وِصال

‏يا أبو وجهٍ على شانه يدق من الغلا ما جل ‏ترى لولاك ما سقت القصايد في متاهاته ‏فداك العمر وأحداث الزمن والمشكلة والحل ‏وقلبٍ ما يعرف من الغزال .. إلا تلفاته ‏أنا من شاف وجهك يا حبيبي في وجيه الكل ‏وفزّت روحه لضحكة عيونك قبل خطواته

‏عزيزة نسب وأطهر من الدين التواب ‏رفيعة مقام هان عمري ولا هنتي ‏تمرّين و يصير السماء خيرها صباب ‏و تزين الأراضي كل ما أنتي تزينتي ‏فداك الشعر و الناس و الحلم و الأحباب ‏و أنا و السنين المقبله وين ما كنتي

‏على البال لك طاري و لك فالحشاشه بيت ‏على مستوى ماهوب مهجور و مهمل

‏اللي حلاها غير و أسلوبها غير ‏ماغيرها فالوقت عيني رجتها ‏غيدًا تتل القلب من غير تبرير ‏ حتى بنات الفكر غصب سهجتها ‏تربعت فالجوف حشمه و تقدير ‏مال المشاعر عذر يوم سهجتها ‏متميزه بالزين حسب المعايير ‏ من حدّ ماطاها لفوق رقبتها

‏و لا فيه أحد يقدر يخليني .. أخليك ‏لو يضيع عمري في رجاك العمر ملحوق ‏- مزيد الوسمي

يقولون العرب « خطأ المملوح مدموح » و بصورة شاعرية قال سعد بن جدلان « زلة اللي يوده القلب مدموحه و دايمٍ حبه يغطي عذاريبه »

‏حتى لو أرحل من بلاد إلى .. بلاد ‏وأستشفي من جروح ماقبل الرحيل ‏غلاك يا أغلى من عرفت من العباد ‏إن طال عمري والله إن عمره طويل

‏كل الغنادير في كفه ‏وانتي على مرقبٍ عالي ‏لو دونك القوم مصطفّه ‏ماحركوا ميلة عقالي

‏إن كان في زين الصبـايا أماره ‏فـ أنتي أميـرة زين و أميـرة شيـوخ ‏و إن كان في عقل العذارى شطـارة ‏فـ أنتي فكر فـاتن و راهـي و مطنوخ

‏يا ملاقيف السوالف لاتجونه ‏أنشدوني واخذوا العلم الوكادي ‏الحبيّب يستحي لا تحرجونه ‏أرفقو بصويحبي غاية مرادي ‏يدري إنه مالك القلب وركونه ‏ويدري إني هايمٍ في كل وادي

‏رمشٍ فاترٍ لاسلهمت به كن ماله حيل ‏كسى عينٍ تشادي عين حرٍ تلّ مسباقه ‏سماها طيب أهلها نجمةٍ بين الجدي وسهيل ‏يلوق لها الفخر وجدودها حمّاية الساقه ‏جدودٍ يتبعون ويفزعون ويذبحون الحيل ‏قبل وقت الرخا يوم الفقر والجوع والفاقه

‏عفيـفه وتجذب كـل الأنظار كنّـها نـجـد ‏وهـي مـن قـبايل نـجـد وأطيب قبايلهـا

منطوقها مايقول الا الكلام الجميل ‏و لو خانها إلسانها صح الله إلسانها ‏جميلة الوجه سوت فـ المحاني جميل ‏من يوم صارت تشوف القلب بستانها

‏شالعٍ قلبــي غزالٍ وسط نجد مرفه ‏مترفٍ يلعب بعرشه في وطن محبوبه ‏الحياء والوصف الأعظم والستر والعفه ‏و الجمال الباذخ النادر و حسن أسلوبه ‏قوةٍ كنها جيوشٍ فالوغـا مصتفـه ‏من طلايعها الجحافل تنثني مغلوبه ‏جاعله ربـي بكفـه و البنات بـكفـه ‏ومايضاهي حسنه الطاغي ولا رعبوبه

رموشها حد السيوف الرهايف ‏مقرونة الحاجب وطلقة محيّا ‏وجديلها يا قلب وش أنت شايف ‏ليلٍ يزيد اللي غيا فيه .. غيّا ‏وخدودها بين الهدب والشفايف ‏مثل السحب بين الثرى والثريا

‏الشدايد لعبة كبار الاشدّه ‏والزمن فتاك والغافل يعاني ‏لو تهادى بين لين وبين شدّه ‏ما لـ راعي الوجه الابيض وجه ثاني ‏البشر يظهر مداها بعد مده ‏لا تغرك في الرخا روح التفاني ‏ماتخفيه الصدور سنين عدّه ‏تكشفه بعض المواقف في ثواني