4 265
Subscribers
No data24 hours
No data7 days
No data30 days
Posts Archive
4 265
*️⃣ التعليم المصري كان أيام الملكية بيركز عالجودة؛ صعب وغالي إنك تعرف تتعلم لكن لو انتا شاطر هتعرف تكمل... لغاية سنة 1944 لما نجيب الهلالي باشا استصدر قرار ملكي من فاروق بمجانية التعليم الإبتدائي والإعدادي؛ ثم سنة 1951 طه حسين أخد قرار مماثل بمجانية التعليم الثانوي...
*️⃣ فضلت الجامعة تعليم مدفوع؛ لكن المتفوق يحصل علي المجانية؛ وبكده الدولة تعرف توفر تعليم عالي الجودة لإن عادة المتفوقين نسبتهم قليلة؛ و الأثرياء برضك قليليين.
*️⃣ قامت ثورة 1952 وفضل نظام التعليم الجامعي كما هو؛ لكن مع توسع الدولة في مصادرة أملاك الباشوات وهروب الأجانب بره مصر (ودول جزء منهم عالي التعلم والمهارة) ؛ وكذلك بداية توسع عبد الناصر في بناء الشركات والمصانع؛ بدأت مصر تواجهه بوادر مشكلة... عاوزين موظفين بدرجة عالية من التعليم (جامعيين).
*️⃣ الخيار الطبيعي هو التوسع في الجامعات وتدريب الكوادر الجامعية وتقليل تدريجي شروط الالتحاق بحيث يبقي عندك عدد كبير من الخريجين بجودة عالية؛ لكن عبد الناصر شاف دا خيار مش مناسب ومش عملي وسريع يناسب نمو مصر... فهنا طلع قرار إنه بمناسبة العيد العاشر للثورة يعني 1962 الجامعات هتبقي مجانية.. كله يدخل الجامعة.
*️⃣ مين فيكم شاف افلام الخمسينات والستينات وخاصة كمال الشناوي اللي بيطلع مهندس وموظف لكن معاه عربية وشقة وبيسافر وكده... اللي فوق يوضح لك؛ بداية الستينات كان عدد خريجي الجامعات قليل فكانوا عايشين في مستوي معيشي عالي.
*️⃣ المستوي المعيشي المرتفع مقارنة بباقي الشعب كان قدام عين كل المصريين؛ لازم عيالنا يخشوا الجامعة عشان يبقوا كده... فلما صدر قرار المجانية... هجووووم عالجامعات.
*️⃣ المشكلة اللي محدش أخد باله منها ان فتح الباب لدخول اعداد كبيرة جعل مستحيل تدريبهم بنفس الجودة؛ طبعا الجيل الأول كان دكاتره عاليي الجودة و جامعات مؤهلة بيدربوا عدد طلب كبير؛ فطلعوا جيل بجودة متوسط مرتفع؛ الجيل الثاني بقي الدكاتره والامكانيات متوسط مرتفع بيدربوا عدد كبير فبقي الخريج متوسط منخفض... احنا بقي مع الدفعة الثالثة؛ المتوسط منخفض في الامكانيات بيدربنا فنطلع معانا ورقة بإننا اتعلمنا؛ اتعلمنا ايه منعرفش بس الورقة بتقول اننا اتعلمنا.
*️⃣ الكل نسي بقي هي الجامعات والمدارس بشكلهم الحالي صممت ليه؛ نرجع لاول القصة؛ في العهد الملكي عاوزين كام شخص عالي الجودة؛ والباقي يموت مش عاوزينه؛ عبيد في الأرض... لكن عصر بعد 52 هو عاوز جيش موظفين؛ موظفين...
*️⃣ منظومة مصممة لصناعة موظف؛ تفكير موظف؛ تلاقي ناس يقولوا التعليم المصري مش بينمي الابداع ؛ ما دا طبيعي هو مصمم لصناعة موظف وعامل... شخص تقوله شيل دا حطها هنا وسجل دا في الدفتر وعد كام كذا عندك...
*️⃣ المشكلة ان من بعد سنة 2000 الحكومة شالت ايديها من عالم الوظايف والمصانع وباعت القطاع الحكومي وو... فهنا التعليم فقد حتي فكرة انه عاوز يصنع موظف.. بقي مش مفهوم هو هدفه ايه.
*️⃣ لكن التعليم صنع حاجة؛ الاتكاليه عالدولة؛ احنا جيناتنا بقي فيها دا من عصر الاجداد؛ ان الدولة هي ماما وهي بابا؛ عيالك هيتعلموا من المدرسة؛ طيب متعلموش ؟ لا خلاص طالما معاه شهادة بقي متعلم... الفكرة دي كويسة لكن عيبها ان الدولة قررت متعتبرش الشعب دا عيالها؛ لا دا ابن جوزها وهي مرات ابوهم اللي مش بتحبهم... لكن المواطن لسه شايفها امه... ولسه بيقولها ماما عاوز اتعلم وعاوز اشتغل وعاوز اسعار كويسة ومرتب وو..
*️⃣ طبعا فاهم انك انتا اللي بتدفع الضرايب؛ بس خلينا واقعين؛ هي مرات ابونا وعندها عيال غيرنا... خلاص بقي نتفطم ونتعلم ازاي نعتمد علي نفسنا؛ نشوف كورسات ؛ سيبك من التعليم الحكومي الفاشل... درب عيالك بنفسك بس المشكلة اننا مش عارفين حتي ازاي... طيب نطور نفسنا؛ لا نطور ايه احنا عندنا مشكلة نكران Denial ؛ احنا مش مصدقين ان عندنا مشاكل؛ بنطبق قاعدة (أنا عيالي متربيين أحسن تربية وأحسن تعليم) اومال البهايم اللي بيعملوا بلاوي في الشوارع دول مين اهلهم.
* احنا اتبرمجنا واتدربنا نبقي موظفين ؛ موظف معتمد ع الدولة حتي في فلوسه؛ ها يا حكومة الشهادات ب كام % عشان احط الفلوس... مهواش حب ربا ولا شيء؛ هو ميعرفش غير ماما هي اللي بتختارله... ماما مرات ابوه.
