تطوير الذات 🌷، تحفيزية 🤍

١٥ فكرة لأهداف ٢٠٢٥ ♡ ١- اظبُط نومك وقوم بدري "اكتب مهامك من بليل، خلي ليك روتين صباحي، جهز فطار رايق، حط نيه انك بتقوم بدري عشان تستفيد بوقتك، واعمل ده كله ليه؟ عشان يومك هيبقي اطوَل وفيه بركه اكتر" لو معرفتِش نظم وقتك علي حسب نظام يومك، مش هنضيع عمرنا ع حِس اننا بنحاول نظبط نومنا. ٢- إقرأ كتب في مجالات مختلفه "قارئ اليوم ، قائد الغد" ٣- لو عندك موهبه طورها، ولو مافيش موهبه يبقي هدفك تكتشفها خلي عندك مرونه في التعليم والتطور، مش قادر علي كورسات، فيه يوتيوب، فيه كتب، فيه بودكاست فيه مشاهير بتنزل محتوي يفيد مجالك، متمسكش في طريقه معينه وتقف عليها. ٤- ظبَط الجانِب الديني عندك "الصلاه في ميعادها، يبقي ليك ورد قران، تنتظم علي قراءة سورة البقرة، ورد اذكار يومي، اذكار الصباح والمساء، تتعلم علوم شرعيه، تحفظ قرآن، تتعلم سيره، تقرا عن أنبياء الله، تتعلم فقه، تشترك في قنوات دينيه او بيدجات تذكرك طول الوقت بالدين وحط في دماغك ادومها وإن قل، مش بالكميه بالاستمراريه وقسم علي السنه كلها" ٥- امشي علي نظام صحي "هتظبط جسمك ونفسيتك، هتريح معدتك، شعرك وبشرتك هيتحسنوا بشكل ملحوظ" ٦- انزل جيم او العب رياضه في البيت احنا بننزل جيم عشان نطلع الطاقه السلبيه اللي جوانا، جسمنا يبقي قوي كده مش ماشي بالمراهيم وانتَ لسه في العشرينات، هتعمل شيب محترم لجسمك، وافتكر العقل السليم في الجسم السليم. ٧- مارس عادة الإمتنان هتجيب دفتر، وكل يوم هتعمل مربع اسمه مربع الامتنان هتكتب فيه كل يوم ممتن لإيه، ادي فرصه لنفسك تبص لنعم ربنا وتبقي شخص ايجابي وراضي عن حياتك. ٨- خصص كل يوم من وقتك تحمد ربنا الحاجه اللي ملهاش توقيت بتتنسي، خلي فيه وقت معين في يومك وعدد معين للذِكر والحمد من الاذكار اللي نسيناها من كتر الشكوى، عشان كده محتاجين نهتم بيها "لئن شكرتم لأزيدنكم" ٩- اتعلم لغه جديده او طور لغه حاليه عندك واللي اتعلمته مارسه في حياتك ومع صحابك، او شاركه وفيد بيه غيرك ده هيساعدك في ان المعلومات اللي اتعلمتها هتثبت اكتر بإذن الله، هات كتب صغيره وسهله للغه اللي بتتعلمها. ١٠- انوي قبل اي فعل النيه تحول العاده لعباده، خلي نواياك كلها لله، جبت هديه لحد حط نية ادخال السرور، انفق مما تحب واعزم حد علي حاجه بتحبها، نضفت البيت حط نيه اماطة الاذي عنهم، عملت شاي لابوك حط نية اطعام، مليت ازايز المياه حط نية السقيه وبر الوالدين، وعدد النوايا في كل فعل، مش بس هتاخد ثواب انتَ كمان هتلاقي نفسك حابب تعمل حاجات كنت بتنفر منها عشان تاخد الثواب. ١١- ادخِر ولو جزء بسيط حتي لو مش عايزه تشتري حاجه معينه، حتي لو هتحوشي ١٠ج، الادخار من الحاجات اللي بتربي النَفس وبتعلمها المسؤولية. ١٢- بطل تشوف بدايل للمشي احنا للاسف بقينا بنستسهل كل حاجه حتي في مشاويرنا، تكاتك ومواصلات ..الخ، المشي رياضه مهمه جدًا وفي نفس الوقت سهله، كمان اغلب الناس المهلمه قالت ان افكارها والالهام بيجيلنا أثناء المشي، فـ حاول تنتظم علي الرياضه دي ونوفر فلوس المواصلات نجيبلنا بيها مكافأه "صحيه" ١٣- اشرب مياه ايوه شرب المياه فعلًا هدف لإنه مهم جدًا لصحتك وجسمك وشعرك وبشرتك وعقلك كمان، واقرا عن فوايد شرب المياه هتتفاجئ، وعشان احنا مش متعودين علي العاده دي فـ هنحطها هدف، هنشتري ازازة مياه شكلها حلو تبقي معانا ع طول، ناخد ازازه معانا واحنا خارجين، ونحطه في متتبع العادات بتاع الشهر. ١٤- دون يومياتك التدوين من العادات اللي علماء كتير اوي شكروا فيها وقالوا انها بتحسن النفسيه وبتساعد في التطور، انت لما بتعيش يومك فيه حاجات كتير ممكن متلاحظهاش لكن مع التدوين هتلاحظ ايجابيات اليوم، وهتلاحظ اخطائك وتتعلم منها. ١٥- استغل السوشيال ميديا لصالحك السوشيال ميديا مش بس فيسبوك وانستجرام، فيه يوتيوب وده حرفيًا كنز فيه كل حاجه بندور عليها بس لو بحثنا، فيه كمان Yt music نسمع منه بودكاست واحنا في المواصلات او قبل النوم، تابع ناس ملهمه ومحتواها مفيد، اقرا مقالات في مجالك او في مجال جديد، حاوط نفسك بالناس والمصادر اللي هتساعدك تنجح وتطور من نفسك. خليك منطقي في تخطيطك، مش ضروري تحقق كل حاجه السنه دي، تريَس عشان الزحمه والضغط هيخلوك مستحيل تستمر، الاستمراية اهم من الكميه وادومها وان قل حطهم ديمًا ادام عنيك، بلاش حماس في التخطيط، الحماس في الوقت ده هيضُرك، اهدي واستوعب ان ادامك ١٢ شهر تقسم عليهم براحتك وانها سنه واحده بس مش نهاية العمر♡ لو كملت البوست للاخر، اثبت حضورك بدعوه حلوه:))

طبيعي والله تحس ان مفيش شغف ، مفيش طاقه ، مفيش حماس ، مفيش ، زهقان الحل ؟ مفيش غير الاستعانه بالله وكل الاحاسيس دي تنساها بسرعه وتحاول ف شويه تغير بسيط وارجع اشتغل باسهل شئ واكتر شئ بتتقنه وتحبه عشان دا هيرجعلك حماسك ف اي حاجه زي م قولتلك زمان شوف الدرس اللي مذاكره ١٠٠ مرة خليها ١٠١ نفسك هتتفتح علي حاجات تانية وهتدخل في المواد وتذكر تستعين بالله ف كل وقت وكل لحظه وارمي نفسك ف الحاجة.علطول بلاش ها هنام انهاردة وبكرة نذاكر جامد خليك فاكر مقوله ( عمر بن عبد العزيز ) لو ان الناس كلما استصعبوا امرا تركوه ، ما قامت للناس دنيا ولا دين فقط استعن بالله 🖤

هتفضل لحد امتى مأجل كل حاجة؟ كل يوم تقول: بكره. ومش واخد خطوة حقيقية... هتنجح إزاي بالطريقة دي؟ امتى هتاخد قرار تشتغل على نفسك، وتواجه الكسل، وتبطل تسويف؟ قوم، خُد أول خطوة، واسعى بكل قوتك... عافر، واشتغل، وهتكتشف بنفسك إن طعم النجاح يستاهل كل تعب ومجهود بذلته. ما فيش حاجة بتيجي بالساهل، بس النجاح يستاهل!

ـ المنهج خلاص اتراكم عليا، وللأسف أهداف بداية السنة راحت.. دي الجملة الشهيرة اللي بتقولها الفترة دي وإن خلاص مفيش أمل، طب أنا عندي رأي تاني لو ممكن كده نجيب كوباية الشاي أو القهوه ونسمع الكلمتين دول: - أنا مؤمن جدًا بإن الإرادة إذا عزمت وتوكلت.. يبقي تبًا للمُستحيل. - أنا بقولك الكلام من واقع تجربه والله حقيقي، مفيش مستحيل طالما قررت تبدأ. - المستحيل هيفضل ملازمك طول ما انت باصص لورا ومش بتعمل حاجة. - لكن إن قررت البدأ من دلوقتي وقررت تحط قدامك الآية {وَأَعِدُّواْ لَهُم مَّا ٱسْتَطَعْتُم مِّن قُوَّةٍۢ} صدقني النتائج هتكون مُبهرة بالنسبة ليك. هات آخرك واعمل اللي عليك في اللي فاضل من السنة، وكل ما تضعف افتكر إن ربنا عايز منك سعي. أما النتيجة فـ دي بتاعت ربنا، والمُقارانات اللي هيّدخلك فيها الشيطان اللي من نوعية: فيه غيرك يستحق لأنه بدأ من أول السنة، فيه غيرك خلّص المنهج، فيه غيرك بدأ من بدري وحقق كل أهداف السنة.. وما إلى ذلك. - كلها أفكار شيطانية الغرض منها إلهائك عن المهام بتاعتك. - اللي بدأ ربنا يكرمه، ، إنت ملكش دعوة بحد، ركز علي نفسك زي ما ربنا لما هيكرمك.. هيكرمك علي أساس سعيك إنت. لو انت فاشل زي ما بتقول مكنش الشيطان فضل ملازمك، لأنه خايف لما تقوم تكسر الدنيا وتعمل كتير. فـ بلاش تخليه ياخد الفرصة وقوم ابدأ من دلوقتي. #عافر-حلمك-يستاهل

"الصبر نهايتُه جميلَة". لكن رِحلتُه هي اللي صعبَة! فلو وجدت نفسَك صابِر وأنت في إيديك تفزَع، لو بتقول لنفسَك "أنا هصبُر والعوض على الله" تأكَّد إن ربِّنا اللي مثبِّتَك، وطالَما من عند ربِّنا، يبقي هو اللي بيسوقَك للخير. اصبر على الضلمَة اللي في حياتَك، بكرَة النُّور يحاصرَك من كلِّ مكان.🤍

"ازرع جميلاً ولو في غير موضعه، فلن يضيع جميل أينما زُرِع." > الشيخ الشعراوي كل جمعة و انتم طيبين 💙

مهم جدااااااا لطلبة 3 ث _كل اللى ف ثانويه عامه و جالهم احباط و اكتئاب الرساله هتفرق معاهم جدا و تفرحهم _انا عايزاك اول ما تقرا المسدج دى تقوم تغسل وشك كده و تنفض التراب اللى عليك ده اها التراب اللى شيطانك ملاك بيه و اللى مخليك مش شايف قدامك غير انا مخلصتش انا بضيع انا فى دروس مفتحتهاش اصلا انا مش هلحق الم حاجه ده فى غيرى خلص و راجع و بيحل امتحانات و انا فى مكانى طب هو ربنا هيساوينى ! .. الخ الخ الخ _طب صلى بينا ع النبى كده و انسى كل الاسئله و الحاجات اللى بتدور جواك دى و ركز معايا _النبي عليه الصلاه و السلام قال فيما معناه ان لو الساعه بتقوم و فـ ايدك زرعه ازرعها ..؟ ازرعها ..!! ااه ازرعها و ملكش دعوة _فـ انت لو الامتحان الصبح يبقى لسه معاك وقت تهدى فيه الدنيا لان الامتحان لسه الصبح مش محطوط قدامك حالآ . فمبالك بقا اهو الامتحان مش الصبح _ده لسه وقت كبيييييير اوى معاك تعمل كل اللى تقدر عليه و تهدى فيه الدنيا .. اقسم بالله انا ما بجاملك انا بقولك الحقيقه .. انت احسن من اللى بدأوا من اول السنه انت دلوقتى هتجاهد نفسك قوم .. ايوه قوم اقف و انت بتقرى الكلام عشان تقول لنفسك انا مش هستنى لبكره .. مفيش يأس مفيش احباط مفيش عياط بقا .. _و الله العظيم بسجده منك تسجدها لربك دلوقتى تغيرلك حياتك كلها .. ربنا قال كن فيكون يعنى مش كبيره عليه انه يشقلبلك حالك حالا ايوه ف اللحظه دى اسجد بعد متقرى الكلام من غير صلاه و لا وضوء حتى اترمى ع الارض و كلميه و فضفضله كل اللى جواك و كل اللى انت خايف منه و بعد ما تقوم من السجده دى شوف التاريخ و الساعه و قول انا هبدأ ثانويه عامه من اللحظه دى . _كل اللى فات ده و لا حاجه انا هعافر .مش هيأس .. مش هقول مش هقدر ..لو باقى ساعه هقول لنفسى لسه فاضل 60 دقيقه ع اللجنه .. وربى لو استعنت بالله حالا و ابتديت حالك كله ف لحظه يتغير .. دمعه منك لربك تبقى واحده تانيه .. و بعدها تعمل ايه _بعده تمسك قلمك و تفتح الكتاب و تقعد عليه يا قاتل يا مقتول .. و امشى بمبدأ السريع المفيد .. يعنى ايه يعنى متذاكرش بالورقه و القلم لا بقا خليك ذكي و ذاكر بسرعه_ _متخافش مش هتكروت و لا حاجه لا .. انت بقلمك الرصاص خطط ركز اقرا خبى سمع بص بصه و دارى بس كده الصفحه خلصت_ _خشى ع اللى وراها و هكذا بقا .. ربنا مش هيديك ع قد تعبك و الله ابدا ده النبي صلي الله عليه والسلام عليه افضل الصلاه والسلام قال فيما معناه برضو ان محدش هيدخل الجنه بعمله و لا حتى انت يا رسول الله ! قال و لا حتى انا .. اومال ايه هندخل الجنه بـ ايه ! هندخلها برحمة ربنا . ف اوعى تقول ف نفسك اصل ربنا مش هيساوينى باللى بدأ من اول السنه لا ربك اكبر من كده اللى بدأ من الاول دا برضو مش هيدخل امتحان ثانويه عامه بمجهوده هو ااه اخد الاجر على تعبه ده طبعا و لكن هيدخل برحمة ربنا و كرمه و ف الاخر هو هيحطك ف الكليه اللى هو كتبهالك من زمااااان الكليه اللى فيها سعادتك و هناك اللى هتشوف فيها اجمل ايام حياتك اللى انت متعرفهاش هى كليه ايه بس ربنا يعرفها طولت انا عارفه بس عايزاك تسيبك من كل العك ده و عارف تركز ف ايه ؟؟ ف انه و الله عايز يسمعهولك اقسم بالله هو اللى خلى ايدى تكتب عشان يوصلك الكلام ده انا اقل من انى اكتب كده لكن هو اللى بيبعت الكلام على لسانى عشان يوصلهولك و يفوقك بيه و اكبر دليل ان اكيد صحابك دلوقتى مثلا موصلهومش الكلام ..! _طب اشمعنا .. شوفت بقى هو عايز يوصلهولك انت .. اجرى ارفع ايدك و اعمل زى ما ربنا بعتلك على لسانى و قالك و صفحه جديده كلها امل و تفاؤل و ثقه و الله انت قدها عافر لاخر نفس ..") و طلب صغنن بقا اي حد ثانويه عامه عندك ابعتله المسدج دي بنيه ان ممكن كلمه تفوقه بنيه ان الدال ع الخير كفاعله بنيه ان حب لاخيك ما تحبه لنفسك بنيه انك تكون سبب انك تمسح تراب اليأس من على صحابك بنيه التوفيق من عند الله بنيه النجاح ليا ولاصحابى و حط نوايا تانيه كمان من عندك

• نصائح لطلاب الثانوية العامة ️ ❤️ ⛔ذاكر عشان مفيش حد يشمت فيك . ⛔ذاكر عشان يوم النتيجه ماتعيطش و تخذل أهلك. ⛔ذاكر عشان حلمك اللي تعبت عشانه كتير و لسه هتتعب. ⛔ ذاكر عشان ابوك اللي بيجيب لك فلوس دروسك وكتبك بطلوع الروح. ⛔ذاكر عشان أمك اللي مستنياك تبقي حاجه كويسه وتفتخر بيك. ⛔ذاكر لأن اللي وصلوا مش افضل منك ولا كان عندهم حاجة زياده عنك الموضوع كله إصرار و عزيمة. ⛔ذاكر عشان نفسك ⛔ذاكر عشان ماتندمش. ⛔ذاكر عشان تفتخر بنتيجة تعبك وسهرك ومجهودك . ⛔ذاكر عشان مترجعش تندم على الأيام اللى بتضيعها . ⛔ ذاكر لأن أهلك محتاجين يفرحوا . ⛔ذاكر عشان مستقبلك . ابعد عن الناس اللي بيدوك طاقه سلبيه انت مش غبي ولا فاشل، اكسر عينهم بنجاحك واعرف انك قدها خلي عندك يقين في ربنا وفي قدراتك، انت تقدر اجتهد .. حاول .. عافر ربنا يوفقكم جميعا وتفرحوا اهاليكم ♥

طبيعي انك تبقي خايف لو هتاخد خطوة جديدة و تعمل حاجة عمرك ما عملتها قبل كده متخليش الخوف يسيطر علي تفكيرك، حاول تبدله بالتفكير في النتيجة اللي هتحصل لما تعمل الحاجة الجديدة دي. الشجاعة مش انك تعمل الحاجة و انت مش خايف. الشجاعة هي انك تعمل الحاجة بالرغم من خوفك. 💪🏾💙

أيَّا فتىِ! جِئتُ لأُخبِرك؛ أنَّ الحياة لا تَسيرُ علىٰ وَتِيرةٍ واحِدة. إِن كان يومُك مُتعِبًا، شديد الغِلظَة، ليسَ مُؤكدًا أن يكون غدًا أيضًا كذلِك! فلا تأسىٰ مِن طولِ الطريق، ولا تحزن لعناء السَير، فالأيام ليست ثابِتة إِنما هي بين يدي الله يُقلِبُها بين عِبادِه كيفما يشاء، فلا تخف وأمرُكَ بين يدي الله!

الانتقاضات هي جزئ من المشوار. ماتزعلّش نفسك لما حد ينتقدك و متخليش كلامه يوقفك…. اللا لو انت بتعمل حاجه انت عارف من جواك انها غلط 😉

اي علاقه بدايتها لا ترضي الله نهايتها لن ترضيك 🤍✨️

صباح الخير.. بدايةُ نجاحِك في الدنيا والآخرة؛ أن تُعيد ضبط بَوصلتك بجَعْل الطاعات أول الأولويات، إذا فاتك شيءٌ منها تفزع كأنه فاتَك شيء دنيوي، كامتحان في دراسة أو مقابلة مهمة، أو ميعاد قطار أو طائرة. تَخيل إذا نمت ليلة امتحان، واستيقظت فوجدت الوقت قد فات، أو فاتَكَ ميعاد طائرة وهكذا، ماذا سيكون شعورك؟! هذا الشعور لو تَملَّكك عند ضياع الصلوات -والفجر خاصةً- أو  ورد القرآن والأذكار؛ فأبشِر بخَيرَي الدنيا والآخرة.💖

هتفضل كسلان كده لحد إمتى؟! قوم بقى.. غير مكانك.. واتحرك.. واملأ الدنيا كلها نشاط ونجاح.

اقول لأولادي اللي بيقولوا الدراسة صعبة ( خصوصا ثانوية عامة) اقرأ د أحمد خالد توفيق بيقول ايه يمكن تفهم حاجات كتييييييييييييييير يقول د أحمد خالد توفيق: في رحلة ريفية رأيت مجموعة من أصدقائي يلعبون لعبة سخيفة: علقوا زجاجة مياه غازيه فارغه بحبل على غصن شجرة وجعلوها تتأرجح كبندول الساعة، ثم راحوا يصوبون عليها بالبندقيه من مسافة بعيدة نسبياً.. دنوت منهم وقررت أن اجرب ما هذه؟ بندقية؟ كيف تطلقون بها؟ ما المطلوب بالضبط ؟ إصابة هذه الزجاجة؟ دعوني أجرب.. وضغطت الزناد بلا تفكير لتتناثر شظايا الزجاجة في كل أتجاه ويشهق اصدقائي ذهولاً.. عرفت فيما بعد أنهم يحاولون منذ ساعة وأن ثلاثة منهم حاصلين علي جوائز في الرماية لكنهم فشلوا ! لو كنت أعرف هذا كله مسبقا لفشلت حتماً.. شجاعة الجهل.. لولاها لما فعلنا أي شئ، لأننا نتوقع الفشل من البداية.. لهذا لم أندهش عندما قرأت عن ذلك الشاب الأمريكي الذي دخل قاعة المحاضرات متأخراً فوجد علي لوح الكتابة معادلة غير محلولة. نسخها وافترض ان هذه هي واجبه المنزلي.. وهكذا عاد لداره وسهر حتي أتم حل هذه المعادلة وقدمها لاستاذه في اليوم التالي أصيب الأستاذ بالذهول، وطلب الفتى ليخبره بالحقيقة: هذه المعادلة لاحل لها أو هكذا اعتبر أساتذة الرياضيات عبر التاريخ ، وقد كتبها الأستاذ علي لوح الكتابة كنموذج للمعادلات مستحيلة الحل.. الطالب الذي لم يعرف هذه الحقيقة حلها في ليلة واحدة ! هنا .. يجب أن نتحلي بشجاعة الجهل ولا نفكر في مدى صعوبة ما نحن بصدده، ولا بعدد من فشلوا قبلنا.. هذه هي الطريقة الوحيدة الممكنة للنجاح، أما لو حاصرتنا أشباح المخاوف قبل أن نبدأ فلسوف تخرج تلك الكلاب السوداء المفترسة لتمزقنا قبل ان نخطو خطوة واحدة ! - عن شجاعة الجهل — د. أحمد خالد توفيق💙🌷

تتبروز 📌 👌🏻 مع الوقت يا عزيزي هتكتَشف إنّ جَمدانك في "سُكوتك". اللي عاوز يدخل الشارع قبلك سِيبه.. اللي عاوز "يثبت" إنُّه أشطر منك سِيبه.. اللي عاوز طول ما هو قاعد يفتي ويحكي قصص "وهمية" سيبه.. اللي عاوز يقول أنا "الأقوى" سِيبه.. اللي عاوز يقول أنا اللي "عملت" سِيبه.. واللي عاوز يحكي عنك "وحش" سِيبه. طول ما أنت "واثق" أنت إيه؛ افرد ضهرك واقعد ساكت تمامًا.. "إتفرج على الفقرة فقط" ! لأنّ مُحاولة حتى إثبات ذاتك فيها "تقليل" من شأنك.🤏🏻 منقول