Electrical Power 26⚡

إلكترو – Electromagnetics المجالات الكهرومغناطيسية | EEP 213 #electro أهم مادة في تانية 😶‍🌫️ المادة كانت مع دكتور مدحت الجنيدي بقالها سنين طويلة جداً معادا سنتين في النص فقط (2017 & 2018) المادة كبيرة ومهمة جداً وتعتبر هي المادة الأساسية في الترم والمحتوى بتاعها عبارة عن جزء كهربية وجزء مغناطيسية محتوى المادة: Coulomb Law - Gauss Law - Electric Potential - Dielectrics & Capacitance & Current Biot Savart Law - Ampere Law - Magnetic Force & Magnetic Circuits - Time Varying Fields "Maxwell" & Inductance & Planewave توزيع درجات المادة: 60 فاينال ، 20 ميد ، 15 تسليمات الدكتور ، 5 تسليمات المعيدة الدكتور بيطلب 3 تسليمات خلال الترم كله وكل تسليم بيكون عبارة عن مسألتين من امتحانات قديمة للدكتور ومطلوب منك تحلهم وترفعهم أونلاين على التيم بتاع المادة المعيدة بتطلب تسليم على كل سكشن تقريباً معادا بعض الاستثناءات (بتدي أجازات) والتسليم بيكون مسألة من الشيت تتحل وتترفع على التيم بنفس الطريقة المادة ملهاش معمل وليها سكاشن نظري فقط وبتكون كل أسبوع مع باشمهندسة منار اللي حرفياً ربنا يباركلها لإنها من أهم أسباب النجاح في المادة دي والكلام ده هتعرفوه قدام المادة فيها امتحان ميد وامتحان فاينال وكلاهما بيكون ريتين والخطوات عليها درجات والناتج عليه درجات والتصحيح في الفاينال بيكون أفضل من الميد الدكتور بيكرر الامتحانات جداً في المادة دي ولكن أقل تغيير في تفاصيل المسألة كفيل يغير شكل الإجابة بالكامل لذلك خلي بالك وماتبقاش بتبصمج وخلاص لإن المادة دي لو مش فاهمها كويس هتتعب فيها المادة دي بتقفل مادتين في الترم التاني اللي هما "ماشين 1" و "باور سيستم 1" ودول بيقفلوا مواد بعدهم وبالتالي اللي هيشيل إلكترو هيتأخر سنة في الكلية لا محالة ملاحظة مهمة: المادة موجودة مادة زيها في اتصالات في نفس الترم ولكن مفيش مقارنة بين نظام المادة عندنا وعندهم، في اتصالات المادة mcq وبيتشرح كم أقل مننا بكتير والدنيا بتكون سهلة وبسيطة، لذلك في آخر الترم ممكن طالب باور يشرح المادة لطالب اتصالات اللي هيكون راكنها طول الترم ويلمها في الآخر ويعدي فيها بسهولة، عندنا مفيش الكلام ده في المادة ولازم تبذل فيها مجهود طول الترم عشان تنجح

مايكروبروسيسور – Microprocessor مبادئ المعالجات الدقيقة | EEP 212 #micro المادة كانت مع دكتورة نيرة صادق ومقسومة جزئين جزء سوفت وير وجزء هاردوير وبيتشرح فيها device مشهور من شركة Intel اسمه 8086 المادة أول مرة تمسكها دكتورة نيرة كانت مع دفعة باور 24، ومع دفعة 23 كان بيشرحها دكتور حسام الدين مصطفى، وقبل كده كان بيشرحها دكتور حسام الدين ودكتور عمرو الزواوي المادة بتتشرح في اتصالات في تانية الترم التاني مع دكتورة نيرة برضو، نفس المنهج ونفس العناوين بالظبط، وبالتالي أي محتوى تبع اتصالات ينفع لينا في باور والعكس، يعني كده الناس ممكن تذاكر من فولدر المادة اللي في اتصالات عادي (درايف مينا منير) الدكتورة شرحها متوسط وهتحتاج مصدر تاني عشان تفهم منه المادة أكتر ولكن لازم تتابع سلايدز الدكتورة ومحاضراتها مع الناس اللي بتحضر عشان أحياناً الدكتور بتركز على حاجات معينة وبتجيبها زي ما هي في الامتحان محتوى المادة المفروض إنه 5 شباتر سوفت وير و 4 شباتر هاردوير بس الدكتورة فعلياً مش بتشرح كل ده وبتلغي بعض الحاجات حسب كل ترم توزيع درجات المادة: 60 فاينال ، 20 ميد ، 10 بروجيكت ، 5 تسليمات ، 5 معمل المادة ليها سكاشن نظري وليها معمل المعمل عبارة عن كويزات سوفت وير بتلاقي كود قدامك تقعد تحله وتمشي وبيتطلب منك تسليم أونلاين مرة كل أسبوعين آخر الترم بيتطلب بروجيكت على بوردة اسمها ESP 32 وده عليه 10 درجات وبيكون سوفت وهارد الامتحانات في المادة mcq والدكتورة بتكرر كتير من امتحاناتها القديمة المادة ملهاش شيتات جديدة ولكن موجود شيتات قديمة ريتين والحل بتاعها.

جروب الواتس بتاعنا يا شباب❤️ https://chat.whatsapp.com/ItU55t21VOd9FkFkxZB8TN

بسم الله سيركتس 2 – Circuits 2 الدوائر الكهربية المتقدمة | EEP 211 #circuits2 المادة مع دكتور أيمن سامي والدكتور شرحه كويس جداً وامتحاناته بتيجي مكررة بنسبة كبيرة كل سنة (مع دفعة ٢٤ كرر امتحان ميد قديم كما هو + كرر أجزاء من الفاينال) محتوى المادة: Transient Response - Mutual Inductance - Laplace - Transfer Function - Resonance - Filters - Fourier Series - Two Port Network توزيع درجات المادة: 50 فاينال ، 25 ميد ، 5 كويز ، 20 معمل وعملي السكاشن النظري مع باشمهندس عبدالله فؤاد وشرحه كويس وهتفهم لو حضرت السكشن وموجود له ورق على الدرايف وبيتعمل كويز في السكشن بيكون بعد الميد بأسبوعين كده المعمل بيكون عليك تجربة كل أسبوعين بتذاكرها من فيديو وتروح تطبقه في المعمل وتوريها للمعيد وتمشي وطبعاً عليها غياب ودرجات وفي آخر الترم امتحان عملي وبيتطلب منك ريبورت كده عن التجارب وبتعمله على الـ Word المادة سهلة بشكل كبير لكن للأسف فيها أفكار كتير شوية ومستوى الامتحان بيكون عالي لإن المحتوى مش صعب لازم تحل امتحانات قديمة ومسائل على قد ما تقدر عشان تجمع أكبر قدر من الأفكار ملاحظة مهمة: المادة موجود مادة زيها اسمها سيركتس 2 في اتصالات ولكن محتوى اتصالات أكبر من باور حاجة بسيطة (نفس العناوين اللي فوق وعليها عنوانين كمان) ولكن الفكرة إن النظام في المادتين مختلف، الوضع في باور أحسن في المادة دي والامتحانات mcq وموجود شيتات عكس المادة اللي في اتصالات بتكون ريتين وأصعب شوية وبيذاكروا من المرجع عشان مفيش شيتات.

ازيكم يا شباب باور عاملين ايه 🫡 هفتتح التشانل معاكم بشوية كلام عن مواد تانية و نظامها ماشي ازاي وكدا ف stay tuned بقا 🔥 و ربنا يوفقكم جميعاً ❤️