National Assembly of the Kingdom of Cambodia

ឯកឧត្តម ឡេង ប៉េងឡុង ដឹកនាំកិច្ចប្រជុំក្រុមប្រឹក្សាអ្នកច្បាប់ដើម្បីពិនិត្យ និងផ្តល់យោបល់លើសេចក្តីព្រាងច្បាប់ចំនួន ៤ ____ វិមានរដ្ឋសភា៖ ឯកឧត្តម ឡេង ប៉េងឡុង អគ្គលេខាធិការរដ្ឋសភា និងជាប្រធានក្រុមប្រឹក្សាអ្នកច្បាប់នៃអគ្គលេខាធិការដ្ឋានរដ្ឋសភា  នារសៀលថ្ងៃទី ៨ ខែកញ្ញា ឆ្នាំ២០២៦ បានអញ្ជើញដឹកនាំកិច្ចប្រជុំក្រុមប្រឹក្សាអ្នកច្បាប់ដើម្បីពិនិត្យ និងផ្តល់យោបល់លើសេចក្តី ព្រាងច្បាប់ចំនួន ៤ ។ សេចក្តីព្រាងច្បាប់ទាំង៤នេះ មាន ១. សេចក្តីព្រាងច្បាប់ស្តីពីវិសោធនកម្មច្បាប់ស្តីពីលក្ខន្តិកៈមេធាវី ២. សេចក្តីព្រាងច្បាប់ស្តីពីការអនុម័តយល់ព្រមលើពិធីសារសេប៊ូ ស្តីពីវិសោធនកម្មធម្មនុញ្ញនៃសមាគមប្រជាជាតិអាស៊ីអាគ្នេយ៍ (អាស៊ាន) ៣. សេចក្តីព្រាងច្បាប់ស្តីពីការអនុម័តយល់ព្រមលើអនុសញ្ញាស្តីពីបុព្វសិទ្ធិ និងអភ័យឯកសិទ្ធិរបស់លេខាធិការដ្ឋាន បុគ្គលិក និងតំណាងរបស់សមាជិកនៃសន្និសីទស្តីពីអន្តរកម្ម និងវិធានការកសាងទំនុកចិត្តនៅអាស៊ី (CICA)និងទី៤. សេចក្តីព្រាងច្បាប់ស្តីពីការអនុម័តយល់ព្រមកិច្ចព្រមព្រៀងស្តីពីការការ ពារពលរដ្ឋទៅវិញទៅមកក្នុងវិស័យយុត្តិធម៌ព្រហ្មទណ្ឌអន្តរជាតិរវាងកម្ពុជានិងសហព័ន្ធរុស្ស៊ី ។ 😍 ភ្ជាប់ទៅកាន់បណ្តាញសង្គមរបស់រដ្ឋសភា៖ 😒Facebook 😏Telegram 😟Instagram 😱 (X) Twitter 😎TikTok 🙁YouTube 🌐 Website

Dr. Chheang Vannarith Highlights Economic Resilience and Future Cambodia–Japan Cooperation in Talks with JIIA Delegation --------- Phnom Penh, 8 September 2026 — H.E. Dr. Chheang Vannarith, Deputy Secretary-General and Chairman of the National Assembly Advisory Council, on Tuesday morning held talks with Mr. Kensuke Yanagida, Senior Fellow at the Japan Institute of International Affairs (JIIA) and head of delegation, at the National Assembly Palace.   The meeting was also attended by Mr. Shin Oya, Chief Analyst at the Sojitz Research Institute; Ms. Yumi Iijima, Lecturer at the Prefectural University of Kumamoto; and officials from the Legal, Research and International Relations Departments of the Secretariat-General of the National Assembly.   The discussion focused on economic security, including supply-chain resilience, critical infrastructure, digital transformation and trade diversification. Both sides also explored opportunities to strengthen Cambodia–Japan cooperation through policy exchanges, human capital development and technological advancement.   H.E. Dr. Chheang Vannarith emphasized the need to strengthen Cambodia’s economic resilience amid fluctuations in global energy prices, supply-chain disruptions, geopolitical tensions and security challenges arising from recent border disputes.   He noted that greater economic resilience would be particularly important as Cambodia prepares to graduate from least developed country status in 2029.   To avoid the middle-income trap, Cambodia is promoting digital transformation, human capital development and trade diversification. Dr. Chheang Vannarith highlighted the National Bank of Cambodia’s Bakong payment system, the verify.gov.kh document-verification platform and measures to strengthen small and medium-sized enterprises.   The discussion also covered Cambodia’s participation in the Regional Comprehensive Economic Partnership (RCEP) and prospects for future engagement with the Comprehensive and Progressive Agreement for Trans-Pacific Partnership (CPTPP).   The Cambodian side outlined measures to combat cross-border cybercrime, online scams and human trafficking. These include plans to host an international conference in Cambodia to strengthen cooperation among relevant authorities.   The JIIA delegation shared Japan’s experience in implementing its Economic Security Promotion Act and establishing the position of minister responsible for economic security.   Mr. Kensuke Yanagida and Mr. Shin Oya outlined four key areas of Japan’s approach: securing supply chains, protecting critical infrastructure, safeguarding sensitive patents and developing specialized technologies to achieve strategic indispensability.   Drawing on Japan’s experience following the 2010 Senkaku Islands dispute and subsequent restrictions on rare-earth exports, the Japanese experts emphasized the importance of diversifying supply chains and reducing dependence on a single source for critical materials.   Both sides expressed their commitment to strengthening Cambodia–Japan cooperation in digital governance, trade policy and green transformation. They also highlighted the importance of ASEAN–Japan cooperation in supporting a rules-based trading system and strengthening regional economic resilience.   The meeting underscored the value of continued exchanges of experience and policy frameworks to promote industrial development, technological advancement and long-term economic resilience. 😍 Connect to the National Assembly's social networks: 😒Facebook 😏Telegram 😟Instagram 😱 (X) Twitter 😎TikTok 🙁YouTube 🌐 Website

កម្ពុជា-ជប៉ុន ប្តេជ្ញារួមគ្នាពង្រឹងអភិបាលកិច្ចឌីជីថល ពាណិជ្ជកម្ម និងបរិវត្តកម្មបៃតង ដើម្បីពង្រឹងភាពធន់នៃសេដ្ឋកិច្ចក្នុងតំបន់  ---------------- ឯកឧត្តមបណ្ឌិត ឈាង វណ្ណារិទ្ធ អគ្គលេខាធិការរង និងជាប្រធានក្រុមទីប្រឹក្សារដ្ឋសភា នៅថ្ងៃទី៨ ខែកញ្ញា ឆ្នាំ២០២៦ បានដឹកនាំកិច្ចប្រជុំយុទ្ធសាស្ត្រជាមួយគណៈប្រតិភូនៃវិទ្យាស្ថានកិច្ចការអន្តរជាតិជប៉ុន (JIIA) ដឹកនាំដោយលោក Kensuke Yanagida អ្នកស្រាវជ្រាវជាន់ខ្ពស់នៃវិទ្យាស្ថាន ដើម្បីពង្រឹងចំណងមិត្តភាព និងភាពជាដៃគូរវាងកម្ពុជា-ជប៉ុនឱ្យកាន់តែស៊ីជម្រៅ ជាពិសេសលើវិស័យអភិបាលកិច្ចឌីជីថល នយោបាយពាណិជ្ជកម្ម និងបរិវត្តកម្មបៃតង (GX) ដែលកំពុងប្រឈមមុខនឹងសម្ពាធ និងការបង្ខិតបង្ខំសេដ្ឋកិច្ចពីខាងក្រៅ។ ក្នុងឱកាសនោះ ឯកឧត្តមបណ្ឌិត ឈាង វណ្ណារិទ្ធ បានគូសបញ្ជាក់អំពីកិច្ចខិតខំប្រឹងប្រែងរបស់កម្ពុជាក្នុងការរៀបចំយន្តការទប់ទល់ និងពង្រឹងភាពធន់នៃសេដ្ឋកិច្ចជាតិ ប្រឈមមុខនឹងការប្រែប្រួលតម្លៃថាមពលជាសកល ការរំខានដល់ខ្សែសង្វាក់ផ្គត់ផ្គង់ និងភាពតានតឹងផ្នែកភូមិសាស្ត្រនយោបាយ ជាពិសេសការគំរាមកំហែងពីប្រទេសថៃ តាម រយៈជម្លោះព្រំដែន។ក្នុងនោះ កម្ពុជាកំពុងជំរុញយ៉ាងសកម្មលើការធ្វើបរិវត្តកម្មឌីជីថល ការអភិវឌ្ឍមូលធនមនុស្ស និងការពង្រីកបណ្តាញពាណិជ្ជកម្ម ដោយបានត្រៀមខ្លួនរួចរាល់ក្នុងការចាកចេញពីក្រុមប្រទេសអភិវឌ្ឍន៍តិចតួចបំផុត (LDC) នៅត្រឹមឆ្នាំ២០២៩ ដើម្បីជៀសផុតពីអន្ទាក់ប្រាក់ចំណូលមធ្យម។ ទន្ទឹមនឹងនេះ ឯកឧត្តមបណ្ឌិតបានរំលេចបន្ថែមពីសមិទ្ធផលលេចធ្លោ និងទិសដៅយុទ្ធសាស្ត្ររបស់កម្ពុជា រួមមានការសម្រេចបានជោគជ័យនៃ «ប្រព័ន្ធទូទាត់បាគង» របស់ធនាគារជាតិនៃកម្ពុជា ក្នុងការលើកកម្ពស់ឯករាជ្យភាពហិរញ្ញវត្ថុ ការដាក់ឱ្យប្រើប្រាស់ថ្នាលផ្ទៀងផ្ទាត់ឯកសារសាធារណៈ «verify.gov.kh» និងការអនុវត្តវិធានការអន្តរាគមន៍សេដ្ឋកិច្ចដែលផ្តោតលើការពង្រឹងសមត្ថភាព និងការប្រកួតប្រជែងរបស់សហគ្រាសធុនតូច និងមធ្យម (SMEs)។ បន្ថែមលើនេះ កម្ពុជាបន្តជំរុញសមាហរណកម្មពាណិជ្ជកម្មតាមរយៈការចូលរួមយ៉ាងសកម្មក្នុងកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) និងបន្តវឌ្ឍនភាពដើម្បីចូលរួមក្នុងកិច្ចព្រមព្រៀងគ្រប់ជ្រុងជ្រោយ និងជឿនលឿនសម្រាប់ដៃគូអន្តរប៉ាស៊ីហ្វិក (CPTPP) ព្រមទាំងការរៀបចំវិធានការប្រយុទ្ធប្រឆាំងបទល្មើសបច្ចេកវិទ្យាឆ្លងដែន ដោយកម្ពុជាគ្រោងនឹងរៀបចំសន្និសីទអន្តរជាតិនាពេលខាងមុខ ដើម្បីពង្រឹងកិច្ចសហប្រតិបត្តិការអនុវត្តច្បាប់ជាសកល ក្នុងការប្រយុទ្ធប្រឆាំងនឹងការឆបោកតាមប្រព័ន្ធអនឡាញ និងការជួញដូរមនុស្ស។   ដោយឡែក គណៈប្រតិភូ JIIA បានចែករំលែកនូវទស្សនទានសំខាន់ៗអំពីច្បាប់ស្តីពីការលើកកម្ពស់សន្តិសុខសេដ្ឋកិច្ចរបស់ប្រទេសជប៉ុន ជាពិសេសបទពិសោធន៍នៃការតែងតាំងរដ្ឋមន្ត្រីទទួលបន្ទុកសន្តិសុខសេដ្ឋកិច្ចជាយុទ្ធសាស្ត្រ។ ក្នុងនោះ តំណាងគណៈប្រតិភូ រួមមាន លោក Kensuke Yanagida និងលោក Shin Oya បានបង្ហាញលម្អិតអំពីផែនការនីតិកម្មសន្តិសុខសេដ្ឋកិច្ចរបស់ជប៉ុន ដែលឈរលើសសរស្ដម្ភសំខាន់ៗចំនួនបួន គឺការធានាសន្តិសុខនៃខ្សែសង្វាក់ផ្គត់ផ្គង់ ការការពារហេដ្ឋារចនាសម្ព័ន្ធសំខាន់ៗ ការបង្កើតប្រព័ន្ធប្រកាសនីយបត្រតក្កកម្មសម្រាប់របកគំហើញថ្មីៗ ដែលងាយនឹងចម្លង និងការសម្រេចបាននូវ «ភាពចាំបាច់ជាយុទ្ធសាស្ត្រ» តាមរយៈការអភិវឌ្ឍបច្ចេកវិទ្យាដែលមានលក្ខណៈពិសេស និងឯកទេសកម្មកម្រិតខ្ពស់។ ជាលទ្ធផលនៃកិច្ចពិភាក្សា ភាគីទាំងពីរ កម្ពុជា-ជប៉ុន បានប្តេជ្ញាចិត្តរួមគ្នាក្នុងការបន្តពង្រឹងកិច្ចសហប្រតិបត្តិការ    អាស៊ាន-ជប៉ុន ដែលជាគ្រឹះយ៉ាងសំខាន់សម្រាប់ការថែរក្សាប្រព័ន្ធពាណិជ្ជកម្មដោយផ្អែកលើវិធានច្បាប់ និងការទប់ទល់នឹងការបង្ខិតបង្ខំសេដ្ឋកិច្ចនៅក្នុងតំបន់ តាមរយៈការសម្របសម្រួលគោលដៅយុទ្ធសាស្ត្រឱ្យមានភាពស៊ីសង្វាក់គ្នា និងការបន្តផ្លាស់ប្តូរបទពិសោធន៍លើក្របខ័ណ្ឌច្បាប់ទៅវិញទៅមកនាពេលអនាគត។ 😍 ភ្ជាប់ទៅកាន់បណ្តាញសង្គមរបស់រដ្ឋសភា៖ 😒Facebook 😏Telegram 😟Instagram 😱 (X) Twitter 😎TikTok 🙁YouTube 🌐 Website

ស្វាគមន៍មកកាន់កម្មវិធីមរតកចំណេះ ................... ជួបគ្នាជាថ្មីម្ដងទៀតជាមួយវត្តមានឯកឧត្តម ប៉ាន សូរស័ក្ដិ តំណាងរាស្ដ្រមណ្ឌលខេត្តកំពង់ចាម និងជាអតីតរដ្ឋមន្ដ្រីក្រសួងពាណិជ្ជកម្ម។ ក្នុងកិច្ចសម្ភាន៍នេះឯកឧត្តមបានចែករំលែកបទពិសោធន៍ និងអនុសាសន៍សំខាន់ៗពាក់ព័ន្ធនឹងតួនាទីចម្បងរបស់ខ្មែរយូនីកូត។ ខ្លឹមសារសំខាន់៖ ·     លើកកម្ពស់សេរីភាពនៃការបញ្ចេញមតិ៖ សម្រួលដល់ការប្រាស័យទាក់ទង និងការចែករំលែកព័ត៌មានដោយសេរីនៅលើប្រព័ន្ធឌីជីថល។ ·     ពង្រឹងការទំនាក់ទំនងជាសកល៖ ភ្ជាប់ទំនាក់ទំនងរវាងប្រជាជនកម្ពុជាទាំងក្នុង និងក្រៅប្រទេសឱ្យកាន់តែជិតស្និទ្ធ និងមានប្រសិទ្ធភាព។ ·     ជំរុញវិស័យពាណិជ្ជកម្មអេឡិចត្រូនិក (E-Commerce)៖ សម្រួលដល់ការធ្វើពាណិជ្ជកម្មតាមប្រព័ន្ធអ៊ីនធឺណិត និងការអភិវឌ្ឍសេដ្ឋកិច្ចឌីជីថលនៅកម្ពុជា។ សូមស្ដាប់ និងទស្សនាវីដេអូកិច្ចសម្ភាសន៍ទាំងស្រុងខាងលេី 😍 ភ្ជាប់ទៅកាន់បណ្តាញសង្គមរបស់រដ្ឋសភា៖ 😒Facebook 😏Telegram 😟Instagram 😱 (X) Twitter 😎TikTok 🙁YouTube 🌐 Website

រដ្ឋសភាកម្ពុជា ត្រៀមលក្ខណៈរួចរាល់ទទួលស្វាគមន៍ដំណើរទស្សនកិច្ចផ្លូវរដ្ឋរបស់ នាយឧត្តមសេនីយ៍ជាន់ខ្ពស់ មីន អ៊ុងឡាំងនៅពេលខាងមុខ .................... វិមានរដ្ឋសភា៖ រដ្ឋសភានៃព្រះរាជាណាចក្រកម្ពុជា បានត្រៀមលក្ខណៈរួចរាល់ស្ទើរតែទាំងស្រុងលើការងារពិធីការ និងបដិសណ្ឋារកិច្ច ដើម្បីទទួលស្វាគមន៍ ឯកឧត្តម នាយឧត្តមសេនីយ៍ជាន់ខ្ពស់ មីន អ៊ុងឡាំង ប្រធានក្រុមប្រឹក្សាគ្រប់គ្រងរដ្ឋ និងជានាយករដ្ឋមន្ត្រីនៃសាធារណរដ្ឋសហភាពមីយ៉ាន់ម៉ា ក្នុងឱកាសអញ្ជើញចូលជួបសម្តែងការគួរសម និងពិភាក្សាការងារជាមួយ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា នៅវិមានរដ្ឋសភា នារសៀលថ្ងៃទី១១ ខែកញ្ញា ខាងមុខនេះ ស្របពេលដែលឯកឧត្តមដឹកនាំគណៈប្រតិភូជាន់ខ្ពស់មីយ៉ាន់ម៉ា អញ្ជើញបំពេញទស្សនកិច្ចផ្លូវរដ្ឋនៅកម្ពុជា ចាប់ពីថ្ងៃទី១១ ដល់ថ្ងៃទី១២ ខែកញ្ញា ឆ្នាំ២០២៦ខាងមុខ។ ដើម្បីធានាឱ្យកិច្ចការពិធីការ បដិសណ្ឋារកិច្ច និងសន្តិសុខ ប្រព្រឹត្តទៅដោយរលូន ស្របតាមកម្រិតពិធីការការទូតជាន់ខ្ពស់ ក្រុមការងារជំនាញពិធីការនៃរដ្ឋសភាកម្ពុជា ដឹកនាំដោយ ឯកឧត្តម ទឹម វណ្ណា នាយកពិធីការសម្តេចប្រធានរដ្ឋសភា និងលោក ហ៊ុន ឌីណូ ប្រធាននាយកដ្ឋានព័ត៌មានស្តីទី នៃអគ្គលេខាធិការដ្ឋានរដ្ឋសភា រួមជាមួយមន្ត្រីជាន់ខ្ពស់ក្រសួងការបរទេស និងសហប្រតិបត្តិការអន្តរជាតិកម្ពុជា បានចុះពិនិត្យទីតាំងជាក់ស្តែង និងសហការយ៉ាងជិតស្និទ្ធជាមួយក្រុមការងារត្រៀមទុកជាមុន (Advance Team) មកពីការិយាល័យប្រធានាធិបតីមីយ៉ាន់ម៉ា ដឹកនាំដោយ លោកបណ្ឌិត ខ្យរ ហ្សរ យេ (Dr. Kyaw Zaw Ye) ទីប្រឹក្សាជាន់ខ្ពស់ប្រធានាធិបតី តំណាងក្រសួងការពារជាតិ ព្រមទាំងតំណាង   ស្ថានឯកអគ្គរដ្ឋទូតមីយ៉ាន់ម៉ាប្រចាំកម្ពុជា ដឹកនាំដោយ ឯកឧត្តម ខ្យរ សូ មីន (H.E. Mr. Kyaw Soe Min) ឯកអគ្គរដ្ឋទូតវិសាមញ្ញ និងពេញសមត្ថភាព, លោកឧត្តមសេនីយ៍ត្រី ហ្សរ វីន (Brigadier General Zaw Win) អនុព័ន្ធយោធាជើងទឹក និងជើងអាកាស ព្រមទាំងមន្ត្រីការទូតសំខាន់ៗនៃស្ថានទូតផងដែរនៅរសៀលថ្ងៃទី ៨ ខែ កញ្ញា ឆ្នាំ ២០២៦នេះ។ តាមរយៈជំនួបសម្តែងការគួរសម និងពិភាក្សាការងាររវាង សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា និងឯកឧត្តម នាយឧត្តមសេនីយ៍ជាន់ខ្ពស់ មីន អ៊ុងឡាំង នារសៀលថ្ងៃទី១១ ខែកញ្ញា ខាងមុខនេះ ត្រូវបានរំពឹងថានឹងក្លាយជាកាលានុវត្តភាពដ៏សំខាន់បន្ថែមទៀត ក្នុងការពង្រឹងទំនាក់ទំនងទ្វេភាគី ចំណងមិត្តភាពជាប្រពៃណី និងកិច្ចសហប្រតិបត្តិការរវាងកម្ពុជា និងមីយ៉ាន់ម៉ា ឱ្យកាន់តែរឹងមាំ និងស៊ីជម្រៅ ជាពិសេសរវាងស្ថាប័ននីតិប្បញ្ញត្តិនៃប្រទេសទាំងពីរផងដែរ។ 😍 ភ្ជាប់ទៅកាន់បណ្តាញសង្គមរបស់រដ្ឋសភា៖ 😒Facebook 😏Telegram 😟Instagram 😱 (X) Twitter 😎TikTok 🙁YouTube 🌐 Website

កម្មវិធីមរតកចំណេះ ល្ងាចនេះឯកឧត្តម ប៉ាន សូរស័ក្ដិ តំណាងរាស្ដ្រមណ្ឌលខេត្តកំពង់ចាម បានចែករំលែកពីការងារពាក់ព័ន្ធ យូនីកូត ដែលឯកឧត្តមជាស្ថានឹកមួយរូបដែលបង្កើតឱ្យមានតួអក្សរ យូនីកូត សម្រាប់ប្រើប្រាស់លើកុំព្យូទ័រ និងអ៊ីនធើណេត។ សូមកុំខកខានទស្សនា និងស្ដាប់កិច្ចសម្ភាសន៍របស់ឯកឧត្តមក្នុងកម្មវិធីមរតកចំណេះនាយប់នេះ វេលាម៉ោង ៨:០០យប់ 😍 ភ្ជាប់ទៅកាន់បណ្តាញសង្គមរបស់រដ្ឋសភា៖ 😒Facebook 😏Telegram 😟Instagram 😱 (X) Twitter 😎TikTok 🙁YouTube 🌐 Website

អបអរសាទរ ទិវាអក្ខរកម្មអន្តរជាតិ ៨ កញ្ញា! ---------------- អក្ខរកម្មមិនត្រឹមតែជាសមត្ថភាពនៃការចេះអាននិងចេះសរសេរប៉ុណ្ណោះទេ ប៉ុន្តែជាសិទ្ធិមនុស្សជាមូលដ្ឋាន និងជាគ្រឹះដ៏រឹងមាំនៃការកសាងសង្គមប្រកបដោយសន្តិភាព បញ្ញាញាណ និងការអភិវឌ្ឍប្រកបដោយចីរភាព។ ក្នុងនាមស្ថាប័ននីតិប្បញ្ញត្តិ រដ្ឋសភានៅតែបន្តគាំទ្រពេញទំហឹងចំពោះក្របខណ្ឌគោលនយោបាយ និងច្បាប់នានា សំដៅលើកកម្ពស់វិស័យអប់រំ ការរៀនសូត្រពេញមួយជីវិត និងការកាត់បន្ថយគម្លាតចំណេះដឹង ដើម្បីជាឧត្តមប្រយោជន៍ដល់ប្រជាពលរដ្ឋគ្រប់រូប។ 😍 ភ្ជាប់ទៅកាន់បណ្តាញសង្គមរបស់រដ្ឋសភា៖ 😒Facebook 😏Telegram 😟Instagram 😱 (X) Twitter 😎TikTok 🙁YouTube 🌐 Website

ឯកឧត្តមបណ្ឌិត ហ៊ឺ វីរៈ អញ្ជើញជួបសំណេះសំណាលជាមួយយុវសិស្សប្រឡងសញ្ញាប័ត្រមធ្យមសិក្សាទុតិយភូមិជាប់និទ្ទេស A នៅស្រុកកំពង់ត្រឡាច ខេត្តកំពង់ឆ្នាំង ---------------- កំពង់ឆ្នាំង៖ឯកឧត្តមបណ្ឌិត ហ៊ឺ វីរៈ អ្នកតំណាងរាស្ត្រមណ្ឌលខេត្តកំពង់ឆ្នាំងនិងក្រុមការងារអម ដំណើរដោយប្រធានការិយា ល័យ អប់រំ យុវជន និងកីឡាស្រុកកំពង់ត្រឡាច នៅថ្ងៃទី៦ ខែកញ្ញា ឆ្នាំ២០២៦ បានអញ្ជើញសំណេះសំណាលជាមួយយុវសិស្សដែល ប្រឡងសញ្ញាប័ត្រមធ្យមសិក្សាទុតិយភូមិទទួលបាននិទ្ទេស A ចំនួន ៤នាក់។ សិស្សជាប់និទ្ទេសA រួមមាន៖កញ្ញស អ៊ឺន សុភារី អាយុ ១៨ឆ្នាំ នៅភូមិសាលាលេខប្រាំ ឃុំអូរឫស្សី. កញ្ញា អាត សុណារី អាយុ ១៨ឆ្នាំ នៅភូមិសាលាលេខប្រាំ ឃុំអូរឫស្សី កញ្ញា តាន់ ឈុនអេង អាយុ ១៧ឆ្នាំ នៅភូមិពានី ឃុំពានី ទី៤ និងយុវសិស្ស ស៊ុយ ពិសី ភេទប្រុស អាយុ ១៨ឆ្នាំ នៅភូមិក្រាំងតាឯក ឃុំពានី ស្រុកកំពង់ត្រឡាច ខេត្តកំពង់ឆ្នាំង។ ក្នុងឱកាសនោះ ឯកឧត្តមបណ្ឌិត បានពាំនាំនូវប្រសាសន៍ផ្តាំផ្ញើសួរសុខទុក្ខ និងសេចក្តីនឹករលឹកយ៉ាងជ្រាលជ្រៅពីសំណាក់ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា, សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី និង សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា ជូនចំពោះក្មួយៗសិស្សានុសិស្សទាំងអស់។ ឯកឧត្តមបណ្ឌិត ហ៊ឺ វីរៈ បានកោត សរសើរយ៉ាងក្រៃលែង និងវាយតម្លៃខ្ពស់ចំពោះការខិតខំប្រឹង ប្រែងរបស់ក្មួយៗទាំងអស់រហូត ទទួលបានលទ្ធផលដ៏ត្រចះត្រចង់ នាំមកនូវកិត្តិយសជូនខ្លួនឯង គ្រួសារ និងសាលារៀន ជាពិសេសគឺការលើកមុខមាត់ស្រុកកំពង់ត្រឡាចយើង។ ឯកឧត្តមបណ្ឌិត បានគូសបញ្ជាក់ថា លទ្ធផលនិទ្ទេស A នាពេលនេះ មិនមែនកើតឡើងដោយចៃដន្យនោះទេ ប៉ុន្តែវាជាផ្លែផ្កានៃការខិតខំសិក្សារៀនសូត្រ ក្នុងនោះក៏មានការគាំទ្រយ៉ាងពេញទំហឹងពីសំណាក់អាណាព្យាបាល និងការលះបង់កម្លាំងកាយចិត្តក្នុងការបណ្តុះបណ្តាលរបស់លោកគ្រូ អ្នកគ្រូគ្រប់រូប។ លទ្ធផលនេះក៏បានឆ្លុះបញ្ចាំងពីវឌ្ឍនភាព និងការរីកចម្រើននៃវិស័យអប់រំនៅកម្ពុជា ក្រោមម្លប់នៃសុខសន្តិភាព និងការដឹកនាំដ៏ឈ្លាសវៃរបស់រាជ រដ្ឋាភិបាល។ ទន្ទឹមនឹងនេះ ឯកឧត្តមបណ្ឌិត បានមានប្រសាសន៍ផ្តាំផ្ញើដល់ក្មួយៗយុវសិស្សថា ជោគជ័យនៅមធ្យមសិក្សាគ្រាន់តែជាជំហានដំបូងប៉ុណ្ណោះ ក្មួយៗត្រូវបន្តរក្សាស្មារតីខិតខំប្រឹងប្រែងនេះបន្ថែម ទៀតនៅថ្នាក់ឧត្តមសិក្សា ព្រោះការសិក្សានៅសាកលវិទ្យាល័យទាមទារការស្រាវជ្រាវនិងភាព ម្ចាស់ការខ្ពស់ជាងមុន។ ជាចុងបញ្ចប់ ឯកឧត្តមបណ្ឌិត បានឧបត្ថម្ភក្មួយៗយុវសិស្សទាំង ៤នាក់ ក្នុងម្នាក់ៗថវិកាចំនួន ៥០០,០០០រៀល៕ 😍 ភ្ជាប់ទៅកាន់បណ្តាញសង្គមរបស់រដ្ឋសភា៖ 😒Facebook 😏Telegram 😟Instagram 😱 (X) Twitter 😎TikTok 🙁YouTube 🌐 Website

តំណាងរាស្ត្រមណ្ឌលខេត្តស្វាយរៀង ចុះជួបសំណេះសំណាល សួរសុខទុក្ខ និងផ្តល់អំណោយជូនកុមារកំព្រា នៅក្រុងបាវិត ------------------- ស្វាយរៀង៖ លោកជំទាវ ឯក សុវណ្ណភារៈ តំណាងរាស្ត្រមណ្ឌលខេត្តស្វាយរៀង និងជាសមាជិកាគណៈកម្មការទី៣ នៃរដ្ឋសភា អមដំណើរដោយមន្ត្រីពាក់ព័ន្ធ នៅព្រឹកថ្ងៃទី៧ ខែកញ្ញា ឆ្នាំ២០២៦ បានចុះជួបសំណេះសំណាល សួរសុខទុក្ខ និងផ្តល់អំណោយជូនកុមារកំព្រា នៅមណ្ឌលកុមារកំព្រាដំណឹងល្អបួន ស្ថិតនៅភូមិអង្គសាលា សង្កាត់ព្រៃអង្គុញ ក្រុងបាវិត ខេត្តស្វាយរៀង។ ក្នុងឱកាសនោះ លោកជំទាវ បាននាំយកប្រសាសន៍ផ្តាំផ្ញើ សួរសុខទុក្ខពីសំណាក់ថ្នាក់ដឹកនាំជាតិ ជូនដល់កុមារកំព្រា និងអ្នកមើលថែ ព្រមទាំងបានបញ្ជាក់ពីការយកចិត្តទុកដាក់របស់រាជរដ្ឋាភិបាល និងស្ថាប័នជាតិ ចំពោះសុខុមាលភាព ការថែទាំ និងការអប់រំសម្រាប់កុមារ។ ជាមួយគ្នានេះ លោកជំទាវ និងក្រុមការងារ បាននាំយកសម្ភារប្រើប្រាស់ ស្បៀងអាហារ និងថវិកា ចែកជូនកុមារកំព្រាចំនួន ២១នាក់ និងអ្នកមើលថែចំនួន ១០នាក់ ដោយមានថវិកាសរុបចំនួន ១,៦៣០,០០០រៀល ក្នុងនោះថវិការបស់លោកជំទាវ ឯក សុវណ្ណភារៈ ចំនួន ៨៥៦,០០០រៀល។ សកម្មភាពនេះឆ្លុះបញ្ចាំងអំពីការយកចិត្តទុកដាក់ និងការចូលរួមរបស់តំណាងរាស្ត្រ ក្នុងការលើកទឹកចិត្ត និងគាំពារដល់កុមារកំព្រា ដើម្បីឱ្យពួកគេទទួលបានការថែទាំ និងការអប់រំប្រកបដោយភាពកក់ក្តៅ និងសុវត្ថិភាព។ 😍 ភ្ជាប់ទៅកាន់បណ្តាញសង្គមរបស់រដ្ឋសភា៖ 😒Facebook 😏Telegram 😟Instagram 😱 (X) Twitter 😎TikTok 🙁YouTube 🌐 Website

ទស្សនទាន និងការប្តេជ្ញាចិត្តយ៉ាងមុតមាំរបស់កម្ពុជាលើឆាកអន្តរជាតិ! ........ សូមគោរពអញ្ជើញទស្សនាប្រសាសន៍ចែករំលែក និងចំណាប់អារម្មណ៍ទាំងស្រុងរបស់ លោកជំទាវ ឡោក ខេង ប្រធានគណៈកម្មការទី៨ នៃរដ្ឋសភា និងជាអនុប្រធានអចិន្ត្រៃយ៍នៃសមាគមសមាជិកសភាស្តីពីប្រជាជន និងការអភិវឌ្ឍ (CAPPD) ក្នុងវេទិកាកម្រិតខ្ពស់រដ្ឋមន្ត្រី និងសមាជិកសភា  ដើម្បីរួមចំណែកដល់ការអភិវឌ្ឍសង្គម និងប្រជាជនប្រកបដោយចីរភាព។ សូមទស្សនាវីដេអូប្រសាសន៍ទាំងស្រុងខាងក្រោម/ខាងលេី៖ 😍 ភ្ជាប់ទៅកាន់បណ្តាញសង្គមរបស់រដ្ឋសភា៖ 😒Facebook 😏Telegram 😟Instagram 😱 (X) Twitter 😎TikTok 🙁YouTube 🌐 Website

ទស្សនទាន និងការប្តេជ្ញាចិត្តយ៉ាងមុតមាំរបស់កម្ពុជាលើឆាកអន្តរជាតិ! ........ សូមគោរពអញ្ជើញទស្សនាប្រសាសន៍ចែករំលែក និងចំណាប់អារម្មណ៍ទាំងស្រុងរបស់ លោកជំទាវ ឡោក ខេង ប្រធានគណៈកម្មការទី៨ នៃរដ្ឋសភា និងជាអនុប្រធានអចិន្ត្រៃយ៍នៃសមាគមសមាជិកសភាស្តីពីប្រជាជន និងការអភិវឌ្ឍ (CAPPD) ក្នុងវេទិកាកម្រិតខ្ពស់រដ្ឋមន្ត្រី និងសមាជិកសភា  ដើម្បីរួមចំណែកដល់ការអភិវឌ្ឍសង្គម និងប្រជាជនប្រកបដោយចីរភាព។ សូមទស្សនាវីដេអូប្រសាសន៍ទាំងស្រុងខាងក្រោម/ខាងលេី៖ 😍 ភ្ជាប់ទៅកាន់បណ្តាញសង្គមរបស់រដ្ឋសភា៖ 😒Facebook 😏Telegram 😟Instagram 😱 (X) Twitter 😎TikTok 🙁YouTube 🌐 Website

គណៈកម្មការទី៦ នៃរដ្ឋសភា ឯកភាពលើសេចក្តីព្រាងច្បាប់សំខាន់ៗចំនួន ៣ ដោយរក្សាខ្លឹមសារដើមទាំងស្រុង ត្រៀមបញ្ជូនទៅគណៈកម្មាធិការអចិន្ត្រៃយ៍ ​...................... វិមានរដ្ឋសភា ៖ គណៈកម្មការនីតិកម្ម និងយុត្តិធម៌ នៃរដ្ឋសភា (គណៈកម្មការទី៦) បានសម្រេចឯកភាពទាំងស្រុងលើទម្រង់ និងខ្លឹមសារដើមនៃសេចក្តីព្រាងច្បាប់សំខាន់ៗចំនួន ៣ ក្រោយការពិនិត្យ និងកែសម្រួលអក្ខរាវិរុទ្ធមួយចំនួនរួចរាល់ ដើម្បីរៀបចំរបាយការណ៍បញ្ជូនបន្តទៅកាន់គណៈកម្មាធិការអចិន្ត្រៃយ៍រដ្ឋសភា ចាត់ចែងតាមនីតិវិធី។ ការសម្រេចនេះត្រូវបានធ្វើឡើងនៅក្នុងកិច្ចប្រជុំផ្ទៃក្នុង នាព្រឹកថ្ងៃទី៧ ខែកញ្ញា ឆ្នាំ២០២៦ នៅវិមានរដ្ឋសភា ក្រោមអធិបតីភាព ឯកឧត្តម អង្គ វង្ស វឌ្ឍានា ប្រធានគណៈកម្មការទី៦ ដោយមានការចូលរួមពីអនុប្រធាន លេខាធិការ សមាជិក សមាជិកាគណៈកម្មការ និងមន្ត្រីជំនាញបច្ចេកទេសនៃអគ្គលេខាធិការដ្ឋានរដ្ឋសភា។ សេចក្តីព្រាងច្បាប់ទាំង ៣ ដែលបានឆ្លងកាត់ការពិនិត្យ និងសិក្សាយ៉ាងល្អិតល្អន់នោះ រួមមាន៖ ·  សេចក្តីព្រាងច្បាប់ស្តីពី វិសោធនកម្មច្បាប់ស្តីពីលក្ខន្តិកៈមេធាវី៖ សំដៅកែសម្រួលក្របខ័ណ្ឌការងារ និងវិជ្ជាជីវៈមេធាវីឱ្យកាន់តែមានប្រសិទ្ធភាព។ ·  សេចក្តីព្រាងច្បាប់ស្តីពី ការអនុម័តយល់ព្រមលើពិធីសារសេប៊ូ (Cebu Protocol)៖ ធ្វើវិសោធនកម្មធម្មនុញ្ញនៃសមាគមប្រជាជាតិអាស៊ីអាគ្នេយ៍ (អាស៊ាន)។ ·  សេចក្តីព្រាងច្បាប់ស្តីពី ការអនុម័តយល់ព្រមលើកិច្ចព្រមព្រៀងរវាងកម្ពុជា និងសហព័ន្ធរុស្ស៊ី ផ្តោតលើកិច្ចសហប្រតិបត្តិការការពារ ពលរដ្ឋទៅវិញទៅមកក្នុងវិស័យយុត្តិធម៌ព្រហ្មទណ្ឌអន្តរជាតិ។ ក្រោយបញ្ចប់ការពិភាក្សា អង្គប្រជុំបានឯកភាពរៀបចំរបាយការណ៍លទ្ធផល ដើម្បីដាក់ជូនគណៈកម្មាធិការអចិន្ត្រៃយ៍រដ្ឋសភា មុននឹងឈានដល់ការដាក់បញ្ចូលក្នុងរបៀបវារៈសម័យប្រជុំពេញអង្គរដ្ឋសភា ដើម្បីពិភាក្សា និងអនុម័តជាផ្លូវការនាពេលខាងមុខ៕ 😍 ភ្ជាប់ទៅកាន់បណ្តាញសង្គមរបស់រដ្ឋសភា៖ 😒Facebook 😏Telegram 😟Instagram 😱 (X) Twitter 😎TikTok 🙁YouTube 🌐 Website

ក្រុមការងារកែទម្រង់ការគ្រប់គ្រងហិរញ្ញវត្ថុសាធារណៈនៃអគ្គលេខាធិការដ្ឋានរដ្ឋសភា ចូលរួមកិច្ចប្រជុំពិនិត្យពិភាក្សាលើរបាយការណ៍សមិទ្ធកម្មប្រចាំត្រីមាសទី២ ឆ្នាំ២០២៦ ..................... វិមានរដ្ឋសភា៖ លោក សុន សុខហេង អគ្គនាយករងរដ្ឋបាល និងហិរញ្ញវត្ថុ និងជាអនុប្រធានប្រចាំការ ក្រុមការងារកែទម្រង់ការគ្រប់គ្រងហិរញ្ញវត្ថុសាធារណៈនៃអគ្គលេខាធិការដ្ឋានរដ្ឋសភា នាព្រឹកថ្ងៃទី៧ ខែកញ្ញា ឆ្នាំ២០២៦ បានដឹកនាំក្រុមការងារអញ្ជើញចូលរួមកិច្ចប្រជុំតាមប្រព័ន្ធវីដេអូ (Video Conference) ជាមួយគណៈកម្មាធិការដឹកនាំការងារកែទម្រង់ការគ្រប់គ្រងហិរញ្ញវត្ថុសាធារណៈ និងក្រុមការងារបច្ចេកទេស (PFM-TWG)។ កិច្ចប្រជុំនេះរៀបចំឡើងក្នុងគោលបំណងពិនិត្យ និងពិភាក្សាលើ «របាយការណ៍សមិទ្ធកម្មប្រចាំត្រីមាសទី២ ឆ្នាំ២០២៦» នៃការអនុវត្តកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ដំណាក់កាលទី៤ ដើម្បីតាមដានវឌ្ឍនភាពការងារ វាយតម្លៃលទ្ធផលសម្រេចបាន និងលើកទិសដៅអនុវត្តបន្ត ក្នុងគោលដៅបង្កើនប្រសិទ្ធភាព តម្លាភាព និងគណនេយ្យភាពនៃការគ្រប់គ្រងថវិកាជាតិឱ្យកាន់តែមានចីរភាព៕ 😍 ភ្ជាប់ទៅកាន់បណ្តាញសង្គមរបស់រដ្ឋសភា៖ 😒Facebook 😏Telegram 😟Instagram 😱 (X) Twitter 😎TikTok 🙁YouTube 🌐 Website

ឯកឧត្តម រ៉ូហ្វី អូស្មាន ដឹកនាំគណៈប្រតិភូរដ្ឋសភាកម្ពុជា ចូលរួមសន្និសីទសកលលើកទី១២ នៃសមាជិកសភាវ័យក្មេង IPU នៅសាធារណរដ្ឋអ៊ូសបេគីស្ថាន ------------------- អ៊ូសបេគីស្ថាន៖ គណៈប្រតិភូរដ្ឋសភា នៃព្រះរាជាណាចក្រកម្ពុជា ដឹកនាំដោយឯកឧត្តម រ៉ូហ្វី អូស្មាន សមាជិកគណៈកម្មការសាធារណការ ដឹកជញ្ជូន អាកាសចរណ៍ស៊ីវិល ប្រៃសណីយ៍ ទូរគមនាគមន៍ ឧស្សាហកម្ម វិទ្យាសាស្រ្ត បច្ចេកវិទ្យា នវានុវត្តន៍ រ៉ែ ថាមពល ពាណិជ្ជកម្ម រៀបចំដែនដី នគររូបនីយកម្ម និងសំណង់ (គណៈកម្មការទី៩) នៃរដ្ឋសភា និងជាសមាជិកក្រុមរដ្ឋសភាកម្ពុជា នៃសភាវ័យក្មេង (Young Parliamentarians) បានអញ្ជើញចូលរួម សន្និសីទសកលលើកទី១២ នៃសមាជិកសភាវ័យក្មេងរបស់ IPU ក្រោមមូលបទ «ការស្តារឡើងវិញនូវសិទ្ធិមនុស្ស យុត្តិធម៌ និងសេចក្តីថ្លៃថ្នូរសម្រាប់មនុស្សគ្រប់រូបក្នុងសភាពការណ៍ដ៏ច្របូកច្របល់»។ សន្និសីទសកលនេះ សហការរៀបចំឡើងដោយព្រឹទ្ធសភា នៃសាធារណរដ្ឋអ៊ូសបេគីស្ថាន ជាមួយ IPU ពីថ្ងៃទី៤ ដល់ថ្ងៃទី៦ ខែកញ្ញា ឆ្នាំ២០២៦ នៅមជ្ឈមណ្ឌលសន្និសីទ Silk Road Samarkand។ សន្និសីទសកលនេះ មានការចូលរួមពីលោកជំទាវ Tanzila Norbaeva ប្រធានព្រឹទ្ធសភាអ៊ូសបេគីស្ថាន លោកជំទាវបណ្ឌិត Tulia Ackson ប្រធាន IPU ឯកឧត្តម Nuriddinjon Ismailov ប្រធានរដ្ឋសភាអ៊ូសបេគីស្ថាន សមាជិកសភាវ័យក្មេងប្រមាណ ១០០រូប មកពីប្រទេសចំនួន ៥០ និងតំណាងអង្គការអន្តរជាតិ សង្គមស៊ីវិល ព្រមទាំងអង្គការនិងអ្នកជំនាញយុវជន។ សន្និសីទសកលនេះ ជាវេទិកាសម្រាប់សមាជិកសភាវ័យក្មេង ផ្លាស់ប្តូរបទពិសោធ បង្កើនការផ្សាភ្ជាប់ពហុភាគី និងបង្កើតវិធីសាស្រ្តជាក់ស្តែងសំដៅដោះស្រាយបញ្ហាថ្មីៗនៃភូមិសាស្រ្តនយោបាយ។ ឯកឧត្តម រ៉ូហ្វី អូស្មាន បានចូលរួម និងបានចែករំលែកមតិយោបល់យ៉ាងសកម្មនៅក្នុងសម័យប្រជុំទាំង ៦ នៃសន្និសីទសកលនេះ ដោយផ្តោតសំខាន់ពិសេសលើមាគ៌ានិងបទពិសោធរបស់កម្ពុជាក្នុងដំណើរការស្វែងរកសន្តិភាពគ្រប់ជ្រុងជ្រោយ សារៈសំខាន់នៃការរក្សាសន្តិភាពនិងស្ថិរភាព ការរក្សាការពារសិទ្ធិរបស់យុវជនក្នុងអំឡុងពេលមានជម្លោះ និងការកសាងភាពធន់នឹងការប្រែប្រួលអាកាសធាតុ។ សន្និសីទសកលលើកទី១២ នៃសមាជិកសភាវ័យក្មេងរបស់ IPU បានបញ្ចប់ដោយមានការអនុម័តឯកសារលទ្ធផល ដោយអង្គសន្និសីទទាំងមូល និងបានបញ្ជាក់សាជាថ្មីថា សិទ្ធិមនុស្សគឺជាមូលដ្ឋានគ្រឹះនៃការរស់នៅប្រកបដោយសេចក្តីថ្លៃថ្នូរ និងសុខសុវត្ថិភាព។ គោលការណ៍នានាដែលមានចែងក្នុងសេចក្តីប្រកាសសកលស្តីពីសិទ្ធិមនុស្ស និងគោលការណ៍ដែលបានឆ្លុះបញ្ចាំងនៅក្នុងគោលដៅអភិវឌ្ឍន៍ប្រកបដោយចីរភាព (SDGs) កំពុងទទួលរងការប្រឈម ដោយការកើនឡើងនៃជម្លោះ បច្ចេកវិទ្យាថ្មីៗ វិបត្តិបរិស្ថាន ព្រមទាំងភាពមិនប្រាកដប្រជាវិស័យសេដ្ឋកិច្ចនិងនយោបាយ។ ជាលទ្ធផល អង្គសន្និសីទ ក៏បានសម្តែងការប្តេជ្ញាចិត្តឡើងវិញចំពោះសិទ្ធិមនុស្ស ព្រមទាំងរក្សាការទទួលខុសត្រូវរបស់បណ្តាសភាក្នុងការលើកកម្ពស់និងការពារសិទ្ធិមនុស្ស៕ 😍 ភ្ជាប់ទៅកាន់បណ្តាញសង្គមរបស់រដ្ឋសភា៖ 😒Facebook 😏Telegram 😟Instagram 😱 (X) Twitter 😎TikTok 🙁YouTube 🌐 Website

លោកជំទាវ ឡោក ខេង អញ្ជើញចូលរួមនៅក្នុងពិធីសម្ពោធលេខាធិការដ្ឋាន AFPPD ដែលបានដាក់ទីតាំងថ្មីនៅទីក្រុងគូឡាឡាំពួរ ------------------ ក្នុងអំឡុងពេលអញ្ជើញចូលរួមសន្និសីទប្រចាំឆ្នាំ២០២៦ នៃវេទិកាសមាជិកសភាស្តីពីប្រជាជន និងអភិវឌ្ឍន៍ (AFPPD) ចាប់ពីថ្ងៃទី៣-៥ ខែកញ្ញា ឆ្នាំ២០២៦ លោកជំទាវ ឡោក ខេង ប្រធានគណៈកម្មការទី៨នៃរដ្ឋសភា តំណាងឱ្យសមាគមសមាជិកសភាកម្ពុជា CAPPD និងជាអនុប្រធានវេទិកា AFPPD បានអញ្ជើញចូលរួមនៅក្នុងពិធីសម្ពោធជាផ្លូវការនៃលេខាធិការដ្ឋាន AFPPD ដែលបានដាក់ទីតាំងថ្មីនៅទីក្រុងគួឡាឡុំពួរ ប្រទេសម៉ាឡេស៊ី ស្ថិតនៅក្នុងបរិវេណនៃរដ្ឋសភាប្រទេសម៉ាឡេស៊ី ។ ក្នុងពិធីសម្ពោធនេះ លោកជំទាវ បានជូនផ្ទាំងគំនូរប្រាសាទអង្គរវត្ត នៃព្រះរាជាណាចក្រកម្ពុជា ដេីម្បីតម្កល់ទុកនៅលេខាធិការដ្ឋានថ្មី ជាអនុស្សាវរីយ៍ផងដែរ។ សូមបញ្ជាក់ផងដែរថា AFPPD បានចាប់កំណើតឡើងនៅទីក្រុងតូក្យូ ប្រទេសជប៉ុន និងបានដាក់លេខាធិការដ្ឋានដំបូងបង្អស់របស់ខ្លួននៅប្រទេសឥណ្ឌា បន្ទាប់មកនៅប្រទេសថៃ និងបានត្រឡប់ទៅប្រទេសជប៉ុនវិញនៅឆ្នាំ២០១៨។ ដូច្នេះដើម្បីអាចដំណើរការជាអង្គការសភាអន្តរជាតិ និងដើម្បីកុំឱ្យមានការភ័ន្តច្រឡំជាមួយនឹងឈ្មោះ AFPPD Malaysia វេទិកា AFPPD បានកែប្រែឈ្មោះទៅជា AFPPD Global ដែលបច្ចុប្បន្នមានសភាជាសមាជិកនៃវេទិការបស់ខ្លួនចំនួន ៣៣ប្រទេស។ ពិធីសម្ពោធដាក់ឱ្យប្រើប្រាស់លេខាធិការដ្ឋាន AFPPD Global នេះ មានការអញ្ជើញចូលរួមជាអធិបតីភាពដ៏ខ្ពង់ខ្ពស់ ពីប្រធានព្រឹទ្ធសភា និងប្រធានរដ្ឋសភា នៃប្រទេសម៉ាឡេស៊ី ប្រធានAFPPD Global ប្រធានសមាគមអាស៊ីស្តីពីប្រជាជន និងអភិវឌ្ឍន៍(APDA)នៃប្រទេសជប៉ុន សមាជិកសភាអញ្ជើញមកពីប្រទេសក្នុងតំបន់អាស៊ាន អាស៊ីកណ្តាល អាស៊ីខាងត្បូង អាហ្រ្វិក អាស៊ីប៉ាស៊ីហ្វិក និងរដ្ឋមន្រ្តីសំខាន់ៗនៃប្រទេសម៉ាឡេស៊ី។ គួរឱ្យកត់សម្គាល់ផងដែរថា ការដាក់ទីតាំងរបស់ AFPPD នៅក្នុងតំបន់អាស៊ានបង្ហាញពីការប្តេជ្ញាចិត្តខ្ពស់របស់វេទិកានេះ ក្នុងការពង្រឹងភាពជាដៃគូជាមួយបណ្តាប្រទេសក្នុងតំបន់អាស៊ី និងប៉ាស៊ីហ្វិកឱ្យកាន់តែប្រសើរថែមមួយកម្រិតទៀត ជាមួយនឹងបេសកកម្មច្បាស់លាស់ឆ្លើយតបទៅនឹងបញ្ហាប្រជាជន និងអភិវឌ្ឍន៍នៅក្នុងតំបន់ឱ្យកាន់តែមានប្រសិទ្ធិភាព ប្រកបដោយបរិយាបន្ន និងនិរន្តភាព។ ពិធីសម្ពោធលេខាធិការដ្ឋានថ្មីនេះ ក៏មានការដាំដើមឈើដើម្បីជានិមិត្តរូបនៃភាពរឹងមាំរបស់លេខាធិការដ្ឋាន AFPPD Global ព្រមទាំងជាសក្ខីភាពនៃការខិតខំពូនជ្រំសាមគ្គីភាព និងកិច្ចសហប្រតិបត្តិការនៃបណ្តាប្រទសជាសមាជិកផងដែរ៕ 😍 ភ្ជាប់ទៅកាន់បណ្តាញសង្គមរបស់រដ្ឋសភា៖ 😒Facebook 😏Telegram 😟Instagram 😱 (X) Twitter 😎TikTok 🙁YouTube 🌐 Website

ឯកឧត្តម វ៉ាន់ ដារ៉ា សំណេះសំណាល និងចែកអំណោយជូនប្រជាពលរដ្ឋមានជីវភាពខ្វះខាត នៅខេត្តកំពត -------------- ខេត្តកំពត៖ ឯកឧត្តម វ៉ាន់ ដារ៉ា តំណាងរាស្ត្រមណ្ឌលខេត្តកំពត និងជាសមាជិកគណៈកម្មការទី៣ នៃរដ្ឋសភា នាថ្ងៃទី៥ ខែកញ្ញា ឆ្នាំ២០២៦ បានអញ្ជើញចុះជួបសំណេះសំណាល សួរសុខទុក្ខ និងស្វែងយល់ពីស្ថានភាពជីវភាពរស់នៅរបស់ប្រជាពលរដ្ឋដែលមានជីវភាពខ្វះខាតចំនួន១៤ គ្រួសារ នៅឃុំបានៀវ ស្រុកឈូក ខេត្តកំពត។ ក្នុងឱកាសនោះ ឯកឧត្តមបាន នាំយកអំណោយមនុស្សធម៌ជាស្បៀង សម្ភារ និងថវិកា ចែកជូនប្រជាពលរដ្ឋទាំង ១៤គ្រួសារ ដើម្បីចូលរួមសម្រាលការលំបាក និងជួយដល់ជីវភាពរស់នៅប្រចាំថ្ងៃ។ អំណោយសប្បុរសធម៌នេះ រួមមាន អង្ករ មី ទឹកត្រី ទឹកស៊ីអ៊ីវ ប៊ីចេង ត្រីខ អំបិល ក្រមា សារុង និងថវិកាមួយចំនួន។ ជាមួយគ្នានេះ ឯកឧត្តមក៏បានឧបត្ថម្ភថវិកាចំនួន ៥០ម៉ឺនរៀល ដល់សាលាបឋមសិក្សាឧត្តមសេរីរដ្ឋ ដើម្បីចូលរួមគាំទ្រដល់ការងារអប់រំ និងការអភិវឌ្ឍសាលារៀននៅមូលដ្ឋាន។ ការចុះជួបសំណេះសំណាល និងផ្តល់អំណោយមនុស្សធម៌នេះ បានបង្ហាញពីការយកចិត្តទុកដាក់ ចំពោះសុខទុក្ខនិងជីវភាព រស់នៅរបស់ប្រជាពលរដ្ឋ ព្រមទាំងជាការចូលរួមលើកកម្ពស់ស្មារតី ចែករំលែក និងជួយគ្នាទៅវិញទៅមកក្នុងសង្គម៕ 😍 ភ្ជាប់ទៅកាន់បណ្តាញសង្គមរបស់រដ្ឋសភា៖ 😒Facebook 😏Telegram 😟Instagram 😱 (X) Twitter 😎TikTok 🙁YouTube 🌐 Website

តំណាងរាស្ត្រមណ្ឌលខេត្តស្វាយរៀង អញ្ជើញចុះសួរសុខទុក្ខ និងនាំយកអំណោយចែកជូនចាស់ជរា នៅស្រុកកំពង់រោទិ៍ -------------------- ខេត្តស្វាយរៀង៖ តំណាងរាស្ត្រមណ្ឌលខេត្តស្វាយរៀង រួមមាន ឯកឧត្តមបណ្ឌិត សម តារា អនុប្រធានគណៈកម្មការទី១ នៃរដ្ឋសភា និងឯកឧត្តមបណ្ឌិត ជ័យ សុន សមាជិកគណៈកម្មការទី១០ នៃរដ្ឋសភា នាថ្ងៃទី៥ ខែកញ្ញា ឆ្នាំ២០២៦ បានអញ្ជើញចុះជួបសំណេះសំណាល សួរសុខទុក្ខ និងនាំយកអំណោយចែកជូនលោកយាយ លោកតាចាស់ជរា ចំនួន ៦នាក់ នៅភូមិរោទិ៍ ឃុំញរ ស្រុកកំពង់រោទិ៍ ខេត្តស្វាយរៀង។ ទន្ទឹមគ្នានោះដែរ ឯកឧត្តមបណ្ឌិត សម តារា និងឯកឧត្តមបណ្ឌិត ជ័យ សុន បាននាំនូវប្រសាសន៍ផ្ដាំផ្ញើសួរសុខទុក្ខពីសំណាក់ សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទី នៃព្រះរាជាណាចក្រកម្ពុជា សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា ដែលជានិច្ចកាលតែងតែយកចិត្តទុកដាក់ខ្ពស់ចំពោះសុខទុក្ខរបស់ប្រជាពលរដ្ឋ និងបានខិតខំប្រឹងប្រែងដឹកនាំកសាង អភិវឌ្ឍន៍ប្រទេសជាតិឱ្យកាន់តែមានភាពរុងរឿង ព្រមទាំងថែរក្សាសន្តិភាពពេញលេញជូនប្រជាជាតិទាំងមូល។ ក្នុងឱកាសនោះ តំណាងរាស្ត្រមណ្ឌលខេត្តស្វាយរៀង បាននាំយកទៅចែកជូនរួមមាន គ្រឿងឧបភោគ-បរិភោគ និងថវិកាសរុបចំនួន ១.៦០០.០០០រៀល ដោយក្នុងនោះ ថវិការបស់ឯកឧត្តមបណ្ឌិត សម តារា ចំនួន ៨០០.០០០រៀល និងថវិការបស់ឯកឧត្តមបណ្ឌិត ជ័យ សុន ចំនួន ៨០០.០០០រៀល ដើម្បជួយសម្រួលដល់ជីវភាពរស់នៅប្រចាំថ្ងៃរបស់លោកយាយ លោកតា៕ 😍 ភ្ជាប់ទៅកាន់បណ្តាញសង្គមរបស់រដ្ឋសភា៖ 😒Facebook 😏Telegram 😟Instagram 😱 (X) Twitter 😎TikTok 🙁YouTube 🌐 Website

ឯកឧត្តម គិត ទ្រី អញ្ជើញចុះពិនិត្យស្ថានភាពទឹកទន្លេស្រែពក ដែលកំពុងជន់ឡើងខ្លាំង -------------- ខេត្តរតនគិរី៖ ឯកឧត្តម គិត ទ្រី សមាជិកគណៈកម្មការសិទ្ធិមនុស្សទទួលពាក្យបណ្តឹង និងអង្កេត និងអធិការកិច្ច (គណៈកម្មការទី១) នៃរដ្ឋសភានិងជាតំណាងរាស្ត្រមណ្ឌលខេត្តរតនគិរី នារសៀល ថ្ងៃទី០៤ ខែកញ្ញា ឆ្នាំ២០២៦ បានអញ្ជើញចុះពិនិត្យ ស្ថានភាពទឹកទន្លេស្រែពក ដែលកំពុងជន់ឡើងខ្លាំង ដោយគិតចាប់ពីម៉ោង ៦ព្រឹកមកដល់ម៉ោង ៤រសៀលនេះ កម្ពស់ទឹកបានឡើងដល់ ០,៨ម៉ែត្រ។ ការចុះពិនិត្យស្ថានភាពទឹកទន្លេស្រែពកនេះ អមដំណើរដោយ លោក ស៊ន ពលមេបញ្ជាការរងតំបន់ប្រតិបត្តិការសឹករងខេត្ត លោក ចាន់ សារិន មេបញ្ជាការរងកងរាជអាវុធហត្ថខេត្ត លោក មាស ពៅបូរ៉ា ស្នងការរងខេត្ត និងលោកអភិបាលស្រុកលំផាត់ ព្រមទាំងមន្ត្រីសាលាស្រុកលំផាត់។ ឆ្លៀតក្នុងឱកាសនោះដែរ ឯកឧត្តមក៏បានពិភាក្សាជាមួយអាជ្ញាធរស្រុក ដើម្បីត្រៀមខ្លួនក្នុងការដោះស្រាយបញ្ហាផ្សេងៗជូនប្រជាពលរដ្ឋមូលដ្ឋាន នៅពេលមានហានិភ័យកើតឡើងជាយថាហេតុណាមួយ។ ជាមួយគ្នានេះឯកឧត្តម ក៏បានអំពាវនាវឱ្យប្រជាពលរដ្ឋមានស្មារតីប្រុងប្រយ័ត្នខ្ពស់។ ក្នុងថ្ងៃជាមួយគ្នានេះដែរ ឯកឧត្តម គិត ទ្រី ក៏បានអញ្ជើញចូលរួមពិធី បុណ្យ ៧ថ្ងៃ របស់អតីតយុទ្ធជន នៅក្នុងឃុំជ័យឧត្តម ស្រុកលំផាត់ ខេត្តរតនគិរី ផងដែរ៕ 😍 ភ្ជាប់ទៅកាន់បណ្តាញសង្គមរបស់រដ្ឋសភា៖ 😒Facebook 😏Telegram 😟Instagram 😱 (X) Twitter 😎TikTok 🙁YouTube 🌐 Website

គណៈប្រតិភូរដ្ឋសភាកម្ពុជា ចូលរួមវេទិកាអភិវឌ្ឍន៍ថាមពលកាបូនទាបតៃយាន ឆ្នាំ២០២៦ នៅខេត្តសានស៊ី ប្រទេសចិន) ------------------ ខេត្តសានស៊ី-ប្រទេសចិន៖ គណៈប្រតិភូរដ្ឋសភាកម្ពុជា ដឹកនាំដោយ ឯកឧត្តមសន្តិបណ្ឌិត ឡូយ សុផាត ប្រធានគណៈកម្មការផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹក (គណៈកម្មការទី៣) នៃរដ្ឋសភា រួមដំណើរដោយ ឯកឧត្តម លន់ លឹមថៃ, ឯកឧត្តម ជាម ប៉េអា, ឯកឧត្តម ឃុត ចាន់ដារ៉ា និងឯកឧត្តម ឃឹង នុភាព នៅថ្ងៃទី៤ ខែកញ្ញា ឆ្នាំ២០២៦ បានអញ្ជើញចូលរួមពិធីបើក «វេទិកាអភិវឌ្ឍន៍ថាមពលកាបូនទាបតៃយាន ឆ្នាំ២០២៦» ដែលរៀបចំឡើងនៅមជ្ឈមណ្ឌលសន្និសីទអន្តរជាតិ Shanxi Xiaohe ខេត្តសានស៊ី សាធារណរដ្ឋប្រជាមានិតចិន។ វេទិកាអន្តរជាតិនាឆ្នាំនេះ ប្រារព្ធធ្វើឡើងក្រោមប្រធានបទ «គោលដៅកាបូនទាប ក្នុងការអភិវឌ្ឍថាមពលប្រកបដោយនវានុវត្តន៍ ដើម្បីអនាគតបៃតង» ដោយមានការអញ្ជើញចូលរួមពីប្រតិភូតំណាងប្រទេសចំនួន ២៨ សរុបប្រមាណ ៥០០ នាក់។ ព្រឹត្តិការណ៍នេះមានសារៈសំខាន់ជាពិសេស ដោយស្របពេលនឹងឆ្នាំដំបូងនៃការអនុវត្តផែនការអភិវឌ្ឍន៍រយៈពេល ៥ឆ្នាំ លើកទី១៥ របស់ប្រទេសចិន និងជាខួបលើកទី១០ នៃការបង្កើតវេទិកាតៃយាននេះឡើង។ បច្ចុប្បន្ន វេទិកានេះបានក្លាយជាយន្តការអន្តរជាតិកម្រិតខ្ពស់មួយ សម្រាប់ការផ្លាស់ប្តូរទស្សនៈ ចែករំលែកបទពិសោធន៍ និងលើកកម្ពស់កិច្ចសហប្រតិបត្តិការលើការអភិវឌ្ឍថាមពលកាបូនទាប និងនវានុវត្តន៍បច្ចេកវិទ្យា។ វត្តមានរបស់គណៈប្រតិភូរដ្ឋសភាកម្ពុជាក្នុងវេទិកានេះ គឺដើម្បីចូលរួមផ្លាស់ប្តូរបទពិសោធន៍ ព្រមទាំងសិក្សាស្វែងយល់ពីគោលនយោបាយ និងបច្ចេកវិទ្យាថ្មីៗពីបណ្តាប្រទេសចូលរួម សំដៅពង្រឹងកិច្ចសហប្រតិបត្តិការអន្តរជាតិ ក្នុងការជំរុញការអភិវឌ្ឍថាមពលបៃតង និងកាត់បន្ថយការបញ្ចេញឧស្ម័នកាបូន ឆ្ពោះទៅរកការអភិវឌ្ឍប្រកបដោយចីរភាព។ បន្ទាប់មក នារសៀលថ្ងៃដដែល គណៈប្រតិភូក៏បានបន្តដំណើរទស្សនកិច្ចនៅ ពិព័រណ៌ឧស្សាហកម្មថាមពលអន្តរជាតិចិន (តៃយាន)។ ក្នុងឱកាសនោះ គណៈប្រតិភូបានផ្តោតការយកចិត្តទុកដាក់ និងផ្លាស់ប្តូរយោបល់លើវិស័យសំខាន់ៗមួយចំនួន រួមមាន៖ វិស័យថាមពល រ៉ែ ប្រព័ន្ធស្វ័យប្រវត្តិកម្ម (Robotics) ការផលិតឆ្លាតវៃ ថាមពលកកើតឡើងវិញ បញ្ញាសិប្បនិម្មិត (AI) និងគម្រោងសហប្រតិបត្តិការឧស្សាហកម្ម ដើម្បីសិក្សាពីសមិទ្ធផល បទពិសោធន៍ជោគជ័យ និងការរីកចម្រើននៃវិស័យថាមពល បច្ចេកវិទ្យា និងកសិកម្មរបស់ប្រទេសចិន៕ 😍 ភ្ជាប់ទៅកាន់បណ្តាញសង្គមរបស់រដ្ឋសភា៖ 😒Facebook 😏Telegram 😟Instagram 😱 (X) Twitter 😎TikTok 🙁YouTube 🌐 Website