ASOOSAMA KUTAA DARBAN DUBBISUU KEE ADDA BAASI! AMMA KUTAA ISIN EEGAA JIRTAN DHUFAA JIRA! DUBBISA GAARI!!
ASOOSAMA
MADAA LAAGAA
★KUTAA_14FFAA:-
Hawwiin Bilbila cuftee gara adaadaa isheetti deebite. Hawwiin akka isheen obboleessummaatti, Ifaan immoo akka obboleettiitti wal jaallatan beeku malee daangaa obbolummaa cabsanii dirree jaalalaa keessa jiraachuu isaanii namni hubate hin jiru. Adaadaan Hawwii eenyu akka bilbile Hawwii yeroo gaafattu, Hawwiinis eessatti akka wal baranii fi jireenya maatii ishee keessaa iddoo guddaa akka inni qabu adaadaa isheetti himte. Obbo Hundumaan akka inni nama gaarii ta’e fi oolmaa inni guyyaa sana isaaniif ooleef dagachuu akka hin dandeenye cimsanii dubbatan.
Harmeen Hawwiis Ifaan nama imaanaa itti kennan sirriitti ba’uudha jedhanii gaarummaa Ifaa dubbatan. Hawwiinis isa maqaan jaalallee ishee kabajaan haasaa’amu dhageessee baay’ee gammade. Galgalli yeroo ga’u Ifaan bilbilee jennaan, akka isa ajaa’ibsiifatan itti himte. Onnee Cabde Feeneetiin galgala baay’ee dhukkube, yeroo Abbaan Feeneet mana yaalaattin si geessa jedhan; Feeneet borin Hawwii waliin deema, jettee didde. Abbaan Feeneet, Feeneetiin eeguuf jecha bira taa’aa bulan. Yeroo lafti bariitu Abbaan Feeneet qarshii kennaniifi akka isheen mana yaalaa deemtuuf akeekkachiisan.
Abbaan Feeneet mana Hawwiifaatti goranii akka Hawwiin Feeneetiin mana yaalaatti geessitu itti himan. Hawwiinis naatee mana Feeneet faa deemte. Hawwii: Feenookoo sitti hammaatemoo dhukkubni kee? Jettee, Feeneetiin gaafatte. Feeneet: Eeyyee na dhukkubaa bule, Hawwii ko. Hawwii: Ka’iitii uffatakee uffadhu! Mana yaalaa deemnaa, ittiin jette. Feeneet: tole jettee, uffata ishee uffattee waliin gara mana yaalaatti imala jalqaban. Dhaqanii Kaardii baafatanii dabaree isaanii eeggachaa jiru. Ogeessi fayyaa yommuu ishee waamu Feeneet ol seentee bakka ishee dhibe itti himte. Ogeessichis kutaa Laaboraatooriitti erge. Kutaa Laaboraatooriitii dhiiga, sagaraa fi fincaan fuudhanii gad baatee ala teessee firii akka eeggattu itti himan. Feeneetis, tole jettee gadi baatee eeguurra jirti.
Abbaan Feeneet hojii isaanii sirriitti hojjechuu hin dandeenye. Ammas ammas” mucaankoo maal taate? Yoona kana akkam taati?” jedhanii biiroo keessa taa'anii dhiphachaa turan. Ogeessi fayyaa waamnaan yeroo lammaffaaf ol seente. Ogeessichis akkana jedhee gaafateen,” jaalallee qabdaa?” Feeneet qaban ture garuu amma wal dhabnee addaan baanee jirra, jetteen. Ogeessichis wal dhabdee keessaniif sababa kan ta’e maali? Feeneet ani hin beeku; garuu guyyaa Sanbataa nagaa waliin oollee Dafinoo ganama gaafan bilbiluuf bilbila narraa kaasee jechoota ani irraa hin eegne naan jedheera; sanaan booda wal arginee hin beeknu, jettee itti himte. Ogeessichis, Feeneet amma garuu walitti haasa’uu qabdu; waliin taatanii waan tokko murteessuu qabdu, ittiin jedhe. Feeneetis waa’ee maalii? Jettee, lafa teessuu ol-kaatee isa gaafatte. Tasgabbaa’i! Feeneet, jedhee gadi teessisee, suuta jedhee gurra isheetti siqee ati ulfaam ittiin jedhe. Osoo Ogeessichi dubbatee hin xumurin, ta’uu hin qabu jettee iyyitee boosse. Hawwiin iyya Feeneetiin yommuu dhageessu, bakka teessuu kaatee fiigdee iddoo Feeneet jirtutti deemte; yeroo isheen ilaaltu, Feeneet ta’uu hin qabu! Jettee, lafatti of-tumti. Hawwiin” maaltu maal ta’e?” Jettee ogeessicha gaafatte. Ogeessichis jajjabeessi jedhee Hawwiitti hime.
Hawwiinis yommuu kana dhageessu isheen immoo Feeneetiin caalte. Ogeessichis Hawwii lafaa kaasee ati immoo hin sossobda jennaan, ishee caaltaa? Ishee ofitti qabii fuudhii galii jajjabeessi ittiin jedhe. Hawwiin akkuma isaatti Feeneetiin sossobdee manatti galchite.Hawwiin manatti galtee waa’ee hiriyyaa ishee yaaduu eegalte; sammuun ishee jeeqamaa waan jiruuf waan tokko murteessuu hin dandeenye. Feeneet isa manatti galte garaan siree ishee irratti gombifamtee ni boossi. Abbaan ishee dhokatee yommu dhaggeeffatu, hirqinfattee boo’uu ishee dhaga’e. Wayyoo! Gaafa rakkinaa dafee hin bari’u, jette halkan itti dheerannaan.