလာကြည့်တဲ့အခါ ကိုယ့်ကို စောင့်ရှောက်မယ့် တစ်ယောက်ယောက် ခေါ်လာဖို့ လိုပါတယ်။ 🔹မှန်ပြောင်းကြည့်တာကတော့ ရိုးစင်းပါတယ်။ မှန်ပြောင်းကို ပါးစပ်ထဲထည့်တဲ့အခါ အလိုက်သင့်လေး မြိုချပေးရုံပါပဲ။ ဒါပေမယ့် မှန်ပြောင်းက လည်ချောင်းကိုရောက်တဲ့အခါ ပျို့ချင်လာတတ်ပါတယ်။ ဒါကိုကျော်သွားရင်တော့ နေရတာသက်သောင့်သက်သာ ဖြစ်သွားပါပြီ။ မှန်ပြောင်းကြည့်တာက ၁၅မိနစ်ကနေ ၄၅မိနစ်လောက်ထိ ကြာတတ်ပါတယ်။ 🔹မှန်ပြောင်းကြည့်ပြီးလို့ ဆရာဝန်က စစ်စရာရှိတာစစ်၊ မှာစရာရှိတာမှာ၊ အထွေအထူးကိစ္စမရှိဘူး၊ ဆရာဝန်ကလည်း ပြန်ခွင့်ပြုတယ်ဆိုရင် ပြန်လို့ရပါပြီ။ များသောအားဖြင့် ဆေးရုံမှာ ညအိပ်စရာမလိုပါ။ ✅ မှန်ပြောင်းကြည့်တာက ဘယ်လိုကောင်းကျိုးတွေရှိလဲဆိုတော့ - ကိုယ့်မှာဖြစ်တဲ့ရောဂါကို ရှာဖွေလို့ ရပါတယ်။ ဥပမာ- အစာမျိုချရခက်တာ၊ နာတာရှည်အစာအိမ်အောင့်တာ၊ ခဏခဏအန်တာ၊ သွေးအန်တာ၊ သွေးဝမ်းသွားတာ စသဖြင့်။ - ကင်ဆာတွေကို ရှာဖွေလို့ ရပါတယ်။ ဥပမာ- အစာအိမ်ကင်ဆာ၊ အစာရေမျိုပြွန်ကင်ဆာ။ - အစာအိမ်မှန်ပြောင်းကို ရောဂါရှာဖွေရာမှာတင်မဟုတ်ဘဲ ရောဂါကုသတဲ့နေရာမှာလည်း သုံးလို့ရပါသေးတယ်။ ဥပမာ - အစာအိမ်သွေးယိုတာ တိတ်စေဖို့၊ - အလုံးအကျိတ်တွေ ဖယ်ဖို့၊ - အစာရေမျိုပြွန်ချဲ့ဖို့ စတာတွေအတွက်လည်း သုံးကြပါတယ်။ 🔸အစာအိမ်မှန်ပြောင်းကြည့်တာက ဒီလိုကောင်းကျိုးတွေရှိပေမယ့်လည်း တစ်ခါတလေမှာ မတော်တဆ ဘေးထွက်ဆိုးကျိုးလေးတွေ ဖြစ်တတ်ပါတယ်။ ဖြစ်တတ်တာတွေကတော့ - သွေးထွက်တတ်ပါတယ်။ များသောအားဖြင့်တော့ အသားစယူတဲ့နေရာကပါ။ သွေးထွက်တယ်ဆိုပေမယ့် မများသလို အလိုလိုတိတ်သွားတာကြောင့် သိပ်ပြီးစိုးရိမ်စရာတော့မလိုပါဘူး။ - မှန်ပြောင်းက လည်ချောင်းထဲကို ဖြတ်သွားရတဲ့အတွက် လည်ချောင်းနာတတ်ပါတယ်။ - ပိုးဝင်တတ်ပါတယ်။ - သွားကိုခိုက်မိတတ်ပါတယ်။ - အစာသီးပြီးအဆုတ်ရောင်တတ်ပါတယ်။ - ရှားရှားပါးပါး အစာအိမ်နဲ့ အစာရေမျိုပြွန် ပေါက်သွားတတ်ပါတယ်။ ဒါကြောင့် အစာအိမ်မှန်ပြောင်းကြည့်ပြီးလို့ အိမ်ပြန်ရောက်တဲ့အခါ - ဖျားတယ် - မောတယ် - ဝမ်းမည်းမည်းတွေသွားတယ် - သွေးအန်တယ် - ဗိုက်နဲ့ ရင်ဘတ်တွေ ပြင်းပြင်းထန်ထန်အောင့်တယ်ဆိုရင် ဆေးရုံပြန်သွားသင့်ပါတယ်။ 🔹အစာအိမ်မှန်ပြောင်းကြည့်တာက ဒီလိုဘေးထွက်ဆိုးကျိုးတွေရှိပေမယ့်လည်း ဒါတွေက အဖြစ်နည်းသလို ကောင်းကျိုးဆိုးကျိုးယှဉ်ရင် ‌ကောင်းကျိုးက ပိုများတာကြောင့် မှန်ပြောင်းကြည့်ဖို့ မကြောက်ကြပါနဲ့။ ဒီဆောင်းပါးလေးကနေလည်း မှန်ပြောင်းကြည့်တာက ဘယ်လိုမျိုးဆိုတာကို ပိုပြီး ထဲထဲဝင်ဝင်နားလည်သွားလို့ အရင်ကလောက် မကြောက်ကြဖို့ကိုလည်း မျှော်လင့်ပါတယ်။ Dr Htet Htet Zaw Win #AnandaSaytanarFoundation #By_AMMK_Investment_Holdings_Company #ကျန်းမာရေး #health

သည်းခြေအိတ်ထုတ်ပြီးဆောင်ရန်ရှောင်ရန်များ ♦️ သည်းခြေကျောက်တည်လို့၊ ပိုးဝင်လို့ သည်းခြေအိတ် ထုတ်လိုက်ရပြီဆိုပါတော့။ သည်းခြေအိတ်မရှိဘဲ လူက အသက်ဆက်ရှင်နိုင်ပါ့မလား။ သည်းခြေအိတ်မရှိတော့ရင် ခန္ဓာကိုယ်မှာ ဘာတွေပြောင်းလဲလာမှာလဲ။ ♦️တကယ်တော့ ခန္ဓာကိုယ်မှာ သည်းခြေအိတ်က တစ်အိတ်တည်း ပါပေမယ့် မရှိလည်း ရပါတယ်။ အထူးသဖြင့် သည်းခြေကျောက်တည်တတ်တဲ့သူတွေမှာ သည်းခြေအိတ်ရှိနေရင် ခဏခဏပြန်ဖြစ်နိုင်ခြေ ရှိတာကြောင့် ခွဲစိတ်ပြီး ထုတ်လိုက်တာက ပိုကောင်းပါတယ်။ ♦️သည်းခြေအိတ်ထုတ်တာက များသောအားဖြင့် နာရီပိုင်းလောက်သာကြာပါတယ်။ ခွဲစိတ်ပြီး ဆေးရုံမှာ ရှိနေချိန်တော့ ဆရာဝန်တွေ၊ သူနာပြုတွေက ဂရုစိုက်ပေးမှာဖြစ်ပြီး အိမ်ပြန်ရောက်ရင်တော့ ကိုယ့်ဟာကိုယ် ဂရုစိုက်ရမှာဆိုတော့ ဆောင်ရန်ရှောင်ရန် အချက်တွေကို သိထားရမှာပါ။ အိမ်ရောက်ပြီဆိုရင် - 🔹ဝမ်းချုပ်မခံပါနဲ့။ အမျှင်ဓာတ်များတဲ့ အသီးအရွက်တွေ စားပါ။ ရေများများသောက်ပါ။ ဝမ်းသွားချင်ရင် အောင့်မထားပါနဲ့။ 🔹ခြေထောက် သွေးကြောမှာ သွေးမခဲစေဖို့ လှုပ်လှုပ်ရှားရှားနေပါ။ လမ်းလျှောက်ပါ။ 🔹ခွဲစိတ်ပြီး ၄ပတ်ကနေ ၆ပတ်ကြာသည်အထိ အလေးအပင်မတာ၊ ပြင်းထန်တဲ့ လေ့ကျင့်ခန်းတွေ လုပ်တာကို ရှောင်ပါ။ 🔹အနာကို ဆရာဝန်၊ ဆရာမတွေ ညွှန်ကြားထားတဲ့အတိုင်း ပုံမှန်ဆေးထည့်ပါ။ ♦️အစားအသောက်နဲ့ ပတ်သက်လို့ သည်းခြေအိတ်က သည်းခြေရည်တွေကို စုပေးပြီး အဆီတွေကို ချေဖျက်ဖို့ ထုတ်ပေးပါတယ်။ အခု သည်းခြေအိတ် မရှိတဲ့အတွက် သည်းခြေရည်တွေက အူထဲကို တန်းရောက်ပြီး ဝမ်းလျှောတာမျိုး ဖြစ်တတ်ပါတယ်။ အစားအသောက်နဲ့ ပတ်သက်လို့ ဆောင်ရန်ရှောင်ရန်တွေကတော့ - အစာစားတဲ့အခါ နည်းနည်းနဲ့ ခဏခဏ စား‌ပေးပါ။ များများစားရင် အစာမကြေတာ၊ လေပွတာ၊ ဝမ်းလျှောတာတွေ ဖြစ်တတ်ပါတယ်။ - အဆီများတာတွေ၊ အကြော်တွေ၊ ဟင်းအနှစ်တွေကို တတ်နိုင်သမျှ လျှော့စားပါ။ အထူးသဖြင့် ခွဲပြီးစ ၁ပတ်အတွင်းမှာ လုံးဝရှောင်ထားပါ။ - အမျှင်ဓာတ်တွေပါအောင် စားပေးပါ။ ဒါပေမဲ့ အလွန်အကျွံစားရင် လေပွတတ်လို့ သင့်တင့်တဲ့ပမာဏပဲ စားပါ။ - ဒါ့ပြင် ဝမ်းလျှောတာကို ပိုဆိုးစေတဲ့ ကဖင်းပါတဲ့ သောက်စရာတွေ၊ နို့ထွက်ပစ္စည်းတွေနဲ့ ချိုလွန်းတာတွေကို လျှော့သောက်ပါ။ - ခွဲစိတ်ပြီးနောက်မှာ မြန်မြန်နာလန်ထစေဖို့ ခြေထောက်လေ့ကျင့်ခန်းလုပ်ပါ။ ဒါမှ ခြေထောက်- - သွေးကြော သွေးမခဲမှာပါ။ - အသက်ရှူလေ့ကျင့်ခန်းလုပ်ပါ။ - ကိုယ်လုပ်နိုင်တဲ့ လှုပ်ရှားမှုတွေကို ခွဲစိတ်ပြီး ၂ပတ်မြောက်ကနေစလို့ ဖြည်းဖြည်းချင်း တိုးလုပ်သွားပါ။ - အိပ်ရေးဝဝအိပ်ပါ။ - စိတ်ဖိစီးမှုနည်းအောင်နေပါ။ ဒါဆိုရင် နာလန်ထတာမြန်ပြီး မြန်မြန်နေကောင်းလာမှာ ဖြစ်ပါတယ်။ တကယ်လို့ ခွဲစိတ်ပြီး အိမ်ပြန်ရောက်တဲ့အခါ - ဗိုက်က မခံနိုင်လောက်အောင် ပြင်းပြင်းထန်ထန် အောင့်နေရင် - ပျို့အန်ရင် - အသားတွေ၊ မျက်လုံးတွေ ဝါလာရင် - ဝမ်းမသွားတာ ၃ရက်လောက် ကြာလာရင် - ဝမ်းလျှောတာ ၃ရက်ကြာတာတောင် မသက်သာရင် - အဖျားတက်လာရင် ဆရာဝန်နဲ့အမြန်ဆုံး ပြန်ပြဖို့ လိုပါတယ်။ သည်းခြေအိတ်မရှိလည်း အသက်ဆက်ရှင်နိုင်တယ်ဆိုပေမယ့် ကျန်းကျန်းမာမာနဲ့ နောက်ဆက်တွဲပြဿနာတွေ ကင်းစေဖို့ ခုပြောတာတွေကို လိုက်နာဖို့ လိုပါတယ်နော်။ Dr Htet Htet Zaw Win #Ananda_Saytanar_Foundation #By_AMMK_Investment_Holdings_Company #ကျန်းမာရေး #health