BAC 2024

الحمدلله لي قدرني باش نكون معاكم حتى النهاية 🤲 يشهد الله أنني قدمت واش نقدر و أعتذر لأي شخص ما شفتش رسائله، ولا ما قدرتش نساعده 😔 ها نحن في نـهاية الرحلة 💔

🟥 شعبة علوم تجريبية + رياضيات : ✅️ ما تدخلش غدوة الفلسفة بلا هادو : ✓ اليقين الرياضي ✓ العلوم الانسانية ( خاصة علم النفس ) ✓ الفرضية ✓ التجربة ✓ مقارنة بين العلم والفلسفة ✓ الشعور ( علاقة الأنا بالآخر ) 🟥 شعبة تقني رياضي + تسيير : ✅️ ما تدخلش غدوة الفلسفة بلا هادو : ✓ البيولوجيا ✓ العلوم الانسانية ✓ الفرضية ✓ المذاهب

- بالنسبة لمادة الفلسفة : • راجعو المقالات لي كتبتوهم من قبل ولا مقالات الاساتذة تاعكم ✅ • راجعو الأقوال و أسماء الفلاسفة و الأنصار تاع كل موقف ✅ • راجعو المنهجيات ( جدل - استقصاء - مقارنة .. ) ✅ • راجعو الحجج و الأمثلة لي تقدرو توظفوها في كل موقف ✅ غدا في الفلسفة كي تختارو الموضوع و تجو تكتبو المقالة تاعكم فالمسودة ديرو المخطط تاعها و ديرو العناصر لي راح تهدرو عليهم في المقالة و نظمو المنهجية لي راح تخدمو بيها هذا كامل فالمسودة و من بعد و اكتبوها في عقلكم باش ما تنساو والو و الوقت يكفيكم largement و ما تضطروش تشطبو بزاف ✅

☆ إختيار الموضوع : في الفيزياء على غير المواد لوخرين تحسو بلي كاين فرق واضح بين الموضوعين في السنوات الاخيرة، يا يجي واحد طويل على واحد، يا يجي واحد أسهل من واحد .. • ما تدخلوش غدوا بأفكار مسبقة، تاع انا نخير الموضوع لي فيه النووي ولا ما نخيرش الموضوع لي فيه القذيفة • اقراو الموضوعين مليح حتى آخر سؤال، ما تسوطيو حتى سؤال • عشرين دقيقة كافية لاختيار الموضوع برأيي، و اذا كنتو قاريين المادة مليح راح تقدرو تعرفو à peu près وينهم تمارين راح يدولكم الوقت اكثر

☆ عموماً كي تجو تحلو التمرين : - اقراو السياق تاع التمرين بزاف مهم و لونوو ولا سطرو على الكلمات المهمة كيما " مزيج إبتدائي متساوي المولات "، " قمر إصطناعي مستقر أرضياً "، هادو راح يذكرهم فالسياق و هوما مفتاح الحل - المعطيات اللي يمدهالك في سياق التمرين لونهاا في الموضوع باش كي تكون تحل ما تبقاش تحوس عليها من جديد بعينيك - اكتبو الحاجات المهمة كيما قلتلكم المرجع المعلم الـجملة و تمثيل القِـوى و الحاجات هادو راح يسهلو عليكم بزاف و قادر يكون عليهم تنقيط - قادر يكون سؤال يـخدِم السؤال اللي بعده ،، سماا ركز مليح - كي تكون عندك عبارة ولا قانون، حتى تبسطها و تكمل باش تدير التعويض العددي، من جهة قادر تحتاجها في سؤال آخر و من جهة أخرى ما تبقاش تكتب الارقام من الاول هوما كي يجو يصححو لازم يلقاوك كانب العبارة و من بعد داير تطبيق عددي و من بعد داير النتيجة - النتائج راجعوها مليح و عاودو احسبوها مرة و اثنين و ثلاثة و ديرو بالكم تنساو الوحدات ولا حاجة، اذا كانو كاش تحويلات درتوهم اكتبوهم ما تنساوهمش

⁃ 1️⃣ المتابعة الزمنية : لازم تنتبهو للوحدات و المعادلة تع التفاعل بزاااف مهمين + الكلمات المِفتاحية مثل : تفاعل ستكيومتري، إضافة وسيط .. ⁃ 2️⃣ الميكانيك : لازم تحددو المرجع و المبدأ اللي راكم تخدمو بيه و تكتبوهم في إي تمرين حتى بلا ما يطلبهم منكم + لازم كذلك تنتبهو اذا قال لكم نوع الحركة ولا إتجاه المحور ولا اي معطيات أخرى + لازم تعرفو المعادلات الزمنية و ما تغلطوش فيهم ⁃ 3️⃣ كهرباء : لازم تراجعو كيفية تطور جميع المقادير بدلالة الزمن + المعادلات التفاضلية + تعرفو إتجاه التيّار و طرق مختلفة لإستخراج ثابت الزمن و طرق استخراج عبارات الثوابت تاع المعادلات التفاضلية لأنها تتكرر بزاف و هكا ما راحش تديلكم الوقت غدوا ✅ ⁃ 4️⃣ تطور جملة كيميائية .. : راجعو العلاقات باش تتخلطوش بينها و بين الوحدة الأولى، و لازم تعرفو تقريباً الحالات الواردة تاع المعايرة و المجالات تع القيم تع ثوابت التوازن باش اذا غلطتو تفيقو لرواحكممم ✅ ⁃ 5️⃣ الأسترة : راجعو الدرس مليح و خاصة في وحدة الاسترة، لأنو معلومات الدرس راح تـفيقك اذا غلطت في كاش حاجة و راجعو كيفاه تديرو التسميات تاع المُركبات الكيميائية " أسترات - كحولات - أحماض كربوكسيلية " + انواع الكحولات و الدلائل تاعها و كذلك ما تنساوش تقراو التفاعل المعاكس للأسترة ( اماهة الاستر ) ✅ - 6️⃣ النووي : نفس حكاية الكهرباء، راجعو تاني كيفاه تكتبو المعـادلات + التطورات البيانية و كيفاه تجي + التأريخ بالإشعاع ✅

🟥 الفيزياء : • راجعو الملخصات تاعكم مليح و اقراوهم و نتوما مركزين و حاولو تسترجعو معاهم الدرس ✅ • راجعو افكار التمارين اللي حليتوهم و لا داعي لحل تمارين جديدة ✅ • راجعو الأسئـلة النظرية ✅ • راجعو البروتوكولات التجريبية و الرسومات التخطيطية هادوك كيما تاع المعايرة و .. ✅ • راجعو القوانين مليح و المعادلات التفاضلية ✅ • راجعو خطوات الحل و الأمور اللي لازم تتكتب في كل تمرين ،، مثلاً : ميكانيك >>> لازم تكتب الجملة و المرجع و المعلم كهرباء >>> لازم الدارة و تمثل عليها التوترات و إتجاه التيار .. هادو حاجات يندارو قبل ما يتحل التمرين حتى ولو ما طلبش منك ديرهم • راجعو الحاجات لي كنتو تغلطو فيهم بشكل متكرر ✅

☆ في المقال : - المقدمة : مادابيك ما تديرش تعريف، خليها حاجة بسيطة تكون عبارة عن تمهيد للموضوع لي راح تجاوب عليه + ما تنساش طرح الإشكال و علامة الاستفهام ديرها - العرض : راح تكتب على شكل عناصر نورمالمون هادي علابالك بيها ؟ و لازم يكونو 6 عناصر في كل سؤال و اذا قدرت تزيد آكثر زيد بصح ابدا بالعناصر لي تكون متأكد منهم مليح و يكونو شغل عندهم قوة و أهمية اكبر، و الباقي خليهم للأخير و اذكرهم بصح لازم يكونوا على الأقل ستة و مام هادوك ستة و اشرحهم شغل ماشي يسقسيك على أسباب الحرب الباردة تكتبلو مثلاً " الاختلاف الايديولوجي " و تحبس على الأقل كمل و قول الاختلاف الايديولوجي بين أنظمة المعسكرين الشرقي و الغربي، شغل جملة مفيدة و كاملة - الخاتمة : حوصلة حول الموضوع او استنتاج يعني اجمع بين السؤالين لي قبل و أكتب استنتاج خفيف عليهم ولا ..

🟥 أخطاء ملازمش ديرهم ✅️ : ☆ في التواريخ : زعما يكتبلك التاريخ و يقولك سم الحدث لي صرا فهذاك التاريخ، اكتب اجابة كاملة، مثلاً : يقولك واش صرا في 24/10/1945 هنا علابالي كامل تعرفو بلي تأسيس هيئة الامم المتحدة ياك ؟ بصح نتوما تكتبو هيئة الامم المتحدة ❌️ بينما انت لازم تكتب " تأسيس هيئة الأمم المتحدة " يعني لازم كلمة تأسيس ولا يقولك : 12/03/1947 هنا لازم تكتب " الإعلان " عن مبدأ ترومان ماشي تكتب " مبدأ ترومان " وحدها و تخرج ❌ ☆ في الشخصيات : ماذابيك تذكر شحال من عمل لهاذيك الشخصية ثلاثة اربع اعمال ولا، ماشي دير زوج برك !! علاش تبخل ؟ ياك قريت عام كامل مشي باش تكتب إجابات ناقصين اكتب على الاقل ثلاث اعمال باش تضمن النقطة تاعك و طبعاً فترة الحكم ولا الوفاة لا داعي لها

مثال : يقولك عرف " الكِفاح المسلح " - ماهو ؟ أسلوب مقاومة، من اسمه تعرف بلي تستعمل فيه القوة .. يعني اسلوب مقاومة يقوم على القوة باستعمال السلاح ✅ - من أتى به ؟ الجزائر ولا الشعب الجزائري لانو مكانش شخصية محددة ✅ - متى ؟ هنا نقدرو نوظفو الفترة الزمنية و نقولو انو كان خلال الثورة التحريرية و مادابيك تكتب ( 1954 - 1962 ) ✅ - بهدف ماذا ؟ اكيد بهدف تحقيق الاستقلال و الحرية ضد الوجود الاستعماري ✅

🟥 المصطلحات كي تجو تعرفوهم حاولوا تعرفوهم بهاد الطريقة : 1 - ماهو هذا المصطلح ؟ ( منظمة - هيئة - سياسة - نِـظام ؟؟ ) يعني ماهي طبيعته " واش يكون ؟؟ " 2 - من أتى بِـه ؟ شكون صاحب هاد السياسة ولا هاد المنظمة ؟؟ هنا تقدرو تستعينو بالشخصيات 3 - ما الهدف منه ؟ يعني و علاش دارو هذيك السياسة ؟؟ ولا علاش قاموا بتأسيس هاديك المنظمة ؟؟ 4 - في بعض المصطلحات تقدرو تذكروا تفاصيل أكثر كيما زعما هاديك المنظمة وين تأسست و وقتاش، ولا هاديك السياسة متى تم تطبيقها .. 5 - اذا سقساك على حِلف، ولا مؤتمر ولا منظمة حاول تذكر الدول لي داخلة فيها

🟥 الجغرافيا : • كيما التاريخ " مراجعة الدروس و المصطلحات و أكيد ابداو بالدروس باش يعاونوكم تشفاو على المصطلحات " • راجعو الخرائط : يكفي انك تكون تعرف تعلم على الخريطة، و لكن لازم تاني تراجع الدول المصدرة للبترول مثلاً، و الدول لي داخلة فالـ G7 • راجعو كيفاه ديرو دائرة نسبية و مدرج تكراري و أعمدة بيانية ... ما تضيعش ربع نقطة على جال عنوان نسيت ديره و ربع نقطة على جال المِـفتاح • راجعو منهجية التعليق على الجدول راجعوها ما تروحوش بلا بيها قادر طيح في الموضوع الساهل و يضيعولكم نقط على جال عفسة تافهة

🟥 التاريخ : • ابداو بالدروس، راجعو الدروس أولاً اقراو العناصر الأساسية تاعهم و حاولو تسترجعو معلوماتكم فيهم و كي تبداو بالدروس اكيد راح تتفكرو بيهم التواريخ و الشخصيات و المصطلحات • راجعو التواريخ : بالتسلسل الزمني تاعها و اذا كاين مثلاً زوج تواريخ يتشابهو لازم تفرقو بيناتهم • راجعو الشخصيات، كل شخصية : الجنسية تاعها و المنصب و الأعمال لي دارتهم • راجعو المصطلحات : هنا لازم تكونو اذكياء شوية و تراجعو الفكرة لي يعالجها كل مصطلح + و تعتمدو على الفهم تاعكم بشكل أكبر باش يقدكم الوقت للمراجعة

compte rendu ✅️ : كي تجي تكتبو حاول توظف الأجوبة تاع الأسئلة تاع النص فيه، استغلهم فيه مليح، هادي ملاحظة قالها مفتش تاع فرونسي و مـا تنساوش توظفو القواعد لي قريتوهم كي تجو تكتبوه، هادي تاني حاجة مهمة

كي تجي تقترح فرضيات في التمرين الثاني، اذا قالك اقترح فرضية واحدة و ما عرفتش وش تقترح، لازم تكون هاديك الفرضية هي الصحيحة و من بعد نصادقو عليها صح ؟ يعني اقتراحك لازم يكون صحيح، روح للجزء الثاني تع التمرين و حاول تفهم واش هي الفرضية اللي قادر تكون صحيحة و اقترحها و خلصنا ✅️ كي تقترح الفرضية ماشي تكتب نص سطر فيها، اكتبها مليح و فسر هادي علاه و هادي علاه باش تكون الفرضية تاعك كاملة مُـكملة و عموماً في الأجوبة تاعكم ما تبخلوش راكم قريتو العلوم عام كامل و لازم توظفو كلش واش قريتو اكتب كامل واش عندك المهم ما تكتبش حاجة غالطة و خلاص بصح اذا عندك إضافات قادر تحسن من إجابتك لا تبخل علينا بـها ✅️

التمرين الثاني و الثالث : - اقرا السياق مليح مليح مليح و ركز فيه مليح حط تركيزك كامل و لون الكلمات المفتاحية و الغرض من التمرين، زعما يكتبلك بغرض معرفة كذا كذا .. نقوم بإجراء الدراساات الآتية .. هذا هو الهدف من التمرين اللي راح يكون استنتاج فيما بعد - بعد ما كملت السياق تشوف التعليمات و كل تعليمة تاني تشوف الأفعال الادائية لي فيها، احياناً تكون تعليمة فيها زوج اجزاء، هكا باش ما تنساش اي واحد فيهم - تقرا الوثائق تاعك مليح مليح و ركز فيهم و حاول تحللهم مليح و تجبد كامل واش كايـن فالوثيقة، لأنو الحل في النهاية هو عبارة عن الدرس + الوثائق - كلما جيت تحل سؤال، احكم المسودة تاعك و اكتب منهجية الحل في المسودة على شكل رؤوس اقلام، هكا باش ما تنسى حتى خطوة !! و اكتب الحل مباشرة على ورقة الإجابة كونك خفيف و في نفس الوقت مركز و عارف واش راك تكتب و وضح خطك

- لازم تحسم قرارك في الاختيار و مكانش رجعة في هاد القرار، من الاول دير حسابك بلي كي تبدا تحل موضوع خلاص انسى الموضوع الثاني و رد بالك دير الغلطة تاع " تحل جزء من موضوع و جزء من موضوع " علابيها قلت لكم افصلوا المواضيع .. - التمرين الأول : اكتب ديراكت فالورقة تاع الإجابة مكاش علاه المسودة، و لكن في النص العلمي اكتب فالمسودة النقاط الاساسية اللي راح ديرهم فالمقدمة و العرض و الخاتمة .. و كلما تكتب على عنصر من هادوك العناصر كوشي في المسودة باش ما تنسى حتى عفسة و راعي المنهجية طبعاً هكا تكمل التمرين الأول في 35/40 دقيقة ماكسيموم و ما تزيدش تولي ليه، كملت معاه إلى الأبد، كي تكون تكتب في ورقة الاجابة مادابيك توضح خطك و تخلي سطر بين الأسئلة خاصة فالعلوم باش تبان بلي كملت مع السؤال هذا و بديت في سؤال آخر

خير على أساس : التعليمات تاع كل تمرين اذا كانت واضحة و مفهومة واش راهو حاب منك توصل ✅ الوثائق الوثائق الوثائـق !! اذا كانت باينة و قادر تشوفها تعرف تحللها و تفسرها و تجبد التفاصيل تاعها كامل ✅ كاين تمارين الوثائق تاعهم ما يبانوش واضحين، و تحس لازملهم تكسار راس كثر من غيرهم، هكا راح يغبنوك فالحل كثر ما لوكان تخير موضوع تمارين تاعو فيهم وثائق باينين شوية .. ✅️ عموماً ما تخيرش على أساس التمرين الأول لأنو على واش كان يهدر راح يكون بسيط و تعليمات تاعو مباشرة و واضحة و اي واحد فيكم يقدر يجيب الخمس نقاط تاعو فيه، خير على أساس التمرين الثاني و الثالث و خمم مليح قبل ما تخير ✅

ابداو بالعلوم و اذا بديتو بيها من قبل كملوها و من بعد روحو للفرنسية، اذا ما كفاكمش الوقت للفرونسي تقدرو تراجعو واش بقالكم منها غدوا بإذن الله فالوقت لي بين العلوم و الفرونسي عادي اصلاً مهيش طويلة ✅️ بلا ما نوصي ارقدو بكري و ارقدو مليح و غدا لازم تاكلو قبل ليكزامان على الأقل باش تقدرو تركزو ديرو حسابكم العلميين عندكم أربع ساعات و نصف و ما تقولش الوقت راهو بزاف راك علابالك السوجي تاع العلوم شحال يجي طويل يعني الوقت يكفيك قدقد تخير الموضوع و تحل و كاش ما تراجع اجاباتك خفيف ظريف، لازم تكون مركز طيلة الاربع ساعات و نصف و تحافظ على هدوئك ✅ كي يحطولك الموضوعين، اول حاجة ديرها هي انك تفصلهم على بعض، تبدا تقرا الموضوعين بتأني، كي تكون تقرا فالموضوع الأول ما تتخمش فالموضوع الثاني، هكا باش تقدر تخير و يكون اختيارك صائِـب،ما تخيرش على أساس الوحدات اللي قريتهم مليح و لا لي ما قريتهمش ✅️

مادة العلوم الطبيعية 🧬 : - راجعو الملخص تاعكم و اقراوه بتركيز - راجعو الرسومات التخطيطية و البيانات تاعها مليح مليح - راجعو النصوص العلمية اذا سبق و كتبتوها ولا كانت عندكم واجدة - اذا عندكم حاجة فالمنهجية مش متأكدين كيفاه تندار حوسو عليها و راجعو خطواتها تبالي هذا يكفي بالنسبة للعلوم و ما تنساو حتى وحدة راجعوهم كامل مادة اللغة الفرنسية 🇫🇷 : - راجعو ملخص يكون شامل و فيه كلش - راجعو الأسئلة المتكررة لي كانت تطيح العوام اللي فاتو بسك ما يخرجوش عليها - راجعو شوية القواعد لي قريتوهم - راجعو كيفاه تجاوبو على سؤال synthèse - راجعو طريقة كتابة compte rendu ضروري جداً - ركزو على text historique و text argumentatif بشكل اكبر و اكيد هذا لا يعني انكم تنساو l’appel