លេខាធិការដ្ឋាន គ.ជ.អ.ប. -NCDDS

កិច្ចប្រជុំពិនិត្យ និងពិគ្រោះយោបល់លើសេចក្តីព្រាងផែនការយុទ្ធសាស្ត្រស្តីពីការបញ្ជ្រាបយេនឌ័រ បរិយាបន្ន និងសមធម៌សង្គម .......................................... ទីស្តីការក្រសួងមហាផ្ទៃ៖ ថ្ងៃអង្គារ ១១រោច ខែស្រាពណ៍ ឆ្នាំមមី អដ្ឋស័ក ព.ស ២៥៧០ ត្រូវនឹងថ្ងៃទី៨ ខែកញ្ញា ឆ្នាំ២០២៦ ឯកឧត្តម ឆេង វឌ្ឍនៈ អនុប្រធានលេខាធិការដ្ឋាន គ.ជ.អ.ប. តំណាងដ៏ខ្ពង់ខ្ពស់ ឯកឧត្តម ចាន់ សុធា រដ្ឋលេខាធិការក្រសួងមហាផ្ទៃ និងជាប្រធានលេខាធិការដ្ឋាន គ.ជ.អ.ប. បានអញ្ជើញដឹកនាំកិច្ចប្រជុំពិនិត្យ និងពិគ្រោះយោបល់លើសេចក្តីព្រាងផែនការយុទ្ធសាស្ត្រស្តីពី «ការបញ្ជ្រាបយេនឌ័រ បរិយាបន្ន និងសមធម៌សង្គម» ក្នុងកម្មវិធីជាតិសម្រាប់ការអភិវឌ្ឍន៍តាមបែបប្រជាធិបតេយ្យនៅថ្នាក់ក្រោមជាតិដំណាក់កាលទី២ (២០២១-២០៣០)។ កិច្ចប្រជុំនេះ រៀបចំឡើងតាមវីដេអូពីចម្ងាយ ដោយមានការចូលរួមពី ឯកឧត្តម លោក លោកស្រី ថ្នាក់ដឹកនាំ និងតំណាងដៃគូអភិវឌ្ឍន៍ សរុបប្រមាណ ៣២រូប (ស្រី ១៦រូប)។ កិច្ចប្រជុំនេះមានគោលបំណងសំខាន់ៗចំនួន ២៖ ១. ពិនិត្យ និងពិភាក្សាលើសេចក្តីព្រាងចុងក្រោយនៃផែនការយុទ្ធសាស្ត្រស្តីពីការបញ្ជ្រាបយេនឌ័រ បរិយាបន្ន និងសមធម៌សង្គម។ ២. ប្រមូលមតិយោបល់ អនុសាសន៍ និងធាតុចូលពីដៃគូអភិវឌ្ឍន៍ពាក់ព័ន្ធ ស្តីពីភាពអាចអនុវត្តបាននៃសកម្មភាពអាទិភាព និងគោលដៅដែលបានស្នើឡើង នៅក្នុងវិសាលភាពមុខងារដែលអនុវត្តដោយដៃគូ ៣. បន្ស៊ីគ្នារវាងផែនការយុទ្ធសាស្ត្រស្តីពីការបញ្ជ្រាបយេនឌ័រ បរិយាបន្ន និងសមធម៌សង្គម ជាមួយផែនការយុទ្ធសាស្ត្រស្តីពីការបញ្ជ្រាបយេនឌ័រ និងឬគោលការណ៍ណែនាំស្តីពីការលើកកម្ពស់តួនាទីស្ត្រីក្នុងមុខតំណែងគ្រប់គ្រងរបស់ក្រសួង ស្ថាប័ននៅថ្នាក់ជាតិ៕