ژوان

نا نەخەڵەتیەی باس مەردەی نیا باس زنج هۆرتەکنایێوەن تا ئەبەدیەت بێ ئانەی کەسێو بۆ یاسینیت وەنۆ، باس مەرگ نیا باس نەبیەو ژیواین وەختێ جە تیشکەو چەمات بێ بەشەنا، باس تەنیایی نیا باس نەیاواینەو گرد کەسین جە گرەوەخۆڵەی ئەوەشاریاو چێروو پۆسوو شێعرەکام... باوڕم نیا بە بارەسای بەرزی نزمی بە پیمانەی بە هێندێسەی تەنگتەر جە گۆڕێ ئا شارەنە نەبی چەنەش و من ئەسپەردێ کریەو گردوو ئا کافانە هەر کەسم دی غەیروو تۆ و تۆ هەرگیز نمەزانی چننە وڵاویانێ نێگاو گارسۆنێوینە کە چەنەش داوام کەردە بێ فنجانێو حزوورت... #ژوان وەهاروو ۲۷۲۱ بەشێوە جە شێعرەو: فنجانێو حزوورت https://t.me/Zhwan1370

فەلسەفەو ڕەنجی جوانی دیت؟ وەشیت هەرگیز نەکەردم من بە تامەو خەریکا تر چڕۆم سەیسەو ژەنێ پیرێ جە جامەو مریچیلێ کە ناخمنە لیانەش بێ، هەبەسیا جە سەدٚ زەنجیرێ تەقدیری کە بەسیێنێ بە پامەو بەڵام زانوو سلووکا خەم، مەبۆ بۆنەم سکاڵا نەمدٚرایوە جە پۆختەین و گلەی کەردەی جە خامەو نەبام زامێ جە وێم هاڵی، مەبا تەعبیر هەناسێم ئەپی زاماوە دەس شۆروو جە نەنگی یا جە نامەو نەکای زامێم کەرا پەترۆک، فەڵەک با بێنێ تیرێ نەچیری پەڕ جە زەوقوو مەولەوینا من بە فامەو٭ ڕوێ سیروان چڕیش بەرزی کۆساڵانی، کە: ئەی کۆ! خرۆشوو من بە لوتفوو ئا سیاسەنگێن جە ڕامەو کە یاوی فەلسەفەو ڕەنجی، ئێتر چۆڵارێ دەورت ئێتر من مەر خەمینەی ڕەنجەڕۆ نیشۆرە لامەو #ژوان ۲۷۲٤/۳/۲۲ ئوتووبانوو ساوەی ٭نە دڵەی پەڕ زەوق کۆنە نەچیر دا ئای لەزەت دارۆ تیر وەشۆن تیر دا مەولەوی

کێ بێ؟ کێ بێ واچێ؛ "نویستەی سووکەت کەرۆ" بێ با واچووش؛ شێعرەنە ژیوای یانێ چنگێ پێکنینە گیانوو کەلیما چنگێ پێکنانە گیانت کەلیمێ... #ژوان

جوابوو کاک ڕەئوف مەحموودپووری بە شێعرەو "ژیوایێوە و چننە مەرگێ؟" "هۆۆ کناچێ باڵاو شاهۆی و چڵڕێحانەی" ڕەئوف،م سەروو چڵوو حەسرەتێوە ژنیەم هانات هۆ کناچێ باڵاو شێعرێ کفرێت ڕێکوو زاماو دڵیم مەژەکوەرێنێ، قەسەم بە خودا تۆ هەر گژیە و باڵاو شێعرێت وزنەرە بەزم ڕەنج؛ با هەر پەی وێش هورخڵافیۆ هۆۆ کناچێ باڵاو شاهۆی و چڵڕێحانەی تۆ هەر گژیە و هەڵای تارێخ پۆتۆ شنیۆ گیژیایت ئەشقێ کەلیماوی؛ پەلکەکاتۆ ـ خەنێچ نەبۆ ـ زامداریی خۆ ژیوایت لیپا باڵابەرزیی مەمەنەرە قەهاری هەر نەبڕیاوەن ـ پاسە ماچا ـ گێجاویچ با زرێبارەو هەڵسێوەنە ماساوێوە چە زەریفە و مەرگێو ژیوای! هۆۆ کناچێ باڵاو شێعرێ و ڕاگاو کاوێ ئاخۆ زانی ئەوجاخانەو شنیای شێعرێ و سۆ قەڵەمی تاڵە قژتۆ سەراوێزا؟ ئێمەیچ هەڵای پەڕ بێ عاری ـ چی شارەنە ـ واچە و واچە و واچە دەنگیت با هوربڕیۆ و باڵاو شێعرێ گوڵیۆ ترووسکەو چەمەکاتۆ زوان، شێعرە و بۆەو هانایت تارێخێوە وەزنارە بەزم نەبڕیاوە. تۆم هەر هەنی و ماچا بیەی وێشۆ وێشا. https://t.me/Zhwan1370

ژیوایێوە و چننە مەرگێ؟! شێعرە و وەنایوە: ژوان ڕەحیمی ڕیک وستەی: حکمەت ساڵحی

"ژیوایێوە و چننە مەرگێ؟ دەروونوو وێمنە نیشتێنارە قژە خەنە گیریێ گردوو ڕەگام -ئەدٚایانە- گێرتێنێمۆ پەلکە ئەرێ چینەن گژیای من چەنی پەریشانی... وەهماویتەرین تەمەنە ڕا بەختەو وێم نمەبەروو گۆمانێوە مەڕیێنەنە گڵویم و نمازۆ پەرسوو؛ "ئا لاشە کە کەفەنوو ئاواتوو مننە لوا وەرموو ئنجێمادیرە نامێش یەقین نەبێ؟"٭ هەر جارێو زامدارە بیێنا هەسارێوە کۆشیانۆ ئیسە وەراوەروو ئاسمانی بێ هەسارەو ئی شەوێوە تەپێنانە دلێ وێم و یاوونە بە ژماروو زامەکام ژیوێنا... هەر چن هەرگیز دەسێو نەبی کێشۆمۆ سەر چاڵەو نسکەی بێ وادەو وێرەگاینە، بەڵام ئیسە کە پەڕڕەنا کفرێ مەنێنارە مەنێنارە یۆ بێ و نێشانوو خودٚایێو قەهاریم بدٚۆ پەنە! سلوولێم مەسموومێ و ئینانێ گێجاوێوە دووکەڵینەنە یۆ بێ واچۆ یۆوەم ڕەنجێو کە کێشتم چن دەرسەد نیکۆتین بێ؟! گۆشام گێروو گۆشام گێروو زیارەت تەڵانێ تووتووم کەرا یۆ بێ و پەرسۆ نیمە گیانێو و ئی گرد گۆڕێ؟ ژیوایێوە و چننە مەرگێ؟ تا مێمان بۆ سۆکنایی گردوو ئا کووجیانە باڵامۆ ڕەوانێنێ بووڵەم گزی دێنە، ئەرێ چینەن گژیای من چەنی نابەسامانی... #ژوان هامنوو۲۷۲۱ ٭نوسرەت ڕەحمانی https://t.me/Zhwan1370

کێ بێ؟ شێعرە و وەنایوە: ژوان ڕەحیمی ڕیک وستەی: حکمەت ساڵحی

کێ بێ؟ ڕاشاو من! بۆ واچەم پەنە؛ کێ بێ؟ کێ بێ واچێ؛ "ڕۆخانە دەنگوو لوایش سێحراوین" بێ با واچووش؛ سینە ساوای سفتی سیاسەنگێرە تا چن تا چن تاوۆ ئێشش بۆ، بێ با واچووش؛ ئێجبار ئێجبارا ئەگەرچی ئێجباروو لوای بۆ...! بێ با واچووش؛ غەریبە ڕەوایەتێوەن ئینە کە بیەیت لواینە یۆستەبۆتۆ... ڕاشاو من! بۆ واچەم پەنە؛ کێ بێ؟ کێ بێ واچێ؛ "کۆ مەحکەما!" بێ با واچووش؛ هەزار کەڕەتێ وازیایوەو دەنگێو وێڵی ئنزێواتنە چن کاسیش هەن، بێ با واچووش؛ تەنیایی یانێ سیاو سیاو مدرێراوە ئاننە مجیابینا دلێ وێت، بێ با واچووش؛ عومرێو تەماشەو چەمە کۆڵاو ئاسمانی بێ چرکێو پەنە یاوای یانێ چێش؟ ڕاشاو من! کێ بێ؟ کێ بێ واچێ؛ "ئاوی و ئاوەدٚانی!" بێ با واچووش؛ ئانێ خەڵوەتوو وێشنە دڵۆپ دڵۆپ چکۆرە ناخی خاپوور و بێکەسش تۆزەش هۆرزاینە، بێ با واچووش؛ ئانێ سەرگەردانەو چێروو وەشتە وارانینە دەساندەسوو مەژگیشنە پەپوو وەنۆ، بێ با واچووش؛ واران و وێرانی ئاوی و ئاشۆ سەرەتاو سەوتیشانە فەرقێو وینۆ؟! ڕاشاو من! کێ بێ؟ کێ بێ واچێ؛ "زەردٚەخوە ڕەمنۆ خەمێ" بێ با واچووش ئەهووراییتەر جە هەورامانی ژیوایو کناچێوە بێ سەیتەرەو ڕۆحوو ڕەنجینە قڵیشە بەرێنێ لچێش... کێ بێ؟ کێ بێ واچێ؛ "نویستەی سووکەت کەرۆ" بێ با واچووش؛ شێعرەنە ژیوای یانێ چنگێ پێکنینە گیانوو کەلیما چنگێ پێکنانە گیانت کەلیمێ... کێ بێ؟ کێ بێ واچێ؛ "هەتاهەتایین شاعێر!" بێ با واچووش؛ شاعێرانەتەرین تاریفوو دەردٚێ هەر ئا وەختەنە؛ باخەڵەو گەرمتەرین هەناسەینە فرامۆشی گێرۆترە، هەر ئا وەختەنە؛ جەنجاڵوو دنیاینە تەنیا شێعرەکێت زانا چننە تەنیانی چننە تەنیانی... هەو دنیاو ئێنسانانە خیاڵت سەرپەنام! یاوەم پەنە گردٚ شکێوە زەریفەنە غەیروو شکە بە ئەشقی شکە بە ژیوای ڕاشا! #ژوان پاییزوو۲۷۲۱ https://t.me/Zhwan1370

دەوروو چەمەکاو تۆنە مکێشووە تەڵووکێ ژیوایمەنە پەی وەختوو بەخێڵی دڕە بوو من #ژوان

من کە ئاخروو هەر ڕەگێوەم بۆنبەس و گیانم گێجاوڵێ وێرانینە، سەرگەردانە کۆڵانە چۆڵاو سیاوچەمانێوەنە شۆنەو وەهارێوەرە گێڵوو شکڵوو گوڵاو مێبینەکەیت بۆ ڕاشا گیان! #ژوان