bac 2024

غير غدوا ان شاء الله عندكم اختبارات،شتو كيفاش جازت بلخف ..المهم حبيت نقولكم كيما العام لي فات و كيما لي قبلو مجرد اختبارات ،ميهمكمش نقاطي ڨااع ،كاين شي اساتذة غادي يورولكم قدرات الخارقة تاعهم فالمواضيع💀 سما متتخلعوش و بالاكو تتغاشو ثاني 😂 نشفا العام لي فات المات دارتلنا وحد الفرض معمر غي بالجذور لي بدا يبكي ولي داخ ،انا وليت نضحك ،شوفو سيو عودو رواحكم من دكا عفايس هاكا يضحكوكم مشي يدوخوكم ،و صراتلي حتى فالباك في الفيزيك الكلاصة ڨاع بنات و دراري لي يقولو نخرج مبعد يجي ڨاع مشمخ ولي تبكي 🥴،مفهمتش كيفاه يجيهم البكا ياك والله معندك لوقت بش تبقا تندب ،اخدم برك! انا والله كان يجيني الضحك ، المهم خوتي استغلوا المواد الاساسية سيو اخدموا فيهم و ادا جاك واعر مشي معنتها مراكش تقرا ولا بالعكس اتحدا روحك تزيد فالمجهود تاعك زيد اخبش و اعيا وراح تلقى. nrmlm صيف هادا فاتوا عليكم تراند تاع يدي 8 و 10 فالاختبار لفلاني مبعد الباك يخبطها ب 20 😭، ايا صاي سما اختبارات ماشي معيار صدقوني انا عربية عام كامل و انا ندي 10 مبعد الباك 17.5 حتى الفلسفة و فرونسي ووو. المهم الفصل لول ركز على مواد اساسية و شوية لغات دوك يزيدو لي پروف يمدولكم المنهجية تاع الاجوبة وڨاع ،استغلوهم مليح! ايا هادي هيا ربي يوفقكم ويسدد خطاكم🤍

كيفاش تقرا 5 ساعات بعد الدراسة في الثانوية ✨️ : 1️⃣ نفترضوا في الوقت الحالي راك تقرا من 8:00 إلى غاية 16:30 ( في الثانوية )، تبع هذا الروتين باش تقرا بعد الثانوية حوالي 5 ساعات ( مادتين اساسيتين + مادة ثانوية ) : • 16:30 >> 17:00 : الوصول للمنزل • 17:00 >> 18:00 : صلاة + تناول الطعام + راحة • 18:00 >> 19:45 : دراسة مادة اساسية ( علوم / رياضيات / فيزياء ) • 19:45 >> 20:15 : تناول العشاء + راحة • 20:15 >> 22:00 : دراسة مادة اساسية ( علوم / رياضيات / فيزياء ) • 22:00 >> 22:15 : راحة • 22:15 >> 23:15 : دراسة مادة ثانوية ( لغات / مادة حفظ ) 2️⃣ بعد ما تكمل تقرا تروح ترقد مباشرة و ما تبقاش تخدم بالهاتف، حاول تنوض مع صلاة الفجر بين ( 6:00 >> 6:30 ) وهكذا يكون وقتك منظم و ترقد في الوقت + تنوض و انت شابع رقاد

فهاد الوقت وش لازمكم ديرو: ⚪تكونو ديجا يديتو ملخصات علوم وراكم تقراو و فنفس لوقت تحلو مع كتفي وعقبة بن نافع ⚪تبداو ديرو ملخصات عربية ⚪فيزيك راكم تتقدمو فالدروس فنفس لوقت تحلو تمارين و لي يديرو ليكور كي يكون لپروف يحل تمارين و تلقاو سؤال شباب لي قادر يطيح لونوه ولا سطرو تحته بش كي تعاودو تولو لتمرين تسيو فيه وحدكم ،وتمارين لي عجبوكم تلقاو فيهم فكرة مميزة ثاني لونو بالهايلايتر رقم التمرين بش تولو ليه،و الملخصات تقدرو تكتفو بتاع استاذ ليكور بسك كافيين و وافيين ولي ميديرش ليكور راو كاين زدون بعتلكم ملخصاتو و تمارينو الفوق ولوو للرسائل المثبتة تصيبوهم.و ديرو هاكا ورق ولا كراس صغير للافكار الشابة تاع تمرين ولا حل تاع اسئلة الصعبة ولا كاش astuce مدهالكم البروف وداومو عليها راح تساعدكم بزاف انا لوكان جا خطي مفهوم والله نصورلكم تاوعي مي كنت نكتب بزاف صغير و مينداك بأي لغة ومشي منظمين ڨاع🤌🏻🥲, بالنسبة للمرجع عندكم استاذ ليكور و عقبة🙌🏻 ⚪رياضيات نفس الشيء مع فيزيا برك انا افكار تمارين مكنتش نكتبهم ياك مشي حفيظة وسيو تحلو بزاف ،عندكم مقترحات تاع كتاب نور دين ،انا مشريتوش كان عندي ملف راني بعتهولكم لفوق كااامل ⚪ اللغات مزال وقتهم يعني،تقدرو تبداوهم فالعطلة هادي ان شاء الله ابداو بالملخصات مبعد المواضيع تاع عقبة و dz exam ⚪الحفيظة مزال ڨاع ما تبداوها خلو الفصل ثاني فالوسط ولا النهاية .شوفو نضمنلكم تقدو تبداوها فرمضان و تكملوها فيه وتحلو مواضيع🤝🏻 اني متحمسة فبلاصتكم لرمضان بسك صدقوني حا تتقدمو فيه بزاااف ،انا عن نفسي بديت نحفظ فوسط الفصل الثاني و كي جا رمضان لقيت روحي ناسية ، سما حسيت اني نعاود نحفظ مي كاين صوالح حا تبقاو متفكرهم طبعا ، ومع قناة تاع بيلال دوك يقلشوكم بالكويز تولو طيرو وهادي هيا خوتي ،غير بشوي على رواحكم نتكل عليكم تفرحوني هاايا يا ابطال😂

السلام عليييكم شخباركم؟😭 ،تلفتلي وش نحطلكم سما ادا عندكم اي أسئلة ولا عفسة نديرهالكم ادا قدرت قولولي. برك حاجة..لي قلتلها من قبل ( رسائل مثبة راهم ملفوق)ومعليش نعاودها على العربية بالنسبة للي راح يبداها دوكا يالوكان ملخصات فقط هاكا بش كي تتزير تلقاوهم واجدين،لي راهو يدير دروس خصوصية نقولك اخي راك تضيع غي فدراهمك🤝🏻متقوليش انا 0 فيها بسك تقريبا ڨاه كنا كيفكيف. اناجامي درت فيها ليكور و ديت مليح فالباك حمد الله غير من اليوتيوب،شفت عند حيقون بالمناسبة يخليكم تستغناو على كلش🤍 و متتقلقوش كي تدخلو لبلايليست تاع عام ليفات و لي قبلو تلقا هم داير غير شوي دروس ومحبس😂🤌🏻، ولا تلقاوه مخلط علمي مع ادبي (انا كان نهاري يتخسر كي نلقاه مخلطها وتتلفلي😭)،سما روحو عند ابو بكر تلقاوه داير برنامج تاع لباك فالعربية صوروه ولا اكتبوه مبعد حوسو على درس زعما العنوان و كتبو حيقون يخرجولكم. انا كنت نقرا من البلايليست لي كان دايرها وين يقري لي كور و فنفس لوقت يفيلمي فيديو وكان grv يعجبني الحال نحس روحي معاهم..حتى لي معجبهش دوكا نقولكم راح توالفو🫶🏻. والملخصات كنت ندير سواسوا كيما يكتب فطابلو هاديك لغيمة وڨاع😭 ايااااا و هادي هي خوتي الله يوفقكم ،ابعتوا لصحابكم لبوست هادا نحولهم لغمة تاع العربية😂 لعنداكم والله رااهي ساهلة خلاص استغفروا ربكم انه كان غفارا🤍

ماذا لو أن يرتّبُ اللهُ لك ما تتمنى، بشكلٍ أجمل مما تتمنى؟

هاذا تطبيق غادي يعاونكم بزاااف ،surtt هادوك لي تيليفون دايلهم ڨاع وقتهم ولا يجو يقراو يلقاو رواحهم يدرو فانستا...تقدرو تريڨلو كيما تحبو زعما تقراو 50 دقيقة و تريوح 10 دقايق وتعاودوها 3 مرات مبعد ديرو راحة تاع 20 دقيقة وموراها تعاودي تولو 50 قرايا 10 راحة(لي معرفش يريڨلها قولولي نديرلكم فيديو كيفاه)+ روحو لوضع صارم تلقاوها لتحتا(strict mood) وديرو بلوك للتطبيقات لي تشدكم خلو غير لي تقراو بيهم كيما تيليجرام و يوتيوب.وفي هاد تطبيق تقرو تخدمو ڨروپ بيناتك وديرو تحديات وتشوفو شكون قرا فيكم اكبر حجم ساعي.. المهم هاد app بزاف هايلة فأول تعليق راح نديرلكم كيفاش تريڨلوها بش نحو الفضول ادعولي معاكم🤍

📍تطبيق Focus To-Do ​​المدفوع كليا 📌معلومات: تطبيق رائع لمساعدتك على التركيز في أداء مهام حياتك بطريقة رائعة جدا تطبيق طلبتوه بزاف مني 🎮 الحجم: 35 ميغا 🎮 التصنيفات: مهام 👨🏻‍💻 الناشر: @Anisham1 🎮 التحديث في: 08 فيفري 2023 👨🏻‍💻 بواسطة 1001Tech🌍 📍تذكير : يرجى الدخول دوما للتعليقات لسماع الشرح الصوتي لكل تطبيق للفهم أكثر

ديرلكم لي كويز وعفايس راح يعاونوكم ان شاء الله

أدعو لفاروق و محمد بالرحمة و المغفرة 🫶🏻💕 https://t.me/mbaaaac

السلام عليكم كيراكم🥹؟ ان شاء الله ڨاع راكم غايا،قولولي بديتو توالفو ريتم ،كلاصتكم صحابكم ،صايي دخلتو فالاجواء؟ بديتو تحسو في روحكم spacial ومنا..اهه اشتقت🥲 اسك عرفتو ميطود تقراو بيها وكيفاش تنظموا وقتكم ولا مزال،احكولي.وشمن صعوبات راكم تواجهو ادا عندكم اي أسئلة راني هنا متتردوش🤍