فزّز الماء عرق عودك، وعودك ما ثناه ‏غير شعرٍ سيّل الماء على العرق الندي ‏تطرق عيونك معانيه، وتشدّك سماه ‏لين صرت انت اتجاهي، وضيّعت الجدي ‏القصيد إن زل دربك، ترى ماله طراه ‏أي بيتٍ ما يجي فيك، ماهوب اجودي ‏اعرفك منفى قصيدي وسدرة منتهاه ‏ما كتبتك حرف، كاتبك من دمع أبجدي ‏من ضما لك ماقطع طول مشواره ضماه ‏يلمح طيوفك على وجنة الصبح تعدّي ‏إن سرى يطرد ورا الليل، ما عيّن ضياه ‏وإن تودّد لك من البعد، ما قلت: ابعدي ‏لا يهمك طول دربي وأنا خابر شقاه ‏وانت يا لولا شقى الدرب، ما شفت سعدي ‏نْتفرق في سبيل المشاغل والحياه ‏ونتجمع تحت سقف البساط الأحمدي ‏كل ما اجي لك غريقٍ يبي طوق النجاه ‏احتضني مثل ما يحضن الخير بلدي ‏قاريٍ فـ عيونك اللي محد غيري قراه ‏حزةٍ طاحت دْموعك على راحة يدي ‏ما تغيبك المسافة على كل اتجاه ‏كل لحظة غازي البال، كنّك معتدي ‏وكل صبحٍ طل نوره بدونك، وش وراه؟ ‏غير هقوات المعنّى، وليلٍ سرمدي ‏دعوةٍ تاقف على قولة: إيه، وقولة: آه ‏يمكن إن طارت من الأرض، روحي تهتدي ‏كثر ما ضمّيتها في كلامي، والصلاه ‏عشت في لحظة وفاتي، ولحظة مولدي ‏ما تمنيتك رفاهية، أحتاجك رفاه ‏لا فقدتك من يديني انا وين اغدي ؟ ‏الله اللي يعطي الشي ، والله لا خذاه ‏لا يوقف بيني وبينك الحظ الردي ‏كان جا لك بنت تنسيك لوعات الحياه ‏يمكن أخطبها على سنة الله لـ ولدي - فهد بن بجاد

1 706

صبحكم الله بالخير 🤍:)