ISLOMBEK MIRZAQULOV | Sheʼrlar

​​РАССОМДАН ЧИҚҚАН ШОИР-ШОИРДАН ЧИҚҚАН РАССОМ” Сайфулло Қулаев деган номни журналимиз мухлислари яхши танийди. Гўзал поэтик манзараларга бой шеърлари нашримиз саҳифаларида кўп бор эълон қилинган. Қолаверса, у беминнат тарғиботчимиз. “Шарқ юлдузи”ни болаликдан кузатиб келадиган бу маърифатпарвар инсон жураналимизда эълон қилинган асарларни қардош юрт Тожикистон ва ижтимоий тармоқдаги китобхонлар билан мунтазам ўртоқлашиб келади. “– Отам “Шарқ юлдузи”га обуна эди, – деб эслайди ижодкорнинг ўзи. – У пайтлари журнални ўзимиздаги матбаа дуконларидан ҳам топса бўларди. Аммо 1991 йилга келиб, унинг юртимизга келиши тўхтаб қолди. Бунинг сабабларини сўраб нашрга мактуб йўлладим ва журнал ходими Музаффар Аҳмедовдан жавоб хати олдим. Шу ўртада нашрнинг ўша пайтдаги бош муҳаррири Ўткир Ҳошимовда ижодимга нисбатан қизиқиш уйғонди. Кўп хаялламай, шу (1991) йил, 5-сонда бир саҳифа шеърларим эълон қилинди. Таҳририятдагилар 60 сўм қалам хақи билан уни менга почтадан юборишган. Ўзбек тилини билмайдиган аёлим ўшанда шеърларим эълон қилинган қалингина журнални салмоқлаб кўраркан, “шу газитда ишласангиз бўлмайдими? Бир бетга ўн сўм, демак, ўн бет нарсангиз чиқса, 600 сўм бераркан” деган эди, соддалик билан...” Сайфулло Қулаев бугунга довур маърифат соҳасида чакана меҳнат қилмади. “Совет Тожикистони” газетасида корректор, “Тожикистон овози” газетаси адабиёт ва санъат бўлими мудири, “Устоз” газетасида бўлим мудири, Тожикистон Ёзувчилар уюшмаси таржима маркази шарқ адабиёти бўлимида мудир ва бошқа жойларда самарали ишлади. Нафақа ёшидаги ижодкор бугун ҳам маърифат улашишдан чарчагани йўқ. Тожикистондаги ўзбек тилида дарс ўтиладиган мактаблар қарийб 10 йилдан бери у ёзган “Она тили” дарслигидан фойдаланади. Йиллик тиражи 45 мингни ташкил қиладиган бу китоб нашри учун Тожикистон раҳбари, миллат Пешвоси, Президент Эмомали Раҳмон жаноби олийларига такрор-такрор миннатдорчилик сӯзларини айтади. Сайфулло Қулаевни биладиганларнинг айримлари шоирдан чиққан рассом деса, айримлар рассомдан чиққан шоир дейди. Сабаби, бу одам шеъриятда қанча сермахсул ижод қилган бўлса, рассомлик соҳасида яратган асарлари ҳам ундан кам эмас. Хусусан, “Имом Ҳумайний ва кичкинтойлар” мактаб ёшидаги болалар учун расмли китоб муаллифи. Ҳозирда бу китоб Эрон Ислом Республикасидаги “Имом Ҳумайний” музейида ҳам сақланади. Тиниб-тинчимас ижодкор Рудакийдан тортиб Лойиқ Шералигача бўлган тожик шоирларининг ижодини тожикчадан ўзбек тилига таржима қилган. Ўзбек тилига, адабиётига бўлган меҳри, хизматлари учун у 2023 йил, 28-декабрда Ўзбекистон Ёзувчилар уюшмаси аъзолигига қабул қилинди. Бугун журналимизнинг кўп йиллик мухлиси, дўсти, Ўзбекистон Ёзувчилар уюшмаси аъзоси хассос шоир ва рассом Сайфулло Қулаевнинг таваллуд куни. Шу муносабат билан таҳририят номидан табриклаймиз. Сайфулло акага узоқ умр, сўнмас ҳайратлар тилаб қоламиз... «Шарқ юлдузи» журнали. Сайфулло ҚУЛАЕВ Шеърлар. ••• Дил вайрон экан гоҳ, гоҳ обод экан, Ҳар неки ўтгандир хайрбод экан. Даврон оҳу янглиғ учқур бод экан, Ул оҳу--давронни сурганим йўқдир. Замона тамошо-тўйларга ундар, Вале мен мискину ҳайрона бунда. Ки, ушбу тўрт кунлик дунёи дунда, Падарим—кўз очиб кўрганим, йўқдир. Эътиқод йўлида бўлсамда ҳаммол, Ижобат бўлмади орзую аъмол. Мен кечиб юбордим орзудан, аммо, Худодан юзимни бўрганим йўқдир. Ватаним хокида бўлганим—бахтим, Элимнинг ичида ўлганим—бахтим. Шу пастак кулбамдир давлатим, тахтим, Кошона қасрлар қурганим йўқдир. Мен назар ташладим ортимга кўп бор, Гоҳ бахтли яшабман, гоҳи бахтга зор. Тошларга бошимни урганим бисёр, Бировга тош отиб юрганим йўқдир. ••• Унутади куртаклигини, Чисирлайди – куйлай бошлайди. Унутади қуёш эканин, Ярим тунда кӯринар дайди. Тошкӯчадан сирғалиб очиқ Дерезалар пардаси томон Садолари келади учиб, Тундай узоқ инграйди камон. Нечундир бу садолар дилга Бир поёнсиз дардни оқизар. Нигоҳларинг михланар йӯлга, Бошинг узра осмон тоқи зар. Ва белгисиз ёқларга ундаб, Юзинчи бор сенинг эҳтимол Кифтларингни қучади шунда Йиғи-қӯли кӯринмас аёл. Бизни кузатиб боринг: Telegram|  Facebook | web-sayt