Al Qalam School

SQ𝟑R የጥናት  ዘዴ ◾️የSQ3R የጥናት ዘዴ: ተማሪዎች በመማሪያ መጽሐፋቸው ውስጥ በጣም ጠቃሚ መረጃ የሆኑትን እንዲለዩ እና  እንዲይዙ የሚያግዝ የማንበብያ ቴክኒክ ነው። ◾️ SQ3R (ወይም SQRRR) የንባብ ግንዛቤ ሂደት አምስት ደረጃዎችን የሚያመለክት ምህጻረ ቃል ነው። ⓵ S- Survey: ሙሉውን መጽሐፍ ከማንበብ ይልቅ የመጀመሪያውን ምዕራፍ በመዝለል እና በምዕራፉ ስር በተካተቱ አርእስት፣ ንዑስ ርዕሶች፣ ምስሎች ወይም ሌሎች ጎላ ያሉ ባህሪያት ላይ ማስታወሻ በመያዝ መጀመር። ⓶ Q- Question : በምዕራፉ ይዘት ዙሪያ ጥያቄዎችን መፍጠር። ለምሳሌ:- ይህ ምዕራፍ ስለ ምንድን ነው? ስለዚህ ጉዳይ አስቀድሜ የማውቀው ነገር ምንድን ነው? ⓷ R-Read : ሙሉውን ምዕራፍ ማንበብ መጀመር ከዚያም ከላይ ለፈጠርናቸው ጥያቄዎች መልስ መፈለግ። ⓸ R - Recite: አንድን ክፍል ካነበብን በኋላ ያነበብነውን በራሳችን ቃላት ማጠቃለል። ዋና ዋና ነጥቦችን ለማስታወስ እና ለመለየት መሞክር እና ከሁለተኛው ደረጃ ማንኛውንም ጥያቄዎች መመለስ። ⓹ R - Review : ምዕራፉን ከጨረስን በኋላ ሙሉ በሙሉ ለመረዳት ጽሑፉን መከለስ አስፈላጊ ነው። በመጨረሻም ከላይ በፈጠርናቸውን ጥያቄዎች እራሳችንን መጠየቅ እና በተጨማሪ ማንበብ ያለብንን ወይም የምንፈልገውን ማንኛውንም ክፍል እንደገና ማንበብ ነው።

አባት-የለሽ ቤት ለወላጆች . . . አባት በተለያዩ ምክንያቶች እቤት ውስጥ በማይገኝበት ጊዜ ሁኔታው በወንዶች እና በሴቶች ልጆች ላይ አሉታዊ ተጽእኖ አለው፡፡ የሴቶቹ ልጆች ይቆይልንና ለዛሬ ስለወንድ ልጆች እናውራ፡፡ አባት ለልጆቹ እቤት የማይገኝባቸው ምክንያቶች በርካታና የተለያዩ ሊሆኑ ይችላሉ፡፡ •  በስራ ብዛት እቤት የማይገኝ አባት፣ •  ከስራ በኋላ ከጓደኞቹ ጋር በማሳለፍ ውሎ የሚያመሽ አባት፣ •  በጊዜ እቤት ቢገባም እንኳን በስልክና በማሕበራ ሚዲያ ላይ ከማሳፉ የተነሳ ለልጆች ጊዜ የሌለው አባት፣ •  እቤት እያለ ቸልተኛ የሆነ አባት፣ •  በተደጋጋሚ በስራ ምክንያት ለቀናት የሚወጣ አባት፣ በልጆቹ ሕይወት ላይ ተሳትፎ ማድረግ የማይፈልግ አባት . . .፡፡ አንድ ወንድ ልጅ ከአባት መገኘት፣ ትኩትና ሚና ውጪ ሲያድግ ግልፍተኛና ኃይለኛ (aggressive) ወደመሆን ያድጋል፡፡ ይህ የሚሆንበት ምክንያት ያንን ባሕሪውን መስመር ሊያስይዝ የሚችለው ስልጣን ያለው አባት ጋር ስለሆነና አባት ያንን ስልጣኑን ችላ በማለቱ ምክንያት ነው፡፡ ወንድ ልጅ የአባትን ሚና ሲያጣ ከግልፍተኛት በተጨማሪም ከማይሆኑ ሰዎች ጋር የመጣመር ዝንባሌ ይኖረዋል፡፡ ይህ የሚሆንበት ምክንያት ከአባቱ ትክክለኛውን ስልጣን ስለማያገኝ በውስጡ ያለውን ስልጣን የመፈለግና ለስልጣን የመገዛት የተፈጥሮ ሁኔታ ለማርካት የስልጣን ተዋረድ ያለበትን ስፍራ ስለሚፈልግ ነው፡፡ ለዚህ ነው ከላይ በተጠቀሱት ሁኔታዎች ምክንያት አባት-የለሽ ቤት ውስጥ ያደጉ ልጆች በአንዳንድ በሱሰኞች፣ በመንገድ ጉልበተኞች፣ በወሮበሎች ቡድን (gangs) የመሳሰሉት ቡድኖች አጉል ተጽእኖ ስር የሚወድቁት፡፡ እቤት ያጡትን ስልጣን እዚያ ያገኙታልና፡፡ አባቶች!!! ስለወንድ ልጆቻችሁ የወደፊት ስትሉ እቤታችሁ ተገኙ፤ የአባትነትን ሚና ተጫወቱ! ወንድ ልጃችሁ የወንድነትን ሚና ለመጀመሪያም፣ ለመጨረሻም ጊዜ የሚማረው ከእናንተ ብቻ ነው፡፡ ወንድ የትክክለኛ ባልን ምንነት ለመጀመሪያም፣ ለመጨረሻም ጊዜ የሚማረው ከእናንተ ብቻ ነው፡፡ ወንድ ልጃችሁ የስልጣንን ምንነት ለመጀመሪያም፣ ለመጨረሻም ጊዜ የሚማረው ከእናንተ ብቻ ነው፡፡ የእናት አስፈላጊነት በልጆች አስተዳደግ ውስጥ እናት ያላት ድርሻ ጡት ከማጥባት ያለፈ ነው፡፡ እናት በልጆች ሕይወት ውስጥ በማትገኝበት ወይም እያለች ያላት ተሳትፎ ግን አናሳ በሚሆንበት ጊዜ በልጆቹ የስነ-ልቦናና ማሕበራዊ እድገት ላይ ትልቅ ቀውስ ይፈጥራል፡፡ ከእናት ውጪ ያደገች አንዲት ሴት ከሁኔታው ተገቢውን ፈውስ ካላገኘች ለበርካታ ቀውሶች ልትጋለጥ ትችላለች፡፡ ከእነዚህ ቀውሶች መካከል የሚከተሉት ይገኙበታል፡- ድፍረትን ማጣት፣ ሰዎችን ማመን አለመቻል፣ የቀይ መስመርን (personal boundary) ለማስመር ያለመቻልና የሁሉ አስደሳች የመሆን ዝንባሌ፣ በራስ ላይ ያለ የተዛባ እይታ፣ ራስን ከሰዎች ማግለል፣ የስሜት ስስነትና በማይሆን ፍቅረኛ ላይ መውደቅ፡፡ ከእናት ውጪ ያደገ ወንድም ጉዳዩ ይለከተዋል፡፡ የእናት መገኘትና አለመገኘት በወንድ ልጅም ላይ እስከ መጨረሻው የሚዘልቅ አሉታዊ ተጽእኖ አለው፡፡ እንደ እውነቱ ከሆነ ወንድ ልጅ የመጀመሪያውን አሉታዊም ሆነ አዎንታዊ ተጽእኖ የሚቀበለው ከእናቱ ነው፡፡  አንድ ወንድ ወደዚህች አለም ከተቀላቀለ በኋላ በሕይወቱ ለመጀመሪያ ጊዜ የሚያውቃት ሴት እናቱን ነው፡፡ ስለሆነም ከእናቱ ጋር ያለው የልጅነት ትውስታና ግንኙነት ወደፊት በሴቶች ላይ በሚኖረው አመለካከት ላይ ዘርን ጥሎ ማለፉ አይቀርም፡፡ በእናቱ አማካኝነት የደረሰበትን የመጣል፣ ችላ የመባልና የመሳሰሉት ባህሪዎችን ወደፊት በሚኖረው ግንኙነት ውስጥ የመፍራትን ዝንባሌ ሊያዳብር ይችላል፡፡ በእናቱ “በርታ” ተብሎ ያደገ ልጅና ያንን ሳያገኝ ወይም ተቃራኒን ሰምቶ ያደገ ወንድ ይህ ልምምዱ ወደፊት ከሴቶች ጋር በሚኖረው ግንኙነት ላይ የሚጫወተው ሚና ቀላል አይሆንም፡፡ አንዳንድ የእናትን ጣእም ሳያገኙ ያደጉ ወንዶች ፍቅረኛ ወደመያዝ ደረጃ ሲደርሱና በዚያ መስክ ሲሰማሩ ሳያውቁት ያንን በልጅነት ያጡትን የእናትነት ምስልና እንክብካቤ ፍለጋ ከእድሜያቸው በብዙ ወደሚበልጡ ሴቶች የመሳብ ዝንባሌ ሊኖራቸው ይችላል፡፡ ሆኖም፣ የዚህን ዝንባሌና ተጽእኖ የሚያዩት በትዳር ውስጥ ከቆዩና የእድሜ ልዩነቱን በግላጭ ማየት ሲጀምሩ ነው፡፡ ከላይ በጥቂቱ ለመጠቃቀስ የሞከርናቸው ሃሳቦች የአባትንና የእናትን ተገቢ የሆነ ግንኙነት፣ ፍቅር፣ እንክብካቤና ሚና ሳያገኙ ያደጉ ልጆች ሊጋፈጧቸው የሚችሉትን ሞጋች ሁኔታዎች አመልካች ናቸው፡፡ እነዚህ ልጆች አድገው ወደ ወጣትነት፣ አልፎም ወደ አዋቂነት ሲሻገሩ ከተቃራኒ ጾታ ጋር ያላቸውን ግንኙነት በምን አይነት ቅድመ-ምልከታ እንደሚቀርቡት የሚወስንላቸው ይህ በልጅነታቸው አመታት ቀምሰው ወይም ሳይቀምሱ ያደጉት የቤተሰብ ጣእም ነው፡፡          ከዶ/ር እዮብ ማሞ