ملخصات ليالى الامتحان إنجلش

محدش يذاكر قصة الانجليزي يا جماعه انا هحكيلكوا عنها في ولد صغير اسمه فيليب بيريب م الآخر هنسميه *بيب* كان والدته وولده متوفين وعايش مع أخته وجوزها السيد جو.. اخته كانت قاسيه جدا شوقي فتح الله في نفسها في يوم راح المقابر يزور اهله وكان هناك أجواء مخيفه اللي بنشوفها ف افلام الرعب دي وفجاءة طلع شخص من ورا القبر شكله مجرم ومتكلبش مسك بيب من كتفه وسأله عن اسمه ومكانه وعايش مع مين المهم بيب المغفل قال كل حاجه وان جوز اخته حداد قاله بكره تجيبلي مبرد بيقطع الحديد واكل وخمره والعياذُ بالله وهدده أنه لو قال لحد هيقتله وصل البيت اخته ضربته وكان بيب وسيد جو بيخافوا منها هما الاتنين وبعد كده حطيت ليهم الاكل عشان ياكلو فاجأه سمعوا صوت ضرب نار سأل بيب ايه ضرب النار ده قالوله في مجرمين هربو للمستنقعات صحي الصبح خد الاكل وراح في طريقه شاف واحد تاني قاعد متكلبش ومتعور وصل للمجرم اللي عند القبر واداله الحاجه ..اليوم خلص وكان ليله عيد وفي ناس معزومه وكان بيب قاعد خايف من اخته عشان الاكل اللي اختفي وفجاءة جري يفتح الباب لاقي بحاره وظابط 💂🧑‍✈️داخلين يصلحو الكلبشات ويسألوهم لو شافوا حد منهم ومشي بيب وجو معاهم يدورا علي المجرمين ...ليلة سقوط المجرمين😂 لاقو الاتنين اللي شافهم بيب مسكين في بعض واتقبض عليهم أثناء ما واخدنهم للسفينه اللي تعتبر السجن كان بيب بيبص للراجل وبيهز راسه انه مش هو اللي اعترف عليه وفنفس الوقت الراجل شكر جو وقاله هو اللي سرق الاكل من بيته ...السيد جو كان راجل محترم جدا جدا اطيب من بهاء سلطان .. تمر الايام وبيب يبتدي يتعلم ويروح مدرسة القريه وكان في واحده هناك اسمها بيدي صغيره في السن كانت بتعلمه وكان نفسه يبقي gentleman 🤵.....وفي يوم من الايام عم السيد جو اقترح إنه ياخد بيب لواحده اسمها السيده هاڤشيم اغني سيده في القريه الملعونه اخته وافقت عشان الفلوس وراح لاقي امرأة معقده كبيره في السن بسبب اخوها اللي كان عايز ياخد ورثها بعد ما صرف كل فلوسه وكانت مخطوبه لواحد سابها يوم فرحها الوااطي وكان متجوز ومتفق مع اخوها يشتغلوها وياخد الفلوس كانت دايما قاعده في اوضة قديمه كئيبه ولابسه فستان فرح👰 كان عندها ساعات متعلقه وواقفه عند نفس الوقت اللي خطيبها سابها فيه المهم وكان عندها بنت اسمها استيلا متربتش طلبت السيده من بيب يلعب مع استيلا وكانت استيلا متكبره ورخمه وبعد ما بتلعب معاه بترميله الاكل في الأرض وبتقفل الباب في وشه وبيب كان بيعيط وهي كانت بتضحك لما تشوف دموعه فضل يتردد فتره علي بيت السيده ڤانشيم واستمر الوضع دا فتره